AMTAW 4
4
Petera nini Johan ai tara chih nai
1Naibaly nini my ly khumichi teng y leu thui nai thym khala y pathyp pi nai keungchi hawi, achura yhm kalen pui typ nai lu hawi, Saddukaichi py myni teng y tym miu i, khumichi ai leu patiu nai hawi, 2Isu deaungkho y kadeichi theung i nai angthau bi nai leu thui pi nai y py nichi ly khrikhri pa-rei paleung hawi y parai. 3Naibaly nini ai patiu i dym mang y tla nai deaungkho y khawn mang y khrairei theaung y peaung bo. 4Na i py leu tangai naichi theung y neangneangchi my ly ym, nichi i nawi nai sai ly neampacho ka-cheang ryry naimy sang pangrei awm.
5Naibaly khawn mang y ly mymychi i kry nai keungchi hawi, miteaung kehchi hawi, Reita patiu nai keungchi hawi, pathyp pi nai keung kalen keh Anna hawi, 6Kaiapha hawi, Johan hawi, Aleksandra hawi, pathyp pi nai keung kalen keh i cheng bawibawichi py Jerusalem y awm achu bo. 7Naibaly nichi ly nini ai sala y angdo hai iy, “Nangni ly ati sa thai naira hawi mo, ami i amyn y mo hini sa nai ly?” nanai deng. 8Hunaibaly Petera ly Phailo Kachai my kawi i mymychi teng y, “Khumichi ai kry nai keungchi hawi, miteaung kehchi awi: 9khumi kaphra ai hawi sa naira y, hini khumi ly mana nai hawi vui mo, nanai vaini kaini ai deng baly, nangchi bawibawi pany u, Israela khumi bawibawichi py pany u sy. 10Nazaret Isu Krista ai nangchi my kraws tleaung y tahen nai ly, Tameuh my ni ai kadeichi theung i dengdairei pathau bi nai ly, mymy i amyn kypkyp y hini khumi ly hi y nangchi i mo y hawi naimy angdo nai bo he. 11Nangchi yhm sa nai keungchi i lengseaung tahm khai y nai, taki i lengseaung avo keh lawn nai ly mymy ne nai bo he.#Sam 118.22 12Takhra ami teng y py pahengra by y leang, kani anui y khumi amyn pathi naichi theung y achi ai paheng ai nai amyn takhra ha py by y,” napi.
13Naibaly Petera nini Johan i vam nai sai ly nichi my niu i, cha neangneang kawp y nai khumi hawi, neangneang pany y nai khumi ne, nanai pany kha y ly khri pa-rei lyh parai i, nini ly Isu teng y awm bo, nanai pany bo. 14Naibaly no hawi nai khumi ly myni teng y angdo nai niu i ati sai py tlau pajau y. 15Hunaibaly mymychi i tara chih naira i nai nini ai chei hai takhra ai nai leu pei nai bo y ly arum u i, 16“Hini khumi nini ai ly achi mana sa ai mo?” Nini ly atiti rengrang ka-teng ny y nai sa, nanai ly Jerusalem i awm nai bawibawichi my hawihai palai pany veng bo:achi py sai py apha thai y pui ly. 17Na i py khumichi teng y ahei hai rara y ai nai, vai dengdairei ami teng y py hini i amyn y leu thui y ai nai achi nini ai ram sina,” napi. 18Hunaibaly nini ai palau iy, Isu i amyn y den py leu thui y ai nai hawi, patiu y ai nai py leu pei. 19Na i py Petera nini Johan my ly nichi teng y, “Tameuh i mei ka-niu y Tameuh i leu patawm nai tleaung y ly nangchi i leu patawm nai teng keh lawh a? Dawn u cham. 20Kaini ly kaini i atiti niu nai hawi pany naichi ly thui y naimy awm pajau y leang,” napi. 21Naibaly nichi my ly khrikhri pa-rei ram ra iy nini ai palawi bo; khumi mipuichi deaungkho y pajeng ai nai ka-vo ngo y, atiti sa naira y ly khumi bawibawichi my ly Tameuh ai palo veng. 22Ati mana nai mo nabaly nini i atiti rengrang sa nai no hawihai nai khumi ly saneng vui palyhrei tleaung y nawi nai veng bo.
