Luk 10
10
Chisʋs ʋt nan im ai ithʋna ʋhleha pokoli untuklochit ʋbanumpa isht anumpula chi̱, micha nana kʋt a fehna kia yʋmihchi puta hosh im ai ʋlhpesa hatuk ʋt otʋnicha chi̱ mak o̱ a tohno, 1: 17 kaniohmi kak o̱ okla na yukpa he isht ai ʋlhpesa hatuk a̱, Chisʋs ʋt im anoli; 25 Chisʋs ʋt nan‐ʋlhpisa ithʋnanchi hatuk a̱ ʋba yakni hina ya̱ isht it im anumpuli: yohmi hosh hatak achukma Samalitan ʋt kaniohmi tok nan‐isht ʋlhpisa yʋmmak o̱, ilapʋt in chuka panta hatak puta ka isht ithana he mak o̱ isht im anumpuli.
1Nana kʋt a yakohmi ha ya, Chitokaka yʋt inla yosh pokoli untuklo ho̱ atokoli akinli cha, tuklo aiyukachit tʋmaha puta, mikmʋt kanima yo̱ ilapo ʋt ai ona hinla kʋt, tikbanli pit tihleli tok.
2Yʋmohmi hatuk osh na‐waya yʋt ai‐ʋlmo‐ona hokʋto laua mʋhli ho̱, amba na‐toksʋli ʋhleha hak osh chʋbehasish ke: yohmi hoka na‐waya yʋt ai‐ʋlmo‐ona ka in Chitokaka ya̱ hʋsh im asilhhahanchi na na‐toksʋli ʋhleha ha̱ i̱ na‐waya yʋt ai‐ʋlmo‐ona ka pit apittashke.
3Hʋsh itʋnowashke: yakeh! chukfʋlhpoba ushi yosh nashobo ai itintakla ma̱ya ho̱, ohmichi mak osh pit hʋchi tihleli li hoke.
4Tʋli holisso ai‐ʋlhto, micha bahta, mikmʋt shulush aiena ka isht hʋch ik a̱yo kashke: micha hina takla ya̱ hatak nana kia hʋch ik aiokpacho kashke.
5Mikmʋt chuka nana ho̱ ont hʋsh chukowa kʋt nan ti̱kba, Na‐nanaiya kʋt chuka ilʋppa ant iba fo̱kashke, ahnit hʋsh mihashke;
6Mikma na‐nanaiya ushi ʋt yʋmma anta tukma, nan‐isht hʋsh il a nanaiya mʋt ai onʋtuyulashke: amba keyukmʋno, nan‐isht hʋsh il a nanaiya yʋt hʋchi̱ falama hi oke.
7Mikmʋt chuka yʋmmak ash inli ho̱ aha̱shwʋt, peh nana hoh kia hʋch ipetakma, ʋpʋt hʋsh ishkashke: toksʋli ʋt im ʋlhtoba he ak osh im ai ʋlhpesa hoka. Chuka ʋbaiyʋchit hʋch ik itʋnowo kashke.
8Mikmʋt tʋmaha nana ho̱ ont hʋsh chukowa ka, okla hʋchi aiokpʋchikma, impa nana hosh hʋchi tikba talaia hokma, hʋsh pashke.
9Yohmikmʋt abeka yʋt yʋmma a̱shakma, ho hlakofichí: yohmikmʋt Chihowa apehlichika yʋt hʋch i̱ bili̱ka ʋlʋshke, hʋsh im achashke.
10Amba tʋmaha nana ho̱ ont hʋsh chukowa na ik hʋchi aiokpachokma, yʋmmak ash a kohchʋt iʋt, hina bʋshkʋchi puta ka hʋsh ona cha,
11Hʋchin tʋmaha i̱ hituk tohbi ʋt pi a lapali tuk a̱, hʋchi o̱ kashofit e kanchishke: yohmi kia Chihowa apehlichika yato hʋch i̱ bili̱ka ʋla hoka, hʋsh ithaiyanashke, hʋsh im achashke.
12Yohmi kia nitak yʋmma fehnakma Sotom ʋt im ahleka hoh kia pit im ʋlhpi̱sa kʋt, tʋmaha yʋmma i̱ shahla hi oke.
13Kolasin ma! na chi̱ palʋmmi mak oke; Betsaita ma! na chi̱ palʋmmi mak oke; na‐fehna puta kʋt hʋchishno ya̱ a hʋchim a yʋmohmi tuk ʋt Taia, micha Saiton ita‐tuklo ka a yʋmohmi ha tok okma, hopaki kash inli ho̱ na‐pa̱shi tʋnna fohka cha, hituk chubbi anu̱ka binoh‐ma̱yʋt ile kostinincha hi a tok oke.
