योहान्ना 21
21
येशु ङेने धी़नचारु ॱङो़न्पा
1होदे स्याम्ने, येशु तीबेरीयास छोगी डामदु ङेनेक्याला, खोराङ याङ ॱङो़न्दु जेपालाक। खोङबागी राङला देरे झ्येरी ॱङो़न जेपालाक। 2सीमोन पेटो धाङ दीदुमोस ॱनागीन, थोमा धाङ गालील युगी कानानीपा नाथानेल धाङ जेबेदीगी भीजा ॱङी धेनी खोङबागी ङेने श्येम्मा ॱङी झ्येरी, खुङ घीरीमुला हो़तालाक। 3सीमोन पेटोगी खुङक्याला ॱनेवालाक, “ङा ङ्या शीम्दु डोयेहीन।”
खुङक्यागी ॱनेवालाक, “हेक्या ख्यी़मुला डोयेहीन।” धेनी खुङक्या सोरी डु श्यो़न्बालाक हीना होदे छेमु खुङक्याई ङ्या च्यीया माशीम्बालाक।
4ॱनाम लाङये झ्यीदी घाङला, येशु छोगी डामदु श्याङ हो़तालाक हीना ङेनेक्याई खोङबा येशुराङ हीन्गीनगो ॱमास्येवालाक।
5येशुगी खुङक्याला सुवालाक, “भीजाक्याओ, खेक्याला ङ्या रे मेती?”
खुङक्याई “मेक” ॱनेरी ॱनेवालाक।
6खोङबागी खुङक्याला सुवालाक, “ङ्यारेगो डुशीङगी ॱये स्योकला ॱयुक धेनी खेक्याला ङ्या रे ॱङेगीलाक।” होझ्येरी खुङक्याई ङ्यारेगो ॱयुक्पालाक धेनी ङ्या ॱमीच्यीकी माङा शीम्दी, याला थेन ॱमाथुक्पालाक।
7येशुगी झाम्पा जेगीन ङेनेगी़ पेटोला ॱनेवालाक, “खोङबा चोवो लाक।” खोङ चोवो लाक ॱनेरी घोरलुङ मेताला सीमोन पेटोगी राङगी क्षीघो़गो टीरी, छो नाङदु छोम्बालाक। घीझ्येरी ॱनाना खी़ घो़गो पी़दी धे हो़तालाक। 8ङेने श्येम्माक्या काम्साने मीटार ग्या चो़ झ्येरी, खुङक्याई ङ्यागी खाङखा ङ्यारेगो डी़दी डु नाङदु होवालाक।
9खुङक्या सा काम्साला ॱलेप्ती, होदुरु सोलागी मेगी खाला ङ्या श्याकश्या धाङ ग्याङगा थोवालाक।
10येशुगी खुङक्याला सुवालाक, “खीकी धान्दाराङ शीम्सा ङ्या रीङगा खेरती स्योक।” 11होझ्येरी सीमोन पेटो डु नाङदु सोरी ङ्या क्षे, ग्या धाङ ॱङापच्यु ङाक्सुम खाङखा ङ्यारेगो काम्साला डी़दी होवालाक। ङ्या ॱमीच्यीकी माङा झ्येरीया, ङ्यारे मारावालाक।
12येशुगी खुङक्याला सुवालाक, “धा स्योक धेनी श्योक्से शो।” धा ङेनेक्याई चोवो हीन्गीनगो ङोस्येरी, सी़या खोङबा सुले ॱनेरी श्यी़ ॱमाथुक्पालाक। 13येशु फेप्ती ग्याङगा ॱनुम्दी, खुङक्याला ङ्यामुला तेरपालाक।
14येशु छीवाने श्याङसारती, ङेनेक्यामुला ज्यागीन दे थेङ सुम्बागो लाक।
येशु धाङ पेटो
15धेनी खुङक्याई श्योक्से शेसारती, येशुगी सीमोन पेटोला सुवालाक, “योहान्नागी भीजा सीमोन, ख्यी़ ङाला देक्याने ल्हाक चेवा झ्यीदी हो़ती?”
