योहान्ना 19
19
येशुला ग्याङस्यीङ खाला क्याङयेगी छेपा
(मेथा २७:१५-३१; मारकु १५:६-२०; लुका २३:१३-२५)
1धा पीलातुगी येशुला ठीक्ती, ताजाक श्युरतु च्युक्पालाक। 2धेनी ॱमाक्मीक्याई छेम्मागी चो़पो़न ल्हेरी, खोङबागी उला को़न्बालाक। धेनी नाशा ग्यामुक च्यीक खोङबाला को़न्बालाक। 3धेनी खुङक्या खोङबागी डुङदु “याहुदापे ग्यावुला क्षाक छाल्लो।” ॱनेरी होरी, खोङबाला डाम्चाक श्युरपालाक।
4पीलातु धाब्ले फीला सोरी खुङक्याला ॱनेवालाक, “तो़, ङी खोला क्यो़न घीया ॱमाङेगीनगो, खेक्याई ॱहाघोरयेला ङी खोला खीकी दोङदु फीला ठीक्ती होहो़क।” 5धा येशु छेम्मागी चो़पो़न धाङ नाशा ग्यामुकगो ॱनुम्दी, फीला थो़न जेपालाक। धेनी पीलातुगी खुङक्याला ॱनेवालाक, “तो़, मी दी दुरु हो़क।”
6धा क्षो़पो़न क्षेक्या धाङ ॱमाक्मीक्याई खोङबाला ज्याली घाङला, “खोला ग्याङस्यीङ खाला क्योङ, खोला ग्याङस्यीङ खाला क्योङ!” ॱनेरी फेरा ग्याप्पालाक।
पीलातुगी खुङक्याला ॱनेवालाक, “ङी खोला क्यो़न घीया ॱमाङे, होझ्येरी खेक्याराङ खोला ठीक्ती सोरी ग्याङस्यीङ खाला क्योङ।”
7याहुदापाक्याई खोला लेन ग्याप्पालाक, “हेला क्षो़ठीम च्यीक हो़तालाक धेनी क्षो़ठीम देला ताना, खो स्यीघोगुलाक घीझ्येरी ॱनाना खी़ खोराङला को़न्क्षोकगी से हीन ॱनालाक।”
8पीलातुगी लाब दे घोरती, खो ॱयोल्ले माङा जीक्पालाक। 9खो धाब्ले फोडाङ नाङदु जुरी येशुला ढीवालाक, “ख्यो़ घाने हीनो?” हीना येशुगी लेन च्यीया ॱमासुवालाक। 10होझ्येरी पीलातुगी खोङबाला श्यी़वालाक, “ख्यो़ ङीमुला लाब ताङये मेने? ख्यो़ला ॱलो़ ताङये धेनी ग्याङस्यीङ खाला क्याङयेगी आङजा ङाला हो़तालाक ॱनेरी, ख्यो़ला स्येये मेते?”
11येशुगी खोला कालेन ॱनावालाक, “तो़ने ॱमानाङगीन थुक्पे, ङी थोकला खेराङला आङजा घीया मेतालाक। होझ्येरी खेराङगी लाकला ङाला ची ग्याप्कीनगोला, देले ल्हाक धीक्पा क्षे फोक्कीलाक।”
12दे घोरती पीलातुगी खोङबाला ॱलो़ ताङये थापस्यी झ्येवालाक। हीना याहुदापा पो़न्पोक्याई देरे ॱनेरी फेरा ग्याप्पालाक, “खेराङगी दे मी देला ॱलो़ ताङना, खेराङ केसारगी ढोक्पो मेन। राङला ग्यावु चीगीन घीरीगी, केसारला ङोग्येल झ्यीदालाक।”
13पीलातुगी दे घोरती येशुला फीला ठीक्ती होवालाक धेनी खो “धोचेल” ॱनागीन ठीम्चो़गी ठीला धेपालाक। (ईब्रीपा केकला “गाब्बाथा” ॱनालाक।) 14धा होदे ङीमागो पेसाकगी धी़छेन डाढीक झ्यीगीन ङीमागो लाक। धेनी होदे घाङला ङीङमो छुची च्युङङी झ्यु हो़तालाक।
पीलातुगी याहुदापाक्याला ॱनेवालाक, “खेक्याई ग्यावुला तो़!”
