Nabagong Pamumuhay: Mga Pakikipag-usap Sa DiyosHalimbawa

Pakikinig

Ang panalangin ay hindi lamang tungkol sa pakikipag-usap sa Diyos. Tungkol din ito sa pag-upo nang tahimik at pakikinig. Napakaraming ingay sa mundo na kapag ito ay tumahimik, maaari maging medyo nakakatakot. Kailangan nating matutunan kung paano yakapin ang katahimikan kung gusto nating marinig ang tinig ng Diyos. 

Gayunpaman, ang pakikinig ay hindi ang kawalan ng ginagawa—ito ay aktibo. Ito ay nangangailangan ng isang mulat na desisyon upang makinig sa nagsasalita. Kung ikaw ay nakatutok nang sobra sa isang bagay na nakaligtaan mo ang sinasabi ng taong nasa tabi mo, alam mo ang ibig kong sabihin. Maaaring sobra tayong nakatuon sa kung ano ang sinasabi natin sa Diyos na nakalimutan nating makinig sa nais Niyang sabihin sa atin.

Ang Diyos ay nagsasalita sa lahat ng oras. Nagsasalita Siya sa pamamagitan ng mga pelikula, kalikasan, at mga tala mula sa mga kaibigan. Kapag naramdaman mo na ang iyong pastor ay direktang nagsasalita sa iyo o mayroon kang isang kapahayagan sa pagbabasa mo ng lumang dyornal, iyon ay ang Diyos na nagsasalita sa iyo. Walang paraan na hindi Niya kayang abutin. 

Sa kabutihang palad, kapag hindi tayo sigurado kung ang ating naririnig ay mula sa Diyos, masusubok natin ito. Kung ito ay naaayon sa karakter ng Diyos at kung ano ang sinasabi Niya sa Biblia, malamang na Siya iyon. Kapag nakakarinig tayo ng negatibong pag-uusap sa sarili o kasinungalingan mula sa mundo na hindi naaayon sa Kasulatan, maaari nating alisin ang mga ito dahil alam natin na hindi iyon mga mula sa Diyos. 

Minsan kapag nakikinig tayo, wala tayong naririnig. Iyan ay hindi nangangahulugan na ang Diyos ay hindi nagsasalita. Maaaring mangahulugan ito na sinusubukan Niyang ihanda ang ating mga puso o ituro sa atin ang isang bagay sa paghihintay. Marahil ay nakatuon tayo sa maling direksyon o sadyang hindi natin alam kung paano makilala ang Kanyang tinig.

Ang pagtutok ng iyong tainga sa marahan at tahimik na boses ng Diyos ay nangangailangan ng pagsasanay. Habang mas pamilyar ka sa Kanyang karakter at sa Kanyang Salita, mas madali mong malalaman kapag Siya ay nagsasalita. Huwag mawalan ng pag-asa sa proseso. Nalulugod ang Diyos na sinusubukan mo. Kahit na hindi ka komportable sa katahimikan, patuloy na sumandal at makinig sa Kanyang mga bulong.

Pagsasagawa- Maglaan ng 10 minuto sa iyong dyornal habang nagdarasal ka ngayon. Kung mayroon kang mga tanong, dalhin mo ang mga ito sa Diyos at hilingin sa Kanya na ihayag ang mga sagot sa iyo. Kung walang pumapasok sa isip mo, itanong mo lang sa Kanya "Nakikita Mo ba ako?" Isulat kung ano ang iyong iniisip, kung ano ang iyong nararamdaman, at kung ano ang sinasabi sa iyo ng iyong puso. Pagkatapos, pag-isipang muli ang iyong isinulat at alamin kung ito ay naaayon sa kung sino ang Diyos at kung ano ang sinasabi nito sa Biblia.