Matius 25
25
Ande-ande soal nona-nona yang pung pikirang tajang deng nona-nona yang bodo
25:1-13
1Yesus bilang par Antua pung murid-murid lai kata, “Waktu Beta, Orang yang Datang dari Allah ni, bale kombali la pegang parenta jadi Raja, akang macang deng ande-ande satu ni. Satu kali bagini, ada nona sapulu orang. Dong dapa tugas par pi tarima panganting laki-laki. Jadi, dong satu-satu ambe dong pung palita la pi.#Lukas 12:35 2Dari dong sapulu tu, lima bodo deng lima pung pikirang tajang. 3Nona-nona yang bodo tu bawa dong pung palita, mar seng bawa minya. 4Mar nona-nona yang pung pikirang tajang tu bawa dong pung palita deng minya. 5Mar tagal panganting laki-laki tu balong datang-datang lai, dong sapulu tu manganto la tatidor.
6Pas tenga malang, ada orang bataria kata, ‘E, panganting laki-laki datang! Kaluar tarima dia!’ 7Nona-nona tu samua bangong la kasi siap dong pung palita. 8Tarus, dong yang bodo tu bilang par dong yang pung pikirang tajang kata, ‘Tamang e, kasi minya sadiki par katong jua, tagal katong pung palita su mau mati.’ 9Mar dong yang pung pikirang tajang tu bilang kata, ‘Seng bisa tamang, tagal nanti akang seng sampe par katong samua. Labe bae ale dong pi bali di orang jual minya.’ 10Mar waktu dong ada pi bali minya, panganting laki-laki sampe. La dong lima yang su siap tu maso sama-sama deng panganting laki-laki ka tampa pesta kaweng, la pintu dapa tutu.
11Abis itu, dong lima yang bodo tu datang la bataria kata, ‘Tuang, tuang e! Tolong buka pintu par katong jua!’ 12Mar panganting laki-laki tu jawab dong kata, ‘Dengar bae-bae tagal apa yang Beta bilang ni batul! Beta seng kanal kamong!’ ”#Lukas 13:25
13La Yesus bilang lai, “Jadi, kamong musti jaga-jaga tarus, tagal kamong seng tau apa tempo Beta bale kombali.”
Ande-ande soal tiga orang karja
25:14-30
(Lukas 19:12-27)
14Yesus bilang lai kata, “Waktu Beta, Orang yang Datang dari Allah ni, bale kombali la pegang parenta jadi Raja, akang macang deng ande-ande satu ni. Satu kali bagini, ada satu orang yang mau pi ka negri laeng. Dia panggel dia pung jongos-jongos la parcaya dia pung harta par dong usaha deng akang, 15satu-satu iko dong pung kuat. Par yang partama dia kasi lima ribu kepeng mas, par yang kadua dia kasi dua ribu kepeng mas, deng par yang katiga dia kasi saribu kepeng mas. Abis itu dia barangkat. 16Tarus, jongos yang dapa lima ribu kepeng mas tu langsung pi badagang deng akang la dapa untung lima ribu kepeng mas lai. 17Jongos yang tarima dua ribu kepeng mas tu pi badagang lai la dapa untung dua ribu kepeng mas lai. 18Mar, jongos yang dapa saribu kepeng mas tu pi gale lobang di tana la sambunyi dia pung bos pung kepeng tu.
19Tarus, lama abis itu dong pung bos pulang. La dia panggel dia pung jongos tiga tu par mau baku rekeng deng dong. 20Jongos yang dapa lima ribu kepeng mas tu datang bawa untung lima ribu kepeng mas lai la bilang par dia pung bos kata, ‘Bos e, lima ribu kepeng mas yang bos kasi par beta tu beta su badagang deng akang la dapa untung lima ribu kepeng mas lai.’ 21La dia pung bos bilang kata, ‘E, bae jua! Ale ni jongos yang paleng bae deng rajing. Ale su urus hal-hal kacil deng bae, jadi beta nanti parcaya ale par urus hal-hal basar. Mari maso ka dalang la sanang sama-sama deng beta.’
22Tarus, jongos yang dapa dua ribu kepeng mas datang lai. Dia bilang par dia pung bos kata, ‘Bos e, dua ribu kepeng mas yang bos kasi par beta tu, beta su badagang deng akang la dapa untung dua ribu kepeng mas lai.’ 23La dia pung bos bilang par dia kata, ‘E, bae jua! Ale ni jongos yang paleng bae deng rajing. Ale su urus hal-hal kacil deng bae, jadi beta nanti parcaya ale par urus hal-hal basar. Mari maso ka dalang la sanang sama-sama deng beta.’
24Akang pung laste, jongos yang tarima saribu kepeng mas jua datang lai. Dia bilang par dia pung bos kata, ‘Bos e, beta tau kalo bos ni orang yang kasar. Bos ambe untung dari orang laeng pung hasil karja, macang deng orang yang ambe hasil kabong yang dia sandiri seng parna tanang akang. 25Tagal itu, beta taku la pi sambunyi bos pung kepeng tu dalang tana. Ini akang ni, ambe akang jua!’
