Luc 10
10
Cecoc e iciticohwatc nicowaso mitana acitc nicw#10.1 nicowaso mitana acitc nicw: (72) otirinima
1Minawatc Teperitciketc ki orapamew nicowaso mitana acitc nicw kotakihi iriniwa. Nanicw ki iciticahwew kitci nikanickakotc, kaskina otenaskak acitc kaskina kotak wiec kitci icaritci, nete wir tipirawe ke icatc nanake. 2Epwamoci matcaritci ki itew Cecoc: “Mia kitikan askik icinakosiwok iriniwok, mitcen otamirowin ke ki totcikatek neta, aci e otcitciparik kitci mawotcitakaniwok kitikan, nama aric mitcetiwok iriniwok ke otamirotcik. Pakoserimakw anahwe ka mitatc e mawotcitakaniwonik kitikaniw, kitci pe iciticohwatc kotakihi iriniwa kitci pe nta witcihiweritci. 3Ekoci matcakw! Aci kit iciticohotinawaw kitci atoskectawiekw, e koctatikok nete ke iciticohotakok, mia maritcenicak e pimotetcik nte e ici taritci mahikana ki ka iteritakosinawaw. 4Akawir matcewitakw coriawoc, akawir kaie mackimotai. Nama kaie maskisin ki ka matcewitanawaw. Mekwata ke pimoteiekw, aka nokickakw kitci arimikowekw awik. 5Pitakeiekwe mikiwamik, pitama ki ka itwanawaw: ‘Kitci pekateritamekw, kaskina e taciekw!’ 6Kecpin tate iriniw neta tapwe ka wi pimatisitc pekateritamowiniw otci, kata mireritam ani e itakaniwitc acitc kata mirakaniwiw aniheriw pekateritamowiniw. Kecpin aric aka tate, nama kata mireritcikatew anihe ka ki itein, nama tca kata mirakaniwiw aniheriw pekateritamowiniw. 7Nte e ici mirerimikoiekw e pitakeiekw, ekota nta tacikekw. Ekoci mitcisokw kirika minikwekw ke ici mirikoiekw neta. Acteriw meka kitci ici mirakaniwitc awik tan e ici kanewitc e otamirotc. Akawir atcickakw, kotak mikiwam kitci nta tacikeiekw. 8Tatwaw takociniekwe otenak, neta ke ici mirerimikoiekw, mitcikw ke ici acamikoiekw. 9Kikehakok ka aiakositcik neta otenak kirika witamawakok iriniwok neta ka taciketcik: ‘Aci peconakoniw ota Kice Manito Okimawin kirawaw otci!’ 10Kecpin aric takociniekwe taci aka e ici mirerimikoiekw, ekoci icakw meskanak, kaskina kitci witamawekok: 11‘Mirikosi ka akokek nimaskisinanik ni powititanan kitci ki kiskeritamekw arotc e ki totamekw. Aric ki ta kiskeritenawaw, aci ota peconakoniw Kice Manito Okimawin kirawaw otci!’ 12Ki witamatinawaw: takociparike anihe ke kicikak kitci tipaskonikaniwok, aniki neta otenak ka taciketcik aka ke mireritakik kitci tacikeiekw kirawe wirawaw kata anwerimakaniwiwok patok aniki weckatc ka matci iriniwiwaspan ka tacikewaspan neta Sodome otenak.”
Otenak ka taciketcik aka ka wi tapwetakik
(Natawapata kaie Matio 11.20-24)
13“Ekwa kirawaw neta Chorazin otenak ka tacikeiekw! Nikotin ki ka nakickenawaw kitci arimipariekw! Kaie kirawaw Bethsaïda otenak ka tacikeiekw, nikotin ki ka arimiparinawaw! Kecpin nitowatc nete Tyr otenak kirika Sidon otenak ki taci mata kackitaian patok ota kirawaw ka ici tacikeiekw, aci weckatc wirawaw aniki iriniwok kata ki piskamopanak wikasiriw ka kawekinik, acitc iskwaskiteskok kata ki apipanak, kitci wapatahiwetcik e kweskatisitcik. 14Ekoni tca, takociparike anihe ke kicikak kitci tipaskonikaniwok, kirawe kata ariman kirawaw ke ici anwerimikoiekw patok aniki Tyr otenak kirika Sidon otenak ka taciketcik ke ici anwerimakaniwitcik. 15Minawatc kirawaw Capernaüm otenak ka tacikeiekw, kit iteritenawaw ia kitci icpinikoiekw wakwek? Ki ka nitinikowinawaw, neta ka ici taciketcik ka nipotcik#10.15 ka ici taciketcik ka nipotcik: Mia itemakan: l'Hadès. kitci icaiekw!”
