जेपा 1
1
1थेउफीलु ला, येशुगी क्षाले जेयेला गो चुक्कीनने, खोङबा नाम्खे श्यीङखामदु ॱमाफेप्कीन थुक्पे झ्युजा लाब घीरी, ङी खेराङला कुरका एन्योकगी धेपला ढीक्सा हो़क। 2येशुगी नाम्खे श्यीङखाम फेप्ये एन्ला राङगी दाम्दावा कुछापक्याला, धाम्पे थुक्ङीगी स्युकने का ॱनावालाक। 3दुक्पु ङ्याङदी ग्याङस्यीङदु ढोङवा जेदी, खोङबा श्याक्मो श्यीपच्यु थुक्पे धी़-धी़ला होदेक्या चारु ज्यावालाक। धेनी ॱना श्येम्मा-श्येम्मागी धेन्पा पाङपोक्या तो़न जेदी, खोराङला सो़न्पो तो़न जेपालाक। होदेक्याई खोङबाला थोवालाक। धेनी खोङबागी होदेक्यामुला को़न्क्षोकगी ग्याखापगी कोरला कामो़न सुवालाक।
4थेङमा च्यीक येशु होदेक्यामुला जोम्दी श्येलाक श्येयेला श्युक्यी घाङला, खोङबागी होदेक्याला देरे का ॱनावालाक, “खेक्या येरुसालेम माबोरा, ङी यापगी धाम्चा जेजागोला घुक्ती धो़क। होदे धाम्चागी क्षीला ङी खेक्याला एन्दुरु ॱनेवी, 5योहान्नागी क्षुगी ठी़सो़ तेरपालाक हीना श्याक्मो तीते स्याम्ने खेक्याला धाम्पे थुक्ङीगी ठी़सो़ थोप्कीलाक।”
येशु नाम्खे श्यीङखामदु फेप्पा
6होझ्येरी जोमी घाङला, होदे दाम्दा कुछापक्याई खोङबाला ढीवालाक, “चोवो, खेराङगी धान्दाराङ ईस्राएलगी ग्याखापला धाब्ले सो़ जेये हीन्ने?”
7येशुगी होदेक्याला सुवालाक, “दे धी़ धाङ ॱनामधी़ यापगी राङगी आङजाने ढीक्सा हो़तालाक, होझ्येरी खेक्याई होदे स्ये घो़गुमालाक। 8हीना धाम्पे थुक्ङी खेराङक्याई खाला फेप्ती, खेक्याला स्युक जोरकीलाक। होदे स्याम्ने, खेक्या येरुसालेम धाङ युदेया धाङ सामारीयागी साजा घीरीला धेनी जाम्बुलीङगी था थुक्पे, ङी पाङपो झ्युङगीलाक।” 9हो़जो़ सुङा जेदी होदेक्याई तेरी धेदाराङ, येशु ॱनाम स्योकला खेरा जेपालाक। धेनी खोङबाला ॱरीङबागी काप्ती, खोङबा होदेक्याई थोङसाने ये जेपालाक।
10होदेक्या ॱनाम स्योकला तेरी धेदी घाङला, घोलाक काउ घो़न्गा मी ॱङी ॱहाताक्पाला, होदेक्याई दोङदु थोवालाक। 11होदे मी ङीउगी ॱनेवालाक, “खे गालीलगी मीक्याओ, खेक्या घीझ्येरी लारी ॱनाम स्योकला तेरी धेदाले? खेक्याई खोक्ने ठीया जेजा येशु नी, धान्दा नाम्खे श्यीङखामदु फेप्कीनगो खेक्याई थोथा च्योक्रे, याङ खोङबा खेक्याचारु देरेराङ झ्येरी फेप्कीलाक।”
युदागी छापला श्येम्मा कुछाप च्यीक दाम्बा
