Luc 9
9
Ke totamiritci Cecoc owitcewakana
(Natawapata kaie Matio 10.5-15; Mark 6.7-13)
1Minawatc Cecoc ki mawotcihew owitcewakana e mitato acitc niciritci, mackawisiwiniw kirika tiperitamowiniw e miratc kitci ki matceticohwaritci kaskina matci manitowa kaie kitci ki kikeharitci iriniwa ka aiakosiritci. 2Kaie tca ki iciticahwew kitci pa nta aiarimotamiritci Kice Manitowa Okimawiniw kirika kitci kikeharitci ka aiakosiritci, 3e itatc: “Akawir kekocic matcewitakw matcaiekwe: akawir askohon kaie mackimotai, akawir kaie mitcim kaie coria. Akawir kaie matcewitakw nanicw kipapakiwaniwaw. 4Kaskina neta wiec e ici mireritakik iriniwok e wapamitakok, ekota neta peikonok tacikekw, nac kitci nakatamekw anihe otenaw. 5Kaskina neta wiec aka e ici mireritakik iriniwok e wapamitakok, orowikw neta otenamiwak. Powiparitakw tca kimaskisiniwaw e mirikosiwok. Kata tca kiskeritakoniw arotc e ki totakik.” 6Aci matcariwa anahweriw Cecoc owitcewakana. Kaskina otenaskak ki pa icawok e tipatatakik Mirwatcimowiniw kirika kaskina wiec e kikehatcik ka aiakosiritci.
Kowetowi e iteritak Okimaw Hérode
(Natawapata kaie Matio 14.1-12; Mark 6.14-29)
7Minawatc Hérode, anahwe ka okimawikopanen Galilée askik, ki petakepan kaskina wiec e iciwepanik. Kowetowi iteritamokopan, osam atita e aiterispana: “Capatis na ka ki apitcipatc!” 8Kotakihik itewakopan: “Élie na.” Aci kotakihik itewakopan: “Enko anaha peikw nta e tacitcik weckatc ka ki nikan tipatcimowaspan Kice Manitowa otci, ka ki apitcipatc.” 9Aric Hérode ki itew: “E ki tca iteian kitci kickikwecowakaniwitc Capatis, awin tca anahwe iriniw ka petakeian kaskina kekociciriw e itatcimakaniwitc?” Natowi totamokopan tca kitci wapamatc anihi Cecoca.
5 000 iriniwok e acamakaniwitcik
(Natawapata kaie Matio 14.13-21; Mark 6.30-44; Jean 6.1-14)
10Minawatc e pe kiweritci Cecoc otarotakana, witamako kaskina ka ki ici aitotamiritci. Ki tca matcewirew, nte pecotcik otenacik e iciwiratc, Bethsaïda ka icinikaterik, tepirak wircikewaw e wi taciketcik. 11Aric mitcet iriniwok ki petakewok. Ki tca nosanehwewok. Ki mireritam Cecoc e wapamatc anahweriw ka nosanehikotc. Ki arimotamawew Kice Manitowa Okimawiniw, kaie ki kikehew anahweriw nta e taciritci ka aiakosiritci.
12E iti awokarik, pe natawapamiko Cecoc anihi mitato acitc nicw owitcewakana, e tca itikotc: “Ki ta matceticohwawok kaskina aniki iriniwok, papikan otenacik kirika kitikan askik kitci icatcik, kitci nantowapatakik ke ici taciketcik kirika ke mitcikik. Aka kekwan e takok ota.”
13Aric itew Cecoc: “Kirawaw tipirawe acamakok!”
Itiko tca owitcewakana: “Tepirak niaran pakwecikan kirika nicw names taw. Pot ki nataweritenatake kitci nta otapinamak mitcim kaskina wirawaw otci?” 14Tapwe wirata mitcetiwakopan iriniwok, wiec niaranaw kice mitato mitana awocamec e taciwakopanen.
