Luk 11
11
Chisʋs ʋt nan im ai ithʋna ʋhleha ha̱ ʋba pit anumpuli im abʋchi, 1, 14 nan‐isht ahullo okpulo kohchichi: 28 mikmʋt kʋna hosh Chihowa im anumpa ha̱ im antia hokʋto holitopa ka anoli; 37 Falisi okla nana ka ilahobi, yʋmmak oka nana palʋmmi onʋtula he puta ka atokowa anoli.
1Atuk o̱ yakohmi tok: a kaniohmi ho̱ antʋt ʋba pit anumpuli tuk osh ont issa ma, nan im ai ithʋna ʋhleha ha̱ achʋfʋt, Chitokaka ma! Chan ʋt nan im ai ithʋna ʋhleha ha̱ im abʋchi tok a̱, chohmit pishno ma ʋba pit anumpuli ka, ish pim abʋchashke, im achi tok.
2Mihma yʋmmak ash ot, Ʋba pit hʋsh anumpulikmʋt, Pi̱ki ʋba ish binili ma! Chi hohchifo hʋt holitopashke. Ish apehlichika yʋt ʋlashke. Nana ish aiahni ka ʋba ya̱ a yohmi kʋt yakni ilʋppak ma a yohmi makinlashke.
3Nitak moma ilhpak ʋt a pim ʋlhpiesa mak o̱ nitak osh nitak ma ish pihi̱mashke.
4Mikmʋt il ai‐ashʋchika puta ka ish pi̱ kashofashke: pishno mʋt kʋna kia aheka pin takalikma, il i̱ kashofi bano hoke: micha anukpʋlika imma hokʋno ik iba chukowá, chik pim ahno kashke; amba nanokpulo ya̱ ish pi a hlakofihinchashke, hʋsh achashke, im achi tok.
5-6Mihmʋt yʋmmak ash ot, Hʋsh katima kak osh chi̱ kana hʋt a̱sha tuk osh, ninak iklʋnna ho̱ a̱yʋt ish onʋt, A̱ kana hʋt nowʋt a̱ya tuk osh ʋm ʋla ho̱, nana kia itikba ma talali la hi ʋt ik sʋm iksho hoka, pʋska tuchina ka is sam potashke, a̱ kana ma! ish im achi;
7Yohmikma aboha anu̱kaka ya̱ auet ai afalaminchi kʋt, Chik sʋm ahchibalo kia, himak ano okhissa ʋt ʋlhkama ho̱, ʋm ʋlla ʋt si api̱hʋt topa ha̱ kahʋt ma̱ya ka, tani lish chima la he keyushke, auet chim achi;
8Yohmi tuk kia i̱ kana hatuk ak osh tani cha, ipeta he tuk keyu kia, amba yʋmmak ash osh im ahchibʋchi fehna kak o̱ tani cha, laua kʋt kaniohmi ho̱ bʋnnakma, ima hinla hoke, hʋchim achi lishke.
9Yohmi ka hʋsh asilhhakma, hʋch ima he: hʋsh hoyokmʋt, hʋsh ahayucha he: hʋsh soko̱hakma, hʋchin tiwa hi oke.
10Asi̱lhha aiyuka hokʋto habena hoke; mikma kʋna hosh hoyo hokʋto, ahayuchi hoke: micha kʋna hosh soko̱hakma, in tiwa pulla hi oke, hʋchim achi lishke.
11Hʋsh kanima kʋt i̱ki atuk o̱, ushi ʋt pʋska im asilhhakma, yʋmmak ash tʋli yo̱ ima hinla̱? keyukmʋt nʋni yo̱ asilhhakma, nʋni a he tuk ash sinti yo̱ ima hinla ho̱?
12Yʋmmak keyukmʋt, aka̱k‐ushi lobunchi yo̱ asilhhakma, halambia ho̱ ima hinla ho̱?
13Yʋmohmi ka hʋchishno ʋt hʋchi ai ʋlhpesa keyu kia, hʋchim ʋlla ya̱ nana achukma puta ka isht ima hokʋto hʋchimponna ka, hʋch I̱ki ʋba binili kʋt i̱ shaiyahlit, kʋna hosh im asilhhakma, Shilombish Holitopa ya̱ ima hinla keyu cho? im achi tok.