16Itew kiapatc owitcewakana Cecoc: “Anahwe ka natotatakw, kaie nin ni natotakw. Kaie anahwe ka wepakonitakw, kaie nin ni wepakonikw. Anahwe tca ka wepakonitc, wepakonew kaie anihi ka ki pe iciticohwitc.”
Ka pe kiwetcik aniki iriniwok
17Minawatc pe kiwewok aniki iriniwok e nicowaso mitana acitc niciritci ka ki iciticohwakaniwitcik. Ki micta mireritamok, e itetcik: “Teperitcikein, wawatc matci manitowok ni ki sapitakonanak ka itakitcik kitci orowiteheckowatcik iriniwa, kiticinikasowin e ki apatcitaiak.”
18Itew Cecoc: “Ni ki wapamaw Matci Manito#10.18 Matci Manito: Satan icinikatakaniwiw Matci Manito ota. ka pe pakicik, wakwek e ki pe otciparitc, mia onimiskiw osko e waskorehak e icinakosispan.#10.18 Pot wi itetake: Ekoni wetci miroparik e orowiticohwekok matci manitowok, Matci Manito e ki cakotcihakaniwitc. 19Natotacikw! Ki ki miritinawaw kitci takoskatekok kinepikok kirika mantcocak ka koctatikositcik,#10.19 mantcocak ka koctatikositcik: Mia itemakan e emitikociwictek: “scorpion.” Enko anahwe mantcoc ka matci mackikiwitc, e kinwarik oso, onoskotc e takonik ocaponikan ka apatcitatc kitci pitcipohatc awiriw. Mictahi akohew, matci kaie kata ki nipahew. acitc kaskina kitci patakockamwekw omackawisiwin anahwe ka wi cakotcihitokw. Nama kekocic ki ka ki matci totakonawaw. 20Aka aric mireritamokw e sapitatakok matci manitowok. Ohwe kirawe mireritamokw: e ki masinahikateki kiticinikasowiniwaw wakwek.”
E mireritak Cecoc
(Natawapata kaie Matio 11.25-27; 13.16-17)
21Mia apitc ka itetc aniheriw Cecoc, aci ki mockineckako Miro Manitowa kitci micta mireritak, e itetc: “Notawi, kir ka tiperitaman wakwek kaie askik, mikwetc kit ititin e ki wapatahatcik kitapwewiniw ka apicicitcik, kaie tca e ki katowatcik iriniwok ka iterimitisotcik ‘ni omiro omitoneritcikaninan’ kirika ‘ni micta miro kiskeritenan kitci kekocic e ki kiskinohamasoak.’ Tapwe, Notawi, ekoni mia ka ki ici nataweritaman kitci icinakok.”
22Minawatc itew Cecoc: “Notawi ni ki mirikw kaskina kekociciriw kitci tiperitaman. Tepirak peikociw ka kiskerimatc Kice Manitowa Okosiriw, enkweriw Otawiwa. Peikociriw kaie anihi ka kiskerimikotc Kotawino, enkweriw Okosa, acitc kaskina anihi ka wi witciharitci kitci kiskerimaritci.”#10.22 Wi itemakanotake, e arimomitisotc Cecoc: “Nama awik ni kiskerimikw, tepirak Notawi ni kiskerimikw. Ekoni kaie peikon nama awik kiskerimew Notawia, tepirak nin ni kiskerimaw, kirika aniki kaie wirawaw ka natawerimakik kitci kiskerimatcik.”
23Minawatc itactimikapowictawew owitcewakana Cecoc, wirancikewaw e aimihatc, e itatc: “Ki caweritakosinawaw kirawaw e wapatamekw ohwe anotc ka ici wapatamekw. 24Ki witamatinawaw: mitcet iriniwok ka pe nikan tipatcimowaspan kaie okimawok wi wapatamwakopan aniheriw anotc ka ici wapatamekw, nama aric ki otci wapatamok. Wi petamwakopan kaie aniheriw aci anotc ka ici petamekw, nama aric ki otci petamok.”
Atisokanicic: Samarie iriniw ka witcihatc iriniwa ka ki macikowakaniwiritci
25Peikw iriniw ka kiskinohamaketc cota aiamihe irakonikewiniw ki pasiko. Wikokwe paciwirekopan Cecoca arotc kitci iteritci, ke ki otci itactahorakaniwiritci.#10.25 Kata takoniw meka kitci itactahorakaniwitc, kecpin pitoc itete kirika cota aiamihe irakonikewiniw. Ekoni tca e itatc: “Kiskinohamake iriniw, tan ke ki totaman kitci ki pe otitikoian kakike pimatisiwin?”
