Luk 13
13
Chisʋs ʋt ile kostininchit il aiasha he ak o̱ pi̱ miha, 1, 6 Fik ʋpi ʋna he keyu nan isht‐ʋlhpisa. 10 Nitak hullo yo̱ Chisʋs ʋt nan ithʋnanchit ahanta hosh ohoyo iksitopo ilbʋsha ya̱ hlakofichi; 15 micha ʋba yakni apehlichika ya̱ mʋstʋt nihi, micha pʋska isht shatʋmmichi aiena kak o̱ isht it apesa; 24 okhissa iskʋtinosi yʋmma chukowa bʋnna kʋt achunancha hi a̱, okla ha̱ i̱ miha. 31 Chisʋs a̱ Helot ʋt ʋbi bʋnna hatuk o̱, kohchʋt kʋnia hinla ka, okla im ahni ma, nana ho̱ im achi; anonti Chelusalem ʋt ont aiokpulokʋt taha chi̱ ka, itukonofʋt mihinti ka, Chisʋs ʋt tikbanli anoli mʋt, isht yaha̱ya.
1Yʋmma fehna ma kanimi kʋt yʋmma a̱sha tuk ʋt, Pailat ʋt Kalili hatak issish a̱ okla ʋba pit isht aiokpʋchi a̱ ai itaiomi tuk a̱, im anoli tok.
2Mihma Chisʋs ash ot afalaminchi mʋt, Kalili hatak osh yakohmi hokʋt nan‐ashʋchi kʋt Kalili okla ha̱ moma i̱ shahli atuk osh na yakohmi ka isht ai ilbʋsha tuk o̱, hʋchim ahoba cho?
3Keyushke; amba hʋchishno ak kia hʋsh ile kostininchi keyukmʋt, hʋsh moma kʋt ilbʋshʋt hʋch illi akinla chi̱ ka, hʋchim anoli lishke.
4Yʋmmak keyukmʋt Siloam a̱ chuka chaha hikia tuk ʋt auah untuchina ka o̱ kinafʋt ʋbi tok a̱, yʋmmak osh nan ashʋchi kʋt hatak Chelusalem a̱sha moma ka i̱ shahli ha tok a̱, hʋchim ahoba cho?
5Keyushke; amba hʋchishno ak kia hʋsh ile kostininchi keyukmʋt, hʋsh moma kʋt ilbʋshʋt hʋch illi akinla chi̱ ka, hʋchim anoli lishke.
6Nan‐isht‐ʋlhpisa ilʋppakma isht anumpuli tok: Hatak achʋfa hosh fik ʋpi ʋt osapushi anu̱kaka ya̱ im a hollokchi tuk osh ona cha, ʋni a̱ a hoyo tuk osh, ik ahayucho ki tok.
7Mihmʋt im osapushi apoksiachi ash o̱, Inta! ilʋppʋt afʋmmi atuchina mak o̱ fik ʋpi ilʋppa ʋni a̱ hoyo kʋt a̱ya li hosh ak ahayucho bekʋshke: chanlit akʋchí; nanta katiohmi ho̱ hikiʋt yakni a̱ ai okpʋninchi cho? im achi tok.
8Mihma yʋmmak ash ot afalaminchi mʋt, Chitokaka ma! himak afʋmmi achʋfa takla hokʋno ant hiki̱a na, kullit apakfoplit, yakni achukmali ya̱ isht apolichit tahli li hayashke.
9Yohmi na ʋnit waya hokmʋno, ʋlhpesa: amba keyukmʋno, yʋmma misha pilla mak o̱ chanlit ish akʋchashke, im achi tok.
10Mihmʋt nitak hullo yo̱ yʋmmak ash ot nan ithʋnanchi hosh sinakak achʋfona ka anta tok.
11Mihma ohoyo hʋt shilombish okpulo nan iksitopochi yʋt ai i̱ fo̱ka tuk a̱ afʋmmi auah untuchina hosh, kochofʋt kʋnia, kaniohmit il apissalecha he keyu kʋmohmi hosh anta tok:
12Atuk o̱ Chisʋs ʋt yʋmmak ash pisa mʋt, pit i̱ howa cha, Ohoyo chia ma! nan ik chi ai iksitopo ka ish ai i̱ mokofa mak oke, im achi tok.
13Mihmʋt yʋmmak ash o̱ ibbak a̱ ita tuklonchit isht umbitepa tok: mihma yʋmmak ash ot mihmakinli ho̱ apissʋt taha mʋt, Chihowa ha̱ holitoblichi tok.
14Mihma sinakak a̱ apesʋchi ash ot, Chisʋs ʋt nitak hullo yo̱ hlakofichi ka im okpulo fehna hatuk osh, okla hash, Nitak hannali kak o̱ hatak ʋt a toksʋla he ʋlhpesa kʋto a̱shʋshke: yohmi ka nitak hullo ak a he tuk keyu; yohmi hoka yʋmma ai itinta̱kla kak o̱ ai ʋlʋt hʋchi hlakofashke, im achi tok.
15Yohmi ma Chitokaka yash ot afalaminchi mʋt, yʋmmak ash, Peh nana ilahobi chia hoke: hʋsh moma kʋt nitak hullo a̱ chi̱ wak toksʋli okmá, keyukmʋt chim issuba haksobish falaia okmá, nana kʋt ai ilhpitta ya̱ talakchit hiki̱a tuk a̱ i̱ hotofi cha, halʋllit oka ipetʋt ish ia chatuk keyu̱?
16Yohmi ka ohoyo ilʋppʋt Eblaham ushetik atuk o̱, Setan ʋt takchit ishi tok a̱, ilʋppʋt afʋmmi auahuntuchina hatuk a̱, nitak hullo ya̱ isht talakchi tuk ʋt ai i̱ holhtofa he ʋlhpesa keyu cho? im achi tok.
