योहान्ना 20
20
धी़ठो तोङबा
(मेथा २८:१-८; मारकु १६:१-८; लुका २४:१-१२)
1धा धी़न्डागी ङीमा धाङपोगोला ॱनाम माला एन्ला, मीरीयाम माक्दालीनी धी़ठोदु होवालाक धेनी धी़ठोने धोगोङगो ॱहाला री-री श्याक्सा थोवालाक। 2होझ्येरी मो सीमोन पेटो धाङ येशुगी चेवा जेगीन, ङेने श्येम्मागो चारु भाङ तारी सोरी, खुङ ॱङीउला ॱनेवालाक, “खुङक्याई चोवोला धी़ठोने खेरदुक धेनी खुङक्याई खोङबाला घारु श्याक हो़गीनगो, होराङला स्येये मेतालाक।”
3होझ्येरी पेटो होदे ङेने श्येम्मामुला फीला थो़न्दी, धी़ठो स्योकला सोवालाक। 4खुङ ॱङीगारा भाङ तारी डी़ हो़तालाक हीना ङेने श्येम्मागो पेटोला थारी धी़ठोदु एन्ला ॱलेप्पालाक। 5धेनी खी़ घुक झ्येरी ती घाङला, सोरेगो होदुरु हो़गीनगो थोवालाक हीना खो नाङला माजुवालाक। 6धा खी़ स्याम्ला सीमोन पेटो ॱलेप्पालाक धेनी धी़ठो नाङदु जुवालाक। धेनी खी़ होदुरु सोरेगो थोवालाक, 7धेनी येशुगी उला टीटा रेगो सोरेगोमुला मेन्दा, च्यीगा श्येम्मा साजाला ताप्ती श्याकश्या थोवालाक। 8धेनी धी़ठोदु एन्ला ॱलेप्कीन ङेने श्येम्मागोवा नाङला जुरी, होदे थोवालाक धेनी खी़ यीच्चे झ्येवालाक। 9घीझ्येरी ॱनाना खोङबा छीवाने कुसो़न्पो श्याङ घोगीलाक ॱनेरी सुङरापला ढीक्टागो, खुङ ॱङीउगी धोराङा ॱहामाघोरपालाक। 10होदे स्याम्ने खुङ ॱङीउ खोरी नाङला लोक्पालाक।
येशु मीरीयाम माक्दालीनीला ॱङो़न्पा
(मेथा २८:९-१०; मारकु १६:९-११)
11हीना मीरीयाम धी़ठोगी फीला ङी़री धे हो़तालाक। धेनी मो ङी़-ङी़ घुक झ्येरी, धी़ठो नाङला तेवालाक। 12धेनी मी़ घो़ काउ घो़न्गा नाम्खे भाङछेन ॱङी, च्यीक येशुगी कुफुङ श्याक्जागी उ स्योकला धेनी च्यीकगो श्याप स्योकला श्युकश्यागो थोवालाक। 13खुङक्याई मोला सुवालाक, “भोमो, ख्यो़ घीझ्येरी ङुवा?”
मी़ खोङक्याला ॱनेवालाक, “खुङक्याई ङी चोवोला खेरती सोदुक धेनी खोङबाला घारु श्याक्कीनगो ङाला स्येयेमेक।” 14दे ॱनेसारती मो ग्याप ॱलोक्पालाक धेनी मी़ येशुला होदुरु श्येङदी श्युक हो़गीनगो ज्यावालाक हीना येशुराङ हीन्गीनगो मी़ ॱमास्येवालाक।
15येशुगी मोला सुवालाक, “भोमो, ख्यो़ घीझ्येरी ङुवा? ख्यो़ सुला चाला?”
