Luc 8
8
Iskwewok ka nosanehwatcik Cecoca
1Minawatc otenaskak pa icapan Cecoc, kitci aiarimwetc e tipatatak Mirwatcimowiniw, ka otci kiskeritcikaterik Kice Manito Okimawiniw. Kaskina e mitato acitc niciritci owitcewakana pa witcewikopan, 2acitc atita iskwewa ka ki witcihaspan Cecoc, e ki otci orowiticohamowatc matci manitowa kirika ka ki kikehatc. Peikw neta Mari#8.2 Mari: Marie icinikasopan, Magdala otenacik e otcitc. Anahwe Mari nicowaso#8.2 nicowaso: (7) matci manitowa ki orowiticohamowakaniwikopan e pitciteheckakospan. 3Minawatc kotak iskwew, Jeanne icinikasopan. Chuza anihi okoma, Chuza atoskectawepan okimawa Hérode. Kotak kiapatc iskwew, Sosan#8.3 Sosan: Suzanne icinikasopan. Mitcetipanak kotakihik kaie wirawaw e apatcitatcik e ici tatakik kitci otci witcihatcik Cecoca kirika owitcewakana.
Atisokanicic: Iriniw ka ki matce kitiketc
(Natawapata kaie Matio 13.1-9; Mark 4.1-9)
4Cecoc ki pe natawapamiko mitcet iriniwa nta e ici taciketc, tato otenak e ototeritci. Atisokew Cecoc ohweriw atisokaniciciriw:
5“Takopan kitike iriniw. Peikwaw e kicikarik, ki icaw okitikan askik kitci matce kitiketc. Mekwata e taci matce kitiketc, atita okitamina papakiciniriw meskanak. Ki tatakoskatakaniriwa. Pirecicak mockimewok kaskina aniheriw okitamina. 6Kotakihi kaie aniheriw okitamina e ici asiniwakarik ki ici papakiciniriw. E iti nitawikiritci tca, ki pasoriw, osam aka e ki otci tipi nipiwonik askiriw. 7Kotakihi atita kiapatc aniheriw okitamina, nta ka ici nitawikinik minesikaciriw ki ici papakiciniriw. E iti nitawikinik, tapickotc nitawikin anihe minesikaci, aric nipatcikemakan neta kitikanik e ici mirwacikipan. 8Aric kotakihi okitamina ka matce kitikaniwok papakiciniwok nta miro askik. Aci mirokiw nac kitci micta mirwacik anihe kitikan. Aci tca ka takociparik kitci mockinakaniwitcik, mitato mitana tatwaw kirawe nipara ki nitawikiwok.” Minawatc ki itew Cecoc: “Wewerita natotamokw ohwe, kirawaw ka kackitaiekw kitci nisitotamekw!”
E witak Cecoc wetci apatcitatc atisokaniciciriw
(Natawapata kaie Matio 13.10-17; Mark 4.10-12)
9Kokwetcimiko owitcewakana Cecoc tan wa itemakanik aniheriw atisokaniciciriw. 10Naskamoctawew e itatc: “Aci ki ki pe otitikonawaw kitci kiskeritamekw anihe ka ki katcictekipan Kice Manito Okimawinik otci. Aric kotakihik iriniwok tepirak atisokaniciciriw mirakaniwiwok. Ekoni tca wetci icinakositcik, kotc e itemakanik Kice Manito Omasinahikanik:
‘Kanawapatamok, nama aric wapatamok.