26Itiko Cecoca: “Tan e itasinatek kitirakonikewinino? Tan e ici nisitotaman e tapwataman?”
27Itew anahwe iriniw:
“‘Ki ka sakihaw Teperitciketc Kikice Manitom
kaskina e irikokotehein, kaie tekaci kitcitcakocik,
acitc irikik e ici mackawisiin kaie kimitoneritcikanik.’
Acitc tca ‘Ki ka sakihaw kiwitc iriniw
mia mitowi e asitci sakihitisoin.’” Deutéronome 6.5; Lévitique 19.18
28“Mia kit itan,” itew Cecoc. “Tota anihe ka ki itein. Ki ka tca kakike pimatisin.”
29Aric anahwe irakonike iriniw wi wapatahiwekopan e tapwetc. Itew tca Cecoca: “Awin tca niwitc iriniw?”
30Cecoc atisokawew: “Peikwaw e kicikarik iriniw pimotepan meskanak, Jérusalem otenak e ki ototespan, nete e icakopanen Jéricho otenak. Kek kimoti iriniwa ka macihiweritci ki kwackotitako e macikakotc. Ki manipitamako owikasim e kimotimakaniwitc.#10.30 Ki manipitamako owikasim e kimotimakaniwitc: Peikon kata ki ici nisitotakon: Kaskina e ici takonik ki maskamiko. Ka ickwa macikowatcik, ekoni ka ici matcatcik e nakatatcik, kekatc e niporitci. 31Aci peikw cota makatewokorew mia ki pe pimotew neta meskanak. Ki wapamew anihi iriniwa ka ki macikowakaniwiritci. Kweskiteskanak ki ici pimotew, aka e wi pecowapamatc. 32Peikon kaie wir kotak cota iriniw, Lévite itekera ka ici aiamihatc anahwe towi cota iriniw, ki pimotew nta. Ka wapamatc anihi iriniwa ka ki macikowakaniwiritci, peikon kaie wir ki pimotew kweskiteskanak. 33Aric iriniw, Samarie askik ka otcitc#10.33 iriniw, Samarie askik ka otcitc: Iriniwok Samarie askik ka otcitcik pitoc ici aiamihakowapan. ki pimotew kaie wir meskanak. Ki wapamew anihi iriniwa ka ki macikowakaniwiritci, kaie ki micta kitimakerimew. 34Ki natawapamew. Minicaporiw ki apatcitaw kitci ki kisisipatowatc omikiriw, kirika pimiteriw e totak e natokohatc ka ki aitohwakaniwiritci, minawatc ki akopitew. Minawatc ki okitetirew wir tipirawe otatikomik e iciwiratc nipewikamikok kirika e nanakatcihatc. 35Minawatc kecepawonik ki mirew coriariw ka tiperitamiritci nipewokamokoriw, e itatc: ‘Nanakatcihi anahwe iriniw. Kecpin awocamec itikitakoke, nin ki ka kicikatin minawatc pimoteiane ota.’”
36Minawatc Cecoc kokwetcimew anihi irakonike iriniwa: “Awin mia nta e nictitcik, kit iteriten, owitc iriniwa, anaha ka ki macikakotc kimoti iriniwa?”
37Itew anahwe irakonike iriniw: “Anahwe mia ka ki kitimakerimatc.”
Aci itew Cecoc: “Eko ma tca ni tota kaie kir!”
Cecoc e kiwotimatc Marthewa kirika Mariwa
38Mekwata e iti pimotetcik Cecoc kirika owitcewakana, aci iti takociniwok otenacik. Taw neta peikw iskwew, Marthe e icinikasotc. Ki pitakahew Cecoca omikiwamik. 39Taripan ocima, Mari e icinikasoritci. Anahwe Mari ki ici apiw e icisitepiritci Cecoca, ekoni ka ici natotawatc e ici kiskinohamakeritci. 40Micta otamikekopan Marthe e mitatc kitci mitcisonaniwonik. Aci natawapamew Cecoca, e tca itatc: “Teperitcikein, nama ia ni wiec kit iteriten aka e pamerimitc nicim e otamirowak? Witamo kitci pe witcihitc.”
41Aci itew Teperitciketc: “Marthe, Marthe, micta mitcet kekocic kit arimeritamihikon, mitcen kaie ka arimihikoin. 42Aric tepirak peikw kekocic kictapatan. Wir Mari ki orapatam aniheriw kirawe ka mirwacinik, aka ke maninamowakaniwitc.”
Поточний вибір:
Luc 10: ATMK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Canadian Bible Society, 2014
