LUKAS 16
16
Owaa Douto-tai Me Peu Kidi Ena Dani Awe-tai Mana
1Tijake etope-taidoopa eteete mana, „Tonawi me idaana owaa jadouto-tai kidaa edepede utoopa jatikumeete mana me ka okaija ibo kidiipa jaetii.
2Tijake ibo kidaa manaa-tijake eteete mana, ’Má mana aki maida make juwipa? Aki douto-tai mana ko joko kega-naimai, aki douto-tai mana maida peu keege kojoka,’ etii.
3Tijake douto-tai me kidaa kei teete mana, Ani magijo kei taita? Anija ibo kidaa douto-tai mana maida make najaikaipagi kouja. Ani maki utii to kaga, daana meepa agijo ediimigoo maija ego.
4Ani epi anija kei taine agijo, me ka owaapa nabuke-tita, anija douto-tai mana maida make najaikijake ko, dimi gai.
5Tijake okaija ibo kidiipa ebé tota bagee me gakita manaa-tijake edoga ka kidiipa egaado teete mana, ’Anija ibo kidiipa ebé magoo topai?’ etii.
6Tijake wo eteete mana, ’Uwoutu ebijadou mutoona’ etijake wo eteete mana, ’Akija ebé ugamakita kapogeije motijake, egaa animakijake jokagaati ugajawii,’ etii.#16:6 Seratus lima puluh
7Tijake me idaanaapa eteete mana, ’Aki ebé magoo?’ Etijake wo eteete mana, ’Gandum ebijadou mutoona,’ etijake wo eteete mana, ’Ebé ugamakita kapogeije motijake gaatibeu ugajawii’ etii.#16:7 Seratus delapan puluh
8Peu ka douto-tai me kidi ibo kidaa muta etuwai, okai epi dimi ma kei tipi kouja. Aweida ka jokaane ma ko kii makiida ka jokaane kedaa euga epi dimi ka akaate tai okei ma bagee ma enaimo.
9Daana ani kitii, peu Mammon#16:9 Mege demi kodo ma akooge akooge tiwei, Mammon kodo igadoke tijake okei imo to togoo to-taida kibuke-tita.
10Mijo mana maida enanaa bagee ibo mana maida maija enanaa. Daana meija mijo mana maida ena peu kipi, ibo mana maida maija ena peu.
11Okai kouja ikii peu Mammon kodo maida ena peu kipa, meija maakodo jegeenaka agijo maida kijaikaitai?
12Daana me ino ka agijo maida ena peu kipa, meija ikiidaweda agijo kiniitai?
13Kei te-tai me idaana ka ma ibo wijaapa te ejuwija, me idaana be egajake joko ka kidi ei egai kouja. Juwa, me idaana kidi ejakimakijake, joko ka kidi daba ejaikai. Ikii Ugatame ma Mammon ma enaida te ejakimakija.”
14Parisi bagee, mege kibigi bagee kede, kou mana muto juwijake ewidogai.
15Kodeja Jesus eteete mana, „Ikii akaato me jumaapa inii ke maa wegaiga, kodeja ikiija kegepa ko Ugatame kidou epi. Me pekaida ibo agijo Ugatame pekaida nokii agijo kouja.
16Musaja dijo douja mana ma, tikauwa ka gokobaki tijawiidaiga wegai tita mana ma, Jahja tota wagiida to. Kou wadoutouga Ugatameja jakimakita makiida mana ugo uwidoke, daana me bida peu kidi kebagoo wadoujo kai.
17Musaja dijo douja manaida ka mijo daba mana mutoona to igadoke tai kodo ma ko, epa ma maki ma beu kija.
18Meija jagamome ejaikidokijake joko ka jagamo wo ebukipi, okai mogai. Daana meija jameme ka ejaikita jagamo ebukipi, okai mogai.
Tonawi Me ma Lazarus ma
19Tonawi me idaana toojogo. Okai diiti kagaba makijake naago gakita diiti pagaadagaida umi-tou tita.
20Okaija damoutoopa diime-diime te-tai idaana eka ki Lazarus, tomo abumidoke tita kidi pakuti-toojogo.
21Tonawi me ka kejageida make mijo gootidaa puugeida naine kibigi gai. Dodi maija mejake tomo kodo jakudeeno tigoo.
22Ibopo umii beu gaa diime-diime te-tai me kidi bokajake Ugatame jaetigo-tai bagee ka Ibrahim mutaidaapa edoke-uwii. Tonawi me maija bokajake emakijawii.
23Bokawouda didi gaduwaatigo peka wado doumigijake Ibrahim poto edou, daana Lazarus ejupugi-toojogo.
24Tijake emeeme teete mana, ’Ei, naitai Ibrahim, ipa nagajei, Lazarus aneepa mei naaetii, kipo momogi uwo duba tokamijake anaa eta maida gemoo gemoo natijawii. Bodija wii duba didi gaduwaate no,’ etii.
25Kodeja Ibrahim wo eteete mana, ’Ani joka, gaadou; aki makiida tootege gaa kodo enaa agijo go-motii, kodeja Lazarus peu agijo. Ito kou okai jakai mobu kai, kodeja aki ki didi gaduwai.
26Kou to ko beu kodeja, inii ma aki ma jupi jagaa peijo topa, tijake jakai make jawiine bagee te jawimake, daana mijo make bagee maija wado te memake.’
27Tijake me kidi eteete mana, ’Kou dani keetigo ko, ei, naitai, ani kadiimai, naitai owaapa ebadikumii.
28Ani keneka idibi topai kouja; naaetijake okei maija gaduwaida kiija te ke-tita,’ etii.
29Kodeja Ibrahim eteete mana, ’Okei Musaja kapogeije ma, tikauwa ka gokobaki tijawiidaiga wegai tita bagee ka kapogeije maija topai. Kei kede ejuwe-tai enaa.’
30Kodeja wo eteete mana, ’Beu, naitai Ibrahim, kodeja kou danite bokata me idaana anigojake okeepa uwi-toojogo ko, okei tedemaipigai,’ etii.
31Kodeja Ibrahim eteete mana, ’Okei Musa ma tikauwa ka gokobaki tijawiidaiga wegai tita bagee ma te ejuwipai, bokata me idaana anigopi maija epaapa te taipigai,’ etii.”
Поточний вибір:
LUKAS 16: EKG
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