14Yohmi kia nan ai‐ʋlhpisa chinto nitak okʋno Taia, micha Saiton ita‐tuklo kʋt im ahleka hoh kia pit im ʋlhpi̱sa kʋt, hʋchishno a̱ i̱ shahla hi oke.
15Yohmikma Kapenaʋm chia hʋt shutik ak o̱ ont ish talaia tuk ʋt, aka iʋt ai‐okpuloka mak o̱ pit ish a kʋnia hi oke.
16Mikma kʋna hosh hʋchi̱ haponaklokmʋt, ʋno a̱ a̱ haponaklo hoke: mikma kʋna hosh hʋchishno a̱ hʋchi shitile makmʋt, ʋno a̱ sa shitilema hoke: mikmʋt ʋno a̱ sa shitile makmʋt, auet sa kanchi tok a̱ shitilema hoke.
17Yʋmohmi tuk o̱ pokoli untuklo kash osh na yukpa hosh falamʋt ai ʋla mʋt, Chitokaka ma! chi hohchifo pulla kak o̱ nan‐isht‐ahullo okpulo puta kak kia pim antihi̱yʋshke, achi tok.
18Mihma yʋmmak ash ot, Setan ʋt malʋtha kʋt ʋba ʋttʋt aka minti chatuk a, chiyuhmi ho̱ pisa li kʋno.
19Yakeh! sinti chilita puta, mikmʋt halambia puta aiena ka hʋsh a hʋhlihinchi: micha na tʋnʋp nan‐isht ai im a̱hli ka ma mominchit a hʋsh imaiya chi̱ mak o̱ nan isht aia̱hlika ya̱ hʋch ima lishke: yohmi ka nana hosh a kaniohmit hʋchi hotopala hi ʋt iksho ka hi oke.
20Yohmi kia shilombish okpulo puta kʋt hʋchim antia ilʋppak okʋno nan ik hʋchi yukpo kashke; amba hʋchi hohchifo puta kʋt ʋba ya̱ a holisso, yʋmmak o̱ na hʋchi yukpa ʋlhpesa hoke, im achi tok.
21Hʋshi kanʋlli ʋlhpisa yʋmma fehna ma Chisʋs ʋt chu̱kʋsh na yukpa mʋt, A̱ki, ʋba, mikmʋt yakni ita‐tuklo in Chitokaka ma! na yakohmi puta ka na kostini, micha nan‐ithʋna aiena kʋno ish in luhmi tuk osh, ʋlo̱si puta ho̱ ish im otʋninchi hoka, yak oke, chim aiahni lishke, ʋlhpiesʋshke, A̱ki ma! yʋmmak osh chim ʋlhpiesa hatuk oka:
22Nan oklu̱ha ka A̱ki ʋt sʋbbak a̱ a fohkishke; yohmi ka kʋna hosh Ushi yoka hatak nana kia ik ithano ho̱, amba I̱ki ʋt ak illa hoke: mikmʋt kʋna hosh I̱ki yoka kʋna kia ik ithano ho̱, amba Ushi ʋt ak illa; micha Ushi ʋt kʋna ho̱ im otʋninchi mak bano hoke, achi tok.
23Yohmi mʋt nan im ai ithʋna ʋhleha a hieli ka pit filema mʋt, yʋmmak ash bano ho̱, Nishkin ʋt hʋchishno nana hʋsh pi̱sa ka pi̱sa kʋto na yukpʋshke.
24Hopaii ʋhleha, micha mi̱ko ʋhleha aiena kʋt laua hosh hʋchishno nana hʋsh pihi̱sa ka pisa bʋnna tuk osh, ik peso ki tok: micha hʋchishno nana hʋsh haha̱klo ka haklo bʋnna tuk osh, ik haklo ki tok o̱, hʋchim anoli lishke, achi tok.
25Yohmi ma yakeh! nan‐ʋlhpisa ithʋnanchi achʋfa hosh wakayʋt hikia mʋt, imomaka pisa bʋnnʋt, Nan‐ithʋnanchi ma! ai okcha̱yʋt bilia ya̱ pisa la hi okʋto, nanta ho̱ katiohmi la chi̱ cho? achi tok.
26Mihma yʋmmak ash ot, Nan‐ʋlhpisa holisso ha̱ katiohmit a holisso ho̱? katiohmi ho̱ ai ish it im anumpuli ho? im achi tok.
