Luk 12
12
Chisʋs ʋt nan‐im ai ithʋna ʋhleha ha̱ nana ka peh ilahoba he imma hokʋno ahah! okla ahna chi̱ ka i̱ miha, 1; 13 yohmi mʋt nan im ai ithʋna ʋhleha hʋt chu̱kʋsh a̱ nan ilaiyuka isht ik asitio ka chi̱ ka, hatak nan in laua yosh nana ai isht ilaiyukpʋt ahanta tuk o̱, nan illi hʋt ashali̱ka a mokofit ishi tok, nan isht ʋlhpisa ha̱ isht im anumpuli. 22 Chisʋs ʋt nan im ai ithʋna ʋhleha ha̱ yakni paknaka nana a kaniohmi puta hokʋno chu̱kʋsh isht ik anushkunno ka hi a̱ i̱ miha; 31 micha hatak shilombish okcha̱ya he ak o̱ na tikba anukfihinli; 36 yohmikmʋt Chitokaka yʋt a̱ya hi a̱, tikbanli im ʋlhtaha he puta ka isht im anumpuli. 54 Chisʋs ʋt okla ha̱, ilap ak osh Klaist mak atuk a̱ ik akostinincho ka, nan isht i̱ miha; yohmi mʋt Chihowa ha̱ iti̱ nanaiya pulla hi a̱ i miha.
1Yʋmohmi ai itin takla ma, okla laua kʋt atampa fehna hosh itʋnaha, yʋmohmi cha ilap bi̱ka okla it i hʋhlihinchi ma, yʋmmak ash ot nan im ai ithʋna ʋhleha hash, Falisi ʋhleha i̱ pʋska isht shatʋmmi, yʋmmʋt nan‐ilahobi yak oka, ik kaniohmi kia ahah! hʋsh aiahnashke.
2Nana kʋt ompoholmo tuk ʋt ik wakamo ka he, mikma nana kʋt luma tuk ʋt ik otaiyano ka he aiena kʋt iksho ka hi oke.
3Yʋmohmi hoka nana ho̱ aiokhlilika ya̱ hʋsh ai anumpohonli tuk ma, a tohwikeli yo̱ a hakla he; mikmʋt haksobish ont tikelichit abohushi anu̱kaka yo̱ hʋsh ai anumpohonli tok ma, aboha paknaka puta ma ai annoa hi oke.
4Yohmi ka a̱ ka̱na hʋchia ma! Haknip a̱ ʋbi kia, himmakma nana ho̱ a kaniohma he mʋt ik im iksho yʋmmak okʋno hʋch ik i̱ nukshopo kashke, hʋchim achi lishke.
5Amba kʋna ho̱ hʋsh i̱ nukshopa he okʋno hʋchim anoli lashke; Illichi ha mʋt, ai‐okpuloka ya̱ pit kancha hi ʋt im ʋlhpiesa yʋmmak o̱ hʋsh i̱ nukshopashke; a̱hli, Yʋmmak o̱ hʋsh i̱ nukshohompashke, hʋchim achi lishke.
6Hushi chipunta tahlapi kʋt sint tuchina ho̱ ai ʋlbi chatuk keyu̱? Yohmi kʋt yʋmmak okʋt achʋfona kia Chihowa itikba ya̱ ai a haksi keyu chatuk oke.
7Yohmi ka hʋchishno hʋchi̱ pa̱shi puta noshkobo ai o̱ hieli kak kia moyumʋt holhtinʋt taha yoke. Yohmi hoka ik hʋchi nukshopo kashke; holitopa kʋt hushi chipunta laua ka hʋsh i̱ shahli hoke.
8Kʋna hosh ʋno a̱ hatak itikba ya̱ Klaist oke, si achit si ahninchi tuk ma, mihi yo̱ Hatak Ushi ʋt Chihowa im enchil puta itikba ai ahninchit, Ʋm antia yoke, achit aiokpʋcha he akinli hoke.
9Amba kʋna hosh hatak puta itikba ʋno a̱ ik si ahniechot, Ahalaia li keyu, achi tuk ak o̱, mihi yo̱ Chihowa im enchil itikba ya ik ahniechot ik ahalaiyo ka hi oke.
10Mikma kʋna hosh Hatak Ushi a na mihachit anumpuli tuk okʋto, i̱ kashofa he; amba kʋna hosh Shilombish Holitopa ak o̱ ik ahobalot anumpuli tuk okʋto, i̱ kashofa he keyu kʋmohmi hoke.
11Micha sinakak puta, mikmʋt mi̱ko ʋhleha, mikmʋt nan apesa puta ka hʋch isht im ai onakma, kaniohmi hosh, micha afalaminchit nana ka hʋsh anumpula he aiena kʋt hʋch ik anukfillo kashke.