Petamok, nama aric nisitotamok.’” Ésaïe 6.9
E witak Cecoc wa itemakanik otatisokanicic
(Natawapata kaie Matio 13.18-23; Mark 4.13-20)
11“Ekoni wa itemakak anihe atisokanicic. Okitamin mia icinakon kirika Kice Manito otitewin. 12Atita iriniwok tarasak icinakosiwok mia anihi okitamina ka papakicinitcik meskanak. Petamok Kice Manito otitewiniw, aric Matci Manitowa pe takociriw kitci maninamakotcik otehiwak, aka kitci ki tapwetakik, aka tca kitci akwacimakaniwitcik. 13Kotakihik iriniwok tarasak icinakosiwok mia anihi okitamina ka papakiciniritci neta e ici asiniwakarik. Petamok Kice Manitowa otitewiniw, micta tca mireritamok e petakik, nama aric pakitinamok kitci mirokinik. Memacic tepirak tapwetamok. Kotc aric e kokwetcihakaniwitcik, tecikotc pakiteritamok aniheriw otapwetamowiniwaw. 14Minawatc anihi kotakihi okitamina ka papakiciniritci ka ici nitawikik minesikaci, mia ko iriniwok kaie wirawaw ka ki petakik Kice Manitowa otitewiniw, tarasak atohowok, osam wiec e iciwepasitcik ota askik aka ka kicteritakonik, kekotc ma coriariw osam e sakitatcik, kirika tepirak e wi mireritamihitisotcik. Nama tca mirokiwok aniki iriniwok otcitcakociwak itekera.#8.14 Nama tca mirokiwok aniki iriniwok otcitcakociwak itekera: Peikon kata ki ici nisitotakon: nama nitawikihewok miro wapimina. 15Anihi okitamina miro askik ka ici papakiciniritci, tarasak iriniwok ka natotakik Kice Manitowa otitewiniw kirika ka miro kanaweritakik otehiwak, e mirotehetcik, aka kaie e ponitatcik, e tca mirokitcik otcitcakociwak itekera.”
Atisokanicic: Wactenamakan e iskahikatek
(Natawapata kaie Mark 4.21-25)
16“Nama awik iskaham wactenamakaniw kitci katatc, askikwa kitci akonapwekanihiwaketc, nama kaie kataw cipa nipakanatikok. Kirawe kata actaw neta ko ka ici tcimatakaniwonik, kitci miro wapatakik neta ka pitaketcik e miro wacterik. 17Kaskina ka ki katakaniwok nikotin kata nokotakaniwon. Kaskina ka katcictek kata miro kiskeritakon kirika kata miro wactenikatew.”
18“Ekwamanitisokw e ici natotamekw! Anahwe meka aci ka ici tatak kekociciriw, awocamec kata pe mirakaniwiw. Anahwe aric kotak aka ka takonik kekociciriw, wawatc aniheriw memantcic ka iteritak e ici tatak, kata maninamowakaniwiw.”
Cecoc okawiwa kirika owitcicana
(Natawapata kaie Matio 12.46-50; Mark 3.31-35)
19Kek pe takociniriwa okawiwa Cecoc kirika owitcicana nte e ici taciketc e wi wapamikotc. Nama nac ki pecowapamiko, osam e mitcetinaniwonik. 20Kek itakaniwiw Cecoc: “Kikawi kirika kiwitcicanak ki taci pehikok orowitimik neta. Ki wi wapamikok.”
21Aci Cecoc itew: “Kaskina iriniwok ka natotamowatcik Kice Manitowa otitewiniw kirika ka pimatisiwaketcik, enko na nikawi kirika niwitcicanak.”
Cecoc e nakanak e micta rotinik acitc e mitcahanik
(Natawapata kaie Matio 8.23-27; Mark 4.35-41)
22Peikwaw e kicikarik, ki positcimewok Cecoc kirika owitcewakana, e itatc: “Acohetan sakihikan.”
Ekoni e ici matcehotcik. 23Mekwata e macitcik, aci notekociw Cecoc. Kek keskat micta rotiniw sakihikanik. Sisikahoteriw onapokwan tcimaniwaw. Koctatikoniw kitci kosapehoterik. 24Pe natcikapowictako owitcewakana Cecoc, e kockonikotc, e tepweritci e itikotc: “Kiskinohamake iriniw! Kiskinohamake iriniw! Aci ki ka niponano!”
Ki pasiko Cecoc e kitotatc aniheriw pisitosiwa kirika sakihikaniw e mitcahanik, e itetc: “Pekatcikw!” Tecikotc arwactaniw. 25Minawatc itew owitcewakana Cecoc: “Kekwan wetci aka asperimototawiekw?”
Kaskina aric sekisiwok kirika micta mamiskateritamok e aititotcik: “Awin ia anahwe iriniw? Wawatc aiamitaw e rotinik acitc sakihikaniw e witamawatc ke totamiritci, e tca sapitakotc!”
