मत्ति 27
27
येसु पिलातसबेॽ चिक्खे़ॽपॽआ
(मरकुस १५:१; लुका २३:१-२; युहन्ना १८:२८-३२)
1माक्मिसेल्लाम, चोप एप्पा याडाङ्बाजिनुङ यहुदि एप्पा डायोङ्बाजिडे़ॽ येसु सेॽनेमा खे़ये लुनुङ मोत्ता इःसुजि। 2मोबा खोजिडे़ॽ येसु हिःक्नुङ चिॽखे़ॽटुजि मोबा बेॽए एप्पा मायोङ्बा पिलातसबेॽ जिम्मा पिसुजि।
यहुदा सिघे़ॽपॽआ
(एप्पा चोङ्सा १:१८-१९)
3येसु सेॽनेमे दन्डा पिमा खे़ये लुमे खा पक्का लिटे़ लुमे़ खा येसु धोका पिघुबा यहुदाडे़ॽ खेम्नुङ खो बेॽलो हे़क हे़क मिना। मोबा खो सिसे़ङ्मि सुमबोङ मुन्डा याङ लामानुङ एप्पा याडाङ्बाजिनुङ यहुदि डायोङ्बाजिबेॽ खे़ॽनुङ लुसुजि, 4“के़ॽ बिरोङ मे़ॽनिङ्मा याॽमि सेॽनेमेॽनुङ खो धोका पिसुङ।” तर माहाजिडे़ॽ लुसुजि, “आक्को खा कानिङे़ॽ इमाङ लेमा ? हे़ने़ॽनोॽ लेसे।” 5मोबा माहा सिसे़ङ्मि सुमबोङ मुन्डा याङ मन्दिरबेॽ राप्आसु मोबा खे़ॽनुङ खोमटाङ्बा सिस्सिघडा।
6मोबा एप्पा याडाङ्बाजिडे़ॽ माहा सिसे़ङ्मि याङ कुःप्नुङ कासामि, “इघा याङ गो मन्दिरबेॽहा याङ्नुङ युङ्मा कानिङ्मि यहुदि धारमिक नियमडे़ॽ पिनिबा, इन्ढोङ्होङ इघा याङ याॽमि सेॽनेमाॽमि लाबॽआ याङ ले़हा।” 7खोजिडे़ॽ माहा याङ्डे़ॽ परदेसिजिमि सिगुयाक युङ्ढाम येःॽमाघा टोङ्मामि लागि सुॽउ टोङ्घुबाजिमि जग्गा इम्मामि मोत्ता इःसुजि। 8मोडोगे़ॽनोॽ आयुरोसो मो जग्गा “हरिमि सोङ्रा” लुन्डुजे।
9मोबा यरमिया अगमबक्ताडे़ॽ लुबॽआ इगो खा पुरा लिजाटहा, “इस्राएलि याॽमिजिडे़ॽ येसुमि लागि युङ्बॽआ दाम चाहिँ सुमबोङ सिसे़ङ्मि मुन्डा ले़टा। मो माहाजिडे़ॽ लासुजि। 10परमपरभुडे़ॽ का लुडिडोक्नोॽ माहाजिडे़ॽ माहा याङ्डे़ॽ सुॽउ टोङ्घुबाजिमि सोङ्रा इनुजि।”
येसु पिलातसमि पोम्बेॽ
(मरकुस १५:२-१५; लुका २३:३-५,१३-२५; युहन्ना १८:२९–१९:१६)
