योहान्ना 10
10
लुक्जी शाङपोगी पे
1येशुगी सुवालाक, “ङा खेक्याला धेन्पा धेनक्याङ ॱनाहीन। लुक्रा नाङदु घोने मीजुला, छोक श्येम्माने जाक्कीनगो नी, कुमा धाङ झ्याक्पा लाक। 2हीना घोने जुगीनगो नी लुक्जी लाक। 3घो ॱरुङगीनगी खी़ क्षीला घो पेगीलाक। लुकक्याई खी़ केकला ङेन्दालाक। धेनी खी़ राङगी लुकक्याई मीङने भो़री फीला ठीयालाक। 4खी़ लुकक्या फीला तो़न्सारती, खो होदेक्याई दोङ-दोङला डोवालाक। धेनी लुकक्याई खी़ केक स्येरी, खी़ स्याम्ला डाङालाक। 5ङो ॱमेस्येगीन मीगी स्याम्ला लुकक्या मेडाङालाक हीना होदेने डो़री डोवालाक। घीझ्येरी ॱनाना होदे मीगी केक लुकक्याई ॱमेस्येलालाक।”
6येशुगी दे पे दे खुङक्याला सुङा जेपालाक। हीना खुङक्याई दी दो़न्दाकगो ॱहामाघोवालाक।
येशु नी लुक्जी शाङपो
7होझ्येरी येशुगी खुङक्याला धाब्ले सुङा जेपालाक, “ङा खेक्याला धेन्पा धेनक्याङ ॱनाहीन, लुक्रागी घो नी ङा हीन। 8ङी एन्ला होवा घीरी कुमा धाङ झ्याक्पा हीन। हीना लुकक्याई खुङक्याला माङेन्बालाक। 9ङा नी घोगो हीन। ङा थोक्ने जुगीनगो क्योप्कीलाक धेनी नाङला हुङ, फीला डो झ्येरी चापाङ ॱङेगीलाक। 10कुमा नी कुरु धाङ सेदु धाङ मेताला ताङदु हुङालाक। ङा नी, घीरीला छे मेछो़ली थोप्येगी क्षीला होवाहीन।
11“ङा नी, लुक्जी शाङपोगो हीन। लुक्जी शाङपोगी लुकक्याई क्षीला, राङगी ॱरोक ॱलो़ ताङालाक। 12ॱलावो नी, लुक्जी च्योक्रे मालाक। च्याङगु हुङगीनगो थोरी, खी़ लुकक्या भोरती डो़री डुगीलाक धेनी च्याङगुगी लुकक्या ठोक्ती ठेथोरी तोरकीलाक। 13होदे मी दे ॱलावो झ्येरी, खी़ लुकक्याला दाक्पो मीग्याबा डो़री डोवालाक।
14-15“ङा नी, लुक्जी शाङपोगो हीन। यापगी ङाला खेन्दालाक। धेनी ङीया यापला ङो स्येलालाक। देरेराङ झ्येरी ङी राङगी लुकक्याला ङोस्येलीहो़क। धेनी ङी लुकक्यागीयाः ङाला ङो स्येलालाक। ङा नी लुकक्याई दो़न्दु, राङगी ॱरोक ॱलो़ ताङाहीन। 16लुक्रा दी मेन्गीन, ङी लुक श्येम्माक्या हो़तालाक। ङी देक्यालाः ठीक घो़गुलाक धेनी देक्याई ङी केक ङेन्गीलाक। धेनी खुङक्या लुकख्यु च्यीकगी झीउ च्यीक झ्युङगीलाक। 17ङी ङाराङगी ॱरोक याङ सो़न्पो थोप्येगी क्षीदु, ङाराङगी ॱरोक ॱलो़ तावी, होझ्येरी यापगी ङाला झाम्पा जेदालाक। 18सी़या ङी ॱरोक ङाने लेन ॱमीथुक्कीलाक। ङाराङगी राङवाङ थोक्ने, दी ॱलो़ ताङाहीन। ङाला राङसोक ॱलो़ ताङयेगी वाङ हो़तालाक। धेनी ॱरोक ॱलाङयेगी वाङ हो़तालाक। ङाला का दे, ङी यापने थोप्पालाक।”
19येशुगी सुङगीन का दे, ङेन्दी याहुदापा पो़न्पोक्या याङ ठुक्पालाक। 20खुङक्याने माङक्षेगी ॱनेवालाक, “खी़ नाङदु डे जुदुक धेनी खो ॱङ्यो़दुक। खेक्या घीझ्येरी खी़ लाबला ङेन्दा?”
21श्येम्माक्याई ॱनेवालाक, “डे जुजा मीगी देरे लाब ॱमेताङालाक। डे च्यीकगी मी श्यारागी ॱमीक पे थुबाले?”