Cecoc e mirwatisihatc iriniwa, mitcet matci manitowa e ki tiperimikoritci
(Natawapata kaie Matio 8.28-34; Mark 5.1-20)
26Aci iti macakawok Cecoc kirika owitcewakana nte Gérasène#8.26 Gérasène: Peikon itactew: Gergésène. iriniwok ka ici otaskitcik, nete akam sakihikanik tipickotc nete Galilée askiriw ka ici takonik. 27Mia apitc e iti kapatc Cecoc tcimanik, peikw iriniwa Gergésa otenak e ototeritci pe natawapamiko. Anahwe iriniw ki pitciteheckakokopan mitcet matci manitowa. Aci weckatc nama apatcitakopan owikasim. Nama kaie tacikekopan mikiwamik, aric rikwaskanik pa tacikekopan.
28Ka wapamatc Cecoca ki micta notakosiw kirika ki nipiskoctawew, e tca itetc e kiciwetc: “Kekwan ni ka ici nataweritamawiin, Cecoc, Kice Manito ka mawotci icperitakositc Okosa? Ki pakoserimitin, akawir nekatcihici!”
29Aci meka ki ickwa itekopan Cecoc anihi matci manitowa kitci orowiritci owiawirik anihi iriniwa. Anahwe iriniw mitcetwaw ki makonikopan anihi omatci manitoma. Takopitakaniwikopan ko otcitcik kirika ositik piwapiskwapiriw e totcikaterik, aka kitci ki ocimotc, aric kackihopan ko. Nte tca ka ici cipewatawokarik#8.29 ka ici cipewatawokarik: Peikon kata ki ici nisitotakon: aka ka ici taniwonik. iciwirikokopan ko anihi omatci manitoma.
30Aci Cecoc kokwetcimew, e itatc: “Tan ni e icinikasoin?”
Itiko tca: “Ka mitcetiak nit icinikason.” Mitcetiripana meka matci manitowa e ki pitciteheckakotc anahwe iriniw. 31Aci micta pakoserimiko Cecoc anahweriw matci manitowa aka kitci iciticohwatc atamaskamakok.
32Nama neta warawik e matinarik mitcetiwakopan kokocak, e pa nantowi mitcisotcik. Aci pakoserimiko Cecoc anahweriw matci manitowa kitci pakitinatc kitci pitakeckowaritci kokoca. Ki tca pakitinew Cecoc. 33Ekoni tca ka ici orowitcik aniki matci manitowok nta irinik, nete kokoca e ki pitakeckowatcik. Kaskina aniki kokocak ki nitcikowackotiwok e kickapiskarik sakihikanik e ici pakicinitcik. Kaskina tca ki kwapawewok.
34Tapanak neta iriniwok ka kanawerimatcik anahweriw kokoca. Ka wapatakik aniheriw ka ispariritci, ki ocimowok e pa nta tipatcimotcik otenak kirika kitikan askik. 35Kaskina ki pe icawok iriniwok e wi wapatakik ka ki isparinik. Tekocikik neta Cecoca ka ici tacikeritci, wapamewok kaie anihi iriniwa ka ki orowiticohamowakaniwiritci omatci manitoma. Taci apiw anahwe iriniw, pecotcik Cecoca e ici nanipowiritci. Aci owikasimiriw, aci kaie cowatc itiriw. Ki micta sekisiwok aniki iriniwok. 36Aniki kaskina ka ki wapatakik ka ki isparinik ki tipatcimowok tan mia ka ki ici kikehakaniwiritci anihi iriniwa ka ki pitciteheckakoritci matci manitowa. 37Kaskina neta Gérasène askik ka taciketcik ki nataweritamawewok Cecoca kitci matcaritci neta otaskiwak, osam e micta sekisitcik. Ekoni tca e ici positcimetc Cecoc, e matcehotcik. 38Anahwe iriniw ka ki orowiticohamowakaniwiritci omatci manitoma ki pakoserimew Cecoca kitci pakitinikotc kitci witcewatc. Aric Cecoc ki kiweticahwew, e itatc: 39“Kiwe nete kimikiwamik. Kaskina tipatcimo ka ki ici totak Kice Manito kir otci.”