Ym naichi my vam ai nai chiu sa pi nai
23Naibaly nini ly lawi bo nabaly, nini i kamkawmchi teng y chei i, pathyp pi nai keung kelenchi hawi, miteaung kehchi my myni teng y thui nai ngierei ly thui pi bebe. 24Hunaibaly tangai naichi ly vanrei my Tameuh teng y, “Aw Areng, nang ly kani khaileaung hawi, pangli hawi, nichi theung y awm nai bawibawichi ai sa nai keung ne.#Theu 20.11; Neh 9.6; Sam 146.6 25Nang i Phailo Kachai i saho y nangmy kaichi i amsi sangum nang i miseaung Davida i labeaung y ly,
‘Cheng Takhrachi ly ati mana nai y kado theu kha?
Cheng cheaungkhangchi my ati mana nai dawn
atyhtyh lawh?#Sam 2.1–2
26Areng Tameuh hawi mymy i Krista i tlang tleaung y
Khaileaung pri i samrangchi ly aeng yb i,
Arengchi py amkheng achu bo,’ nanai thui.
27Hini avang y ly nang i Miseaung kachai nang i rimui paju nai Isu i tlang tleaung y ly nang i kiu hawi paleung y tym ai nai khai takhra rym nai ngierei ly sa ai nai,#Mt 27.1–2; Mk 15.1; Lk 23.1, 7–11; Jh 18.28–29 28Heroda hawi Pontia Pilata hawi, Cheng Takhrachi hawi Israela khumichi py amkheng achu tatang nai bo. 29Hunaibaly Areng, vai nichi i kaichi ai ram nai sai ly khen cham; naibaly nang ly amichi ai no hawi sa nai nang i kiu jaha nai tarawi y, nang i miseaung ly vam parai pa-rei nangmy i leu pany hai ai nai sabawm kyh ba; 30naibaly nang i miseaung kachai Isu i amyn deaungkho y ka-ma-rachi hawi, atiti lyh ai awm parai nai so hai kyh ba,” napi. 31Naibaly nichi chiu sa pajau iy, mymychi i awm achu naira ahyn bo; naibaly nichi bawibawi ly Phailo Kachai my kawi i vam parai pa-rei Tameuh i leu thui pi.
Ym naichi ly mychi i yhmtheaungchi teaung ahum nai
32Naibaly ym nai khumi mipuichi ly paleung py dawn nai py vanrei awm, mymychi theung y leaungrei py yhmtheaung awm nai ly, Kai i teu, nanai angam y; nichi ly atiti bawibawi vanrei ahum bo.#Ataw 2.44–45 33Naibaly amtaw thau naichi ly sa thai naira len parai nai hawi Areng Isu Krista i angthau bi nai satang thui pi: naibaly mymychi bawibawi teng y khrikhri pa-rei pahenra awm. 34Naibaly mymychi theung y py ami py avaw nai by y, meingtym py yhm py awm nai ngierei ly jo u iy, mymychi i atiti jo nai vang syn i, amtaw thau naichi i kheu keung y khai iy, 35mymychi i aly ngai nai ka-leu khyp amji bawibawi.
36Naibaly Josepha, amtaw thau naichi my amyn ka-reu Barnaba napi nai ly, (huni amyn ly Awm hai nem nai chanau, nanai sai ne,) 37Levi cheng, Kupra tlawn i khumi ne i, mymy i hlau jo iy vang ly syn i, amtaw thau naichi i kheu keung y khai bo.
Поточний вибір:
AMTAW 4: KCL02
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Khumi Common Language Bible © Bible Society of Myanmar, 2005.