याहुदापाक्याई येशुला ङोलेन माझ्येवा
22घुङगा येरुसालेमदु क्षो़खाङगी ॱङोजाङगी धी़छेनगो ताङी हो़तालाक। 23धेनी येशु क्षो़खाङगी सोलोमोन ॱनागीन ॱयाक्कुरु फेवी घाङला, 24याहुदापा पो़न्पोक्या खोङबागी थाकोरला जोम्दी, खोङला श्यी़वालाक, “खेराङ नाम थुक्पे हेला थेचुम केरु च्युक्ये? खेराङ मास्यीकागो हीन्ना हेला सावो सुङाजे।”
25येशुगी खुङक्याला लेन ॱनावालाक, “ङी खेक्याला स्येछा। हीना खेक्या ङाला यीच्चे मीझ्यीदा। ङी यापगी थोक्ने ङी झ्येजा लेगाक्याई ङाला पाङपो झ्यीदालाक। 26हीना खेक्या ङी लुकख्युने मेन्दा, ङाला यीच्चे मीझ्यीदालाक। 27ङी लुकक्याई ङी केक ङेन्दालाक। धेनी ङी होदेक्याला ङो स्येलीहो़क। धेनी देक्या ङी स्याम्ला डाङालाक। 28ङा देक्याला थामेपे छेसोक तेरयेहीन धेनी देक्या नामा मेताला डोगीमालाक। सी़या देक्याला ङी लाकने ठोक ॱमीथुक्कीलाक। 29ङी यापगी देक्याला ॱनाङालाक धेनी खोङ नी, घीरीने क्षेस्योक हीन। ङी यापगी क्षाकने सी़या देक्याला ठोक ॱमीथुक्कीलाक। 30ङा धाङ याप नी च्यीक हीन।”
31याहुदापा पो़न्पोक्याई, येशुला धोगोङ श्युरयेला धाब्ले धोगोङ धी़वालाक। 32येशुगी खुङक्याला सुवालाक, “यापगी गोने, ङी खेक्याला ले शाङा माङा तो़न्पी। देक्याने घीन्गी क्षीला, खेक्या ङाला धोगोङ श्युरये हीन्नो?”
33याहुदापा पो़न्पोक्याई खोङबाला श्यी़वालाक, “हेक्याई ख्यो़ला ले शाङागी क्षीला, धोगोङ श्युरामेन हीना ख्यो़ मी च्यीक झ्येरीया, राङला को़न्क्षोक चीरी, को़न्क्षोकला कुरवा धेप्कीनगी क्षीला हीन।”
34येशुगी खुङक्याला लेन ॱनावालाक, “खेक्याई क्षो़ठीमला देरे ढीक मीदुये, ‘ङा ॱनाहीन, खेक्या ल्हा लाक।’#सुङगुर ८२:६ 35सुङरापला हो़गीनगो नी, च्योई धेन्पा हीन। को़न्क्षोकगी का थोप्था मीक्याला, ल्हा ॱनेरी को़न्क्षोकगी सुङ हो़ना, 36को़न्क्षोकगी धाम्पा जेदी जीक्तेनदु ॱङाक्ङा ङी, ‘ङा को़न्क्षोकगी से हीन।’ ॱनागीनगोला, खेक्या ङाला को़न्क्षोकला कुरवा धेबी, ॱनेरी घीझ्येरी क्यो़न चुक्वाले? 37यापगी क्षाक्ले ङी माझ्ये हो़ना, ङाला यीच्चे माझ्यी। 38हीना ङी लेगा देक्या झ्येरी, धोराङा खेक्या यी ॱमेछेना, लेगाक्याला यीच्चे झ्यी। होझ्येरी याप ङी नाङदु हो़गीन धाङ ङा यापगी नाङदु हो़गीनगो, खेक्याई ॱहाघोरती स्येलास्योक।” 39खुङक्याई याङ येशुला शीम्ये थापस्यी झ्येवालाक हीना खोङबा खुङक्याई लाकने थारती डो़वालाक।
40खोङबा धाब्ले योरदान चाङबुगी ॱहाकीनला, योहान्नागी एम्मा ठी़सो़ ॱनाङसारु फेप्ती, होदुरु श्युक्पालाक। 41धेनी मी माङा खोङबाचारु च्यारती, खोराङक्या घुङदु ॱनेवालाक, “योहान्नागी ॱहाङसागीन ताक घीया ॱमातो़न्बालाक हीना खोङगी दे मी दी कोरला सुङगीन घीरी धेन्पा दुक।” 42धेनी माङक्षेगी येशुला होदुरु धेपा झ्येवालाक।
Поточний вибір:
योहान्ना 10: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
