जेपा 2
2
धाम्पे थुक्ङी फेप्पा
1याहुदापाक्याई ङीमा ॱङापच्युपा धी़छेन ॱलेप्कीन ङीमाला, चोवो येशुला धेपा-झ्यीगीन मीक्या घीरी साजा च्यीकला रुप्ती, धे हो़तालाक। 2होदे घाङला ॱहाताक्पाला ॱनामने ॱमीच्यीकी क्षे ॱलुङबु च्योक्रे केक ग्याप्पालाक धेनी होदे केकगी खुङक्या धेता खाङबागो खावालाक। 3धेनी मेगी च्येमोक्या च्योक्रे, थोङगीन खुङक्याचारु थोवालाक। होदे मेगी च्येमोक्या दुबु-दुबु झ्युरी, होदुरु हो़गीन मी घीरीगी खाला भाप्पालाक। 4धेनी खुङक्या घीरी धाम्पे थुक्ङीगी खावालाक धेनी धाम्पे थुक्ङीगी केरीक श्येम्मा श्येम्माला लाब ताङयेला, खुङक्याला रोवा जेपालाक।
5होदे धी़चो़ला येरुसालेमदु जाम्बुलीङगी साजा श्येम्मा-श्येम्माने, क्षो़ला चीगीन याहुदापा मीक्या हो हो़तालाक। 6देरे फेरा ॱहाघोरती, मीक्या छोक घीरीने लारी होवालाक। धेनी होदुरु ॱमीच्यीकी क्षे मीमाङ जोम्बालाक। होदुरु होवा याहुदापाक्याई मीरी-मीरीगी केक ग्याप्कीनगो ॱहाघोरती, खुङक्या ॱहाङसावालाक। 7धेनी खुङक्या ॱमीच्यीकी ॱहालेरी ॱनेवालाक, “दे लाब ताङगीन, मीक्या घीरी गालीलपा मीक्या माले? 8देरे हीन्ना खुङक्याई होरी केक ग्याप्कीनगो, होराङ घाङगी झ्येरी घोराले? 9होराङक्या पारथाक्या धाङ मेदेक्या धाङ एलाम्पाक्या धाङ मेसोपोटामीयागी मीक्या धाङ युदेयाक्या धाङ कापादोकीया धाङ पोन्तु धाङ एशीया धाङ 10फारुगीया धाङ पामफीलया धाङ एजेप ग्याखाप धाङ कुरेनेगी थामाक्याई, लीबीयागी ग्याखाप धाङ रोम ग्याजागी मीक्या, 11याहुदापा धाङ याहुदापा क्षो़ला ग्युरग्युवा मीक्या ॱङीगारा धाङ केरेट धाङ आराब ग्याखापने, होवा मीक्या लाक। को़न्क्षोकगी जेजा ॱहाङसागीन क्षालेक्याई कोरला, खुङक्याई होरी केकला स्येगीनगो होराङक्याई घोरी।”
12होझ्येरी ॱहाङसारी धाङ गो थोम्दी, खुङक्याई च्यीकगी च्यीकला, “दी दो़न्दाक दे घी ले?” ॱनेरी ढीवालाक।
13हीना मी रीङगागी खुङक्याला ॱमेज्यु तारी ॱनेवालाक, “देक्या नी ॱमीच्यीकी छ्याङ थुरी शीवाराक।”
पेटोगी कालोप स्येपा
14धेनी पेटो श्येम्मा कुछाप च्युक च्यीकक्यामुला लारी, घीरीगी ॱहाघोर थुप्कीन झ्येरी ॱनेवालाक, “खे याहुदापा रोवाक्या धाङ येरुसालेमदु धेगीन मीक्याओ, दुरु घी झ्युङगीनगो ङा खेराङक्याला ॱनायेहीन। धा ङी ॱनाये झ्यीगीन लाबक्या, घामोमा श्यीप्ता झ्येरी ङेन्रोनाङ। 15खेराङक्याई साम्गीन च्योक्रे, दे मीक्या माशी हो़तालाक घीझ्येरी ॱनाना धान्दा ॱङारोकगी छुची घुवा च्यीका शीङ दुक। 16हीना दे लाब झ्युङगीलाक ॱनेरी, ॱङो़नस्येखेन योएलगी क्षो़ठीमगी धेपला देरे ढीक हो़तालाक,
17को़न्क्षोकगी सुङालाक,
‘थामागी ङीमाक्याला, ङा मी घीरीगी खाला ङी थुक्ङी तेरयेहीन,
धेनी खेक्याई भीजा-भोमोक्याई ॱङो़न स्येगीलाक,
ख्योक्तोङक्याई थोङनाङ थोङगीलाक,
