योहान्ना 9
9
येशुगी श्यारा च्यीकला चो़गा जेपा
1धेनी येशु लामने फेई घाङला, खोङबागी केने ॱहाला श्यारा हीन्गीन मी च्यीकला शीक्पालाक। 2धेनी खोङबागी ङेनेक्याई खोङबाला श्यी़वालाक, “राब्बी, मी दे श्यारा केगीनगो, खी़ धीक्पा झ्येरी ले याङना खी़ फामी धीक्पा झ्येरी ले?”
3येशुगी सुङा जेपालाक, “मी दी धीक्पा झ्येरी मालाक धेनी खी़ फामे धीक्पा झ्येरीयाः मालाक हीना को़न्क्षोकगी क्षाक्ले, खी़ नाङने ॱङो़न्दु जेयेगी क्षीला झ्युवालाक। 4ङाला ॱङाक्कीनगी क्षाक्ले दे, ङीङमो हो़ती घाङलाराङ झ्यीघो़। छेन स्यारकीन धी़ला सी़या लेगा झ्यी ॱमीथुप। 5ङा जीक्तेनदु हो़गीन थुक्पे, ङा जीक्तेनगी हो़ हीन।”
6दे सुङसारती खोङबागी साला जाक्छाप तोरती, होदे जाक्छापने दाम्बाक जेपालाक। धेनी होदे दाम्बाकगो होदे मीगी़ ॱमीकला की़ जेपालाक। 7धेनी खोला सुङा जेपालाक, “सोङला, सीलोआमगी जीङुला ठी़।” (सीलोआम ॱनाना “ॱङाक्पा” लाक) होझ्येरी खो सोरी ठी़वालाक धेनी थोङगीन झ्युरी लोक्ती होवालाक।
8धा खीम्चेक्या धाङ खोला एम्माने ॱलोङगीन झ्येरी थोङ ङ्युङगीनक्याई ॱनेवालाक, “दे ॱलोङमो ॱलाङदी धेगीन मीगो माले?” 9रीङगागी “खोराङ लाक” ॱनेरी ॱनेवालाक धेनी श्येम्माक्याई “खो मेन्दा खो च्योक्रे मी लाक” ॱनेरी ॱनेवालाक। धेनी खी़ “ङा होदे मीराङ हीन” ॱनेरी ॱनाजीङ झ्येवालाक। 10होझ्येरी खुङक्याई खोला “ख्यी़ ॱमीक घाङगी झ्येरी भेवाले?” ॱनेरी ढीवालाक।
11खी़ ॱनेवालाक, “येशु ॱनागीन मीगी़ दाम्बाक शो़री, ङी ॱमीकला की़जुङ धेनी ङाला ‘सीलोआम जीङुला सोरी ठी़।’ सुरी सुजुङ। होझ्येरी ङा सोरी ठी़वी धेनी थोङगीन झ्युजुङ।”
12खुङक्याई खोला ढीवालाक, “खो घारु हो़ताले?”
धेनी खी़ “ङाला स्येयेमेक।” ॱनेरी ॱनेवालाक।
फारुसीपाक्याई ढीवा
13धेनी खुङक्याई एम्मा श्यारा हो़गीन मी देला फारुसीपाक्याई दोङदु ठीक्पालाक। 14धा येशुगी दाम्बाक जेदी, मी दी ॱमीक सोवा जेगीन ङीमोगो ङासुगीन ङीमागो लाक। 15होझ्येरी फारुसीपाक्याई खोला याङदा घाङगी झ्येरी खी़ ॱमीक थोवाले ॱनेरी ढीवालाक। धेनी खी़ ॱनेवालाक, “खोङगी ङी ॱमीकला दाम्बाक की़ जेजुङ धेनी ङी ठी़री ॱमीक थोजुङ।”
16फारुसीपा रीङगाक्याई ॱनेवालाक, “मी दी ङासुगीन ङीमागो ॱमारुङवा, दे मी दे को़न्क्षोकने मालाक।”
हीना श्येम्माक्याई ॱनेवालाक, “मी धीक्चेन च्यीकगी देरे ताकक्या घाङगी झ्येरी झ्यी थुक्वाले?” धेनी होदुरु मीक्या खाक ॱङीला भेवालाक।
17होझ्येरी खुङक्याई धाब्ले होदे श्यारागोला ढीवालाक, “होदे मीगी ख्यी़ ॱमीक सो़री, धा ख्यो़ खी़ कोरला घी सामी हो़तो?”
खी़ ॱनेवालाक, “खोङ ॱङो़नस्येखेन च्यीक लाक।”
18थोङगीन झ्युजा मीगी़ फामाक्याला भो़री, ढीवा माझ्ये थुक्पे याहुदापाक्याई खो एम्मा श्यारा हीन्गीन धाङ स्याम्ला थोङ थुक्कीन झ्युजागोला यीच्चे माझ्येवालाक। 19धेनी खुङक्याई खी़ फामाला ढीवालाक, “खेक्याई ॱनागीन केने ॱहालाराङ श्यारा हीन्गीन दे, खीकी भीजा ले? धा हाना खो घाङगी झ्येरी थोङगीन झ्युवाले?”