Cecoc itew owitcewakana: “Tatipan apihakok, wiec niarano mitana kitci tacitcik e tatoreanimikisitcik.” 15Ki itotiskewok ka ki itakaniwitcik. Kaskina ki apihewok. 16Minawatc Cecoc ki otapinew anihi niaran pakwecikana kirika anihi nicw namesa. Ki itapiw icpimik wakwek, mikwetc e itatc Kice Manitowa aniheriw mitcimiriw otci. Ki tetawonam, kirika ki mirew owitcewakana kitci papakitinaritci. 17Tato nta e tacitcik aniki iriniwok kaskina ki mitcisowok nac e miro tipiparitcik. Minawatc ki matcewitawok mitato acitc nicw pakitenakaniw tekaci kiapatc e mockinerik mitcimiriw e ki ickoparinik.
Pien e itetc: “Cecoc, enko anihi Kice Manito ka ki itespan kitci pe iciticohwatc kitci akwacimiweritci.”
(Natawapata kaie Matio 16.13-19; Mark 8.27-29)
18Peikwaw e kicikarik, wircike taci aiamihapan Cecoc, owitcewakana kaie wirawaw pecotcik e tacikeritci. Aci kokwetcimew: “Tan ni e itetcik aniki iriniwok e mitcetinaniwonik e arimomitcik?”
19Itiko owitcewakana: “Atita itewok: ‘Capatis anahwa.’ Kotakihik: ‘Élie na.’ Minawatc kotakihik itewok: ‘Enko anaha peikw nta e tacitcik weckatc ka ki pe nikan tipatcimowaspan ka ki apitcipatc.’”
20Itikowok Cecoca: “Aric kirawaw, awin ka iterimiekw?”
Pien itew: “Kir anihi ka ki itespan Kice Manito kitci pe iciticohwatc ota askik kitci akwacimiweritci!”
E tipatatak Cecoc kitci nipotc kaie kitci apitcipatc
(Natawapata kaie Matio 16.20-28; Mark 8.30–9.1)
21Minawatc Cecoc ki cikimew owitcewakana aka awiriw kitci arimotamowaritci aniheriw Piena ka ki iteritci. 22Itew kiapatc: “Acteriw kitci micta nekatcitatc anahwe Ka ki pe iriniwihitisotc.#9.22 Ka ki pe iriniwihitisotc: Arimomitiso ota Cecoc. Cota aiamihe okimawok acitc cota makatewokorewok ka tiperitakik kaie ka kiskinohamaketcik cota aiamihe irakonikewiniw kata wepakonewok. Kata nipahakaniwiw, minawatc ickwa nicto kickokarike kata apitcipaw.”
23Minawatc kaskina iriniwa itew: “Kecpin awik wi pe nosanehwite, kata ponitaw wir tepirak e mamitonerimitisotc. Tato kickwa kata miwirew otcipaiatikoma kitci pe nosanehwitc. 24Anahwe meka tepirak ka iteritak kitci kanaweritak ota askik opimatisiwin, kata onitaw. Aric anahwe ke pakiteritak opimatisiwin nin e nosanehwitc, kata kanaweritam. 25Ceckwat awik kata wi tatamopan kaskina kekociciriw ota askik, kecpin wir tipirawe onicimitisote kekotc tekaci onicike? 26Kecpin awik wanerimite kirika waneritake nititewiniw, kata wanerimiko anihi Ka ki pe iriniwihitisoritci, minawatc pe takociniritena oticperitakosiwinik, kaie Otawiriw oticperitakosiwinirik, kirika aceriwok e kitcitwaweritakositcik. 27Tapwe ohwe ka witamatakok: atita ota e taciketcik nama kata nipowok epwamoci wapatakawe Kice Manitowa Okimawiniw.”#9.27 epwamoci wapatakawe Kice Manitowa Okimawiniw: Wi itemakanotake: epwamoci wapatakawe Kice Manitowa e tiperitcikeritci.
