जेपा 4
4
पेटो धाङ योहान्ना छोक्खाङगी दोङदु
1पेटो धाङ योहान्ना मीक्यामुला लाब तारी धेदी घाङला, क्षो़पो़नक्या धाङ सादुकीपाक्या धाङ क्षो़खाङगी घोरेक्याई, पो़न्पो खुङक्याचारु होवालाक। 2धेनी येशुगी थोक्ने छीवाने सो़न्पो लाङ थुक्ये हो़तालाक ॱनेरी, मीक्याला पेटो धाङ योहान्नागी ॱलाप्कीनगोला, खुङक्या ॱमीच्यीकी खोङडो लावालाक। 3धेनी खुङक्याई पेटो धाङ योहान्नाला शीम्दी, ङीमा स्याम्मागो थुक्पे चो़न्खाङदु धाक्पालाक घीझ्येरी ॱनाना होदे घाङला ॱरो रुक्सा हो़तालाक। 4हीना होदे कुछाप ॱङीउगी का ङेन्गीनक्याने, मी माङक्षेगी धेपा झ्येवालाक धेनी धेपा झ्यीगीन मीक्याई ढाङगा माङदु सोरी, तोङ ॱङा चो़ झ्युवालाक।
5ङीमा स्याम्मागोला पो़न्पोक्या धाङ क्षो़ठीमगी ॱलोपो़नक्या धाङ गोठीक्या, येरुसालेमदु जोम्बालाक। 6चो क्षो़पो़न हान्नास धाङ कायाफा धाङ योहान्ना धाङ आलेक्जेन्डार धाङ चो क्षो़पो़नगी, मीक्जाङक्या घीरी होदुरु हो़तालाक। 7खुङक्याई पेटो धाङ योहान्नाला घुङदु ॱलारी, “सी़ आङजा याङमेना सी़ मीङने खेक्या देरे लेगा झ्यीदा?” ॱनेरी ढीवालाक।
8धेनी पेटो धाम्पे थुक्ङीगी खारी, खुङक्याला ॱनेवालाक, “मीक्याई पो़न्पोक्या धाङ गोठीक्या! 9धीरीङ हीकी मी श्याक्योवा च्यीकला लेगा शाङपो च्यीक झ्यीगीनगोला, होदे घाङगी झ्येरी चो़गा झ्युजो ॱनेरी, ढीवा कुयेला हेक्याला दुरु भो़पा हीन्ना, 10खेक्या धाङ ईस्राएलगी मीक्या घीरीगी ॱहाघोरास्योक, दे मी श्याक्योवा दे नाजारेतगी येशु मास्यीकागी छेनने चो़गा झ्युवालाक। खेराङक्याई खोङबाला ग्याङस्यीङ खाला क्याङबालाक हीना को़न्क्षोकगी खोङबाला छीवाने सो़न्पो श्याङा जेपालाक। 11सुङरापला दे लाब दे खोङबागी कोरला राङ ढीक हो़तालाक,
‘खे चीक्पा चीक्कीनक्याई ॱयुक्ती श्याक्सा धोगोङगो,
धान्दा शुरधोगो झ्युदुक।’#सुङगुर ११८:२२
12“श्येम्मा सुनेः थारपा ॱमेथोप्कीलाक घीझ्येरी ॱनाना होरी थारपागी क्षीला येशुगी छेन माना, को़न्क्षोकगी श्येम्मा मीङ नाम्खे श्यीङखाम होकदु ॱमानावालाक।”
13धेनी छोक्पागी मीक्याई पेटो धाङ योहान्ना क्षो़ माढोक्टा धाङ मी ॱङ्यामच्युङा झ्युरीयाः, खुङ ॱङीउ ॱमीच्यीकी ॱङीङक्षे झ्यीगीनगो थोरी ॱहाङसावालाक। धेनी खुङक्याई दे ॱङीउ येशुमुला धेपालाक ॱनेरी ॱहाघोरपालाक। 14हीना चो़गा झ्युजा मी श्याक्योकगोला पेटो धाङ योहान्नामुला लारी धेदा थोरी, खुङक्याई घीया ॱनामाथुक्पालाक। 15होझ्येरी खुङक्याई दे ॱङीउला फीला सोङ ॱनेरी, का ॱनारी खोराङक्या नाङदु ढो़ झ्येवालाक, 16“दे मी ॱङीउला होराङक्या घी झ्यीये? घीझ्येरी ॱनाना देक्याने ॱङोन्नेगी ॱहाङसागीन लेगा च्यीक झ्युजागो, येरुसालेमगी मीमाङ घीरीला क्षा झ्युसादुक धेनी होराङगी होदे लेगा माझ्येदुक ॱनेरी ॱनाथुक्ये मेतालाक। 17हीना दे लाब दे मीमाङक्याला ॱमेटाम्येगी क्षीदु देने ॱहाला, येशु छेनने मी सी़या मुला लाब ॱमाताङ ॱनेरी देक्याला जीक्टा कु घोगुलाक।”