मी़ खोङबाला दुम्रा ॱरुङगीन लाक साम्दी श्यी़वालाक, “आज्यो, खेराङगी खोङबाला खेर हो़ना, खोङला घारु श्याक हो़तो ङाला ॱनारो झ्यी। धेनी ङा खोङला ॱहाला खेरयेहीन।”
16येशुगी मोला सुवालाक, “मीरीयाम!” मो खोङबा स्योकला खा ॱलोक्ती, “राब्बोनी” ॱनेरी श्यी़वालाक। ईब्रीपा केकला “ॱलोपो़न ला” ॱनालाक।
17येशुगी मोला सुवालाक, “धान्दा थुक्पे ङा यापगी डुङदु ॱमाफाक्पा, ङाला माशीम। हीना ङी पी़नक्याचारु सोरी, खुङक्याला, ‘ङा नी ङाराङगी याप धाङ खेक्याई याप धेनी ङी को़न्क्षोक धाङ खेक्याई को़न्क्षोक चारु डी़हो़क’ ॱनेरी स्यो़क।”
18मीरीयाम माक्दालीनी सोरी ङेनेक्याला, “ङी चोवोला ज्याजुङ” ॱनेरी स्येपालाक। धेनी खोङबागी सुङगीनगो खुङक्याला मी़ स्येपालाक।
येशु ङेनेक्याचारु ॱङो़न्पा
(मेथा २८:१६-२०; मारकु १६:१४-१८; लुका २४:३६-४९)
19धी़न्डागी ङीमा धाङपोगी घोमोगो ङेनेक्या याहुदापा गोठीक्याला जीक्ती, घो ग्याप्ती धे हो़तालाक। धेनी येशु खुङक्या घुङदु फेप्ती खुङक्याला सुवालाक, “खेक्याला श्यीदे हुङास्योक।” 20दे सुङसारती खोङबागी राङगी क्षाक धाङ श्योक, खुङक्याला तो़न्दा जेपालाक। चोवोला ज्यारी ङेनेक्या ङ्यामो घेवालाक।
21धेनी याङ येशुगी खुङक्याला सुवालाक, “खेक्याला श्यीदे हुङास्योक। यापगी ङाला ॱङाक्कीन च्योक्रे ङा खेक्याला ॱङाहीन।” 22दे सुङसारती खोङबागी खुङक्याला फु ग्याप्ती सुवालाक, “धाम्पे थुक्ङी लेन च्यीक। 23खेक्याई सी़ धीक्पा सेली, होदे दाक्कीलाक। धेनी खेक्याई सी़ धीक्पा ॱमेसेल्ना, होदे मेदाक्कीलाक।”
येशु थोमाला ॱङो़न्पा
24धा ङेने च्युङङीने, दीदुमोस ॱनागीन थोमागो, येशु फेई घाङला खुङक्यामुला मेतालाक। 25होझ्येरी ङेने श्येम्माक्याई खोला ॱनेवालाक, “हेक्याई चोवोला ज्याजुङ।”
हीना खी़ खुङक्याला ॱनेवालाक, “ङा खोङबागी क्षाकक्याला शेरगी ॱमेम्पाक्या थोरी, होदेला ङी जुगु ॱमाचुक थुक्पे धाङ खोङबागी श्योकला लाक्पा ॱमाचुक थुक्पे, ङा यीच्चे मीझ्यी।” 26श्याक्मो ग्ये स्याम्ने खोङबागी ङेनेक्या याङ होदे खाङबा नाङदु हो़तालाक धेनी थोमागोवा खुङक्यामुला हो़तालाक। घोगो ग्याप्हो़नाः, येशु खुङक्याई घुङदु फेप्ती सुवालाक, “खेक्याला श्यीदे हुङास्योक!”
27धेनी खोङबागी थोमाला सुवालाक, “ख्यी़ जु दुरु चुक्ती, ङी लाक्पाक्याला तो़। धेनी ख्यो़री लाक्पा क्यारी ङी श्योक नाङला चुक। दोक्पा ॱमासाक हीना धेपा झ्यी।”
28थोमागी खोङबाला श्यी़वालाक, “ङी चोवो, ङी को़न्क्षोक।”
29येशुगी खोला सुवालाक, “ख्यी़ ङाला थोथा झ्येरी, ङाला धेपा झ्यीदाले? ङाला ॱमाथोवाला, ङाला धेपा झ्यीगीनक्या झ्यीलाप क्षेली।”
दे धेपगी ॱमीक्यु
30येशु राङगी ङेनेक्याई दोङदु, श्येम्मा ॱमीच्यीकी माङा ताकक्या तो़न जे हो़तालाक धेनी होदेक्या दे धेपला माढीक हो़तालाक। 31हीना येशु, मास्यीका धाङ को़न्क्षोकगी सेगो लाक धेनी खोङबाला धेपा झ्येरी, खोङबागी छेनने खेक्याला थामेपे छेसोक थोप्कीलाक ॱनेरी खीकी धेपा झ्यीयेला, ङी देक्या ढीक हो़क।
Поточний вибір:
योहान्ना 20: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
