AMTAW 2
2
Phailo Kachai satla nai
1Naibaly Pentekost kani tym kha y nichi bawibawi paleung vanrei my meingtym harei y awm achu be.#Lev 23.15–21; Leu 16.9–11 2Naibaly tlenrei khyh my kani pri mang i dengdairei ali khu theu nai ka-tawm tym miu, naibaly huni ly nichi i ateh nai yhm verei kawi bebe. 3Naibaly palaichi ly mai ka-tawm nichi teng y amji iy ahei nai nichi teng y amteng bo; naibaly nichi i lu tleirei y chym. 4Naibaly nichi bawibawi ly Phailo Kachai my kawi bebe i, Phailo my leu katheu hai nai ka-tawm leu takhra takhra katheu u amteaung bo.
5Naibaly kani anui i cheng cheaungkhang theung i dengdairei Tameuh ai dawn parai nai Judachi ly Jerusalem y ni awm. 6Naibaly huni tyn thai bo nabaly khumi mipuichi jeu achu i, khumi leaung leaungrei nichi i leu ly amy i leu ana pa-rei thui nai thai lawh nai deaungkho y dawn ai nai ngo y. 7Naibaly nichi bawibawi ly lyh parai nai rengrang tlai ly napi i, “Khen cham, hini leu thui nai khumichi bawibawi ly Kalili pri i khumi ne y lawh a? 8Naibaly achi khumi leaung leaungrei amy i tapen ahawi nai leu ka-tawm mana thai lawh mo? 9Parthai cheng hawi, Medai cheng hawi, Elamitai cheng hawi, Mesopotamia pri i hawi, Judai pri i hawi, Kapadokia pri i hawi, 10Ponto pri i hawi, Asia pri i hawi, Phrukia pri i hawi, Pamphulia pri i hawi, Aikupta pri i hawi, Kurini ahawi Libua pri i awm naichi hawi, Rom angvyn Judachi hawi, mychi i suibang kammeaung hawi, 11Krit tlawn i awm naichi hawi, Arabi pri i awm naichi py Tameuh i atiti sa nai nang parai naichi nichi i thui nai, amy i leu ana pa-rei achi thai na ly,” napi. 12Naibaly nichi bawibawi ly lyh parai i dawn pany y nai mychi tengtawi, “Hini ly ati mana nai sai mo?” na u. 13Na i py phyreichi my ly panui hai lawh i, “Kreip athai hang kangtha pavui nai na a hi ly,” napi.
Petera i leu thui nai
14Na i py Petera my holai hareichi hawi angdo iy ni ly tao pajeng parai naimy nichi teng y, “Nangchi Judai pri i khumichi awi, Jerusalem y awm nai bawibawichi awi, hini ly pany u ly, kai i leu py tangai u. 15Hinichi ly nangchi i dawn nai kamta pavui y leang, kani achaw deaung khyh rai chy bo. 16Na i py hini ly amo Joela i thui nai ne;
17‘Naibaly Tameuh my, Kangkhym i neng y ly hina nai#Joel 2.28–32
awm ai.
Ngan bawibawi tleaung y kai i Phailo kang lei ai:
Nangchi i chapo chaniuchi my py kai i leu thui ai:
Nangchi i thawndeangchi my py atiti amteng nai niu ai:
Nangchi i miteaung neampachochi my py amang mang
y amang ai:
18Ne, huni kani y ly kai i miseaung neampacho neampachychi
i tlang tleaung y py kai i Phailo kang lei
ai i, nichi ly kai i leu thui ai.
19Kaimy salo mang i kani y ly atiti rengrangchi,
Anui mang i khaileaung y py atiti ka-ma-rachi
kapatei ai:
Thi hawi, mai hawi, maikhyh amhui nai hawi:
20Areng i kani nang parai nai hawi amyn amthang parai
nai ly tym y rai kha y,
Kanito ly kaveng lawn ai i,
Lo py thi lawn ai:
21Naibaly hina nai ne ai, Ami py Areng i amyn y palau
nai ngierei ly heng ai,’ napi.