खी़ खोङबाला श्यी़वालाक, “चोवो ला, ङी खेराङला चेवा झ्यीगीनगो खेराङ खेन्दालाक।”
खोङबागी खोला सुवालाक, “ङी लुक्टुक्याला छो़।”
16याङ थेङ ॱङीवा खोङबागी खोला सुवालाक, “योहान्नागी भीजा सीमोन, ख्यो़ ङाला चेवा झ्यीदी हो़ती?”
खी़ खोङबाला सुवालाक, “चोवो ला, ङा खेराङला चेवा झ्यीदीहो़क।”
खोङबागी खोला सुवालाक, “ङी लुकक्याला क्योङ।”
17थेङ सुम्बा खोङबागी खोला सुवालाक, “योहान्नागी भीजा सीमोन, ख्यो़ ङाला चेवा झ्यीदी हो़ती?”
धा येशुगी पेटोला थेङ सुम्बा थुक्पे, “ख्यी़ ङाला चेवा झ्यीदी हो़ती?” सुरी ढीवा जेगीनगोला खो सेम फाम्बालाक।
धेनी खी़ खोङबाला श्यी़वालाक, “चोवो, खेराङ घीरी खेन्दालाक। ङी खेराङला चेवा झ्यीगीनगोवा खेराङ खेन्दालाक।”
येशुगी खोला सुवालाक, “ङी लुकक्या छो़। 18ङा ख्यो़ला धेन्पा धेनक्याङ ॱनाहीन, ख्यो़ श्यो़न्पा हो़ती घाङला, ख्यो़ राङगी केराक राङ रेलालाक धेनी राङ घारु थेगीनगोला डोवालाक हीना ख्यो़ खा घेरी, ख्यी़ लाक्पा क्यारी मी श्येम्मागी ख्यी़ केराक रेगीलाक धेनी ख्यी़ ॱमेथेगीन साजाला ख्यो़ला ठीक्कीलाक।” 19पेटोगी छीवा गोने को़न्क्षोकला शीजे हुङगीनगी कोरला तो़न्येला, खोङबागी दे सुवालाक। दे सुङसारती खोङबागी खोला सुवालाक, “ङी स्याबाला डोङ।”
येशु धाङ खोङगी झाम्पा जेगीन ङेनेगो
20पेटोगी खा ॱलोक्ती येशुगी झाम्पा जेगीन ङेनेगो, खुङक्याई स्याबाला हुङगीनगो थोवालाक। थामे श्येलाकला येशुगी डामला ॱङेरी धेती खोङबाला, “चोवो, खेराङला डागी लाक्पाला ची ग्याप्ये झ्यीगीनगो सुले?” ॱनेरी ढीगीन ङेनेगो खो राङ लाक।
21पेटोगी खोला थोरी येशुला श्यी़वालाक, “चोवो, खोला घी सुङये हो़तो?”
22येशुगी खोला सुवालाक, “ङा मायोङ थुक्पे खो सो़न्पो ॱनेयेगी ङी दो़पा हीन्ना, ख्यो़ला ढेवा घी हो़तो? ख्यो़ ङी स्याबाला डोङ।”
23होझ्येरी ङेने दे स्यीगीमालाक ॱनेरी पी़नक्याई नाङला ख्याप्पालाक। हीना येशुगी खो स्यीगुमालाक सुरी ॱमासुवालाक हीना, “ङा मायोङ थुक्पे खो सो़न्पो ॱनेयेगी ङी दो़पा हीन्ना, ख्यो़ला ढेवा घी हो़तो?” सुरी सुवालाक।
24दो़न देक्याला पाङपो झ्यीगीन धाङ यीक देक्या ढीक्कीन ङेनेगो खो राङ लाक। धेनी खी़ पाङपो झ्यीगीनगो धेन्पा लाक ॱनेरी हेक्याला स्येयेहो़क।
25धा येशुगी जेजा क्षाक्ले श्येम्मा ॱमीच्यीकी माङा हो़तालाक। धेनी ङी साम्लोला, दे घीरी रे-रे ढीक्ये हीन्ना, ढीक्टा धेपक्या जीक्तेन दुरुवा स्योङये मेतालाक।
Поточний вибір:
योहान्ना 21: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