14Mihma yʋmmak ash ot ik anumpulo yo̱ nan‐isht ahullo okpulo ya̱ a kohchit anta tok. Atuk o̱ yakohmi tok: nan‐isht ahullo okpulo ʋt a kohcha mʋno, ik anumpulo ash ot anumpuli tok; mihma okla hʋt anukhlakancha tok.
15Yohmi kia kanimi kʋto, Ilʋppʋt nan‐isht ahullo okpulo puta i̱ mi̱ko Beelsebʋb ak o̱ nan‐isht ahullo okpulo puta ka isht kocha weli hoke, achi tok.
16Mihma inlaka mʋto imomaka pisa kʋt, nan‐isht‐atokowa kʋt ʋba a minta hi a̱ im a hoyo tok.
17Yohmi kia yʋmmak okʋt nana im anukfila puta ka ithana hatuk osh, Apehlichika achʋfa kʋt it a kashapʋt ilapo ash inli it im i̱ sanali hokʋt, ont aiokpulokʋt taha hoke: mikma chuka yʋt ita kashapʋt ilapo ash inli it im i̱ sanali hokʋt, akʋma hoke.
18Setan ak kia ita kashapʋt ilapo ash inlit il im i̱ sanali hokmʋt, im apehlichika yʋt katiohmi hosh talaia hinla cho? ʋno ʋt Beelsebʋb ak o̱ nan‐isht ahullo okpulo puta ka isht kocha weli li ho̱ hʋsh miha hoka,
19Yohmi ka ʋno ʋt Beelsebʋb ak o̱ nan‐isht ahullo okpulo puta ka isht kocha weli li hokma, hʋch iso ʋhleha hʋto kʋta hak o̱ yʋmma isht kocha weli cho? Yohmi hoka yʋmmak osh na hʋchim apesa yashke.
20Amba ʋno ʋt Chihowa ibbak‐ushi o̱ nan isht ahullo okpulo puta ka isht kocha wihinli li hokma, yohmi hok mʋno, Chihowa apehlichika yʋt hʋchim ʋla mak oke.
21Hatak hlampko yosh na‐halupa ai im ʋlhtaiyaha hosh in chuka apesʋchi hokʋno, nana kʋt aiyuba̱ka hoke.
22Amba kʋllo kʋt ilapo a̱ i̱ shahli hosh ant i̱ kohchʋt, imaiyachi hokmak osh, i̱ na‐halupa ai anukchieto tuk ash mominchit im ai eshi cha, nana immi hatuk ash inla im it a kʋshkoli chatuk oke.
23Kʋna hosh ʋno a̱ sʋb ai achʋfa keyu kʋt ʋm i̱ sanali hoke: mikma kʋna hosh sʋba hoyo keyu hokʋto na fimmi yoke.
24Shilombish okpulo yʋt hatak a̱ a kohchakmʋt, a foha he hoyot haiaka oka ik ai iksho puta ka hlopullit a̱ya kia ik ahayucho mʋt, An chuka ai ʋttʋt kohchʋt a minti li kash osh falamʋt ia lashke, achi hoke.
25Atuk osh onakmʋt, yʋmmak ash ot pa̱shpoʋt shemʋt taiyaha cha hikia ho̱, ont pisa hoke.
26Yohmikmʋt shilombish okpulo untuklo inla yʋt okpulo kʋt ilapo a̱ i̱ shahli ho̱ ont pehlichit ʋla na, yʋmmak ash okla pit abeha cha, aiasha hoke; yohmikma hatak yʋmma nana kʋt ont ai‐isht im aiyopa kak osh ik achukmo kʋt ʋmmona tuk ash i̱ shahli hoke, im achi tok.
27Atuk o̱ yakohmi tok; ilʋppa anumpohonli moma ho̱, ohoyo achʋfʋt okla takla hikia tuk ʋt chitoli hosh mihʋt, Ikfoka yʋt yʋmmak osh chisht a̱ya tuk, mikma i̱ pishi ma ish a pihi̱shi tuk a̱ aiena kʋto holitopʋshke, im achi tok.