11येसु एप्पा डायोङ्बा पिलातसमि पोम्बेॽ येबा, मोबा मायोङ्बाडे़ॽ खो सिप्सु, “इमा हे़न यहुदिजिमि हाङ्बाडे ?” येसुडे़ॽ लुसु, “मोगो हे़ने़ॽनोॽ लुमे़ॽनिङ्सिन्डु।” 12मोबा एप्पा याडाङ्बाजिनुङ यहुदि डायोङ्बाजिडे़ॽ येसु बेॽलो आप्टिक टिसुजि, तर खोसे़ॽ इमाङ्सो मे़लुसुजि। 13मोडोगे़ॽ पिलातसडे़ॽ येसु लुसु, “हे़ने़ए़ बिरोधबेॽ इघाजिडे़ॽ खाल खालहा आप्टिक टिमे़ॽनिङ्सिन्डुजे, इमा हे़ने़ॽ खेप्सुनिहा ?” 14तर येसुडे़ॽ पिलातस इक्को खासो मे़न्डेसु। बेॽए मायोङ्बासो इगो खाङ्नुङ खरि मिना।
15मो छुट्कारामि चाडबेॽ याॽमिजिडे़ॽ लुबॽआ इक्को कैदि एप्पा मायोङ्बाडे़ॽ लेप्पेॽमे चलन टुसे़। 16मोडोक्पेॽ बारब्बा लुमे इक्को सारोनोॽ मङे़ॽमा याॽमि तिरिङ्गा खिमबेॽ से़क्सिघे़ॽपॽआ ले़टे़। 17मोबा पिलातसडे़ॽ मोबेॽ सुम्बॽआ याॽमिजि सिप्सुजि, “के़ॽ हे़निङ्मि लागि असा चाहिँ लेप्पेबेॽमे ? बारब्बाडे, खिरिस्ट लुमे येसुडे ?” 18इन्ढोङ्होङ माहाजिडे़ॽ येसु चेजेवे़ॽनोॽ खोबेॽ लाजे़टुजे लुमे खा पिलातसडे़ॽ लेसुए।
19पिलातस न्याय ले़ठामबेॽ पेम्मे़ॽनिङ्सिमाबेॽ खोमबनिमाडे़ॽ इडोक्मा लम्बवाँ पाक्सु, “आक्को बिरोङ मे़ॽनिङ्मा याॽमि इमाङ्सो ए़ले़ःॽमे, इन्ढोङ्होङ आयु सेन्डा आक्को याॽमिमि टुम्बेॽ मक्पॽआ सेम्माङ्बेॽ बेॽलो दुःख आङ्इटुङे।”
20तर एप्पा याडाङ्बाजिनुङ यहुदि डायोङ्बाजिडे़ॽ बारब्बा चाहिँ लेप्पेॽमा, येसु चाहिँ सेॽनेमा लुनुङ याॽमिजि चोप्सुजि। 21एप्पा मायोङ्बाडे़ॽ फेरि सिप्सुजि, “चइबानोॽ लुसानुमे, इगो निप्पाङ्बेॽ असाडे लेप्पेमे ?” माहाजिडे़ॽ लुसुजि, “बारब्बा।”
22पिलातसडे़ॽ माहाजि लुसुजि, “मोबा खिरिस्ट लुमे येसु चाहिँ इमाङ्डे ले़ःॽमे ?” माहा चोबे़ॽ लुसुजि, “आक्को चाहिँ काप्सिङ्बेॽ किङ्नेमे!” 23पिलातसडे़ॽ माहाजि सिप्सुजि, “इन्ढोङ किङ्नेमे, आक्कोसे़ॽ इमाङ्डे बिरोङ ले़टुए ?” तर माहाजि छना बेॽलो वोसाङ कासामि, “आक्को काप्सिङ्बेॽनोॽ किङ्नेमा खे़ये!”