15धेनी खुङक्याई “खोला ॱहाला ठीक, ॱहाला ठीक। खोला ग्याङस्यीङला क्योङ!” ॱनेरी फेरा ग्याप्पालाक।
पीलातुगी खुङक्याला ॱनेवालाक, “खेक्याई ग्यावुला ङा ग्याङस्यीङ खाला क्याङये?”
क्षो़पो़न क्षेक्याई लेन ग्याप्पालाक, “केसार माना हेक्याला ग्यावु श्येम्मा मेक।”
16धेनी पीलातुगी खोङबाला ग्याङस्यीङ खाला क्याङयेला, खुङक्याई लाकला ची ग्याप्पालाक।
येशु ग्याङस्यीङ खाला
(मेथा २७:३२-४४; मारकु १५:२१-३२; लुका २३:२६-४३)
होझ्येरी खुङक्याई खोङबागी ची लेन्बालाक। 17धेनी येशु फीला फेप्ती, राङगी ग्याङस्यीङ खुरती गोरी़गी री ॱनागीन साज्याला फेप्पालाक। ईब्रीपा केकला, “गोलगोथा” ॱनालाक। 18होदुरु खुङक्याई मी श्येम्मा ॱङी, च्यीकला येशुगी ॱये धाङ च्यीकला ॱयो़न झ्येरी, खोङबाला घुङला श्याक्ती, खुङक्याला सेयेला ग्याङस्यीङ खाला क्याङबालाक। 19पीलातुगी “नाजारेपा येशु, याहुदापे ग्यावु” ॱनेरी, ङेक्यो़नगी यीक ढीक्ती ग्याङस्यीङगी गोला ताक्पालाक।
20यीक दे ईब्रीपा धाङ लाटीन धाङ गीरीक केकला ढीक हो़तालाक धेनी येशु ग्याङस्यीङला क्याङक्या साजागो ग्याजाने ङ्येला झ्येरी, याहुदापा माङक्षेगी यीक दे ढोक्पालाक। 21होझ्येरी याहुदापे क्षो़पो़न क्षेक्याई पीलातुला ॱनेवालाक, “‘याहुदापाक्याई ग्यावु’ ॱनेरी ढीया माजे हीना, ‘दी मी दी, ङा याहुदापाक्याई ग्यावु हीन ॱनेरी ॱनी।’ ॱनेरी ढीया जे।”
22पीलातुगी लेन तेरपालाक, “ङी घी ढीक्कीनगो ढीक्सालाक।”
23ॱमाक्मीक्याई येशुला ग्याङस्यीङला क्याङसारती, खोङबागी नाशागो खेरती ॱमाक्मी रे-रेला दुबु रे-रे झ्येरी दुबु श्यीला घो़वालाक। धेनी खोङबागी नाङघो़गोवा खेरपालाक हीना होदे नाङघो़गो छेबु मेता, गोने गाप थुक्पे धे हो़तालाक। 24होझ्येरी खुङक्याई च्यीकगी च्यीकला ॱनेवालाक, “धा होराङ दे रा मोघो हीना दे सुला थोप्यी ॱनेरी, तायेला गेन ग्याउ।” सुङरापला ढीक्टा दे डुप्येगी क्षीला दे झ्युवालाक,
“ङी घोलाक खुङक्याई खोराङक्या नाङदु घो़जुङ धेनी ङी नाङघो़ला, खुङक्याई गेन ग्याप्जुङ।#सुङगुर २२:१८”
होझ्येरी ॱमाक्मीक्याई दे लेगा झ्येवालाक। 25येशुगी ग्याङस्यीङगी ङ्येरु, खोङबागी युम धाङ खोङबागी युमगी नुमो धाङ कोलोपासगी, केमी मीरीयाम धाङ मीरीयाम माक्दालीनी लारी धे हो़तालाक। 26येशुगी राङगी युम धाङ खोङबागी ॱमीक्सेगी झाम्पा जेजा, ङेनेला डामदु लारी धेतागो शीक्ती, खोङबागी राङगी युमला सुवालाक, “भोमो, खो ख्यी़ भु लाक।”
27धेनी होदे ङेनेलाः खोङबागी सुवालाक, “मो ख्यी़ आमा लाक।” धेनी होदे धी़ने होदे ङेनेगी़ येशुगी युमला राङगी नाङला ठीक्पालाक।
येशु ढोङपा
(मेथा २७:४५-५६; मारकु १५:३३-४१; लुका २३:४४-४९)