28Yohmi kia yʋmmak ash ot, A̱hli, na‐yukpa aia̱hli kʋto Chihowa im anumpa ha̱ haklo cha, im antia hak oke, achi tok.
29Atuk o̱ okla hʋt itahobʋt ant a laua fehnʋt taha ma, Hatak himonasi a̱sha ilʋppʋt ai ʋlhpesa keyushke; nan‐isht atokowa okla hoyo; yohmi kia nan‐isht atokowa nana hosh in takala he keyu, amba hopaii Chonas nan‐isht im atokowa kak a hi oke.
30Chonas ʋt Ninefeh okla ha̱ isht ai im atokowa tok a̱, Hatak Ushi mʋt hatak himonasi a̱sha ilʋppa ai in chiyuhmi makinla hi oke.
31Nana ʋlhpisa chinto nitak okʋno oka‐mahli ohoyo mi̱ko ʋt hatak himonasi a̱sha ilʋppa awant hikia cha, atokowʋt anumpa onocha hi oke; yʋmmak okʋto yakni ont ai ʋhli pilla ʋttʋt minti kʋt, Solomon isht im a hopoyuksaka ya̱ haklot a̱ya tok okʋt; atuk o̱ yakeh! Solomon a̱ imaiya mak osh ilʋppa ahantʋshke.
32Nana ʋlhpisa chinto nitak okʋno Ninefeh okla hʋt hatak ʋt himonasi a̱sha ilʋppa iba ta̱kla wakayʋt hiohma̱yʋt, atokowʋt anumpa onocha hi oke; yʋmmak okʋto Chonas ʋt ʋbanumpa ont isht im anumpohonli ma, ile kostininchi tok okʋt; atuk o̱ yakeh! Chonas a̱ imaiya mak osh ilʋppa ahantʋshke.
33Hatak nana ak osh pʋla ha̱ pʋlali kʋt a luma̱ka ho̱ talali chatuk keyu, keyukmʋt tanchi isht‐ʋlhpisa nutaka yo̱ talali chatuk keyu, amba kʋna hoh kia ant chukowakmʋt tohwikeli ka pisa chi̱ ka, pʋla ai‐o̱ hikia ak o̱ o̱ hilechi chatuk.
34Haknip a̱ i̱ pʋla hʋt nishkin ak oke: yohmi hoka chi nishkin ʋt achukmakma, chi haknip ak kia momʋt tohwikelit alota hoke; amba chi nishkin ʋt okpulo yokmʋno, chi haknip ak kia ai okhlilikʋt kʋnia hoke.
35Yohmi ka ahah! ish aiahni na na tohwikeli kʋt a chi foyuka yʋmmʋt ik okhlilo kashke.
36Yʋmohmi ka chi haknip ʋt im a kanima kʋt ai okhlilika iiksho hosh tohwikeli banot alotowa hokma, moma kʋt tohwikelit alotowa kʋt, pʋla lua achukma kʋt chim a tohwikelichi chatuk a̱ a chiyuhma hinla hoke, achi tok.
37Yʋmohmit anumpohonli moma na Falisi achʋfʋt, yʋmmak ash ot ont ibai impa hinla ka im ahni tok: mihma ont chukowa cha, impa chi̱ hosh binili tok.
38Yohmi ma Falisi ash ot pisa mʋt, ik impo ki̱sha kʋt ibbak ik ahchifo ke tuk a̱, okokko! aiahni tok.
39Mihma Chitokaka ash osh, Falisi hʋchia hʋt isht‐ishko micha ampo aiena ka paknaka yokʋno hʋsh kashofishke: amba hʋchi anu̱kaka yʋto na wehpuli, micha nan ik ai ʋlhpeso banot isht hʋchi alotowʋshke.
40Nan anukfila iksho hʋchia ma! nana ka paknaka ya̱ ikbi mʋt, anu̱kaka yak kia ikbi akinli tok keyu cho?