24मोबा पिलातसडे़ॽ माहाजिडे़ॽ मे़ङ्खेम्बॽआसे़ॽ, इगो खाडे़ॽ ले़ःॽमे़ॽ बेॽलो हाइखा हुलदुङ्गा पुःइहोला मिॽनुङ पिलातसडे़ॽ योङा लाप्नुङ बेॽलो याॽमिजिमि पोम्बेॽनोॽ खोमि हुक वासोक्साङ लुसुजि, “हे़निङे़ॽ लेसानुमे इगो बिरोङ मे़ॽनिङ्मा याॽमि सेॽनेबॽआ आप्टिक काबेॽ मे़सिॽलो, इघा चोप बिरोङ हे़निङ्बेॽनोॽ सिॽलो।” 25मोबेॽहा चोप याॽमिजिडे़ॽ लुसुजि, “नुये इगो याॽमि सेॽनेबॽआ आप्टिक कानिङ्नुङ कानिङ्हा पसाजि सोक्पेॽ सिॽलो।”
26मोबा पिलातसडे़ॽ माहाजिमि लागि बारब्बा लेप्पेॽटुजि, तर येसु चाहिँ कोरराडे़ॽ मोःक्नुङ काप्सिङ्बेॽ किङ्नेमामि खोजिनोॽ जिम्माबेॽ पिहाक्सुजि।
तिरिङ्गाजिडे़ॽ येसु सिःक्चाबॽआ
(मरकुस १५:१६-२०; युहन्ना १९:२-३)
27मोबा ए़क्साङ पिलातस तिरिङ्गाजिडे़ॽ येसु हाङ्खिम होङ्सिॽयु लाघे़ॽनुङ हाइखा तिरिङ्गाजि मोबेॽ सुप्सुजि। 28माहाजिडे़ॽ येसुमि चेॽ हेम्बेनुङ हाङ्बामिडोॽमा हाररामा चेॽ चाङ्डिबेॽटुजि। 29खोजिडे़ॽ चिजिङ्मि मुकुट टोङ्नुङ येसुमि निन्डवाँबेॽ ओम्डिबेॽटुजि, खोमि चुप्थिङ हुकपेॽ इङ्भु खिमेॽटुजि। मोबा खोमि पोम्बेॽ चोप तिरिङ्गाजि टुम्रुक ठोःक्नुङ इडोॽ लुसाङ सिःक्चोसुजि, “हे यहुदिजिमि हाङ्बा, सेवायो।” 30मोबा माहा तिरिङ्गाजिडे़ॽ येसु चेःॽनुङ मो इङ्भुडे़ॽ खोमि निन्डवाँबेॽ मोगुजि। 31येसु इडोॽ लुसाङ सिःक्चानुङ ए़क्साङ माहाजिडे़ॽ मो चेॽ हेम्बेॽनुङ खोमिनोॽ चेॽ चाङ्डिबेॽटुजि। मोबा काप्सिङ्बेॽ किङ्नेमामि चिॽखे़ॽटुजि।
येसु काप्सिङ्बेॽ किङ्नेबॽआ
(मरकुस १५:२१-३२; लुका २३:२६-४३; युहन्ना १९:१७-२७)
32खोजि खे़ॽमे़ॽनिङ्सिमाबेॽ रामबेॽ सिमोन निङ ले़ःॽखुबा कुरेनि ठाउँबेॽ पेङ्खुबा इक्को याॽमि चुप्टुजि, माहा तिरिङ्गाजिडे़ॽ खो येॽयेॽ येसुमि काप्सिङ खिमेॽटुजि। 33मोबा खोजि गलगथा लुमे ठाउँबेॽ लेस्सामि, गलगथा लुबॽआ चाहिँ खप्परे लुबॽआ ले़ये। 34मोबा माहाजिडे़ॽ येसु खिॽवाइङ ठुबॽआ अङ्गुरमि खे़ङा उङ्मा पिसुजि, तर खोसे़ॽ सेप्नुङ मे़उक्सु।