12होदे स्याम्ने कुछापक्या क्युरुस्यीङगी री भोरती, येरुसालेम स्योकला सोवालाक। होदेने येरुसालेम थुक्पे क्षुजी फेक चो़गी लाम हो़तालाक। 13येरुसालेमदु ॱलेप्ती, खुङक्या खोराङ धेजा खाङबागी थोयोकगी खाङजुङला सोरी जोम्बालाक। होदुरु जोम्गीनक्या पेटो धाङ योहान्ना धाङ याकोब धाङ आन्डीरीया धाङ फीलीप धाङ थोमा धाङ बारथोलोमा धाङ मेथा धाङ आल्फायुगी भीजा, याकोब धाङ सीमोन ग्याल्चेपा#१:१३ राङगी ग्याखापगी राङजेगी क्षीला दो़पा क्षे धाङ ॱमाक टाप थुप्कीन धाङ याकोबगी भीजा युदा हो़तालाक। 14खुङक्या घीरी ईजी नुमुक्या धाङ येशुगी युम मीरीयाम धाङ खोङबागी नोक्यामुला जोम्दी, सोवा ग्याप्ती धे हो़तालाक।
15श्याक्मो तीते स्याम्ने येशुला धेपा-झ्यीगीन मी ग्याराङ ङीउ चो़गी खोक्दु, पेटो लारी देरे ॱनेवालाक, 16“पी़नक्याओ, क्षो़ठीमला धाम्पे थुक्ङीगी ग्यावु दावीदगी थोक्ने, युदागी कोरला कामो़न जेजा घीरी डुप घो़गीलाक। धेनी होदे डुप्पालाक।#सुङगुर ४१:९ येशुला शीम्गीन मीक्याला गोठी झ्यीगीन युदागो, 17होराङक्या च्योक्रे चोवोगी कुछाप च्युङङीने च्यीक लाक। धेनी होराङ च्योक्रे, चोवोगी लेगा झ्यीयेला खोवाः दाम हो़तालाक।” 18युदागी लेगा ङेन्पाने साक्सा, आलेगी श्यीङ च्यीक ङ्यो़वालाक। होदे श्यीङला, खी़ गोवागो एन्ला ल्हीम्दी स्यीवालाक धेनी खी़ फोवागो धोरी नाङगी ग्युमा घीरी थोरपालाक। 19येरुसालेमगी मी घीरीगी, दे लाबगो ॱहाघोरपालाक। धेनी खुङक्याई होदे श्यीङगी मीङ खोरी, केकला आकेल्दामा ताक्पालाक। होदेगी दो़नगो ठाकगी श्यीङ लाक।
पेटोगी धाब्ले ॱनेवालाक, 20“धा, सुङगुरगी धेपला देरे ढीक हो़तालाक,
‘होदेगी खाङबा तोङबा थो़न्दास्योक,
होदेरु सुवा माधेदास्योक।
धेनी होदेगी झ्यीगीन लेगागी आङजा, श्येम्मागी राङ लेन्दास्योक।’”#सुङगुर ६९:२५;१०९:८
21-22“होझ्येरी येशु ॱलार सो़न्गीनगी पाङपो झ्युङयेला, होरी मी च्यीक दाम घो़गीलाक। खो नी चोवो येशु होराङमुला सो़न्पो श्युक्वाराङ, योहान्नागी ठी़सो़ने गो चुक्ती, येशु नाम्खे श्यीङखामदु फेप्कीन धी़चो़ थुक्पे, होराङमुला च्योई हो़गीन मी च्यीक हुङ घोगुलाक।”
23दे लाब ॱहाघोरती, होदुरु जोम्जा मीक्याई मी ॱङीगी मीङ तेरपालाक। च्यीकगो योसेफ लाक, खोला बारसाबास धाङ युसीतो ॱनालाक। धेनी श्येम्मागो मेथीया लाक। 24-25धेनी खुङक्याई देरे सोवा ग्याप्पालाक, “चोवो, खेराङ मी घीरीगी सेमगी लाब खेन्दालाक। होझ्येरी चोवो, दे ॱङीउने कुछाप झ्युरी श्याप्तोक पुयेला, खेराङगी सुला दामा झ्येहेतो, हेक्याला तो़न्रोजे। घीझ्येरी ॱनाना युदा दे लेगा देला भोरती, खो हुङजा साजाला राङ लोक्पालाक।” 26होदे स्याम्ने, खुङक्याई खुङ ॱङीउगी मीङला गेन ग्याप्पालाक। गेनगो मेथीयागी मीङला थोप्पालाक। होझ्येरी मेथीयागो, कुछाप च्युक च्यीकक्यामुला दोम्बालाक।
Поточний вибір:
जेपा 1: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
