जेपा 3
3
पेटोगी मी श्याक्योवा च्यीक चो़गा झ्येवा
1ङीमा च्यीक पेटो धाङ योहान्ना घोमो छुची सुबा चो़ला, क्षो़खाङदु सोवा ग्याप्तु डी़ हो़तालाक। दे सोवा ग्याप्कीनगी धी़चो़ लाक। 2क्षो़खाङगी घो जेवा ॱनागीनगोरु, केने ॱहालाराङ श्याक्योवा हो़गीन मी च्यीक धेदालाक। मीक्याई खोला ङीमा च्योई खुरती होदुरु खेरती हुङालाक। खो क्षो़खाङदु हुङगीन डुगीन मीक्यामुला ॱलोङमो ॱलाङालाक। 3पेटो धाङ योहान्नाला क्षो़खाङदु डुगीनगो थोरी, खी़ खुङक्यालाः ॱलोङमो ॱलावालाक। 4खुङक्याई खोला घामोमा तेवालाक। धेनी पेटोगी खोला ॱनेवालाक, “हे स्योकला तो़दाङ।” 5दे ॱहाघोरती खी़ च्यीक रे थोवी हो़टु साम्दी तेवालाक।
6पेटोगी खोला ॱनेवालाक, “ङाला सेर धाङ ॱङु नी मेक हीना ङाला घी हो़गीनगो, होदे ङा ख्यो़ला तेरयेहीन। नाजारेतगी येशु मास्यीकागी छेनने लारी घोबा चुक।” 7धेनी खी़ होदे मीला लाक्पा ॱयेने शीम्दी ॱलावालाक। होदे घाङलाराङ होदे मीगी काङबा धाङ काङबी भो़ल्छीकगो ढाक्पालाक। 8धेनी खो लाम्साङ फाक्ती लारी घोबा चुक्पालाक। धेनी खो घोबा चुक्ती धेनी छोङदा ग्यावी, को़न्क्षोकला तो़टा ताङी खुङक्यामुला क्षो़खाङ नाङदु सोवालाक। 9होझ्येरी नाङदु जुरी मी घीरीगी खोला घोबा चुक्कीन धाङ को़न्क्षोकला तो़टा पुगीनगो थोवालाक। 10क्षो़खाङगी जेवा ॱनागीन घोरु धेदी ॱलोङमो ॱलाङगीन, खोराङ लाक ॱनेरी, होदेक्याई खोला ङोस्येवालाक। धेनी “खो घाङ झ्येरी घोबा चुक्कीन झ्युवाले?” ॱनेरी, होदेक्या ॱमीच्यीकी ॱहालेवालाक।
क्षो़खाङदु पेटोगी लाब स्येपा
11पेटो धाङ योहान्नागी स्याबाला, होदे चो़गा झ्युजा मीगो डारी ग्युक्कीनगो थोरी, मी घीरी ॱहाङसारी सोलोमोन ॱनागीन, ॱयाक्कुरु भाङ तारी होवालाक। 12होदे मीक्याला थोरी पेटोगी ॱनेवालाक, “खे ईस्राएल्पाक्याओ, खेराङक्या घीझ्येरी दे लाबला ॱहाङसारी हेला तेरी धेदाले? हेक्याई दे मी देला हेरी नी़थु धाङ क्षो़सेमगी घोबा चुक्कीन शो़वालाक ॱनेरी, खेक्या साम्यी हेती? 13देरे मालाक होरी धाङबी मेमे आब्राहाम धाङ ईसाक धाङ याकोबगी को़न्क्षोकगीराङ, राङगी श्याप्ची येशुला तो़टा जेसुङ। खेराङक्याई येशुला सेक घोगीलाक ॱनेरी, ची ग्याप्पालाक। धेनी पीलातुगी खोङबाला घीन्दा मीझ्यीदा भोरये झ्यीदी घाङलाः, खेराङक्याई खेलेन माझ्येजुङ। 14खेक्याई धाम्पा धाङ ढाङपोगोला ग्याप ॱलोक्ती, खोङबागी छापला मी सेगीन च्यीकला ॱलो़ तोङ ॱनेरी श्युजुङ। 