Matius 24
24
Tampa Sombayang Pusat nanti ancor
24:1-2
(Markus 13:1-2; Lukas 21:5-6)
1Yesus kaluar dari Tampa Sombayang Pusat la pi dari situ. Tarus, Antua pung murid-murid datang la unju-unju Tampa Sombayang Pusat pung bangunang-bangunang yang hebat-hebat par Antua. 2La Antua bilang par dong kata, “Kamong su lia akang samua tu? Dengar bae-bae tagal apa yang Beta bilang ni batul! Satu waktu nanti, seng ada satu batu lai yang tinggal tasusung di atas batu yang laeng. Samua nanti rata deng tana.”
Hari-hari susa deng sangsara
24:3-14
(Markus 13:3-13; Lukas 21:7-19)
3Abis itu, Yesus deng Antua pung murid-murid pi ka gunung Saitun. Tarus, waktu Antua ada dudu, Antua pung murid-murid datang bicara deng Antua sandiri kata, “Tuang Guru e, apa tempo yang Tuang Guru baru bilang tadi tu jadi? La kalo Tuang Guru mau bale kombali deng dunya ni mau kiamat, akang pung tanda bagemana?”
4La Antua jawab dong kata, “Kamong musti jaga diri bae-bae, jang sampe kamong dapa parlente. 5Barang, nanti ada banya orang datang pake Beta pung nama la bilang, ‘Beta ni Orang yang Allah su Angka par Kasi Salamat Manusia!’ La dong nanti parlente banya orang. 6Kamong nanti dengar kata ada prang ka barita-barita soal prang, mar jang taku. Barang samua tu musti jadi macang bagitu, mar dunya balong kiamat lai. 7Nanti bangsa satu baku prang deng bangsa laeng, la karajaang satu baku prang deng karajaang laeng. Nanti jua ada susa makanang deng ada tana goyang di banya tampa. 8Mar samua tu cuma tanda kalo susa deng sangsara baru mulai, macang deng parampuang yang mulai rasa saki waktu mau kasi lahir ana.
9Waktu itu, kamong nanti dapa tangkap par dapa siksa la dapa bunu. Kamong nanti dapa binci dari samua bangsa tagal kamong iko Beta. 10Waktu itu jua banya orang nanti bale balakang la seng parcaya Beta lai. Dong nanti laeng jual laeng deng baku binci. 11Banya juru bicara parlente nanti muncul la parlente banya orang. 12Deng tagal kajahatang labe hari labe tamba basar, banya orang seng baku sayang lai. 13Mar, sapa yang sampe mati batahang tarus par parcaya Beta, dia nanti salamat.#Matius 10:22 14La Kabar Bae soal Allah pegang parenta jadi Raja nanti dapa kasi tau di antero dunya biar samua orang dengar akang do, baru dunya kiamat.”
Orang Yahudi nanti paleng sangsara
24:15-28
(Markus 13:14-23; Lukas 21:20-24)
15Yesus bale bilang par Antua pung murid-murid lai kata, “Kamong nanti lia ada apapa satu yang paleng seng bae paskali yang biking orang paleng sangsara, badiri di Tampa Sombayang Pusat la biking apa yang Tuhan binci di situ. Itu jadi macang deng apa yang Allah pung Juru Bicara Danyel parna bilang.#Danyel 9:27, 11:31, 12:11 (Sapa yang baca tulisang ni, dia musti taru kira hal ini bae-bae.) 16Kalo sampe itu su jadi, orang-orang di propinsi Yudea musti lari ka gunung-gunung. 17Waktu itu, sapa yang ada di teras ruma,#24:17 Di teras ruma: Teks bahasa Yunani bilang “di atas ruma”. Dolo, orang Yahudi pung atap ruma tu, akang rata. Ada tangga yang dong su biking di pinggir ruma par nai ka atas. Dong biasa ambe sanang deng jumur apapa di situ. jang maso ambe apapa lai, mar langsung lari sa. 18La sapa yang ada di kabong, jang pulang ambe pakiang lai.#Lukas 17:31 19Sio kasiang! Waktu itu jadi, parampuang-parampuang yang ada deng badang deng mama-mama yang masi kasi susu ana nanti paleng sangsara paskali. 20Kamong musti sombayang, biar waktu kamong lari, akang seng jadi waktu musing ujang ka hari Barenti Karja. 21Tagal waktu itu, nanti ada susa deng sangsara yang paleng hebat paskali. Dari waktu Allah biking dunya ni sampe sakarang ni, balong parna ada susa deng sangsara macang bagitu deng nanti seng parna ada susa deng sangsara macang bagitu lai.#Danyel 12:1; Yohanis Dapa Tanda 7:14 22Kalo Tuhan seng kasi pende akang pung waktu, seng satu orang lai yang masi hidop. Mar, tagal Antua sayang orang-orang yang Antua su pili, Antua kasi pende akang pung waktu.
23Waktu itu kalo ada orang bilang par kamong kata, ‘E, Orang yang Allah su Angka par Kasi Salamat Manusia ada di sini!’ ka, ‘E, Orang yang Allah su Angka par Kasi Salamat Manusia ada di sana!’, jang parcaya. 24Tagal nanti ada orang-orang yang mangaku-mangaku kata dong tu Orang yang Allah su Angka par Kasi Salamat Manusia ka dong tu Allah pung juru bicara. Dong nanti biking tanda-tanda herang yang hebat-hebat, biar kalo bisa, orang-orang yang Allah pili jua dapa parlente. 25Inga bae-bae! Beta su kasi tau akang kamuka sakali par kamong.