41Amba yohmi kia nana hʋchim a̱sha kʋt hʋsh habenʋchashke: yohmikma yakeh! nana puta kʋt a hʋchim ʋlhpesa bano hoke,
42Amba Falisi hʋchia ma! na hʋchi̱ palʋmmi mak oke, mint, micha lu, mikmʋt haiyu̱kpolo ilaiyuka puta waya it a kashkoa ont isht pokoli kak osh hʋchi̱ kʋnia, mikmʋt nana ai‐ʋlhpiesa ka, micha Chihowa holitobli aiena hokʋno hʋsh ʋbanʋbli hoka: ilʋppak o̱ a hʋchi yʋmohmi ha yosh, anonti yʋmmak ma hʋch ik a haksecho ka hetuk oke.
43Falisi hʋchia ma! na hʋchi̱ palʋmmi mak oke, sinakak puta anu̱kaka aiasha holitopa puta, mikmʋt ilhpak a kanchi ai it aiokpʋchi aiena kak o̱ hʋchim ai achukma hoka.
44Na‐holissochi ʋhleha, micha Falisi okla aiena nan‐ilahobi hʋchia ma! na hʋchi̱ palʋmmi mak oke; a‐hollopi ʋt otani keyu ho̱, hatak ʋt a nowʋt ʋbanopoli kia, yʋmmʋt ik akostinincho chatuk a̱ hʋch itilaui hoka, im achi tok.
45Mihma nan‐ʋlhpisa ithʋnanchi ʋhleha hʋt achʋfʋt afalaminchit, Nan‐ithʋnanchi ma! ilʋppa yak ish achi kʋt pishno a̱ aieninchit nan isht chik pi ahobaloshke.
46Mihma yʋmmak ash ot, Nan‐ʋlhpisa ithʋnanchi hʋchia ma! hʋchishno ak kia na hʋchi̱ palʋmmi mak oke; nana weki shali ka palʋmma hinla ho̱ hatak a̱ hʋsh shalihinchi mʋt, hʋchishno yak okʋto nana weki ash hʋch ibbak ushi achʋfona kia ishit hʋch ik potolo hoka.
47Na hʋchi̱ palʋmmi mak oke: hopaii puta ka hʋchin tikba ʋhleha hʋt ʋbi tok a̱ i̱ sepʋlka yo̱ hʋsh ihi̱kbi hoka.
48Hʋchin tikba ʋhleha hʋt yʋmmak oka ahambi mʋhli ma, hʋchishno ʋt i̱ sepʋlka puta ma hʋsh ihi̱kbi kʋt, hʋchin tikba ʋhleha hʋt nana a kaniohmi tok a̱ hʋsh im ahninchi kʋt isht atokowa mak o̱ hʋsh ieshi mʋhlishke.
49Yʋmohmi ka Chihowa i̱ hopoyuksaka yak kia yak achi tok. Hopaii ʋhleha, micha ʋbanumpeshi ʋhleha aiena ka pit in tihlihinli likma, kanima ka ʋbikmʋt, anonti issikkopali aiena he;
50Yohmi na yakni ʋt toba tok taiyakla ka hopaii ʋhleha im issish ʋt hlatahampa tok moyuma ka, himonasi hatak aha̱shwa ilʋppak o̱ im a hoya hi oke.
51Ebel a̱ im issish a tok a̱ ai ʋhlit mihintit Sakalaias alta micha tempel itin takla ai ʋbi tok issish ak o̱ ant ai ʋhli yʋmmak o̱ himonasi hatak aiasha ilʋppak o̱ im a hoya he mak oke, aia̱hli mak o̱ hʋchi̱ miha lishke.
52Nan‐ʋlhpisa ithʋnanchi hʋchia ma! na hʋchi̱ palʋmmi mak oke; nan‐ai‐ithʋna isht tiwa ya̱ ishit hʋsh kanchi hoka: hʋchishno ak kia pit hʋch ik chukowokmʋt, inla yʋt pit abeha he tuk a̱ hʋsh ataklaha̱mishke, achi tok.
53Ilʋppa puta ka isht im ahanchi moma na na holissochi ʋhleha micha Falisi ʋhleha aiena kʋt a tu̱shpalechit, yʋmmʋt nana ilaiyuka miha he tuk, okla achibʋchi ho̱ fehna mʋt,
54Nana kia itakha a kohchʋt miha na haklot nan‐ʋlhpisa isht onocha he bʋnna hosh okla im aiechi tok.
Поточний вибір:
Luk 11: CHH
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Published by the American Bible Society 1848-1886, reprinted 1913
