योहान्ना 11
11
लाजार ढोङगीनगी कोर
1लाजार ॱनागीन, मी नेपा च्यीक हो़तालाक। खो बेथानी युरु, खोरी ईजी मीरीयाम धाङ मारथामुला धेदालाक। 2चोवोगी श्यापला पो़क्षु ॱलुक्ती, राङगी टागी फीगीन मीरीयामगो मोराङ लाक। मी़ नो लाजार नेपा हो़तालाक। 3धा ईजी ॱङीउगी, येशुला देरे लो़न कुरपालाक, “चोवो, खेराङगी चेवा झ्यीगीनगो नेपा दुक।”
4हीना येशुगी दे सेन्दी सुवालाक, “नाजा दी छीवाला झाङगीमालाक। को़न्क्षोकगी शीजे ॱङो़न्येगी क्षीला धाङ दी थोक्ने, को़न्क्षोकगी सेगी शीजे झ्युङयेगी क्षीला लाक।” 5येशुगी मारथा धाङ मी़ नुमो धाङ लाजारला चेवा जेदालाक। 6हीना लाजार नेपा दुक ॱनेरी लो़नगो सेन्दा जेदीया, खोङबा घारु श्युक हो़सारु धोराङा ङीन ॱङी श्युक्पालाक। 7धा होदे स्याम्ने खोङबागी राङगी ङेनेक्याला सुवालाक, “धा होराङ धाब्ले युदेया युदु डो।”
8ङेनेक्याई खोङबाला श्यी़वालाक, “राब्बी, खासाङ याहुदापा पो़न्पोक्याई खेराङला धोगोङ श्युरये झ्येवालाक। धा याङ खेराङ होदुरु फेप्ये?”
9येशुगी सुवालाक, “ङीनला छुजी च्युङङी मेयोङाले? ङीङमो घोबा ग्याप्कीनक्या थोक्ती, गोती मेलोक्कीलाक घीझ्येरी ॱनाना खुङक्याई जीक्तेनगी हो़ थोवालाक। 10हीना छेनला घोबा ग्याप्कीनक्या थोक्ती, गोती लोक्वालाक घीझ्येरी ॱनाना खुङक्याला हो़ मेतालाक।” 11देक्या सुङसारती खोङबागी खुङक्याला सुवालाक, “होरी ढोक्पो लाजार ॱङी खुक्ती धेदुक। धा ङा सोरी खोला ॱङी सो़दु।”
12ङेनेक्याई खोङबाला श्यी़वालाक, “चोवो, खो ॱङी खुक हो़ना खो ढाक्कीलाक।”
13येशुगी लाजारगी छीवे कोरला सुवालाक हीना खुङक्याई खो ॱङी खुक्गीनगी कोरला सुवालाक ॱनेरी साम्बालाक। 14धा येशुगी खुङक्याला सावो सुवालाक, “लाजार स्यीसा दुक। 15धेनी खेक्या धेपा झ्यीयेगी क्षीला, ङा होदुरु मेता घा झ्युजुङ। धा होराङ खी़ चाला डो।”
16दीदुमोस#११:१६ गीरीक केकला दे ॱनाना छीब्रु लाक। ॱनागीन थोमागी राङगी रोवा ङेनेक्याला ॱनेवालाक, “धा होराङ खोङबामुला स्यीयेला डो।”
येशुगी लाजारगी ईजी ॱङीउला सेम्सो जेपा
17येशु बेथानी युरु ॱलेवी घाङला, खोङबागी लाजार धी़ठोदु बेरी श्याक्मो श्यी डोसागीनगो खेन्बालाक। 18बेथानी दे, येरुसालेमने कीलो सुम चो़ थाक्रीङा हो़तालाक। 19धेनी याहुदापा मी माङा लाजार ढोङरी, खी़ ईजी मारथा धाङ मीरीयाम ॱङीउला सेम्सो पारतु होवालाक। 20मारथागी येशु फेई ॱनागीनगो ॱहाघोरती, खोङबाला ज्यारु फीला सोवालाक हीना मीरीयाम नाङदु धेपालाक।
21मारथागी येशुला श्यी़वालाक, “चोवो, खेराङ दुरु श्युक हो़ना, ङी नो ढोङये मेक। 22हीना धान्दा खेराङगी को़न्क्षोकने घी श्यी़गीनगो, खोङगी खेराङला ॱनाङगीलाक ॱनेरी ङी स्येलीहो़क।”
23येशुगी मोला सुवालाक, “ख्यी़ नो याङ सो़न्पो लाङगीलाक।”
24मारथागी खोङबाला श्यी़वालाक, “थागी ङीनला स्यीम्पो घीरी सो़न्पो ॱलाङी घाङला, खो याङ ॱलार सो़न्पो लाङगीलाक ॱनेरी ङी स्येलीहो़क।”
25खोङबागी मोला सुवालाक, “ॱलार सो़न्गीन धाङ छेसोक नी, ङा हीन। ङाला धेपा झ्यीगीनक्या स्यीनाः सो़न्पो ॱनेगीलाक। 26धेनी ङाला ॱनेगीन धाङ धेपा झ्यीगीनक्या नामा ॱमीस्यीगीलाक। खेक्या देला यीच्चे हो़ते?”