धेनी घेबो-घेमोक्याई ॱमीक्लाम ॱमीक्कीलाक।
18होदे ङीमाक्याला ङाला श्याप्तोक पुगीन, केवे-फो धाङ मोक्या खाला,
ङी थुक्ङी तेरयेहीन,
धेनी खुङक्याई ॱङो़न स्येगीलाक।
19ॱनामदु ङा ॱहाङसागीन लेगाक्या तो़न्येहीन,
धेनी होकगी जाम्बुलीङदु ताकक्या तो़न्येहीन,
होदुरु ठाक धाङ मे धाङ धीबागी ॱरीङबा थोङगीलाक।
20चोवोगी होदे खाक्क्षे धाङ शीजेक्षे ङीमा हुङगीन एन्ला,
ङीमा मी़नाक्पा झ्युरी डुगीलाक धेनी दावा ठाक च्योक्रे ॱमाउ झ्युङगीलाक।
21हीना होदे घाङला चोवोगी मीङ भो़गीनक्या घीरीला, थारपा थोप्कीलाक।’#योएल २:२८-३२
22“ईस्राएल्पा मीक्याओ, ङी लाब ङेन्रोनाङ, नाजारेतगी येशुने को़न्क्षोकगी खेराङक्याई घुङदु स्युक क्षेन्बो धाङ ॱहाङसागीन लेगाक्या झ्येरी, धेनी ताकक्या तो़न्गीनगो खेराङक्याला क्षा हो़तालाक। होदेक्याने को़न्क्षोकगी येशुला खेराङक्याई घुङदु झावाहीन ॱनागीन, पाङपोगो तो़न्दा जेपालाक। 23को़न्क्षोकगी राङगी ढो़ धाङ ॱङो़नस्ये च्योक्रे, येशुला खेराङक्याई लागाला ॱनावालाक धेनी खेराङक्याई खोङबाला ग्याङस्यीङदु सेयेला, मी ङेन्पाक्याई लागाला ची ग्याप्पालाक। 24हीना को़न्क्षोकगी खोङबाला छीवाने सो़न्पो श्याङा जेपालाक। को़न्क्षोकगी खोङबाला छीवे स्युकने खा टा जेपालाक घीझ्येरी ॱनाना छीवे स्युकगी खोङबाला च्योई शीम्दी श्याक ॱमीथुक्वालाक। 25ग्यावु दावीदगीयाः खोङबागी कोरला देरे सुङ हो़तालाक,
‘ङी चोवोला च्योई ङी दोङदु थोङहो़क।
खोङबा ङी लागा ये स्योकला श्युकहो़क,
होझ्येरी ङा जीक घोये मेक।
26होझ्येरी ङा सेम नाङनेराङ ङ्यामो घा हो़क,
धेनी ङी खाने थो़न्दा, छीकक्याई खोङबाला तो़टा पुलीहो़क।
धेनी ङी ली़गी खोङबाला रेवा झ्येरी धेदीहो़क।
27घीझ्येरी ॱनाना खेराङगी ङी सेम धी़ठोदु बोरकीमालाक,
खेराङगी धाम्पे मीगी फुङबु रु-रु च्युक्कीमालाक।
28खेराङगी ङाला मीछे पी़येला लाम्तो़न ॱनाङसोङ।
खेराङगी डुङदु ङा घाटोगी खाङगीलाक।’#सुङगुर १६:८-११
29“पी़नक्याओ, होरी मेमे दावीद नी ढोवालाक धेनी धी़ठोदु कुङबालाक धेनी खोङगी धी़ठो धान्दा थुक्पे हो़तालाक ॱनेरी, ङा ॱलोगोक झ्येरी खेक्याला ॱनाथुक्ई हो़क। 30हीना दावीद ॱङो़नस्येखेन लाक धेनी खोङगी ग्युपाक्याने च्यीक, खोङगी श्युक्ठीला श्युक्कुलाक ॱनेरी, को़न्क्षोकगी जेजा धाम्चागो खोङला स्येये हो़तालाक। 31झ्युङये हीन्गीन लाबगो एन्दुरु थोथा झ्येरी, दावीदगी येशु मास्यीका छीवाने ॱलार सो़न्गीनगी कोरला स्येपालाक। धेनी मास्यीका नी छीवागी खोकला माभोरपालाक धेनी खोङगी फुङबु रु-रु ॱमाच्युक्पालाक, सुरी दावीदगी सुवालाक।