18होझ्येरी खुङक्याई खुङ ॱङीउला केक तारी, येशुगी मीङने सी़या मुला लाब ॱमाताङ याङना क्षो़ ॱमास्ये ॱनेरी का तेरपालाक। 19हीना पेटो धाङ योहान्नागी खुङक्याला लेन ॱलोक्पालाक, “हेक्या को़न्क्षोकगी खाला ङेन्ये याङना खेराङक्याई खाला ङेन्ये? को़न्क्षोकगी ॱमीक्वादु घारेगो ढाङा ले? खेराङक्याराङ थाक चेरो जे। 20घीझ्येरी ॱनाना हेक्याई थोथा धाङ ॱहाघोका लाबक्या ॱमेना धे थुक्ये मीन्दुक।” 21होदुरु झ्युजा लाबगी कोरला, मी घीरीगी को़न्क्षोकला तो़टा पुरी धे हो़तालाक। होझ्येरी छोक्पागी मीक्याई खुङ ॱङीउला घाङगी झ्येरी क्षेपा काये ॱनेरी, ढो़ झ्यी ॱमाथुक्पालाक। धेनी खुङ ॱङीउला ॱयोल्ले माङा जीक्टा ॱलारी भोरपालाक। 22होदे ॱहाङसागीन लेगाने चो़गा झ्युजा मीगो, लो श्यीपच्युने माङा ॱलेप हो़तालाक।
धेपा-झ्यीगीनक्याई ॱमो़लाम
23पेटो धाङ योहान्ना होदेने थारते, खोरी रोवाक्या चारु होरी, क्षो़पो़न क्षेक्या धाङ गोठीक्याई सुसा लाब घीरी खुङक्याला स्येपालाक। 24धेनी खुङक्याई होदे लाब ङेन्दी, खुङक्या घीरी धेप च्यीकला को़न्क्षोकला ॱमो़लाम दे पुवालाक, “चोवो को़न्क्षोक, खेराङगी नाम्खे श्यीङखाम धाङ जाम्बुलीङ धाङ ग्याछो धाङ देक्याला हो़गीन घीरी को़ ॱनाङसोङ। 25खेराङगी धाम्पे थुक्ङीगी थोक्ने खेराङगी श्याप्ची, हीकी मेमे दावीदगी थोक्ने सुजुङ,
‘याहुदापा मेन्गीन मीरीकक्या घीझ्येरी खोङडो लाङाले, धेनी
मीक्या घीझ्येरी फेन ॱमेथोक्कीन ढो़ शोवा हीन्ढी़?
26धेनी जाम्बुलीङगी ग्यावुक्या ॱमाक टाब्येला डाढीक झ्येदुक,
धेनी खुङक्याई पो़न्पोक्या मुला रुप्ती,
चोवो धाङ खोङगी दाम्दा मास्यीकागी ग्याप्केलला ढो़ झ्येदुक।’#सुङगुर २:१,२
27“ॱङो़न दे ॱङोन्नेगी डुप्सुङ घीझ्येरी ॱनाना ग्यावु हेरोदे धाङ पोन्तीहु पीलातु धाङ याहुदापा मेन्गीन मीरीकक्या धाङ याहुदापा मीक्या घीरी, येरुसालेमदु खेराङगी दाम्दा धाम्पे श्याप्ची येशुला ङोग्येल झ्यीयेला जोम्जुङ। 28खेराङगी वाङ धाङ दो़पागी झ्येरी, दे मी देक्याई खेराङगी एम्माने झ्येजा क्षास्यीगो डुप्तु च्युक्पालाक। 29धा चोवो, खुङक्याई जीक्टा कुगीनगोला शीया जे। खेराङगी ॱयोक्पोक्याला खेराङगी का मीज्यीया स्येयेला स्युक ॱनाङरोनाङ। 30खेराङगी धाम्पे श्याप्ची येशुगी छेनने नेपाक्या चो़गा झ्यीये धेनी ॱहाङसागीन लेगाक्या झ्येरी ताकक्या तो़न्येला स्युक ॱनाङरोनाङ।”
31खुङक्याई ॱमो़लाम ग्याप सारती, स्याम्ला खुङक्या धेजा सागो लीङ-लीङ झ्येवालाक। धेनी खुङ घीरी धाम्पे थुक्ङीगी खावालाक धेनी को़न्क्षोकगी का ॱलोगोक क्षे झ्येरी स्येपालाक।
धेपा-झ्यीगीनक्याई ग्यु घीरी पी़मा
32धेपा-झ्यीगीन मीक्या सेम धाङ साम्लो च्यीक झ्युरी, थी़न्दी धेबालाक। खुङक्याई राङगी ग्युनोरक्या ङी हीन ॱनेरी, ॱनागीन च्यीया मेतालाक। ग्युनोर हो़गीन घीरी घो़री पी़मा चीलालाक। 33कुछापक्याई चोवो येशु छीवाने सो़न्पो श्याङगीनगी कोरला, वाङक्षेगी थोक्ने मीक्याला पाङपो झ्येवालाक। धेनी को़न्क्षोकगी थुक्जे क्षेन्बो, खुङक्या खाला मेछो़ली झ्युवालाक। 34छोक्पा नाङदु हो़गीन घीरीला ॱमेछाङगीन माझ्युवालाक घीझ्येरी ॱनाना सा धाङ खाङबा हो़गीनक्याई होदेक्याने रीङगा चोरी, 35ॱङुगो कुछापक्याला पुलालाक धेनी कुछापक्याई घो़गीन मी घीरीला तेरालाक।
36धेनी धेपा-झ्यीगीनक्याने साईपुरुस ग्याखापगी योसेफ ॱनागीन, लेवी मी च्यीक हो़तालाक। कुछापक्याई खी़ मीङ बारनाबा (सेमस्युकगी भु) ॱनेरी ताक्पालाक। 37खी़ खोरी श्यीङक्याने च्यीक चोरी, होदे आलेगो खेरती होरी कुछापक्याई दोङदु पुवालाक।
Поточний вибір:
जेपा 4: LOY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. and Nepal Bible Society