26Jadi, kalo ada orang bilang par kamong kata, ‘E, Orang yang Allah su Angka par Kasi Salamat Manusia ada di padang gurun!’, jang pi ka situ. Ka kalo ada orang bilang kata, ‘E, Orang yang Allah su Angka par Kasi Salamat Manusia ada di dalang kamar!’, jang parcaya. 27Barang kalo Beta Ana Manusia ni bale kombali ka dunya, samua orang nanti tau. Itu sama deng kilat yang tapancar di sabala matahari nai bisa dapa lia sampe di sabala matahari maso.#Lukas 17:23-24 28Itu jua sama deng orang biasa bilang kata, ‘Kalo lia burung makang bangke bakumpul, pasti ada bangke di situ.’ ”#Lukas 17:37
Tanda-tanda kalo Yesus su mau bale kombali ka dunya
24:29-35
(Markus 13:24-32; Lukas 21:25-33)
29Tarus Yesus bale bilang lai, “Pas abis susa deng sangsara tu, matahari nanti jadi galap deng bulang seng kasi kaluar sinar lai. Bintang-bintang nanti jatu dari langit la kuasa-kuasa di langit#24:29 Waktu itu, orang-orang Yahudi pikir kalo kuasa-kuasa di langit tu pung arti apa sa yang kasi kaluar sinar di langit ka roh-roh jahat. nanti talamburang.#Yesaya 13:10, 34:4; Yeheskel 32:7; Yoel 2:10, 31, 3:15; Yohanis Dapa Tanda 6:12-13 30Waktu itu, nanti ada tanda di langit kalo Beta Ana Manusia ni bale kombali ka dunya. Samua bangsa nanti taku la marata waktu dong lia Beta turung dari sorga dalang awang-awang. Beta datang deng Beta pung kuasa dalang sinar yang manyala tarang paskali.#Danyel 7:13; Yohanis Dapa Tanda 1:7 31Beta nanti suru Beta pung malekat-malekat tiop trompet yang babunyi paleng basar. Tarus, dong nanti kumpul orang-orang yang Beta su pili dari antero dunya, dari timur sampe barat, utara sampe salatang.
32Coba balajar dari pohong ara. Waktu akang pung jaga-jaga su mulai batunas, kamong tau kalo musing panas su dekat. 33Bagitu lai kalo kamong lia samua yang Beta bilang tadi tu jadi, kamong tau kalo waktu par Beta bale kombali su dekat. 34Dengar bae-bae tagal apa yang Beta bilang ni batul! Dari samua orang yang hidop jamang sakarang ni, ada yang balong mati waktu samua tu jadi. 35Langit deng dunya nanti ancor, mar Beta pung kata-kata tetap ada tarus-tarus!”
Katong musti siap tarus tagal katong seng tau apa tempo Yesus bale kombali
24:36-44
(Markus 13:32-37; Lukas 17:26-30, 34-36)
36Yesus bilang lai kata, “Soal apa tempo Beta bale kombali ka dunya ni, seng satu orang lai yang tau akang. Malekat-malekat di sorga seng tau, Beta Allah pung Ana ni jua seng tau, cuma Bapa sa yang tau.#Markus 13:32 37Apa yang nanti jadi di dunya waktu Beta Ana Manusia ni bale kombali, akang sama deng apa yang jadi dolo, di jamang Nuh.#Carita Mula-Mula 6:5-8 38Barang, waktu balong ada banjir basar tu, orang-orang makang-minong deng kaweng macang biasa sa sampe waktu Nuh maso kapal. 39Dong seng tau apa yang mau jadi sampe waktu banjir basar datang tutu dong samua do. Waktu Beta Ana Manusia ni bale kombali ka dunya, orang-orang di dunya hidop macang bagitu lai.#Carita Mula-Mula 7:6-24 40Waktu Beta bale kombali ka dunya, dari dua laki-laki yang ada di kabong, satu nanti dapa angka mar satu lai dapa kasi tinggal. 41Dari dua parampuang yang ada giling gandum, satu nanti dapa angka mar satu lai dapa kasi tinggal. 42Jadi kamong musti siap tarus, tagal kamong seng tau apa tempo kamong pung Tuhan mau bale kombali ka dunya.
43Dengar ande-ande satu ni lai bae-bae! Kalo tuang ruma tau pancuri nanti datang malang jam barapa, dia pasti jaga-jaga deng seng kasi biar pancuri maso dalang dia pung ruma. 44Jadi kamong jua musti salalu siap, tagal Beta Ana Manusia ni nanti bale kombali di waktu yang kamong seng sangka-sangka.”#Lukas 12:39-40
Ande-ande soal jongos yang dengar-dengarang deng jongos yang seng dengar-dengarang
24:45-51
(Lukas 12:41-48)
45Yesus bilang lai kata, “Jongos yang salalu iko dia pung bos pung mau deng jua pung pikirang tajang, dia nanti dapa angka dari dia pung bos par jadi kapala par bos tu pung jongos-jongos yang laeng, par kasi makang dong pas akang pung waktu. 46Dia paleng baruntung waktu dia pung bos bale kong dapa dia ada biking dia pung karja. 47Dengar bae-bae tagal apa yang Beta bilang ni batul! Dia pung bos tu nanti angka dia par urus dia pung bos pung harta samua.
48Mar kalo jongos tu jahat, dia nanti bilang dalang hati kata, 49‘Beta pung bos tu masi lama lai baru bale’. Tarus, dia mulai pukul jongos-jongos yang laeng deng makang-minong deng pamabo-pamabo. 50Skrek bagini, dia pung bos bale di waktu yang dia seng sangka-sangka 51la hukum dia paleng barát. Dia pung bos nanti buang dia ka orang-orang munafik pung tampa. Di sana dia nanti sangsara paskali deng marata.”
Поточний вибір:
Matius 24: ABMA
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2022, Sinode Gereja Protestan Maluku