17Mihma ilʋppa yʋmmak achi ma, i̱ sanali ʋhleha hash ot momʋt hofahya tok; mihma nan isht a chinto a puta ka yʋmihinchi ka okla hʋt momʋt na yukpa tok.
18Mihma yʋmmak ash ot, Chihowa apehlichika yʋt nanta hak o̱ hoyulba̱? yohmi ka nanta hak o̱ isht it apesa la chi̱ cho?
19Mʋstʋt nihi achʋfa ho̱ hatak ʋt ishi cha, im osapushi a̱ pit a pila tok o̱, offot hofantit ma̱ha̱yʋt, iti chito tobʋt hikia tok: yohmi na ʋba hushi puta kʋt naksish puta ka ant ai o̱ binohonli tok mak o̱ chiyuhmi hoke, achi tok.
20Mihmʋt anonti Chihowa apehlichika ya̱ nanta hak o̱ isht it apesa la chi̱ cho?
21Pʋska shatʋmmichi yo̱ ohoyo hʋt ishi cha, tanchi pushi isht ʋlhpisa tuchina ho̱ a yʋmʋslichi tuk o̱, momʋt shatʋmmit taiyaha tuk mak o̱ holba hoke, achi tok.
22Mihmʋt tʋmaha puta, micha tʋmahushi aiena ka hlopullit a̱yʋt nan ithʋnanchit, Chelusalem imma ia hosh a̱ya tok.
23Mihma achʋfʋt, Chitokaka ma! Achafoa kak illa hosh okcha̱ya hi oh cho? im achi tok.
24Mihma yʋmmak ash ot, Yichina fehnʋt okhissa iskitini a̱ chukowa hʋchi bʋnnashke; chukowa bʋnnʋt pisa kia, nan ik kanihmo ka chi̱ kʋt laua hoke, hʋchim achi lishke.
25Chuka chʋfa pehlichi yʋt kaniohmi ho̱ wakayʋt, okhissa ya̱ okhishta ha ma, kocha ya̱ hʋsh hiohma̱yʋt, okhissa ya̱ soko̱hʋt, Chitokaka ma! Chítokaka ma! ish pin tiwashke hʋsh achi kia, yʋmmak ash ot afalaminchit, Yʋmmak o̱ minti, ahnit hʋch ithana li keyu kʋt, hʋchim acha hi oke.
26Yʋmma fokakma hʋchishno ash ot, Chi tikba ya̱ ai impʋt, nan ishkot il aiasha chatuk: yohmi ma chishno ʋt pin tʋmaha itin takla ya̱ nana ish ai ithʋnanchi tok mak oke, hʋsh acha he.
27Yohmi kia yʋmmak ash ot, Yʋmmak o̱ minti, ahnit hʋch ithana li keyu hoka, nan ai ʋlhpesa keyu puta ka a yohmi hʋchia hʋt, momʋt hʋs sa̱ filʋmmashke, hʋchim achi lishke, acha hi oke.
28Yohmikma hʋchishno yokʋno kocha hʋchi kanchi na, Eblaham, micha Aisaak, mikmʋt Chekob, micha hopaii puta ka a moyuma hokʋto Chihowa apehlichika ya̱ auet aiasha na hʋsh pisa he, yʋmma fokak mak osh yaha̱yʋt noti a̱ ʋpʋt hʋsh aiasha hi oke.
29Mikma hʋshi akochaka imma, micha hʋshi ai okʋtula ka, mikmʋt falʋmmi, micha oka mahli aiena ka a mihintit Chihowa apehlichika im ai‐impa ya̱ ai a binohla hi oke.
30Mikma yakeh! ishtaiyopi tuk ʋt mihi yosh na ti̱kba hi oke, mikma na ti̱kba tuk ʋt mihi yosh ishtaiyopa hi oke.
31Mih‐nitak fehna akinli ka Falisi kaniohmi kʋt ai ʋla cha, Ilʋppa a kohchʋt kanima ish iashke; Helot ʋt chiba he ahna hinla hoka, achi tok.
32Mihma yʋmmak ash o̱, Oh ia cha, chula yʋmma ont oh im anolí; Himak nitak, micha onna ha aiena kʋno nan‐isht ahullo okpulo puta kocha weli, micha haknip ik in chukmo puta ka hlakofichi aienʋt ahanta li tuk osh, nitak ont atuchinakma, nana ka aia̱hlit ont ʋm ataiyaha hok mak a hi oke.
33Yohmi kia himak nitak, micha onna ha, anonti nitak ont atuchina kʋno, nowa li pullashke; hopaii atuk ʋt Chelusalem keyu ka ai illa he keyu hoka.
34Chelusalem, Chelusalem hopaii ʋhleha ʋbi, micha auet chin tihleli tuk a̱ tʋli ishit boli chia ma! aka̱ka yosh ushi ʋhleha ha̱ sanahchi nuta ya̱ pit ai itahobi chatuk mak o̱, chiyuhmit chim ʋlla ʋhleha ha̱ itahohombi la he, aiahni li tuk nana kia, hʋchishno ak osh ʋlhpesa hʋch ik aiahno hokʋno,
35Yakeh! hʋchin chuka yʋt hʋchin chuk‐illissʋt taiyaha mak oke. Yohmi hoka aia̱hli mak o̱ hʋchi miha lishke; Chitokaka i̱ hohchifo mak o̱ a̱ya kʋt holitopʋshke, hʋsh acha chi̱ ka, ont ai ʋlhpiesa keyukma, hʋch ik sa peso ka chi̱ hoke, im achi tok oke.
Поточний вибір:
Luk 13: CHH
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Published by the American Bible Society 1848-1886, reprinted 1913