27मी़ खोङबाला श्यी़वालाक, “ला चोवो, खेराङ नी को़न्क्षोकगी से जीक्तेनदु फेप्कीन मास्यीकागो लाक ॱनेरी, ङा धेपा झ्यीदीहो़क।”
28मी़ दे श्यी़सारती मोरी नुमो मीरीयामचारु सोरी मोला शुरला भो़री ॱनेवालाक, “ॱलोपो़न ला दुरु फेप्दुक। धेनी खोङबागी ख्यो़ला भो़ली।” 29धा मीरीयामगी दे घोरती मो लाम्साङ लारी, खोङबाचारु सोवालाक। 30येशु धोराङा युदु ॱमाफेप्पा मारथागी ज्यासारु राङ श्युक हो़तालाक। 31धा खाङबा नाङदु मीरीयामला सेम्सो पारतु हुङगीन, याहुदापाक्याई मो लाम्साङ लारी फीला थो़न्दी डोगीनगो थोरी, मो धी़ठोदु ङुरु डोवा हीन्ढु साम्दी, खुङक्या मी़ स्याम्ला डावालाक।
32धा मो येशु श्युक्सारु ॱलेप्ती खोङबाला ज्यावालाक। धेनी खोङबागी श्यापला क्षाक क्षारी श्यी़वालाक, “चोवो, खेराङ दुरु श्युक हो़ना, ङी नो ढोङये मेक।” 33येशुगी मो धाङ मी़मुला हो़गीन याहुदापाक्या ङुगीनगो शीक्ती, खोङबा ॱमीच्यीकी थुक फाम्दी सेम क्योवालाक। 34धेनी खोङबागी खुङक्याला ढीवा जेपालाक, “खी़ फुङबु घारु श्याक हो़ता?”
खुङक्याई खोङबाला श्यी़वालाक, “चोवो, फेप्ती शीया जे।” 35येशु स्युम्बालाक।
36होझ्येरी याहुदापाक्याई ॱनेवालाक, “तो़दाङ, खोङबागी लाजारला ॱमीच्यीकी झाम्पा जेपालाक।” 37हीना रीङगागी ॱनेवालाक, “श्याराक्याई ॱमीक पे थुप्कीन, खी़ लाजारला स्यीयेने क्योप थुप्ये मेताले?”
येशुगी लाजारला सो़न्पो जेपा
38येशु याङ थुक फाम्दी, धी़ठोदु फेप्पालाक। धी़ठोगो नी डाक्फु च्यीक हो़तालाक। धेनी होदे घोगोला, धोगोङ क्षे च्यीक श्याक हो़तालाक। 39येशुगी सुवालाक, “धोगोङ दी ॱहाला झ्यी।”
स्यीम्पोगी ईजी मारथागी खोङबाला श्यी़वालाक, “चोवो, खो ढोरी श्याक्मो श्यी डी़। धा दे धी़ थुक्पेला ढीमा खीसा हो़टु।”
40येशुगी मोला सुवालाक, “ख्यी़ धेपा झ्यीना को़न्क्षोकगी शीजे थोङहोङ, ॱनेरी ङी ख्यो़ला ॱमानेवी?”