12Nana ho̱ hʋsh acha he ʋlhpesa ka Shilombish Holitopa ak osh hʋshi kanʋlli yʋmmak fehna akinli ka hʋchim anola hi oke, hʋchim achi lishke, im achi tok.
13Mihma okla hash ot achʋfʋt, Nan‐ithʋnanchi ma! itibapishi li ha̱ ish i̱ miha na, nana kʋt ʋlhtoshowʋt pibbak a̱ pi̱ fohka tuk a̱ a̱ kashʋblashke, im achi tok.
14Mihma yʋmmak ash o̱, Hatak chia ha̱, kʋta hosh nana hʋchim apesa yokmá, keyukmʋt nana hʋchi itakʋshkoli yokmá, nanta ho̱ sakbi tok oh cho? im achi tok.
15Mihmʋt, Ahah! hʋsh aiahni cha, nan in laua bʋnna ya̱ hʋch ik ahalaiyo kashke: hatak ʋt nana kʋt laua ho̱ il aieshi kak o̱ im ilhfiopak ʋt takali ho̱ keyu hoke, im achi tok.
16Mihmʋt okla hash nan‐isht ʋlhpisa ho̱ isht im anumpulit, Hatak nan in laua achʋfa hosh im osapa yʋt nana waya fehna tok.
17Mihmʋt, Nana a̱ waya puta ka kanima ai ashachi la hi ʋt ik sʋm iksho kʋto, nanta ak o̱ katiohmi la chi̱ cho? achit il anukfilli tok.
18Mihmʋt, Ilʋppak o̱ yakohmi lashke; an tanchi in chuka yak o̱ yuhli lish, chito i̱ shahli ho̱ ikbi lashke: micha yʋmmak o̱ a̱ nan a waya, micha na hochukma puta ka mominchit ashachi lashke.
19Mikmʋt sa shilombish a̱, Sa shilombish ma! na hochukma laua kʋt afʋmmi la̱ua taha he ʋlhpesa ka achukmalit ashachit chin tahlishke; peh nan ik pilesot fohʋt, impʋt, nan‐ishkot, nan isht ish ilaiyukpashke, im achi lashke, achi tok.
20Yohmi kia Chihowa yokʋto yʋmmak ash, Ik hopoyukso chia ma! chi shilombish a̱ falaminchit himak ninak a̱ chim a hoya chi̱ hoke; yohmikmʋno nana ish atahli tuk amo kʋta ho̱ immi ha chi̱ cho? im achi tok.
21Yohmi ka kʋna hosh na hochukma puta ma ilap inli isht im atahlit ahanta hosh, anonti Chihowa ai imma hokʋno nana kʋt im ʋlhtaiyaha tuk keyu kʋt yʋmmak o̱ chiyuhmi hoke, achi tok.
22Mihmʋt nan im ai ithʋna ʋhleha hash, Yʋmohmi hoka hʋchi ai okcha̱ya hi a̱ nana ho̱ hʋsh pa he; mikmʋt hʋchi haknip ma nana ho̱ hʋsh fohka hi a̱ anukfillit hʋch ik ilbʋsho kashke, hʋchim achi lishke.
23Okcha̱ya kʋt holitopa kʋt ilhpak a̱ i̱ shahlikma, anonti haknip ʋt holitopa kʋt na fohka ya̱ i̱ shahli hoke.
24Fʋla chito puta ka anukfillit ho pesá: yʋmmak okʋt nana kia hokchi cha ʋmo ho̱ keyu: mikmʋt yʋmmak okʋt ʋlhpoyak in chuka, micha kanchak aiena kia im a̱sha keyu ho̱, Chihowa ak osh ipeta hoke. Holitopa kʋto hushi puta ka katiohmit isht hʋsh i̱ shahli ho̱?
25Yohmi ka hʋsh katima kak osh anukfihinlit isht ilbʋsha kʋt hʋchi chaha ka kubit achʋfa kia hʋsh il achakala hinla cho?
26Nana kʋt moma ik a lauwo hoka hʋsh yʋmihcha he keyu kʋt, nanta katiohmi ho̱ inla yokak heno anukfillit hʋsh pisa cho?
27Lilli puta kʋt kaniohmit offot hofantit ma̱ha̱ya ka anukfillit ho pesá; yʋmmak okʋt toksʋlit a hoyubli keyu: anonti nana ho̱ shʋnni keyushke: yohmi kia Solomon ʋt nan isht im a holitopa moma isht a shema kʋt ilʋppa achʋfona kia chohmi tok keyu, hʋchim achi lishke.
