LUKAS 18
18
Mana Peta-tai Peu Me Kidi
1Okai ena dani awe-tai mana oowegai, dimi te duwajawijake sembahjang to tigoo beu kai peu mana kodo.
2Eteete mana, „Maki katouda mana peta-tai idaana toojogo. Okai Ugateme weda egai beu. Daana me maija ibo ejaikai beu.
3Kii makiida mijáá jagamo tojake okaapa megoo tijake ediimeete mana, ’Akaije nate-tai me kidi maida boko napetajawii,’ eetii.
4Okai gepuu to etigoo, kodeja wadoutouga okaija kegepa duba kei teete mana, ’Ani Ugatame weda egai beu, daana me maija ibo ejaikai beu kodeja,
5kou mijáá kodo apaapu natigoo kouja ani boko japetajawiita, megoo teete ani odoo kidoke na kojoka,’ gai.”
6Tijake Tuhan eteete mana, „Peu peta-tai kidaa mana juwei!
7Beu mee? Ugatameja ewitokita bagee agapi wanee ediimigoo to tijake boko japetajawiitagi, okei maida ipee kipi maija.
8Ani kitii, okai egaa kodo boko japetaitagi. Kodeja me Joka meitagiida makiida kiija maakodo gai mana domakaitagi, mee?” etii.
Parisi Me ma, Mege Kotuu Te-tai Me ma Sembahjang
9Me wija wido akaato maa gajake joko bagee daba ejaikita bagee kedeepa ena dani awe-tai mana oowegai.
10„Me ida wija Ugatameja owaapa sembahjang taine woujo aakai. Idaana ki Parisi me, daana joko ka kidi mege kotuu te-tai.
11Parisi me kidi joonidoke tijake okai kidi kii dani sembahjang tai: ’Ei, Ugatame, nagajaweege katii, ani ki joko ka bagee dani ko beu kouja. Bokome-tai juwa, anaani juwa, mogai juwa, kii mege kotuu te-tai kidi juwa dani bukaa.
12Sabbat putuuda kigi wija te nai dijo douga. Anija motita aagijo taagijo gaatijago didee kaneiga,’ wegai.
13Kodeja mege kotuu te-tai kidi poto make joonidoke tijake, epa maida wado dou weda gajake mijouga kijake kei teete mana, ’Ei, Ugatame, ani peu me ipa nagai!’ etii.
14Ani kitii, kii me kidi maa eewijake owaapa jamo uwii, joko ka kidi dani ko beu. Akaato ibo awita me kidi daba kaitagi kouja, kodeja akaato mijo awita me kidi ibo kaitagi.”
Jesus Jokaido Ebukai
15Me ka jokaido Jesuspa oomei, ejakido-tita. Etope-taido edojake enogimai.
16Kodeja Jesus jokaido kede manaa-tijake eteete mana, „Jokaido aneepa me-tita no naaejaikei. Wate-wate te etai. Ugatameja jakimakita makiida kei dani bagee ipuwe kouja.
17Beu maa kou ani kitii, meija Ugatameja jakimakita makiida joka dani tijake te jakimakipi, okai kouda kodaa umina wadoujo te kaitagi,” etii.
Jokaagaa Tonawi
18Pika-tai idaana ka Jesus egaado teete mana, „Ei, enauto Kuduu, ani magijo kei tai ajii taine no?” etii.
19Tijake Jesus eteete mana, „Magijo ka enauto naabateege? Meena ma enaa beu, kodeja Ena to, kii ke Ugatame kidi.
20Nitimakita manaido aki epi. Mogai te tai, me te wagii, oma te motii, puja mana te kubai, akaitai akuukai ibo ejaikai,” etii.
21Tijake amo eteete mana, „Kei utoma jokaida kodaa make dijo douga,” etii.
22Jesus kou mana juwijake eteete mana, „Tumaana to akeepa beu. Akija agijoudo utoma kaa tijake daba bageepa jawudii. Tijake aki epaawado ka agijo makiitage. Daana mejake ani naapei,” etii.
23Kodeja kou mana juwijake okai gaagaa umina, okai tonawi umina kouja.
24Jesus kou kodo jadojake wegaate mana, „Tonawi bagee Ugatameja jakimakita makiida wadoujo kai ko gaagaa umina no.
25Tonawi me idaana Ugatameja jakimakita makiida wadoujo kai ma ko, unta idaana keipo mugu duba woujo kai ko euga ekowamakija,” etii.
26Kou mana juwita bagee eteete mana, „Keetigo meime ajii tija?” etii.
27Kodeja Jesus eteete mana, „Me ka te ekowamakija mana Ugatame ekowamakija,” etii.
28Tijake Peterus eteete mana, „Dodou, inii ipuwe agijo jaikidokijake kaapeetege,” etii.
29Tijake Jesus eteete mana, „Beu maa kou ani kitii, me idaana ma Ugatameja jakimakita makiida maida make owaa ma, jagamome ma, kenekaane ma, nakame ukame ma, jokaane ma te ejaikidokii,
30kodeja kii makiida kiija kigi inoudo joko motiitagi, daana wado ka wagiida kodaa ajii tai imo to togoo,” etii.
Kigi Widaago Jesus Bokaitagi Mana Eti-menita
31Wija ma gaati kede ouwijake eteete mana, „Juwidowei, inii Jerusalim wado uwii. Daana utoma agijo utoma tikauwa ka gokobaki tijawiidaiga wegai tita bagee ka me Joka maida make ebijamakita manaido kobadaa taitai.
32Ojaa bageepa eekegajawiitai kouja; tijake okei ewidogijake peepu etaitai, daana epoge etuwaitai.
33Tijake okei godijai etijake wagimakaitai; tijake widaago naago okai anigoutagi,” etii.
34Kodeja kei manaido mana mutoona ma gamakai beu. Okeepa make mana boko jato boonidoke kouja, tijake etita mana gamakai beu.
Jericho Kapauto Peka Wanee Me Beu Jaawita
35Jericho kapauto kijake peka wanee me idaana ita watija animakijake naimi-naimi teetigo.
36Me wedaba wokaato keete juwijake, egaado teete mana, „Magijo ewaa keega?”
37Etijake me ka eteete mana, „Jesus, Nazaret ka me kidi jaweete,” etii.
38Tijake emeeme teete mana, „Ei, Jesus, Daud Joka, ipa nagai,” etii.
39Okei tiga jawita bagee ewidogijake, gabo tou etii. Kodeja okai umina kidi emeeme to tigoo, „Ei, Daud Joka, ipa nagai!” etii.
40Tijake Jesus joonidoke tijake aneepa oomei etii. Okai kapa kijake Jesus egaado teete mana,
41„Aki magijo ide ani kakei tai ko?” Etijake, „Tuhan, peka nakadijawii kadiimai,” etii.
42Tijake Jesus eteete mana, „Peka dodou. Akija maakodo gai kodaa beu keege,” etii.
43Okai kou gaa kodo maija peka kadidoke tijake eepei, Ugatame muta etuwaate. Meido utoma kou kodo dojake Ugatame muta etuwai.
Поточний вибір:
LUKAS 18: EKG
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
