AMTAW 1
1
1Theophila awi, angchei i cha y ly Isu i atiti sa nai hawi, patiu angchei nai leu bawibawi ly,#Lk 1.1–4 2mymy ly Phailo kachai i saho y ni i vawi nai amtaw thau naichi teng y leu pei pajau iy, kani mang y pahawi kalau vui nai kani tym pa-rei nai leu ly kaimy tajiu bo. 3Hunichi teng y ly mymy i ngari patang nai bo y neangneang pany kyp naira y mymy ly heng teang, nanai amteng hai iy, kani vui palyhrei sala y mymychi teng y amteng pi i, Tameuh i peang nai satang thui pi; 4naibaly mymychi i awm achu naira y amkawm teang iy mymy ly, “Jerusalem i nai theu u moh; Ngaai i atiti adeu nai, kaimy kang thui pi nai ly ajeng u;#Lk 24.49 5Johan ly tui y baptis sa reng, na i py kani kra y nai sala y nangchi ly Phailo Kachai y baptisma nga u ai,” napi.#Mt 3.11; Mk 1.8; Lk 3.16; Jh 1.33
Isu ai kani pri mang y hawi kalau nai
6Naibaly nichi ly jeu achu iy ni teng y, “Areng, Israelachi teng y nangmy pri pei bi ai nai ly vai a?” nanai deng. 7Naibaly ni my ly nichi teng y, “Ngaai my neng hawi kani mymy ngaingai awm ai nai sa rym nai ly nangchi pany ai nai avo y leang. 8Na i py Phailo kachai my nangmychi i tlang tleaung y tym nai khala y nangchi ly sa thai naira nga u ai; hunaibaly Jerusalem y py, Judai pri hawi Samari pri verei y py, khuteng taki y tym pa-rei nangchi ly kai i leu pany hai nai keungchi lawn ai,” napi.#Mt 28.19; Mk 16.15; Lk 24.47–48 9Naibaly huni leu thui pajau iy mychi niu ryhryh nai tarawi y ni ai kani mang y pahawi kaleu bo, naibaly khupanym my mychi niu pajau y naira y pahawi vui bo.#Mk 16.19; Lk 24.50–51 10Naibaly nichi ly ni i kalau nai kani mang y khen ryry nai thym khala y, khen cham, khumi leaung nyhrei, kanih kangleung akhiu nai nichi ahawi y angdo. 11Nini my ly, “Kalili pri i khumichi awi, ati mana nai angdo naimy kani mang y khen u ryry lawh mo? Hini Isu, nangchi teng i dengdairei kani mang y pahawi kalau nai ly, kani mang y kalau nai nangchi i niu nai kamta mymy ly ang jeu takengkei teang ai,” napi.
Juda i meingtym y amtym nai
12Naibaly nichi ly Olive mawi napi naira i dengdairei Jerusalem y ali teang bo; huni mawi ly Jerusalem ahawi y awm, Anawn Kani y pavai salang ai nai hawi khyp. 13Naibaly tym u i mymychi i awm naira salo i sambeu y lyn kalau bo; Petera py Johan py Jakob py Andria py, Philipa py Thoma py, Bartholomai py Matthai py, Alphai i chap Jakob py, Zelota kamkawmchi i khumi Simon py, Jakob i chapo Juda py.#Mt 10.2–4; Mk 3.16–19; Lk 6.14–16 14Hunichi bawibawi ly neampachychi hawi, Isu i amhm Mari hawi, Isu i amjo amnauchi hawi paleung venrei my chiu sa nai patlaw y. 15Hunai khala y ly (nichi bawibawi ly chungvai atlo leaung apomrei mo awm i) Petera ly amjo amnauchi theung y angdo iy, 16“Amjo amnauchi awi, Phailo Kachai my Davida i labeaung y Isu ai patiu nai keungchi ai pahawi nai keung Juda i satang thui yb nai ly, huni Tameuh i cha-iu leu sai ly ang tym tanga nai bo. 17Ni ai ly achi theung y kati tabawi nai ne i, hini krykeung kalop y py phy nga teang. 18(Huni khumi ly my i kamngo vang y meingtym harei van; naibaly tla amkhiuh iy sala y apeu phiu ryp i tavi theu bebe. 19Naibaly huni satang ly Jerusalem y awm naichi bawibawi my thai bo. Hunaibaly huni meingtym ly mychi i leu y Akeldama, napi; huni ly Thi Meingtym, nanai sai ne.) 20Sam cha-iu y,#Sam 69.25, 109.8
“My i awm naira ka-keu awm sy,
Huni meingtym y ami py awm moh sy,”
nanai hawi,
“My i peang nai kalop ly khumi takhra my ngo sy,” nanai tajiu nai awm.
21Hunaibaly Areng Isu achi theung y kun reng nai sala y ly Johan i baptis sa nai dengdairei achi teng i nai pahawi kalau vui nai kani tym pa-rei, 22hini achi i amkawm reng naichi theung i khumi leaungrei ly kaichi hawi vanrei mymy i angthau bi nai pany hai ai nai keung lawn ai nai tla,” napi.#Mt 3.16; Mk 1.9, 16.19; Lk 3.21, 24.51
23Naibaly nichi ly leaung nyhrei ai vawi, leaungrei nai ly Josepha, Barsaba napi nai, amyn ka-reu Justa napi bi nai, naibaly leaungrei nai ly Matthia. 24Naibaly nichi chiu sa i, “Areng awi, nang ly khumi bawibawichi i paleung pany nai keung ne, Juda ly mymy i awm naira y chei ai nai phra i, 25hini krykeung kalop hawi amtaw thau nai kalop i jeng y awm ai nai, hinini khumi leaung nyhrei ai nangmy mani ai vawi mo, nanai kaichi ai pany hai kyh ba,” napi. 26Naibaly tambe va i, Matthia ai avah; hunaibaly ni ai ly amtaw thau nai holai hareichi theung y kati tabawi bo.
Поточний вибір:
AMTAW 1: KCL02
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Khumi Common Language Bible © Bible Society of Myanmar, 2005.