32“धा खोङराङ येशुला को़न्क्षोकगी छीवाने सो़न्दु च्युक्पालाक। धेनी दे लाबगी पाङपोगो होराङ घीरी हो़क। 33याप को़न्क्षोकगी येशुला थोस्योक को़री, खोरी क्षाक ये स्योकला श्याक जे हो़तालाक धेनी खोरी धाम्चा च्योक्रे, खोङबाला धाम्पे थुक्ङी ॱनावालाक। होदे धाम्पे थुक्ङी चोवो येशुगी धान्दा, होराङक्या खाला ॱनाङ जेपालाक। होदे लाबगो खेराङक्याई धान्दा ॱहाघोरये धाङ थोङी हो़तालाक। 34-35घीझ्येरी ॱनाना दावीद नाम्खे श्यीङखामला ॱमाफेप्पालाक। घीहीन्ना खोङगी देरे सुवालाक,
‘को़न्क्षोकगी ङी चोवोला सुङा जेपालाक,
ख्यो़ ङी लाक्पा ये स्योकला धो़क,
ङी ख्यी़ डा घीरीला,
ख्यी़ काङबी होकला माश्याक्कीन थुक्पे धो़क।’#सुङगुर ११०:१
36“होझ्येरी धा ईस्राएलगी मी घीरीगी दे लाब ॱहाघो घोगुलाक। खेराङक्याई ग्याङस्यीङदु सेसा येशुला राङ को़न्क्षोकगी, चोवो धाङ मास्यीका ङीगारा को़ जे हो़तालाक।”
37पेटोगी ॱनागीन लाब ॱहाघोरती मीक्याई सेम कीदा माझ्युवालाक। धेनी खुङक्याई पेटो धाङ श्येम्मा कुछापक्याला ढीवालाक, “पी़नक्याओ, देरे हीन्ना धा हेक्या घी झ्यीये?”
38धेनी पेटोगी ॱनेवालाक, “खेराङक्या घीरीगी राङगी धीक्पा पारी सेम ग्युरवा तोङ धेनी येशु मास्यीकागी छेनने ठी़सो़ श्यी़। धेनी खेराङक्याई धीक्पाने घोयाङ थोप्कीलाक धेनी को़न्क्षोकगी धाम्पे थुक्ङीगी ॱङेन्बा राक्कीलाक। 39दे धाम्चागो खेराङ धाङ खेराङक्याई टुवाक्या धाङ थाक्रीङाला हो़गीन घीरीगी क्षीला लाक। धेनी चोवो होरी को़न्क्षोकगी भो़गीन घीरीगी क्षीदु लाक।”
40पेटोगी खुङक्याला ॱमीच्यीकी माङा लाबक्या ॱनेरी पाङपो तेरपालाक। धेनी होदेक्याला च्याक ग्याप्ती ॱनेवालाक, “धीक्जाङगी मीरीक धुकच्यागी खाला हुङगीन क्षेपाने ख्यो़ ख्यो़राङला क्योप।” 41मी ॱमीच्यीकी माङागी पेटोगी ॱनेना लाबला यीच्चे झ्येवालाक धेनी ठी़सो़ लेन्बालाक। धेनी होदे ङीमागो मी तोङ सुम चो़, खुङक्याई ढाङगाला दोम्बालाक। 42धेनी खुङक्या कुछापक्याई क्षो़ला ङेन्ये धाङ मुला जोम्ये धाङ ग्याङगा च्याक्ये धाङ सोवा ग्याप्ये च्योक्रे, लेगाक्या मुला झ्यीदालाक।
चोवो येशुला धेपा झ्यीगीनक्याई मीछे
43कुछापक्याई ॱहाङसागीन लेगाक्या झ्येरी, ॱमीच्यीकी माङा ताकक्या तो़न्दालाक। देरे झ्युङी घाङला मी घीरीगी खाला को़न्क्षोकगी जीक्नाङ केवालाक। 44चोवोला धेपा झ्यीगीनक्या च्योई मुला थुवालाक। खुङक्याला हो़गीन घीरी पी़मा हुङालाक। 45खुङक्या खोरी सा धाङ ग्युनोरक्या चोरी, च्यीकगी च्यीकला घो़गीनगो घोवालाक। 46धेनी ङीमा च्योई खुङक्या क्षो़खाङदु जोमालाक। धेनी नाङ-नाङदु जोम्दी, ङ्यामो घेरी क्षाबोमा झ्येरी शामा शालाक। 47धेनी च्योई को़न्क्षोकगी तो़टा ताङालाक। श्येम्मा मीक्याईयाः खुङक्याला सेम्बा थेदालाक। थारपा राक्राक्याई ढाङगा, होदेक्याई खोक्दु ङीमा च्योई चोवोगी माङदु जेपालाक।
Поточний вибір:
जेपा 2: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