E wapatahetc Cecoc oticperitakosiwin
(Natawapata kaie Matio 17.1-8; Mark 9.2-8)
28Wiec nicwaso kickwa#9.28 nicwaso kickwa: 8 jours. Peikwo minactakana. ka ickwa aitetc aniheriw Cecoc, ki amatciwew matinak kitci nta aiamihatc, nicto owitcewakana e matcewiratc: Pien, Jean acitc Cak. 29Mekwata e aiamihatc, pitoc iti icinakosiw. Iti wasikweso otactamikok kaie owikasim iti micta wapariw mia e wasiterik. 30Kek nicw iriniwok nokosiwok, Moïse kaie Élie,#9.30 Moïse kaie Élie: Enko aniki weckatc iriniwok ka ki arimomakaniwitcik Kice Manito Omasinahikanik. e taci aimihitotcik kirika Cecoca. 31Ki pe nokosiwok e micta mamiskasinakositcik e micta wasearik e waskakotcik. Ekoni e ici aimihatcik Cecoca, e arimotamawatcik ke pe iciwepasiritci, kitci ki tca pe otcitciparinik aniheriw ka ki mirakaniwiritci kitci totamiritci ota askik, niporitena Jérusalem otenak. 32Pien kirika okwimesa micta nipawakopan. Ka kockositcik, aci wapamewok Cecoca e micta icperitakosiritci kirika anihi nicw iriniwa e witcikapowictakoritci. 33Iti matcawok aniki iriniwok e nicitcik. Apitc e nakatatcik Cecoca, aci Pien itew: “Kiskinohamake iriniw, mirwacin e tacikeikw ota. Nicto rakasimonikiwama ni ka orekahenan: peikw kir, peikw Moïse, acitc peikw Élie otci.” —Nama kiskeritamokopan aniheriw e itetc anahwe Pien.— 34Mekwata e taci arimwetc, aci iti nokon e petoskowok, nac kaskina aka e nokositcik e rikockakotcik oskoriw. Cecoc owitcewakana koctatciwok e wapamatcik e iti rikockakoritci oskoriw. 35Kek otci petakon oskok, e itwaniwok: “Enko ohwa Nikosis ka ki orapamak. Natotawakw!” 36E ickwa petakik aniheriw, aci wapamewok Cecoca e peikokapowiritci. Nama tecikotc ki otci arimotamok aniheriw ka ki ici wapatakik. Nama awiriw ki otci witamawewok.
E kikehakaniwitc awacic, matci manitowa ka ki pitciteheckakotc
(Natawapata kaie Matio 17.14-18; Mark 9.14-27)
37Minawatc kecepawonik ki nitcitciwewok Cecoc kirika owitcewakana. Ki mitcetinaniwoniw e pe nta nakickowakaniwitc Cecoc. 38Aci peikw iriniw tepitepwew neta e tacinaniwonik, e itetc: “Kiskinohamake iriniw, ki pakoserimitin kitci nta kanawapamatc nikosis! Ekoni kotc e peikocitc nikosis! 39Matci manitowa makoniko. Keskat notakohiko, kirika opirikopitiko nac e pictewakaminik e pikiskwetc. Mictahi nanekatcihiko, kirika arimisiw kitci ki nakatikotc. 40Ni ki pakoserimawok kiwitcewakanak kitci matceticohwatcik anihi matci manitowa, nama aric ki otci kackihewok.”
41Itew Cecoc: “Wesa kirawaw ka matci iriniwiekw kaie aka ka asperimototawiekw! Tan irikik ke actek kitci witci tacikemitakok? Tan kaie irikik ke actek kitci witcihitakok?” Minawatc itew anihi iriniwa: “Peco ote kikosis.”
42Mia apitc ka iti petcimotetc anahwe awacic, ki wepicimiko motcik anihi matci manitowa kirika ki aiatcipitiko nac e opirikotc. Cecoc kitotew anihi matci manitowa: “Ponihi anahwe!” itew. Ki mirwatisihew anihi awaca. Minawatc ki iciwirew otatamirik. 43Kaskina tca ka tacikewaspan neta mamiskateritamwakopan e ki wapatakik e apitc mackawisiritci Kice Manitowa.
Kiapatc e tipatcimotc Cecoc kitci nipotc
(Natawapata kaie Matio 17.22-23; Mark 9.30-32)
Mekwata kiapatc e micta kockowapamonaniwonik kaskina neta e tacinaniwonik, itew Cecoc owitcewakana: 44“Kaketin natotamokw ohwe anotc ka witamatakok: anahwe Ka ki pe iriniwihitisotc kata pakiterimakaniwiw kitci makonikotc iriniwa.” 45Nama aric ki otci nisitotamok wa iteritci Cecoca. Ki katcicterikopan wa iteritci, aka wipatc kitci nisitotakik, kirika osam sekisiwakopan kitci kokwetcimatcik wa iteritci.
Awin ka mawotci kicteritakositc?