41धा खुङक्याई धोगोङगो ॱहाला झ्येवालाक धेनी खोङबागी चेन या शीक्ती सुवालाक, “ङी याप, खेराङगी ङाला सेन्गीनगोला थुक्चीक्षे श्यी़लाहीन। 42खेराङगी च्योई ङाला सेन्गीनगो ङी स्येलीहो़क। हीना खेराङगी ङाला ॱङाक्पालाक ॱनेरी, दुरु लारी धेता मीक्याई धेपा झ्यीयेला ङा देरे श्युवाहीन।”
43खोङबागी देरे सुङसारती, सुङकेक क्षेला सुवालाक, “लाजार, फीला थो़न्दी स्योक।” 44धा मी स्यीम्पोगो काङबा लाक्पा रेगी धाम्दा धाङ दोङबा रेगी तुम्तालाराङ फीला थो़न्बालाक।
येशुगी खुङक्याला सुवालाक, “खोला टोरी डोरु च्युक।”
येशुला सेयेगी ढो़
(मेथा २६:१-५; मारकु १४:१-२; लुका २२:१-२)
45होझ्येरी मीरीयामचारु होवा याहुदापा माङागी येशुगी दे जेगीनगो थोरी, खोङला धेपा झ्येवालाक। 46हीना रीङगा फारुसीपाक्याचारु सोरी येशुगी घी जेगीनगी कोरला, खुङक्याला स्येपालाक। 47होझ्येरी क्षो़पो़न क्षेक्या धाङ फारुसीपाक्याई छोक्तेन भो़री ॱनेवालाक, “दी मी दे ताक माङा तो़न्दी। धा होराङ घी झ्यीये? 48खोला होराङ देरेराङ झ्यीदु च्युक्ना, मी घीरीगी खोला धेपा झ्यीटु धेनी रोमापाक्या होरी, होरी धाम्पे ॱने धाङ मीरीक ॱङीगारा ठोक्टु।”
49हीना खुङक्याने कायाफा ॱनागीन होदे लोगी चो क्षो़पो़न च्यीकगी खुङक्याला ॱनेवालाक, “खेक्या घीया ॱमेस्येला। 50मी घीरी मेताला डोवाले घीरीगी क्षीला च्यीक स्यीना, घा हीन्गीनगो खेक्या ॱमेस्येलाले?” 51दे लाब दे खी़ खोराङगी थोक्ने स्येदा मेन्दा, होदे लोगी चो क्षो़पो़न झ्येरी, याहुदापे मीरीक क्षीला येशु ढोङ घो़गुलाक ॱनेरी, खी़ ॱङो़न स्येपालाक। 52धेनी याहुदापे मीरीक क्षीला च्यीगा मेन्दा थोरती धेता, को़न्क्षोकगी से धाङ सेमोक्या च्यीकदु धी़येगी क्षीला स्येपालाक। 53होझ्येरी दे ङीमाने झ्येरी, याहुदापा पो़न्पोक्याई येशुला सेयेला झ्यी़ङेन तीवालाक। 54होझ्येरी येशु याहुदापाक्याई घुङदु ॱङो़न्सुमदु नामा ॱमाफेप्पालाक। खोङबा होदेने फेप्ती रीतोङगी ङ्येला हो़गीन, एफराईम ॱनागीन युदु राङगी ङेनेक्यामुला श्युक्पालाक।
55याहुदापाक्याई पेसाकगी धी़छेनगो ङे ॱलेवी हो़तालाक धेनी पेसाकगी धी़छेन गो चुक्ये एन्ला, यु-युने मीमाङक्या येरुसालेमदु राङ-राङला चाङडागी ॱरो ॱरुङयेला हो हो़तालाक। 56क्षो़खाङगी नाङ जोमी घाङला, खुङक्याई येशुला चाली हो़तालाक। धेनी खोराङक्या नाङदु देरे ॱनेवालाक, “खेक्या घी सामी हो़तो? खो धी़छेन देला ॱलेप डी़?” 57धा क्षो़पो़न क्षेक्या धाङ फारुसीपाक्याई येशुला शीम्येगी क्षीला, खो घारु हो़गीनगो सी़ ॱहाघोरना, खी़ खुङक्याला लो़न तेरयेला का ॱनावालाक।
Поточний вибір:
योहान्ना 11: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