Ekoni e ici matcatc anahwe iriniw kirika e iti tipatcimotc kaskina wiec neta otenak kaskina ka ki ici totamiritci Cecoca wir otci.
Iskwew ka ki miro pimatisihikotc Cecoca, kirika ickwecic ka apitcipahakaniwitc
(Natawapata kaie Matio 9.18-26; Mark 5.21-43)
40Apitc ka macikatc Cecoc, akam sakihikanik e ki otahotc, mitcet iriniwa pe nta pocokako. Kaskina meka pehikokopan. 41Mia apitc kotak iriniw pe takociniw, Jaïrus e icinikasotc. Enko anahwe ka nikaniwispan cota aiamihe mikiwamik ka takonik neta. Nipiskoctawew Cecoca e pakoserimatc kitci pe icaritci omikiwamirik. 42Tarikopan meka otanisa e peikociritci, e mitato acitc nicwo tato piponesiritci. Pawiritariwa anihi otanisa.
Mekwata Cecoc e pimotetc, nete e icatc ka ici wicamakaniwitc, micta sitcikapowinaniwoniw, e apitc mitcetinaniwonik. 43Takopan neta iskwew, mocak e onitakopanen omikw, mitato acitc nicw tato pipona esko itapinekopanen. Ekote kaskina ocoriam ka isparinik e kicikowatc mackiki iriniwa, nama aric otci peikw ki otci kackihiko kitci natokohikotc. 44Aci anaha iskwew nta icikapowiw otananik Cecoca e pimoteritci, e takinamowatc nitek okapotowaniriw. Tecikotc nakapariniw omikw e matcamakanik. 45Itew Cecoc: “Awin ka ki pe takinitc?”
Kaskina awik itew: “Namaiew ni nin.”
Aci Pien itew: “Kiskinohamake iriniw, micta mitcetinaniwon, kaskina wiec e waskackakoin. Kaskina awik ki sitcickakw e pimotein.”
46Aric itew Cecoc: “Awik ni ki pe takinikw. Ni ki kiskeriten memantcic nimackawisiwin ka matcamakak.”
47Aci anahwe iskwew kiskeritam aka e ki katowatc Cecoca e ki takinatc. Pe natawapamew e micta ninikiparitc, kirika nipiskoctawew. Kaskina awiriw e petakotc, aci witam kekwariw wetci ki takinatc, kirika tecikotc e ki kikehikotc omikw e micta onitaspan. 48Cecoc itew anihi iskwewa: “Nitanis, tapwe kit asperimototawin, ekoni wetci ki kikein. Ekoni ici matca, acitc pekaterita.”
49Mekwata e taci arimwetc Cecoc, aci pe takociniw awik, anihi Jaïrusa omikiwamirik e ki pe ototetc, e pe itatc anihi Jaïrusa: “Aci ki poni pimatisiw kitanis. Aka tca awocamec otamihi anahwe kiskinohamake iriniw.”
50Aric petam Cecoc e itakaniwiritci anihi Jaïrus. Aci natawapamew e itatc: “Akawir sekisi. Tapwerimici tepirak. Kata tca kikew kitanis.”
51Tekocik nte Jaïrus omikiwamik, atita tepirak pakitinew Cecoc kitci pe witcewikotc e pitaketc mikiwamik: Pien, Jean, Cak kirika otatama acitc otcotcoma anaha ickwecic ka nipotc. 52Mekwata kaskina aci ka taciketcik neta matowakopan e micta kackeritakik, e mitatatcik anihi awaca. Aci itew Cecoc: “Aka matokw. Nama ni nipo anahwe ickwecic. Tepirak ni nipaw!”
53Papirotowakaniwiw aniheriw e itetc, e kiskeritakik aniki iriniwok e niporitci anihi awaca. 54Aric Cecoc otapiniskenew anihi ickweca, e kiciwekitowatc: “Awacic, pasiko!”
55Ki kiwe pimatisiw anahwe ickwecic, tecikotc tca e pasikotc. Itew Cecoc kitci acamakaniwiritci. 56Anaha ickwecic onikihikwa micta kockopaririwa. Aric Cecoc itew aka awiriwa kitci witamawaritci ka ki iciwepanik.
Поточний вибір:
Luc 8: ATMK
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Canadian Bible Society, 2014