26Tarus, bos bilang par dia kata, ‘Hoe, ose ni jongos yang paleng jahat deng pamalas! Ose bilang kalo beta ambe untung dari orang laeng pung hasil karja macang deng orang yang ambe hasil kabong yang dia sandiri seng tanang akang. 27Kalo bagitu, mangapa kong ose seng pi kasi beta pung kepeng tu par orang kasi bajalang akang biar kalo beta bale, beta bisa tarima akang deng akang pung bunga?’
28La bos tu bilang par jongos laeng kata, ‘Ambe kepeng tu dari dia la kasi akang par jongos yang pung sapulu ribu kepeng mas tu! 29Tagal sapa sa yang urus apa yang su dapa parcaya par dia deng bae, dia nanti dapa kasi labe banya lai, sampe dia pung banya paskali. Mar sapa yang seng urus apa yang su dapa parcaya par dia deng bae, apa yang ada di dia nanti dapa ambe dari dia.#Matius 13:12; Markus 4:25; Lukas 8:18 30Jadi, jongos yang tar ada pung guna tu, buang dia di tampa yang paleng galap. Di sana dia nanti sangsara paskali deng marata.’ ”#Matius 8:12, 22:13; Lukas 13:28
Yesus nanti jadi hakim par samua orang waktu Antua bale kombali ka dunya
25:31-46
31Yesus bilang lai kata, “Waktu Beta Ana Manusia ni bale kombali jadi Raja, Beta datang dalang sinar yang manyala tarang sama-sama deng samua malekat. Beta nanti dudu di Beta pung kadera raja yang luar biasa.#Matius 16:27, 19:28 32Samua bangsa nanti dapa kumpul di Beta pung muka. Tarus, Beta nanti kasi pisa dong, macang deng orang jaga yang kasi pisa domba dari kambing. 33Beta nanti kumpul orang-orang yang iko Allah pung mau di Beta pung sabala kanang la orang-orang yang seng iko Allah pung mau di Beta pung sabala kiri, sama deng orang jaga yang taru domba di sabala kanang deng kambing di sabala kiri.
34Tarus, Beta yang jadi Raja nanti bilang par dong yang di sabala kanang kata, ‘E kamong yang su dapa berkat dari Beta pung Bapa. Mari maso dalang Karajaang yang Beta pung Bapa su kasi siap par kamong dari waktu dunya ni balong jadi lai. 35Barang, waktu Beta lapar, kamong kasi makang Beta. Waktu Beta aos, kamong kasi minong Beta. Waktu Beta jadi orang dagang, kamong tarima Beta manumpang di kamong pung ruma. 36Waktu Beta seng ada pung pakiang, kamong kasi pake Beta. Waktu Beta saki, kamong jaga Beta. Waktu Beta ada dalang bui, kamong pi mangente Beta.’
37La orang-orang yang iko Allah pung mau tu nanti bilang par Beta kata, ‘Tuhan, apa tempo katong lia Tuhan lapar la katong kasi makang Tuhan ka aos la katong kasi minong Tuhan? 38Apa tempo katong lia Tuhan jadi orang dagang la katong tarima Tuhan manumpang di katong pung ruma? Deng apa tempo katong lia Tuhan seng ada pung pakiang la katong kasi pake Tuhan? 39Apa tempo katong lia Tuhan saki ka maso bui la katong pi mangente Tuhan?’
40La Beta yang jadi Raja nanti bilang par dong kata, ‘Dengar bae-bae tagal apa yang Beta bilang ni batul! Apa sa yang kamong biking par tolong satu dari Beta pung sudara-sudara yang seng dapa anggap, itu sama sa deng kamong jua su biking akang par Beta.’
41Tarus, Beta nanti bilang par dong yang ada di Beta pung sabala kiri tu kata, ‘Hoe kamong yang su dapa kutok. Barangkat dari Beta pung muka! Kamong nanti dapa buang dalang api basar yang seng mati-mati, yang su dapa kasi siap par Setang pung Raja deng dia pung malekat-malekat. 42Barang waktu Beta lapar, kamong seng kasi makang Beta. Waktu Beta aos, kamong seng kasi minong Beta. 43Waktu Beta jadi orang dagang, kamong seng tarima Beta manumpang di kamong pung ruma. Waktu Beta seng ada pung pakiang, kamong seng kasi pake Beta. Deng waktu Beta ada saki ka ada dalang bui, kamong seng pi mangente Beta.’ 44La dong jua nanti bilang par Beta kata, ‘Tuhan, apa tempo katong lia Tuhan lapar, ka aos, ka jadi orang dagang? Apa tempo katong lia Tuhan seng ada pung pakiang, ka saki, ka maso bui la katong seng tolong Tuhan?’
45Tarus, Beta nanti bilang par dong kata, ‘Dengar bae-bae tagal apa yang Beta bilang ni batul! Apa sa yang kamong seng biking par tolong satu dari orang yang seng dapa anggap, itu sama sa kamong jua seng biking apapa par Beta.’
46Jadi, dong yang ada di sabala kiri nanti dapa hukum tarus-tarus. Mar dong yang iko Allah pung mau, yang di sabala kanang tu, dong nanti hidop tarus-tarus deng Allah.”#Danyel 12:2
Поточний вибір:
Matius 25: ABMA
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2022, Sinode Gereja Protestan Maluku
