Matius 26
26
Rencana par bunu Yesus
26:1-5
(Markus 14:1-2; Lukas 22:1-2; Yohanis 11:45-53)
1Abis Yesus ajar samua tu par Antua pung murid-murid, Antua bilang par dong kata, 2“Kamong tau kalo dua hari lai katong orang Yahudi pung hari basar Paska. Waktu itu, nanti Beta Ana Manusia ni dapa kasi par dapa salib.”#Kaluar dari Mesir 12:1-27
3Waktu Yesus ada bicara, imam-imam kapala deng orang Yahudi pung pamimping-pamimping jua ada bakumpul di Imam Basar Kayafas pung istana. 4Dong ada baku skongkol par tangkap Yesus tado-tado la bunu Antua. 5Mar dong laeng bilang par laeng kata, “Jang katong tangkap Dia pas pesta hari basar, biar orang-orang yang suka deng Dia seng biking kaco.”
Parampuang satu sirang Yesus pung kapala deng minya bobou sadap
26:6-13
(Markus 14:3-9; Yohanis 12:1-8)
6Waktu Yesus ada di kampong Betania, Antua pi di Simon yang parna saki lepra tu pung ruma. 7Waktu Antua ada dudu makang, ada parampuang satu datang par Antua. Dia bawa minya bobou sadap yang mahal paskali dalang botol dari batu marmer. Tarus, dia sirang akang di Antua pung kapala.#Lukas 7:37-38 8Lia bagitu, Antua pung murid-murid mara. Dong bilang kata, “Mangapa kong dia buang-buang minya tu bagitu? 9Labe bae jual akang biar dapa kepeng banya la kasi akang pung kepeng par orang-orang kasiang.”
10Mar Yesus tau dong pung pikirang la bilang par dong kata, “Mangapa kamong mara dia? Dia su biking apa yang bae par Beta. 11Orang-orang kasiang salalu ada sama-sama deng kamong, mar Beta seng salalu ada sama-sama deng kamong.#Carita Ulang 15:11 12Dia sirang minya tu di Beta pung badang par kasi siap Beta pung badang par dapa kubur nanti.#26:12 Orang-orang Yahudi biasa sirang minya bobou sadap di mayat par kasi siap akang par dapa kubur. Mar parampuang tu biking bagitu bukang tagal dia sadar kata Yesus mau mati, mar tagal dia sayang Antua deng mangkali tagal mau minta dangke dari Antua. 13Dengar bae-bae tagal apa yang Beta bilang ni batul! Waktu orang-orang kasi tau Kabar Bae ni ka antero dunya, dong jua nanti carita apa yang parampuang ni baru biking par inga-inga dia.”
Yudas akor par jual Yesus
26:14-16
(Markus 14:10-11; Lukas 22:3-6)
14Abis itu, satu dari Yesus pung murid sapulu dua orang yang nama Yudas Iskariot tu pi par orang Yahudi pung imam-imam kapala. 15Dia bilang par dong kata, “Kalo beta bantu kamong par tangkap Yesus, kamong nanti kasi apa par beta?” Tarus, dong kasi kepeng perak tiga pulu bua par dia. 16Mulai dari oras itu, dia cari waktu yang pas par kasi Yesus par dong.
Yesus pung murid-murid kasi siap samua par makang Paska
26:17-19
(Markus 14:12-16; Lukas 22:7-13)
17Pas hari partama dari orang Yahudi pung hari basar Roti Seng Pake Ragi, Yesus pung murid-murid datang la bilang par Antua kata, “Tuang Guru e, Tuang Guru mau katong pi kasi siap makanang Paska par katong makang tu di mana?”
18La Antua bilang par dong kata, “Pi par satu orang yang ada di kota la bilang par dia kata, ‘Bapa e, Tuang Guru bilang kata Antua pung waktu su dekat. Antua deng Antua pung murid-murid nanti mau makang Paska di bapa pung ruma.’ ” 19Tarus, Antua pung murid-murid tu biking apa yang Antua suru deng jua kasi siap makanang Paska.
Yesus deng Antua pung murid-murid makang Paska
26:20-30
(Markus 14:17-26; Lukas 22:14-23; Yohanis 13:21-30; 1 Korintus 11:23-25)
20Pas akang pung malang, Yesus deng Antua pung murid sapulu dua orang tu dudu makang sama-sama. 21Waktu dong ada makang, Antua bilang par Antua pung murid-murid kata, “Dengar bae-bae tagal apa yang Beta bilang ni batul! Satu dari kamong nanti jual Beta.”
