AMTAW 3
3
Kheu kangbai ai hawi sa pi nai
1Naibaly Petera hawi Johan ly cho amang neng iy chiu sa ai nai neng khyp khala y ly, achura yhm kalen pui y kun ai nai kalau. 2Naibaly neampacho leaungrei ami mo, tapen khyp khala i dengdairei kheu tabai nai ai ajeaung; huni khumi ai ly achura yhm kalen pui y kun naichi teng y cheaung ai nai, achura yhm kalen pui katheu pa-kho Ka-pu nanai pakeung y kani tleirei paseaung jojo. 3Huni khumi ly Petera nini Johan ai achura yhm kalen pui y kun ai tau nai niu i cheaung. 4Naibaly Petera nini Johan ly ni ai khen jo i Petera my, “kaini ai khen rai he,” napi. 5Naibaly mymy ly nini teng y ati mo nga ai nai athang khai nai khen. 6Na i py Petera my, “Kai ly muku tangka sai py by y leang; na i py kai i awm nai kang pei keih ai: Nazaret Isu Krista i amyn y tako,” napi. 7Naibaly mymy ly ni ai lamtang mang i kiu y amkhaw iy pathau, naiblay tlenrei khyh my mymy i kheu hawi kheumei hiu ly atho nga praw ryp. 8Naibaly mymy ly tlenrei khyh my angthau iy angdo i, tako amteaung bo. Naibaly tako iy achaw ryry naimy Tameuh ai palo prei nai tarawi y nini hawi achura yhm kalen pui y kun teang. 9Naibaly ni i tako nai hawi Tameuh ai palo nai ly khumi baw bawichi my niu: mymy ly achura yhm kalen pui katheu pa-kho Ka-pu nanai pakeung y ateh iy cheaung reng nai khumi ne, nanai py pany; 10naibaly mymy i tlang tleaung y atiti tym nai ly khrikhri pa-rei lyh i dawn ai nai ngo y.
Achura yhm theung y Petera i leu thui nai
11Naibaly mymy ly Petera nini Johan ai amkhaw jo nai thym khala y ly, khumi bawibawichi my lyh parai i Solomon i dangkhum napi naira y angpreng achu. 12Naibaly Petera ly huna nai niu iy nichi teng y pathang i, “Nangchi Israela khumichi awi, hini ly ati mana nai rengrang napi lawh? kaini i sa thai naira hawi, kaini ly Tameuh ai tahm khai nai khumi ne nai deaungkho y teu kaini my ni ai tako hai thai nai ka-tawm ly ati mana nai kaini ai khen ryry lawh? 13Abraham hawi Isaka hawi Jakob i Tameuh, achi i amsi sangumchi i Tameuh my ly mymy i Miseaung Isu ai ly palo nai bo he; ni ai ly nangchi my patiu hai i, Pilata my patheu ai tau nai khala y py mymy i mo y nangchi my ngai y nai ly.#Theu 3.15 14Khumi Kachai hawi Khumi kahawi ai ly nangchi my ngai y iy, kasi nga nai keung ai ly nangmychi teng y patheu ai nai takeng u lawh i, Hengra sa nai keung ai ly nangchi my padei;#Mt 27.15–23; Mk 15.6–14; Lk 23.13–23; Jh 19.12–15 15na i py mymy ai ly Tameuh my kadeichi theung i dengdairei pathau teang bo, kaichi ly huni pany hai nai keung ne. 16Naibaly mymy i amyn y ym nai deaungkho y mymy i amyn my ly hini, nangchi i pany nai hawi niu nai khumi ai ly hawihai nai bo he: ne, mymy i saho y ym naira awm nai my ly nangchi bawibawi i mei ka-niu y ni ai hawihai pyn nai bo he.
17“Naibaly amjo amnauchi awi, nangmychi hawi nangchi i miteaung kehchi hawi pany y nai deaungkho y hini ly sa nai teu, nanai kai pany mang. 18Na i py Tameuh my amo bawibawichi i labeaung y mymy i Krista ly atiti ngari patang ai nai satang thai hai yb nai ly ang tym hai nai bo he. 19Hunai deaungkho y nangchi i kamngochi ly tama hai thai ai nai uikhei u ly, ali u teang jau, 20hunaibaly Areng teng i dengdairei amcheng nai neng tym thai ai i, Isu, nangchi i vui y ang khai pi yb nai Krista ai ly ang pato thai ai nai: 21ni ai ly ati cheaungkhang sa palai nai neng tym y ryrei ly kani my kawn ai nai tla rai: huni leu ly Tameuhmy khaileaung palum angchei khyp khala i dengairei amo kachaichi i labeaung y thui yb bo. 22Ne, Mosi my py thui i, ‘Areng Tameuh my nangchi i amjo amnauchi theung i nai kai kamta amo leaungrei ai ang theu hai ai mang, ni my ly leu bawibawi nangchi teng y ang thui pi nai ngierei ly nangchi my tangai ai nai tla.#Leu 18.15, 18 23Naibaly ami py huni amo i leu tangai y nai ngierei ly khumichi theung i nai tama hai vui ai,’ napi.#Leu 18.19 24Ne, Samuela awm nai dengdairei amo bawibawichi, kangkhym i chi my py leu thui pi nai bawibawi ly vai i satang thui pi rym teang. 25Nangchi ly amochi hawi leu maikawm chanauchi ne chy bo; huni ly Tameuh my nangchi i amsi sangumchi teng y adeu i Abraham teng y, ‘Nang i kangpreang deaungkho y khaileaung pri i cheng cheaungkhangchi tlamsa ai,’ napi.#AA 22.18 26Tameuh my mymy i Miseaung ai khai pi i, nangchi bawibawi ai nangchi i kamngo i dengdairei hi vui iy amtheaung hai ai nai, nangmychi teng y ang pato pi manme nai bo he,” napi.
Поточний вибір:
AMTAW 3: KCL02
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Khumi Common Language Bible © Bible Society of Myanmar, 2005.