27Mihma yʋmmak ash ot afalaminchi mʋt, Chi chu̱kʋsh mominchi hosh, chi shilombish ma mominchit, chim ishthlampko a mominchit, mikmʋt chim anukfila ma mominchi hosh Chitokaka chin Chihowa ya̱ isht ish holitoblashke; mikmʋt chin chuka panta hatak ma ish holitobli kʋt, chishno akinli chim itilauashke, im achi tok.
28Mihma yʋmmak ash ot, Ʋlhpesa, ish miha mʋhlishke: ilʋppak o̱ ish yʋmihchashke: yohmi hokmak osh chi okcha̱ya hi oke, im achi tok.
29Yohmi kia yʋmmak ash ot il ai achukmali bʋnna kʋt, Chisʋs ash, Yohmi ka kʋta hak osh an chuka panta hatak o̱? im achi tok.
30Mihma Chisʋs ash ot afalaminchi mʋt, Hatak achʋfʋt Chelusalem ʋttʋt Cheliko ia tuk osh, hatak hu̱kopa ʋhleha ont iba chukowa na i̱ nafohka ya̱ im apoyua cha, isskkopalit boyuhli na illa̱ hosit itonla ho̱, issʋt ilhkoli tok.
31Atuk o̱ yakohmi tok; na‐holitompa isht ʋtta yosh hina yʋmma minta he mak yoba tuk osh, yʋmmak ash ant pisa mʋt, apakfompʋt hina in tʋnnʋp o̱ ant ia tok.
32Mihma Lefait hatak ak kia yʋmmak ash ʋlʋt ant pisa kia, yʋmmak ash inli ho̱ apakfompʋt hina in tʋnnʋp o̱ ant ia tok.
33Amba Samalitan hatak osh nowʋt a̱ya tuk osh, yʋmmʋt ai itola kash, ʋlʋt pisa mʋt, i̱ nukha̱klo tok.
34Mihmʋt ai‐itola kash ʋla cha, ai okpunlo tuk a̱ na‐bila, micha okapa̱ki aiena ka isht ahʋmmit, afohlit in tahli cha, ilap im issuba hatuk ash o̱ binilichit isht a̱yʋt, a‐foha chuka yo̱ isht ona cha, apesʋchi tok.
35Atuk osh ont onna ma ia chi̱ mʋt, iskʋli tuklo ka ishit kohchit, afoha chuka apesʋchi yash ima mʋt, Ilʋppa ish apistikelashke: micha atampa kʋt kaniohmi hosh chi̱ kʋnia tuk mak heno, falamʋt a̱ya likmʋt, chim atobbi lashke; im achi tok.
36Yʋmohmi ka tuchina ilʋppa katima kak osh hatak hu̱kopa ʋhleha ont im isht kanʋpa tuk a̱ in chuka panta hatak a tok o̱, chim ahoba cho? achi tok.
37Mihma yʋmmak ash ot, I̱ nukha̱klo tok á, achi tok. Mihma Chisʋs ash ot, Ia cha, chishno mʋt yʋmmak inli ho̱ ish chohminchashke, im achi tok.
38Atuk osh yakohmi tok; ia hosh okla itʋnowʋt a̱ya ma, yʋmmak ash ot tʋmahushi achʋfa ho̱ pit chukowa tok: mihma ohoyo achʋfa, Mahla hohchifo hosh, aiokpʋchit im aboha ya̱ isht chukowa tok.
39Mihma yʋmma itibapishi hʋt Meli hohchifo hosh anta tuk osh, yʋmmak ash kia Chisʋs iyi ituma ya̱ binilit, im anumpa ha̱ haklo tok.
40Amba Mahla ʋto nan‐isht ʋtta in lauʋt isht ik im ai ʋlhpieso mʋt, yʋmmak ash o̱ im ai ʋlʋt, Chitokaka ma! sa nakfish ʋt si apela hi a̱ ik ahno ho̱, ʋno ak bano hosh nan‐isht anta li ka, nan isht chik ahno cho? yohmi hoka nan isht ik sʋbai ʋttá, ish i̱ mihashke, ant im achi tok.
41Mihma Chisʋs ash ot afalaminchi mʋt, Mahla ma! Mahla ma! nana ka ahalaiʋt im anukfila isht ik chim ʋlhpieso kʋt chin lauʋshke.
42Yohmi kia nana ai ʋlhpiesa hokʋto achʋfa hoke; yohmi ka ai im ai isha he keyu nana achukma mih mak o̱ Meli yokʋto ai apissali tuk oke, im achi tok.
Поточний вибір:
Luk 10: CHH
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Published by the American Bible Society 1848-1886, reprinted 1913