(Natawapata kaie Matio 18.1-5; Mark 9.33-37)
46Minawatc ki iti kikatowok Cecoc owitcewakana, e arimotakik awin neta e tacitcik ka mawotci kicteritakositc. 47Kiskeritamokopan Cecoc e iteritamiritci anahweriw owitcewakana. Aci peikw awaca ki natcipahew, e nanipowihatc opimera e icikapowitc, 48e tca itatc anahweriw owitcewakana: “Anahwe e miro mihitakw ohweriw awaca osam e sakihitc, kaie nin ni miro mihikw. Anahwe tca ka miro mihitc, miro mihew kaie anihi ka ki pe iciticohwitc. Anahwe meka mawotci aka e kicteritakositc neta e taciekw, enko anahwe tapwe ka mawotci kicteritakositc.”
Awik aka e wi cakotcihitakw, ki witcewikowaw ni
(Natawapata kaie Mark 9.38-40)
49Aci arimwew Jean, e itetc: “Kiskinohamake iriniw, ni ki wapamanan iriniw e matceticohwatc matci manitowa irinik, kiticinikasowiniw e apatcitatc. Ni ki kokwetcitanan kitci otcinehwakitc aka nte kitci totak, osam aka e witcewisk, mitowi ninan e witcewitak.”
50Aci itiko Cecoca: “Akawir otcinehwakw! Kecpin meka awik aka e wi cakotcihitakw, ki witcewikowaw ni.”
Iriniwok ka taciketcik peikw otenak Samarie askik aka e mireritakik kitci pe natawapamikotcik Cecoca
51Aci kekatc ke otcitciparinik aniheriw e kicikarik ke ocpickatc wakwek, Cecoc ki oreritam otcitakotc pitama kitci icatc Jérusalem otenak.#9.51 Jérusalem otenak: Ekota nta meka ke taci aiamihe makocaniwok. 52Ki nikan iciticahwew atita iriniwa kitci nikanickakotc. Ekoni e ici matcaritci kitci nisawiritci kitci miro takocik peikw otenacik, Samarie askik itekera. 53Aric iriniwok neta otenak ka tacikewaspan nama mireritamwakopan neta kitci pe nokickaritci anihi Cecoca, osam nete e icaritci Jérusalem otenak. 54Ka petaketcik tca aniki Cecoc owitcewakana Cak kirika Jean, ki itewok: “Teperitcikein, ki nataweriten ia kitci nataweritamak ickote kitci pe nitciparik, wakwek kitci pe otciparik, kitci ki tca nipahikotcik aniki iriniwok?”
55Kiwekapowiw Cecoc e kanawapamatc owitcewakana kirika e kakeskimatc. 56Minawatc ki matcawok, kotak otenacik e icatcik.
Aniki ka wi nosanehwatcik Cecoca
(Natawapata kaie Matio 8.19-22)
57Mekwata e pimotetcik meskanak, peikw iriniw itew Cecoca: “Ki ka pa nosanehitin kaskina wiec ite ke pa icain.”
58Itiko Cecoca: “Wakocak takoniw owaciwaw, kaie pirecicak otcictoniwaw. Aric anahwe Ka ki pe iriniwihitisotc nama takoniw wiec nte ke ki ici mackocik kitci ki arwepitc.”#9.58 kitci ki arwepitc: Manawan: kitci ki arwecimotc.
59Minawatc kotakihi iriniwa ki itew Cecoc: “Nosanehoci!”
Itiko tca anihi iriniwa: “Teperitcikein, pakitinici pitama kitci nta rikwaskatak notawi.”
60Itew Cecoc: “Pakitinakok aniki ka nipotcik e iteritakositcik kitci rikwaskatatcik ka niporitci. Kir tca, matca nta pa tipatcimo Kice Manito Okimawin.”
61Kiapatc kotakihi iriniwa itiko: “Ki ka nosanehitin, Teperitcikein, aric pakitinici pitama kitci nta matcacikowakik nitcirowemakanak.”
62Itiko tca Cecoca: “Anahwe ka iteritak kitci nosanehwitc, aric picicikw ka itapitc otananik e mitatak kitci pakitinak, nin otci, kaskina ka ki pe ici pimatisitc, nama wiec irapatisiw Kice Manitowa Okimawinik.”
Поточний вибір:
Luc 9: ATMK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Canadian Bible Society, 2014