22Waktu dengar bagitu, Antua pung murid-murid dong pung hati susa paskali. La dong satu abis satu bilang par Antua kata, “Tuang Guru e, beta seng to?”
23La Antua bilang par dong kata, “Orang yang nanti jual Beta tu, dia yang colo roti dalang kua sama-sama deng Beta.#Lagu-Lagu 41:10 24Beta Ana Manusia ni nanti mati macang deng apa yang su tatulis dalang Allah pung Tulisang. Mar cilaka par orang yang jual Beta tu! Labe bae jang dia lahir!”
25Yudas yang nanti jual Antua tu bilang par Antua kata, “Tuang Guru e, beta seng to?”
La Antua jawab dia kata, “Ale sandiri yang bilang akang.”
26Waktu Yesus deng Antua pung murid-murid ada makang, Antua ambe roti la minta dangke dari Allah. Tarus, Antua pata-pata akang la bage-bage akang par Antua pung murid-murid. Antua bilang par dong kata, “Ambe la makang. Ini ni Beta pung badang.”
27Abis itu, Antua ambe cawan yang isi anggor la minta dangke dari Allah. Tarus, Antua kasi akang par dong la bilang kata, “Kamong samua, minong dari cawan ni. 28Anggor ni Beta pung dara yang nanti tatumpa biar banya orang pung dosa bisa dapa kasi ampong. Deng Beta pung dara ni Allah kasi sah janji yang Antua ika deng manusia.#Kaluar dari Mesir 24:8; Yeremia 31:31-34 29Dengar Beta bilang par kamong! Mulai dari oras ni, Beta seng minong anggor lai sampe waktu Allah datang pegang parenta jadi Raja do, baru Beta minong anggor yang baru sama-sama deng kamong.”
30Tarus, dong manyanyi puji Allah la abis itu dong pi ka gunung Saitun.
Yesus bilang par Petrus kalo dia nanti manyangkal Antua
26:30-35
(Markus 14:27-31; Lukas 22:31-34; Yohanis 13:36-38)
31La Yesus bilang par Antua pung murid-murid kata, “Malang ini jua kamong nanti lari kasi tinggal Beta sandiri tagal apa yang mau jadi par Beta. Barang, dalang Allah pung Tulisang jua ada bilang kata,
‘Beta nanti bunu orang yang jaga domba
la domba-domba tu nanti lari talamburang.’#Sakaria 13:7
32Mar waktu Beta su hidop kombali, Beta nanti pi kamuka kamong ka propinsi Galilea.”#Matius 28:16
33La Petrus bilang par Antua kata, “Tuang Guru e, biar kata dong samua lari kasi tinggal Tuang Guru tagal apa yang mau jadi par Tuang Guru tu, mar beta pasti seng!”
34Tarus, Yesus bilang par dia kata, “Dengar bae-bae tagal apa yang Beta bilang ni batul! Malang ini jua waktu ayang pai balong bakuku lai, ale su manyangkal tiga kali kalo ale seng kanal Beta.”
35Mar Petrus bilang par Antua kata, “Biar kata beta musti mati sama-sama deng Tuang Guru lai, mar beta pasti seng manyangkal Tuang Guru!” Antua pung murid-murid yang laeng jua bilang bagitu lai.
Yesus sombayang di Getsemani
26:36-46
(Markus 14:32-42; Lukas 22:39-46)
36La Yesus deng Antua pung murid-murid sampe di tampa satu yang nama Getsemani.#26:36 Dalang bahasa Ibrani, Getsemani tu pung arti ‘Tampa ramas bua Saitun’. La Antua bilang par dong kata, “Dudu tunggu di sini sa! Beta mau pi sombayang di sana do.”
37La Antua panggel Petrus deng Sebedeus pung ana laki-laki dua orang par pi sama-sama deng Antua. Waktu itu, Antua mulai balisa paskali deng hati susa. 38Tarus, Antua bilang par dong tiga kata, “Beta pung hati paleng susa macang kata mau mati sa. Tinggal di sini la jaga-jaga batamang Beta jua.”
