LUKAS 17
17
Etope-taidoopa Etita Mana
1Tijake etope-taidoopa eteete mana, „Beu ma ko beu, peu agijo mejawii manaido meitai, kodeja mejawe-tai bagee peu kugouto dokidoke tai.
2Kou danite kei daba bagee kede idaana monoo etai kodo ma ko, ibo mogo ogo maida gadimijake maikai duba eemigimakai enaa.
3Epeepite gai! Aki keneka peu kei tipi etii to. Okai tedemipi ipa ejaikai.
4Naagoona kigi pituwo peepu katijake akeepa kigi pituwo wouga kijake, ’Ani tedemeega’ katipi, ipa ejaikai,” etii.
5Tijake eti-awitaido kedaa Tuhanpa eteete mana, „Iniija maakodo gai dimi kodo abuma nijaawii,” etii.
6Tijake Jesus eteete mana, „Ikiija maakodo gai dimi kodo sesawi miteena dani naako, ikii uu peu kidi ara uta uti kidiipa, ’Badidoke tijake maikaida wedoke ti’ eti-toja, tijake kijuwidoke tai.
7Meime ikii jupi kakei te-tai me maki utijake juwa, domba ooto-tijake juwa, kei teeteida make owaapa joko mejake etii ko, ’Egaa mei, no-te no.’
8Mee? okaapa eteete mana, ’Naija agijo epeepi natijawijake piti tagi atijake naadadai. Ani nojawijake aki nemouga nai.’
9Etita danite kei tai kouja kei te-tai me kidiipa nagajaweege etii, mee?
10Okai kou dani ikii maija kitita danite kei timakijake wegai ko: Inii ke epa beu kei te-tai bagee. Inii kei tija agijo to kei tai kodo.”
Tomo Jago Dani Me Ida Gaati
11Jerusalim uweetigo Samaria ma Galilea ma wokaato kai.
12Maki katouda wadoujo keetigo tomo jago dani me ida gaati poto make joonidaa ti-toojogo edou.
13Tijake wuu eteete mana, „Ei, Jesus, ei, Kuduu, ipa nigai,” etii.
14Jesus edojake eteete mana, „Ikii uwijake akaato imam kidiipa emuwakai,” etii. Okei uweetigo gaa tomo kodo oodaa.
15Tijake okei jupi ka me idaana oodoke keega gajake wo uwijake emeemeida Ugatame muta etuwai.
16Jesus jumaapa maki maida mijouga kijake nagajaweege etii. Me kidi Samaria ka me.
17Tijake Jesus eteete mana, „Beu mee? me ida gaati oodaa keegai. Ijéé kei kaija?
18Me idaana ma Ugatame muta etuwaate joko te mei, mee? ojaa me ki ma ko,” etii.
19Tijake me kidiipa eteete mana, „Joonidoke tijake owaapa uwii! Akija maakodo gai kodaa kaojawii,” etii.
Ugatameja Jakimakita Makiida Mei Mana
20Ugatameja jakimakita makiida meita mana Parisi bagee egaado tijake Jesus wo eteete mana, „Ugatameja jakimakita makiida meita ko peka ka dou ko beu.
21Daana me ka te wegai, ’Gadowei, kiija topi’, juwa, ’Kouja topi’ juwa. Ugatameja jakimakita makiida ikii duba kouja.”
22Tijake etope-taidoopa eteete mana, „Emino ikii me Joka ka naago kato doune tijake didi gaita, kodeja te domake.
23Tijake me ka kitiitai, ’Dowei, kou no!’ juwa, ’Dowei, kii no!’ Ikii te uwijake te eepei.
24Epa momogiida make epa momogiida to tekebego wakibego tija dani bukaa, okai kou dani maija me Joka ka putu naagouda.
25Kodeja kou mana beu gaa kodaa, mana wedaba didi gaduwajake kii me kakade ka ekonai.
26Nu tota wagiida kei tita danite me Joka kidaa wagi maija kou dani kaita.
27Okei nogoo ma, waka bukii ma, waka eumai ma, Nu owaa jago komaida matakitaida to. Tijake uwo pegemijake okei utoma edamijawita.
28Lut tota wagi maija kou dani. Okei nogoo ma, edai ma, kaa tai ma, ijoo wei ma, owaa migijawii ma.
29Kodeja Lut Sodom makiida podomita naago kodo epa maida make bodija ma, bodija poke mogo ma edi weja danite okei utoma edamijawita.
30Okai kou dani maija me Joka ewaida kaitagiida kodo.
31Okai kou naago kodo owaimouda toutagi me kidi edepede owaa duba tojake motiine mijouwe te kai. Daana taida toutagi me wo te uwii.
32Lut waka kodo gai.
33Meija okai akaato muniine gapi, okai akaato igajawiitagi. Kodeja meija okai akaato igajawipi, okai akaato madagajawiitagi.
34Ani kitii, okai kou uno kodo jame ida wija enaida aumijake idaana wado ebuki-motijake idaana ejaikidokii.
35Jagamo ida wija enaida uta jugee aateetigo idaana wado ebuki-motijake idaana ejaikidokii.
36Daana jame ida wija taida aatojake me idaana ki ebuki-motijake idaana ejaikidokii.”
37Tijake okei eteete mana, „Kaija, Tuhan?” Etijake Jesus wo eteete mana, „Katouda má jato topa ko, okai kouda kodaa bedowagija maija kotuu tigoo,” etii.
Поточний вибір:
LUKAS 17: EKG
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