22“Israela khumichi awi, hini leu ly tangai u cham: Nazaret Isu ai ly Tameuh my mymy ai teaung iy nangchi theung y atiti nang parai naichi hawi, atiti rengrangchi hawi ka-ma-rachi hawi sa nai ly hawihai ang pany hai nai, huni ly nangmychi kypkyp my pany bo. 23Ni ai ly Tameuh my mymy i kangai sa ai tau thleng nai hawi pany yb nai kamta patiu hai iy, nangchi lykhumi kamngochi i kiu y kraws tleaung y tahen i padei bo.#Mt 27.35; Mk 15.24; Lk 23.33; Jh 19.18 24Mymy ai ly deira my patawn pajau ai nai ly aveng nai deaungkho y, deira my kawm naichi ly Tameuh my su pi i pathau bo.#Mt 28.5–6; Mk 16.6; Lk 24.5 25Naibaly Davida my ni i satang thui i,#Sam 16.8–11
Kai i mo y Areng ai ly kaniu jojo;
Kai amchyh y ai nai mymy ly
kai i lamtang mang y awm:
26Hunai deaungkho y kai i paleung amo theu i, kai i
palai py kawn;
27kai i phailo ai tavau kho y khai jo y ai i,
Nang i Khumi Kachai ai veaung vui ai nai pei y nai
deaungkho y,
Kai i ngan py athang khai parai naimy awm teang ai.
28Nang ly kai ai heng nai lam patei bo,
Nang i meimai my kai ai kawn nai kawi hai ai,’ napi.
29“Amjo amnauchi awi, nangchi teng y achi i amsi sangum Davida i satang ly angym be pa-rei kai thui pajau: ni ly dei i up py up bo chy bo, ni i angawm py vai khrairei achi teng y awm jo rai. 30Ni ly amo ne i, Tameuh my ni i phai bawi kamji khumi ami ai mo ni i areng atehra tleaung y ateh hai ai, nanai vaineng abeu naimy thui, nanai ni ly pany.#Sam 132.11; 2 Sam 7.12–13 31Naibaly mymy ly huna nai pany rym nai deaungkho y Krista i angthau bi ai nai satang thui iy, ni ai tavau kho y khai su y i, ni i veu py veaung y, napi. 32Hini Isu ai ly Tameuh my pathau bi bo, nanai kaichi bawibawi ly pany hai nai keung ne. 33Mymy ai ly Tameuh i lamtang mang y pasang i, Phailo Kachai adeu nai ly Ampo teng i nga iy, hini nangchi i niu nai hawi thai nai ly ni i ang lei nai bo he. 34Davida ly kani pri mang y lyn y leang, na i py mymy kypkyp ly,#Sam 110.1
Areng ly kai i Areng teng y,
Nang i paleung ka-echi ai ly nang i kheu khai naira
kapalawn y ryrei ly,
35Kai i lamtang mang y ateh, napi’ nanai na a.
36Hunaibaly nangchi i tahen nai Isu ai ly Tameuh my Areng hawi Krista y palawn bo, nanai Israela cheng bawibawi my pany u khypkhyp sy,” napi.
37Naibaly huna nai leu thai i nichi i paleung y thun iy Petera hawi abangnai takhrachi teng y, “Amjo amnauchi awi kaichi mana sa ai mo?” napi. 38Naibaly Petera ly nichi teng y, “Uikhei u ly, nangchi i kamngo pahen ai nai Isu Krista i amyn y baptisma ngo u bawibawi, hunaibaly Phailo kachai pei nai ly nangchi py ngai ai. 39Ati mana nai mo nabaly hini adeu nai ly nangchi i vui py, nangchi i chanauchi i vui py, kamlo parai ra i khumi bawibawichi i vui py, Areng achi i Tameuh my mymy teng y palau nai ngiereichi i vui py ne,” napi. 40Naibaly leu takhra takhra neangneang hawihai palai thui pi i, “vai deung kangthau sa ta-li naichi theung i nai apalawi u,” nanai pachei. 41Naibaly ni i leu tangai nai ngierei ly baptisma nga bo, naibaly huni kani y ly khumi sang thomrei awm panawi bi. 42Naibaly nichi ly abangnaichi i leu patiu naira y hawi amkawm naira y hawi, tako theng baw naira y hawi, chiu sa naira y py hawihai palai awm u jo.
Ym nai khumichi i heng nai sai
43Naibaly khumi bawibawichi ly jei i, abangnaichi ly atiti rengrang hawi ka-ma-ra neangneang sa. 44Naibaly ym nai ngiereichi ly paleung vanrei awm i ati cheaungkhang ahum;#Ataw 4.32–35 45mymychi i vawnsai hawi yhmtheaung katuichi jo iy, nichi i avo nai ka-leu ryrei amji bawibawi. 46Naibaly kani tleirei paleung vanrei my achura yhm kalen pui y hawihai palai awm u i, nichi i yhm y py tako theng bawi iy, amo theu parai naimy paleung tinem iy biu cha nai, Tameuh ai palo. 47Naibaly khumi bawibawichi ly nichi ai kawn hai. Naibaly paheng dudu nai ngiereichi ai ly Areng my kani tleirei nichi teng y panawi hai ryhryh.
Поточний вибір:
AMTAW 2: KCL02
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Khumi Common Language Bible © Bible Society of Myanmar, 2005.