39Tarus, Antua maju sadiki jau la tikang lutu sampe muka kana tana la sombayang kata, “Sio Bapa e! Kalo bisa, tolong kasi lapas Beta dari susa deng sangsara ni jua. Mar, jang iko Beta pung mau, iko Bapa pung mau sa!”
40Abis itu, Antua bale par Antua pung murid tiga tu, mar Antua dapa dong ada tatidor. La Antua bilang par Petrus kata, “Petrus! Petrus e! Masa ale seng bisa jaga-jaga barang sajam batamang Beta lai? 41Kamong musti jaga-jaga deng sombayang biar kamong seng dapa coba par biking dosa. Dalang hati, kamong memang mau biking apa yang batul, mar kamong seng kuat par biking akang.”
42Tarus, Antua pi sombayang par kali kadua, “Sio Bapa e! Kalo memang Beta seng bisa dapa kasi lapas dari sangsara ni mar musti pikol akang, biar Bapa pung mau sa yang jadi.”
43La waktu Antua bale kombali, Antua dapa dong tiga ada tatidor kombali tagal dong paleng manganto. 44Jadi, Antua kasi tinggal dong satu kali lai la pi sombayang par kali katiga la bilang kata-kata yang sama deng kamuka tu lai. 45Abis itu, Antua bale kombali par Antua pung murid tiga tu la bilang, “Masa kamong masi tidor lai? Bangong jua! Dengar! Sakarang ni su waktu par Beta Ana Manusia ni dapa jual par orang-orang bardosa yang pung kuasa. 46Bangong la mari katong pi baku dapa dong! Lia, dia yang mau jual Beta tu su dekat!”
Yesus dapa tangkap
26:47-56
(Markus 14:43-50; Lukas 22:47-53; Yohanis 18:1-11)
47Waktu Yesus masi bicara, Yudas sampe. Dia tu satu dari Antua pung murid sapulu dua orang. Dia datang sama-sama deng orang banya sakawang yang bawa parang deng kayo. Dong dapa suru dari orang Yahudi pung imam-imam kapala deng pamimping-pamimping. 48Yudas yang jual Yesus tu su kasi satu tanda biar dong tau Yesus tu yang mana. Dia bilang kata, “Kalo kamong lia beta ciong sapa, itu Dia suda. Tangkap Dia.”
49Waktu Yudas sampe, dia langsung pi par Yesus la bilang par Antua kata, “Salamat malang Tuang Guru!” Abis itu dia ciong Antua.
50La Antua bilang par dia kata, “Tamang e, biking apa yang ale mau biking tu jua!” Tarus, orang-orang yang datang sama-sama deng Yudas tu maju tangkap Antua. 51Mar skrek bagini, satu dari Antua pung murid-murid cabu parang la potong orang Yahudi pung Imam Basar pung jongos la dia pung talingang putus. 52La Yesus bilang par dia kata, “Hoe! Sarong ale pung parang tu! Tagal sapa sa yang barmaeng deng parang, dia nanti mati deng parang lai. 53Ale kira kata Beta seng bisa minta Beta pung Bapa par kiring malekat labe dari sapulu dua pasukan#26:53 Bahasa Yunani pake kata legion. Satu legion tu ada 6.000 orang tantara. Jadi, malekat labe dari sapulu dua pasukan tu sama deng labe dari 72.000 malekat. kamari par bantu Beta ka? 54Mar kalo Beta biking bagitu, apa yang su tatulis dalang Allah pung Tulisang soal samua yang jadi par Beta sakarang ni, akang mau jadi bagemana?”
55Waktu itu, Yesus bilang par orang banya tu kata, “Kamong kira kata Beta ni tukang malawang pemerinta kapa sampe kamong datang bawa parang deng kayo par tangkap Beta? Sabang hari Beta dudu dalang kintal Tampa Sombayang Pusat par kasi balajar orang, mar kamong seng tangkap Beta.#Lukas 19:47, 21:37 56Mar samua ni jadi macang bagini biar apa yang tatulis dalang Allah pung juru-juru bicara pung tulisang tu jadi.”
Tarus Antua pung murid-murid samua lari kasi tinggal Antua sandiri.