20खी़ फामागी ॱनेवालाक, “दे हीकी भीजा लाक धेनी खो केली घाङला श्यारा हो़तालाक ॱनेरी, हेला स्येयेहो़क। 21हीना धान्दा खो घाङगी झ्येरी थोङगीन धाङ सी़ खी़ ॱमीक पेवाले ॱनेरी, हेला स्येयेमेक। खो ॱनाटो ॱङेसाहो़क। खोलाराङ ढी। खोरी क्षीला खी़राङ स्येगीलाक।” 22खी़ फामागी याहुदापा पो़न्पोक्याला जीक्ती देरे ॱनेवालाक। घीझ्येरी ॱनाना येशुला मास्यीका ॱनेरी खेलेन्गीनक्याला छोक्खाङने पी़दी जाङयेगी ढो़, याहुदापा पो़न्पोक्याई एन्लाराङ थाक च्यो़ हो़तालाक। 23होझ्येरी खी़ फामागी “खो ॱनाटो ॱङेसाहो़क। खोलाराङ ढी।” ॱनेरी ॱनेवालाक।
24होझ्येरी खुङक्याई एम्मा श्यारा हीन्गीन मीगोला याङ भो़री ॱनेवालाक, “को़न्क्षोकगी डुङदु धेन्पा स्यो़क। मी दे नी, धीक्चेन च्यीक लाक ॱनेरी हेक्याला स्येयेहो़क।”
25धेनी खी़ ॱनेवालाक, “खो धीक्चेन च्यीक हीन-मेन ङाला स्येयेमेक। ङी स्येये हो़गीनगो ङा एम्मा श्यारा हो़क धेनी धान्दा ङी थोङी।”
26खुङक्याई खोला ॱनेवालाक, “खी़ ख्यो़ला घी झ्येजो? खी़ ख्यी़ ॱमीक घाङगी झ्येरी पेजो?”
27खी़ ॱनेवालाक, “ङी खेक्याला स्येसा हीना खेक्या मेङेन्दा। खेक्या घीझ्येरी धाब्ले ङेन्ङी दो़दाले? खेक्याः खोङगी ङेने झ्युङङी दो़दे?”
28धेनी फारुसीपाक्याई खोला थोङछुङ तारी ॱनेवालाक, “ख्यो़ खी़ ङेने लाक हीना हेक्या मोशेगी ङेने हीन। 29को़न्क्षोकगी मोशेला कामो़न सुङगीनगो हेक्याला स्येयेहो़क हीना दे मी दे घाने हुङगीनगो हेक्याला स्येयेमेक।”
30धेनी होदे मीगी़ ॱनेवालाक, “खेन्छाला, खो घाने फेप्कीनगो खेक्याला स्येये मीदुक हीना खी़ ङी ॱमीक पेवालाक। 31को़न्क्षोकगी धीक्चेनक्याई ॱमो़लाम ॱमेसेन्दालाक हीना खोङबाला ॱङीङकुर झ्यीगीन धाङ खोङबागी थुकोङ डुप्तु च्युक्कीनक्याला, खोङबागी सेन्दालाक ॱनेरी होराङक्याई स्येलालाक। 32जीक्तेनगी थोक्माने, केने ॱहाला श्यारा हीन्गीनगी ॱमीक सो़दुक ॱनागीन, देरे लाब घोर माङ्युङ। 33धा मी दे को़न्क्षोकने मेन्ना, खी़ घीया झ्यी थुक्येमेक।”
34खुङक्याई खोला ॱनेवालाक, “ख्यो़ केली घाङलाराङ धीक्चेन झ्येरीया, ख्यो़ हेक्याला ॱलापच्या ग्याले?” धेनी खुङक्याई खोला छोक्खाङने तो़न्दी झावालाक।
सेम्ङीने थोङ ॱमीथुप्कीन
35याहुदापा पो़न्पोक्याई होदे मी श्यारागोला तो़न्दी झादुक ॱनेरी, येशुगी सेन्दा जेपालाक धेनी खोङबागी खोला चारी धेनी ॱङेदी सुवालाक, “ख्यो़ मी-भुला धेपा झ्यीदी हो़ते?”
36खी़ श्यी़वालाक, “चोवो, ङा खोङबाला धेपा झ्यीयेगी क्षीला खोङबा सुले, ङाला सुङरोजे?”
37येशुगी खोला सुवालाक, “ख्यी़ खोङबाला थोङ ङ्युङ हो़तालाक। ख्यी़मुला लाब ताङगीनगोराङ, खोङ हीन।”
38खी़ ॱनेवालाक, “चोवो, ङा धेपा झ्यीदीहो़क।” धेनी खी़ खोङबाला क्षाक छावालाक।
39येशुगी सुवालाक, “दे जीक्तेनदु ङा ठीम चेदु होवाहीन। श्याराक्याई थोङये धाङ थोङ थुयी साम्गीनक्याला श्यारा शोयेला, ङा होवाहीन।”
40धेनी खोङबागी डामला हो़गीन फारुसीपा रीङगाक्याई दे घोरती खोङबाला श्यी़वालाक, “हेक्याः श्यारा लाक से?”
41येशुगी खुङक्याला सुङा जेपालाक, “खेक्या श्यारा हीन्ना, खेक्याला धीक्पागी क्यो़न फोक्येमेक। हीना धान्दा खेक्याई ‘हेक्या थोङी’ ॱनेरी खेक्याई क्यो़नगो लेगीलाक।”
Поточний вибір:
योहान्ना 9: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
