AMTAW 5
5
Anania hawi Saphairi
1Na i py khumi leaungrei amyn Anania ly mymy i aju Saphairi hawi meingtym jo i, aju hawi ka-dyh y vang phyrei um mai veng, 2naibaly phyrei ly syn iy amtaw thau naichi i kheu keung y khai bo. 3Na i py Petera my, “Anania, Phailo Kachai ai ka-chawi thui ai nai hawi, meingtym vang ly phyrei um mai veng ai nai py ati mana nai nang i paleung y Setan my kawi hai lawh? 4Tuni awm nai sala ryrei ly nangmy i ny y a? Jo nai bo y py tuni ly nangmy i ngaingai awm nai ny y a? Hini leu ly nang i paleung y ati mana nai dawn nai mo? Nang ly khumi ai ka-chawi thui nai ny y leang, Tameuh ai thui nai teu,’ napi. 5Naibaly Anania ly huni leu thai bo nabaly atlym i dei ryp; naibaly huni thai nai ngierei ly khrikhri pa-rei jei na. 6Naibaly thawndeangchi ly angthau i ni ai kajawi iy angjeaung i up bo.
7Naibaly nari thomrei ka-khan y mo mymy i aju ly atiti awm nai sai ly pany y naimy kun bo. 8Naibaly Petera my ly mymy teng y, “Kai ai thui pi cham, meingtym ly hi jirei chy jo khyh a?,” napi. Naibaly mymy ly, “Ne, hi jirei chy jo khyh,” napi. 9Naibaly Petera my ni teng y, “Ati mana nai Areng i Phailo ai cham ai nai nangni leu adyh hawi lawh? Khen cham, nang i juvo ai up nai keungchi i kheu ly katheu pa-kho ahawi y tym bo, nichi ly nang ai py ajeaung ai mang,” napi. 10Naibaly tlenrei khyh my ni ly mymy i kheu keung y atlym praw i dei teang bo, naibaly thawndeangchi ly kun iy dei nai niu i, angjeaung iy juvo i ahawi y up teang bo. 11Naibaly palau takhra kamkawm bawibawi hawi, huni satang pany nai ngiereichi py khri pa-rei jei na.
Rengrang ka-ma-ra hawi lyh ai nairachi
12Naibaly khumichi theung y amtaw thau naichi i kiu y ka-ma-ra hawi atiti rengrang neangneang sa hai. Naibaly nichi bawibawi ly paleung vanrei Solomon i dangkhum y awm achu. 13Na i py kalangchi ly ami py nichi theung y abawi vam y; ati py ne sy khumichi my ly nichi ai palo. 14Naibaly neampacho neampachy neangneang Areng ai ym i panawi ra bi bo. 15Naibaly Petera tako nai tarawi y mymy i pa-pui my phyreichi ai deng thai ai nai, no nai khumichi ai py lam y ajeaung i, ira y py nihbai y py paseaung. 16Naibaly Jerusalem ahawi tengtang i avang dengdairei khumi mipuichi ly no naichi hawi vawinam my namnaichi ai py hawi i jeu u achu:nichi ai py hawi sa pi bawibawi.
17Na i py pathyp pi nai keung kalen keh hawi, mymy hawi vanrei awm naichi bawibawi py angthau (huni ly Saddukai kamkawmchi ne), 18naibaly nichi ly khri pa-rei paleung no i, amtaw thau naichi ai patiu iy khumi humchi i theaung y paeung bo. 19Na i py vum y Areng i kani pri i amtaw thau nai leaungrei my theaung katheu paeaung i nichi ai theu hai iy, 20“Chei u ly, achura yhm kalen pui y angdo iy khumichi teng y hini Heng nai leu bawibawi thui u,” napi. 21Naibaly huni ly nichi thai i khutawi neng khala y achura yhm kalen pui y kun i leu patiu. Na i py pathyp pi nai keung kalen keh hawi, mymy hawi vanrei awm naichi py jeu i, tara chih nai keungchi hawi Israela kangpreangchi i miteaung kehchi bawibawi ai palau achu iy, amtaw thau naichi ai pahawi ai nai theaung y khumi pato. 22Na i py miseaung luchi ly chei i mymychi ai theaung y niu y pasi lawh; 23naibaly ali teang iy, “Theaung ly chymme naimy akho typ i, typ nai keungchi py katheu pa-kho ahawi y angdo nai ly kaichi niu, na i py kaichi paeung i theung y ly ami ai py niu y,” nanai thui pi.