28होदे स्याम्ने धा घीरी डुप्कीनगो खेन्दा जेदी, खोङबागी सुङरापला ढीक्टागो डुप्येगी क्षीला “ङा खा कोमी”#सुङगुर ६९:२१;२२:१५ सुरी सुवालाक। 29होदुरु खोवा क्युरमु गाङ खाङखा ॱनो़ च्यीक हो़तालाक। धेनी खुङक्याई ॱरीङबा च्यीक होदेला भारी, हीसोप ॱनागीन चीस्यीङ गोला ग्युरी, खोङबागी श्यालला श्याक्पालाक। 30धेनी येशुगी होदे घुन्क्षाङ क्युरमुगो श्येरी सुवालाक, “धा डुप्जो।” धेनी खोङबागी उ घुक्ती कुसोक ॱलो़ ताङा जेपालाक।
31होदे ङीमागो डाढीकगी ङीमा धाङ ङीमा स्याम्मागो ङासुगीन ङीमा खाक्क्षेगो झ्येरी, स्यीवे रोक्या ग्याङस्यीङदु मालेवास्योक ॱनेरी, याहुदापा पो़न्पोक्याई पीलातुला खुङक्याई काङबा च्याक्ती रो खेरयेला श्यी़वालाक। 32होझ्येरी ॱमाक्मीक्या होरी, खोङबामुला ग्याङस्यीङदु क्याङग्या मी ॱङीउने, धाङपोगी़ काङबा च्याक्पालाक धेनी ॱङीवागी़ काङबा च्याक्पालाक। 33हीना खुङक्या येशु डुङदु ॱलेप्ती खोङबा ढोङसागीनगो थोरी, खोङबागी श्याप ॱमाच्याक्पालाक। 34घीहीन्ना, ॱमाक्मीक्याने च्यीकगी येशुगी श्योकला दुङ चुक्पालाक धेनी ठाक धाङ क्षु थेङ च्यीक्लाराङ थो़न्बालाक।
35होदे थोथा मीगी़ दी कोरला, पाङपो झ्येवालाक धेनी खी़ पाङपोगो धेन्पा लाक। धेनी मी दे खोरी स्येगीनगो धेन्पा लाक ॱनेरी, खोला स्येये हो़तालाक। 36सुङरापला “खोङगी रीगोक च्यीया ॱमेच्याक्कीलाक।#धेप्थो़न १२:४६; ढाङगा ९:१२; सुङगुर ३४:२०” ॱनेरी ढीक्टा का दे डुप्येगी क्षीला देक्या झ्युवालाक। 37धेनी याङ सुङरापला श्येम्मा च्यीक ढीक हो़तालाक, “खुङक्याई चुक्कीनगोला, खुङक्याई तागीलाक।#जेकारीयास १२:१०; ॱङो़न्पा १:७ ”
येशुगी कुफुङ भेवा
(मेथा २७:५७-६१; मारकु १५:४२-४७; लुका २३:५०-५६)
38होदे स्याम्ने, याहुदापाक्याने जीक्ती साङवाला येशुगी ङेने हीन्गीन, आरीमाथीया युगी योसेफगी़ पीलातुला, येशुगी कुफुङ खेरती डोयेला श्यी़वालाक। पीलातुगी खोला खेरती डोये का ॱनावालाक। होझ्येरी खी़ येशुगी कुफुङ ग्याङस्यीङ माला पाप्ती, खेरती सोवालाक। 39एन्ला छेमु येशुला ज्यारु हुङगीन नीकोदेमगोवा, योसेफमुला कीलो सुमच्यु चो़गी मुररा धाङ आगारुगी ढीस्यीम ॱरेमा खेरती होवालाक। 40धेनी याहुदापे फुङबु भेगीन लुक्सो़ च्योक्रे, खुङ ॱङीउगी सोरेला ढीस्यीम ॱलुक्ती येशुगी कुफुङगोला टीवालाक। 41येशुला ग्याङस्यीङला क्याङगीन साजागी डामला दुम्रा च्यीक हो़तालाक। धेनी होदे दुम्रा नाङदु रो भा माङ्युङगीन, धी़ठो साबा च्यीक हो़तालाक। 42धेनी होदे ङीमोगो ङासुगीन ङीमा एम्मागो झ्ये धेनी धी़ठोगोवा ङ्येला झ्येरी, खुङ ॱङीउगी येशुगी कुफुङ होदुरु श्याक्पालाक।
Поточний вибір:
योहान्ना 19: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