15छेसोक ॱनाङगीनगोला खेराङक्याई सेजुङ। हीना को़न्क्षोकगी खोङबाला छीवाने सो़न्पो श्याङ जेजुङ। दे लाबगी पाङपो हेक्या हीन। 16खेक्याई थोङगीन धाङ ङोस्येगीन दे मी श्याक्योवा देला, येशु छेनला धेपा झ्येरी स्युक जोरपालाक। येशुगी छेन धाङ खोङगी थोक्ने झ्युङगीन धेपागी झ्येरी, खो चो़गा झ्युवालाक ॱनेरी खेराङक्या घीरीगी थोङालाक।
17“ङी रोवाक्याओ, ङाला क्षाहो़क, खेराङ धाङ खेराङक्याई पो़न्पोक्याई राङ घी झ्यीगीनगो ॱहामाघोरा, येशुला सेपालाक। 18हीना मास्यीकागी दुक्पु खुर घोवालाक सुरी, को़न्क्षोकगी एम्माने हाला ॱङो़नस्येखेन घीरीगी थोक्ने सुङगीनगो, देरे झ्येरी डुपा जेपालाक। 19होझ्येरी धा खेराङक्या राङगी धीक्पा पारी सेम ग्युरवा तोङ धेनी को़न्क्षोक चारु लोक्ती स्योक। धेनी खोङबागी खेराङक्याई धीक्पा घीरी चाङमा जेगीलाक। देरे झ्येरी खेराङक्याला को़न्क्षोकने सेम नाङदु कीदा धाङ स्युक जोरकीलाक। 20खेराङक्याई क्षीला दाम्दा थारपा ॱनाङगीन मास्यीकाला, को़न्क्षोकगी झाङा जेगीलाक। खोङबागो येशुराङ लाक। 21हीना एम्माने हाला धाम्पा ॱङो़नस्येखेनक्याई सुङगीन च्योक्रे, को़न्क्षोकने घीरी साबा जेगीन धी़चो़ मायोङ थुक्पे, येशु नाम्खे श्यीङखामदु राङ श्युक घोगीलाक। 22मोशेगीयाः देरे झ्येरी सुङ हो़तालाक,
‘चोवो ख्यी़ को़न्क्षोकगी खेक्याई क्षीला खेक्याई री़जाने,
ङा च्योक्रे ॱङो़नस्येखेन च्यीक झाङगीलाक,
खोङबागी सुङगीन लाब घीरी खेक्याई ङेन घोगीलाक।#काठीम १८:१५,१८
23खोङबागी लाब मेङेन्गीन मीक्या,
को़न्क्षोकगी मीक्याने खा टागीलाक,
धेनी मेताला ताङगीलाक।’#काठीम १८:१९
24“सामुएल धाङ खो स्यामगी ॱङो़नस्येखेन घीरीगी, धीरीङ झ्युजा दे लाबक्याई कोरला सुङ हो़तालाक। 25ॱङो़नस्येखेनक्याने ॱनाङना को़न्क्षोकगी धाम्चाक्या, खेराङक्याई क्षीलाराङ लाक। धेनी को़न्क्षोकगी खेराङक्याई धाङबी फामाक्यामुला श्याकश्या धाम्चागो, खेराङक्याई छीलाः लाक। होरी मेमे आब्राहामला को़न्क्षोकगी ‘ख्यी़ टुवाक्याने ङा जाम्बुलीङगी मीरीक घीरीला झ्यीलाप तेरयेहीन।’ ॱनेरी सुङ हो़तालाक।#को़पा १२:३;२२:१८;२६:४ 26खेक्याला खेरी झ्यावा ङेन्पाने ॱलोक्ती, होदे झ्यीलाप ॱनाङयेला, को़न्क्षोकगी राङगी दाम्दा श्यीप्ची येशुला घोमा खेक्याचारु झावालाक।”
Поточний вибір:
जेपा 3: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