Yesus dapa sidang
26:57-68
(Markus 14:53-65; Lukas 22:54-55; Yohanis 18:12-14, 19-24)
57Tarus, orang-orang yang tangkap Yesus tu bawa Antua ka Imam Basar Kayafas. Di sana, orang Yahudi pung guru-guru Torat deng pamimping-pamimping su bakumpul. 58Petrus jua iko Antua dari jau. Dia iko sampe dalang Imam Basar pung kintal ruma. Tarus, dia dudu sama-sama deng tantara-tantara par mau lia apa yang mau jadi deng Yesus abis dong urus Antua pung parkara.
59Imam-imam kapala deng samua Pamimping-pamimping Sidang cari-cari saksi parlente biar dong bisa hukum mati Antua. 60Mar dong seng dapa bukti satu lai, biar kata banya orang su maso par jadi saksi parlente soal Antua. Akang pung laste, dua orang maju ka muka par bicara. 61Dong dua bilang kata, “Dia ni parna bilang kata, ‘Beta bisa rubu Tampa Sombayang Pusat la dalang tiga hari Beta nanti kasi badiri akang kombali.’ ”#Yohanis 2:19
62Tarus Imam Basar badiri la bilang par Yesus kata, “Ale su dengar dong tudu-tudu Ale to? Ale seng jawab dong?” 63Mar Antua tado sa. La Imam Basar tu bilang par Antua kata, “Demi Allah yang hidop tarus-tarus, coba bilang par katong! Se ni Orang yang Allah su Angka par Kasi Salamat Manusia, Allah pung Ana tu ka?”
64La Yesus jawab kata, “Ale sandiri su bilang akang. Mar dengar Beta bilang par kamong! Mulai dari oras ni kamong nanti lia Beta Ana Manusia ni dudu di Allah yang pung Kuasa Paleng Basar tu pung sabala kanang, tampa paleng panting. Kamong jua nanti lia Beta turung dari sorga dalang awang-awang.”#Danyel 7:13
65Pas dengar bagitu, Imam Basar tu robe dia pung pakiang tagal mara paskali la bilang kata, “Dia su hojat Allah! Katong seng parlu saksi lai. Kamong sandiri su dengar Dia hojat Allah to? 66Kalo iko kamong, katong musti biking apa Dia?”
La dong samua jawab kata, “Dia musti mati!”#Imam-Imam pung Atorang 24:16
67Tarus, dong luda Antua pung muka deng pukul Antua. Ada jua yang tampeleng Antua#Yesaya 50:6 68la tanya kata, “Hoe Orang yang Allah su Angka par Kasi Salamat Manusia e, coba Ale bilang kata sapa yang pukul Ale?”
Petrus manyangkal Yesus
26:69-75
(Markus 14:66-72; Lukas 22:56-62; Yohanis 18:15-18, 22-27)
69Waktu Yesus ada dapa sidang di Imam Basar Kayafas pung ruma, Petrus ada dudu di kintal. La jongos parampuang satu datang par dia la bilang kata, “Ale ni jua yang sama-sama deng Yesus orang Galilea tu to?”
70Mar Petrus manyangkal itu di muka samua orang yang ada di situ kata, “Ao, beta seng tau ale pung maksud apa.”
71Tarus, Petrus pi ka dekat pintu pagar. Di situ ada jongos parampuang laeng lai lia dia la bilang par orang-orang yang ada di situ kata, “He, Dia ni tadi ada sama-sama deng Yesus orang Nasaret tu!”
72Mar Petrus bale manyangkal lai deng sumpa kata, “Demi Tuhan e! Beta seng kanal orang itu!”
73Seng lama bagini, orang-orang yang ada badiri di situ datang par dia la bilang kata, “Seng sala lai! Ale ni pasti satu dari Yesus pung tamang-tamang, tagal kantara dari ale pung logat tu.”
74La Petrus kutok dia pung diri sandiri la sumpa kata, “Demi Tuhan e! Beta seng kanal orang itu! Biar Tuhan hukum beta kalo beta parlente!”
Pas dia bilang bagitu deng langsung ayang pai bakuku. 75La Petrus dapa inga kalo Yesus su bilang par dia kata, “Waktu ayang pai balong bakuku lai, ale su manyangkal tiga kali kalo ale seng kanal Beta.”
Tarus, dia kaluar dari situ la manangis sampe tahek-hek.
Поточний вибір:
Matius 26: ABMA
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2022, Sinode Gereja Protestan Maluku