24Naibaly achura yhm kalen pui typ nai lu hawi, pathyp pi nai keung kalenchi ly huni leu thai i, “Hini ly mana tanrei ahei ai mo?” nanai nichi i molam y khrikhri pa-rei paleung bi. 25Naibaly khumi leaungrei jeu i mymychi teng y, “Khen cham, nangchi i theaung y peaung naichi ly achura yhm kalen pui y angdo iy khumichi ai leu patiu lawh ly,” nanai thui pi. 26Hunaibaly achura yhm kalen pui typ nai lu hawi, miseaung luchi hawi chei iy nichi ai ano y naimy pahawi, ti y baly mymychi ai khumi mipuichi my lengseaung y atum lawh na, nanai jei. 27Naibaly nichi ai pahawi nai tym baly tara chih nai keungchi i mo y angdo hai i pathyp pi nai keung kalen keh my ly nichi teng y 28“Hini i amyn y leu den py thui moh kang napi khyp be, naibaly khen cham, nangchi i leu patiu nai ly Jerusalem y kawi hai bebe bo:hini khumi i thi py kaichi i tlang tleaung y tym hai ai nai tau u lawh ly,” nanai preng.#Mt 27.25 29Na i py Petera hawi amtaw thau naichi my ly, “Kaichi ly khumi i leu tleaung y ly Tameuh i leu tangai keh ai nai tla. 30Isu ai nangchi my dengkeaung y dang iy padei nai ly achi i amsi sangumchi i Tameuh my ni ai ly pathau bi bo. 31Israelachi ai kamngo uikhei hai ai nai hawi pahen ai nai py, mymy kypkyp ai ly Tameuh my Areng hawi Paheng Keung y awm ai nai vui mymy i lamtang mang y pasang bo. 32Naibaly kaichi ly huni leu pany hai nai keung ne; Phailo Kachai, Tameuh my mymy i leu tangai nai ngiereichi teng y pei nai ly, mymy py pany hai nai keung ne teang,” napi nai pathang.
33Naibaly nichi ly huni leu thai baly khrikhri pa-rei paleung yh-i na i, nichi ai padei ai nai tau bo. 34Na i py tara chih nai keungchi theung y amyn Kamaliela, Pharisai, Reita pany nai keung, khumi bawibawichi theung y amyn amthang parai nai leungrei ly angdo iy, nichi ai tanarei patheu ai nai leu pei. 35Naibaly mymy ly tara chih nai keungchi teng y, “Nangchi Isreala khumichi awi, hini khumichi i tlang tleaung y nangchi i sa ai tau nai ly hawihai palai adawn u ba. 36Hini ny y rai kha y py Theuda ly, Khumi kalen kai ly, nanai py awm; mymy teng y py khumi neangneang, chungvai palyhrei tahm mo amkawm; naibaly mymy ai ly padei i, ni i leu patawm nai ngiereichi ly ahei bebe, ati sai py ny y leang bo. 37Huni bo y ly amyn tajiu nai thym khala y Kalili pri i khumi Juda awm bi, ni ly mymy teng y khumi phyreichi ai abang hai bi; ni py dei bo, ni i leu patawm nai ngiereichi ly ahei bebe veng teang. 38Hunai deaungkho y vai kang napi, hini khumichi ai ly nam u reng moh, awm u palai sy; hini, nichi i patiu nai hawi atiti sa naichi ly khumichi i sa nai teu baly tama ai mang. 39Na i py Tameuh i sa nai ne lawh baly nangchi ly nichi ai tamo hai pajau y leang, ti y baly nangchi Tameuh ai tiu nai tlo lawh na,” napi. 40Naibaly mymy i thui nai ly teng napi bo; hunaibaly nichi ly amtaw thau naichi ai palau iy tabeang i, Isu i amyn y den py leu thui y ai nai leu pei kheng iy patheu bo. 41Naibaly nichi ly tara chih nai keungchi theung i dengdairei tako iy, hini Amyn y amthang leaung ai nai pa-rei patang ai nai abawi ai ataing nai deaungkho y khri pa-rei kawn u. 42Naibaly nichi ly kani tleirei achura yhm kalen pui y hawi, mymychi i yhm tleirei y py Isu ly Krista ne, nanai patiu nai hawi thui pi nai ly anawn lawh y leang.
Поточний вибір:
AMTAW 5: KCL02
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Khumi Common Language Bible © Bible Society of Myanmar, 2005.