28Yohmi ka Chihowa hʋt hʋshuk himak nitak a̱ kowi ha̱ hiohma̱ya tuk osh, onna ha̱ apalʋska pit ʋlhpita chi̱ kia, shemʋchi kʋt yʋmihchi kʋto, hʋchishno a̱ i̱ shahlichi hosh ik hʋchi shemacho ka hinla cho? na yimmi fehna keyu hʋchia ma!
29Yohmi hoka nana hʋsh impa he, mikmʋt nana hʋsh ishka he aiena kʋt hʋch ik hoyo kashke; mikmʋt komuntʋt ik hʋchim anukfilo kashke.
30Ilʋppa chohmi puta kak o̱ oklushi yakni paknaka aiasha kʋt hoyo chatuk mak oke: ilʋppa chohmi puta ka a hʋchi bʋnna hokʋno hʋch I̱ki ʋt ithana hoke.
31Yohmi kia amba Chihowa apehlichika yak o̱ hʋsh hoyashke; mikmʋno ilʋppa moyuma kʋt a hʋchim ibakaha hi oke.
32Apehlichika ya̱ hʋch ima kʋt im achukma hoka, chukfʋlhpoba a̱ya ik lauwo hʋchia mʋt, ik hʋchi nukshopo kashke.
33Na hʋchim a̱sha kʋt hʋsh kanchi cha, ilbʋsha ya̱ hʋsh habenʋchashke: tʋli holisso i̱ shukcha yʋmmak okʋt nitak nana ont a sipokna he keyu, na‐holitompa nitak nana taiyaha he keyu ʋt ʋba itonla; hu̱kopa nana hosh ai̱ i̱ bilincha he keyu, mikma shu̱shi mʋt okpʋna he keyu, yak o̱ isht hʋsh il atahlashke.
34Kanima yo̱ hʋchim ilayak ʋt itonla hokma, hʋchi chu̱kʋsh ak kia mihi yo̱ pit takanla hinla akinli hoka.
35Il ai‐ʋskufʋchi ma isht il ai ʋskufʋchit im ʋlhtahʋt, pʋla puta mʋt hʋchin lihimbashke.
36Yohmikmʋt hʋchishno ak kia hatak osh i̱ shahli hʋt ohoyo ipetʋchi ia tuk osh falamʋt ʋla chi̱, atuk osh ʋla cha soko̱hakma, ashali̱ka in tiwa chi̱ cha, pit hoyo hosh aiasha ho̱ hʋsh chiyuhmashke.
37Chitokaka yʋt a̱yʋt ʋlʋt, o̱kchʋt a̱sha na ont pisa ka, tishu ʋhleha yʋmmʋt na‐yukpa mak oke: a̱hli mak o̱ hʋchim achi lishke, Ilap ash osh nan isht il ai ʋskufʋchit tahli cha, yʋmmak osh impa chi̱ ka binohlichikmʋt, wakayʋt nan isht im ʋtta hi oke.
38Micha ninak kashapa ont atukla ho̱ a̱yakmá, keyukmʋt ont atuchina ho̱ ayakmá, nana cha yʋmohmit aiasha ho̱ ont pisa ka, tishu ʋhleha yʋmmʋt nayukpa hi oke.
39Hatak chuka chʋfa pehlichi ʋt in chuka ahanta kʋt hʋshi kanʋlli ʋlhpisa kaniohmi kak o̱ hu̱kopa yʋt ʋla hi a̱ akostininchi hokmʋt, ato̱ni tuk osh in chuka yʋt okpulot ik in tiwo ka hetuk a̱, ilʋppa hʋsh ithaiyanashke.
40Yohmi hoka hʋchishno mʋt, hʋchim ʋlhtahashke: yʋmmak a he hʋch ik aiahno hʋshi kanʋlli ʋlhpisa takla kia Hatak Ushi ʋt ʋla hi oke.
41Mihma Pita yash ot, Chitokaka ma! nan‐isht‐ʋlhpisa ilʋppa pishno ak okmá, keyukmʋt peh moma kak o̱ isht ish im anumpulikmá, nanta cho? im achi tok.
42Mihma, Yohmi kʋno kʋta hak osh nan‐apesʋchi aia̱hli, mikmʋt hopoyuksa achukma aiena tuk o̱, mihi yo̱ i̱ shahli hʋt ont ai‐ʋlhpiesakma nan‐ʋpa hʋt ai immi ha he ʋlhpesa ka, ipihinta chi̱ ka, ilap in chuka chʋfa yash pehlichi ikba chi̱ cho?
43I̱ shahli hʋt a̱yʋt ʋla kʋt, yakohmi hosh ahanta na ant pisa ka, tishu yʋmmʋt na yukpa mak oke.
44A̱hli mak o̱ hʋchim achi lishke: Nana im a̱sha ka moma apesʋchi o̱ ikba hi oke.
45Yohmi tuk kia tishu yʋmmak ash osh chu̱kʋsh anu̱kaka, A̱ shahli hʋt ai ʋla he tuk ʋt ʋbanʋblichishke, achi cha, hatak toksʋli puta, micha ohoyo toksʋli puta aiena kash bolit, impʋt, nan‐ishkot, okishkot haksi aiena hosh ahanta tok mʋno;
46Tishu yʋmma i̱ shahli hash ot ilapʋt yʋmma pit hoyo nitak keyu, micha ik akostinincho ai itin takla hʋshi kanʋlli ʋlhpisa fehna ho̱ a̱yʋt ʋla cha, chanlit ita hokofit, nan ik yimmo ʋhleha yak o̱ ai iba foyuka chi̱ ka im apesa hi oke.
47Yohmikma i̱ shahli nan ahni tuk a̱ akostininchi hosh, ik il atahlokmʋt, nan‐ahni tuk ash kia yʋmihchi keyu ke tuk tishu yʋmmak ash ot fahama la̱wa isht boa hi oke.
48Amba ik akostinincho hosh nana ka isht a fʋma he ʋlhpesa ka yʋmohmi hokmʋto, fahama ik lauwo ho̱ isht fʋma hi oke: kʋna ho̱ lauachit ima tok ma, mihi yo̱ laua ho̱ im a hoya hi oke: micha kanima ho̱ hatak ʋt lauachit ibbak fohki tuk ma, mihi yo̱ laua i̱ shahli ho̱ im a hoya hi oke.
49Yakni paknaka ya̱ luak o̱ ai yo̱ bohyuli la chi̱ hosh a̱ya li tok: atuk osh himonasi ak o̱ lua hatuk bano, nana ka ai ahni lishke.
50Yohmi kia baptismo isht a baptismo la chi̱ kʋt ʋm a̱sha: yohmi ka yʋmmʋt ont ai yʋmohma chi̱ ta̱kla hokʋno a̱ palʋmmi fehnʋshke.
51Yakni paknaka ya̱ a nanaiyʋcha chi̱ hosh a̱ya li tok o̱, hʋchim ahoba cho? Keyushke; ita kʋshkoli kak illa hoke, hʋchim achi lishke.
52Himak pilla ma chuka chʋfa ka tahlapit a̱shʋt it a kashapa cha, tuchina kʋt tuklo ka i sanalikma, anonti tuklo kʋt tuchina ka i̱ sanala hi oke.
53It i kanimachi cha, i̱ki ʋt ushi a̱ i̱ sanalikma, anonti ushi atuk ʋt i̱ki a̱ i̱ sanalikma; ishki ʋt ushetik a̱ i̱ sanalikma, anonti ushetik atuk ʋt ishki a̱ i̱ sanalikma, anonti ipokni ʋt ipok a̱ i̱ sanalikma, ipok atuk ʋt ipokni a̱ i̱ sanala hi oke, achi tok.
54Mihmʋt anonti okla hash, Hʋshi ai‐okʋtulaka hoshontit kocha na hʋsh pisakmʋt, ashali̱ka, Umbʋt mihintishke, hʋsh achi chatuk; atukma yohmi mʋhli chatuk.
55Micha oka‐mahli hosh mahlikma, Lʋshpa chishke, hʋsh achi chatuk; atuk ma ont yʋmohmi chatuk oke.
56Nan ilahobi hʋchia hoka, shutik, micha yakni aiena kʋt pisa kaniohmi hokʋno nan isht hʋsh ai akostininchi hokak osh, amba katiohmi ho̱ himak okʋno nana ka hʋch ik akostinincho cho?
57A̱hli, micha nanta katiohmi ho̱ hʋchishno akinli kʋt nana ʋlhpesa kʋno hʋch ik ithano cho?
58Nan‐ʋlhpisa chi onochi ya̱ awant mi̱ko ish im ona chi̱ hosh ish a̱ya kʋt, takla ya̱, ai i̱ hlakofi bʋnna kʋt ish achunanchashke: yʋmmak keyukma chi halʋllit nan‐apesa ya̱ isht chi ai onakma, anonti nan apesa yash ot tishu ha̱ ibbak a̱ a chi fohki na tishu hash ot aboha kʋllo ya̱ chi foh ka hinla hoke.
59Iskʋli ont isht aiyopi fehna ka ish atobbi ho̱ keyukmʋt, yʋmmak oka ish kohcha he keyu hoke, chim achi lishke, achi tok.
Поточний вибір:
Luk 12: CHH
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Published by the American Bible Society 1848-1886, reprinted 1913