35माहा तिरिङ्गाजिडे़ॽ येसु काप्सिङ्बेॽ किङ्डिनुङ ए़क्साङ, खोमि चेॽ चिट्ठा एन्नुङ खोजिटाङ्बे़ॽ हासुजि। 36मोबा खोजि मोबेॽनोॽ पेन्नुङ येसु हुक्सुजि। 37“येसु यहुदिजिमि हाङ्बा” लुमे खोमि टेडिघरिक खामि आप्टिक पत्रा साप्नुङ येसुमि निन्डवाँ मेॽटोङ माहाजिडे़ॽ रेप्टिसुजि। 38मोबेॽ निप्पाङ डाकुजिसो येसुमि चुप्थिङ्लामनुङ ए़ङ्सिङ्लाम काप्सिङ्बेॽ किङ्एन्डुजि।
39मो राम लिसाङ राम्खुबा चोप याॽमिजिडे़ॽ येसु खाङ्नुङ निन्डवाँ हिॽसाङ सिःक्चासाङ लुसुजि, 40“मन्दिर योबेनुङ सुम याकपेॽ टोङ्खुबा, आम्टाङ्बा हिङ्जायेन्डि, निवाहाङ्मि पसा ले़येहोङ, काप्सिङ्बाङ मिम्मु उक्से।”
41मोडोक्नोॽ एप्पा याडाङ्बाजि, यहुदि धारमिक नियम इःॽखुबाजिनुङ यहुदि डायोङ्बाजि सोरि येःप्नुङ येसु सिःक्चोसुजि, 42“इगोसे़ॽ हाइखाजिगो हिङ्बोगुजि तर खाक्सानुमे, खोमटाङ्बा चाहिँ मे़हिङ्हेसु। चइबानोॽ इगो इस्राएलमि हाङ्बा ले़येहोङ हागोनोॽ काप्सिङ्बाङ किॽमु उङ्रो मोबाङ्रेॽ कानिङे़ॽ खो बिस्वास ले़न्डुङ्मे। 43इगोसे़ॽको निवाहाङ्बेॽ भरोसा युक्सुएनुङ ‘का निवाहाङ्मि पसा’ कामानिसे़। निवाहाङ्डे़ॽ इगो हिङ्मेॽमा मिॽइन्डुहोङ इगो हागोनोॽ इगोबाङ छुट्कारा ले़टुरो।”
44मोबा येसुनुङ सोरि किॽयु मिॽयु काप्सिङ्बेॽ किङ्एम्बॽआ निप्पाङ डाकुजिडे़ॽसो मोडोक्नोॽ सिःक्चोसुजि।
येसु सिघे़ॽपॽआ
(मरकुस १५:३३-४१; लुका २३:४४-४९; युहन्ना १९:२८-३०)
45मोबा मो देसबेॽ लेन्डाए इक्पोङ निच्चिबोङ्बाङ सुमबोङ्ठोक चोप देसनोॽ सेन्जुगुप लिसा। 46सुम्बोङ्राजि येसु इडोॽ लुनुङ बेॽए सेम्लाडे़ॽ कासा, “इलोइ, इलोइ, लामा सबखथनि ?” इगो लुबॽआ चाहिँ, “हे काङ्मि निवाहाङ, हे काङ्मि निवाहाङ, हे़ने़ॽ का इन्ढोङ लेप्पेटिङे ?” 47मोबे़ॽ येप्खुबाजिबेॽ इन्डोक जनाडे़ॽ इगो खा खेम्नुङ लुसुजि, “इगो याॽमिडे़ॽको एलिया के़ःॽमे़ॽसिन्डुए।”
48माहाजिबेॽ इक्को याॽमि सुवाक्टोॽ येःपोक्नुङ इक्को चेॽमि टुक्रा इङ्भुमि टुप्पाबेॽ युङ्नुङ अङ्गुरमि खिॽइये मद्यबेॽ सोक्नुङ येसुमि याबुक्पेॽ हाक्टिबेॽटु। 49तर हाइखाजिडे़ॽ चाहिँ लुसुजि, “लाखे, लाखे, इॽछोॽ खाङ्खाङ्मा, ना एलिया लेन्नुङ इगो हिङ्मेन्डुवेन्डे!” 50मोबा फेरि येसु बेॽए सेम्लाडे़ॽ कानुङ खोमि सोःक्मा खडा।
51मोडोक्पेॽनोॽ मन्दिरमि राम्डेमबेॽ युङ्बॽआ यिःप्चिरा परदा मिॽटुएबाङ मिम्मुठोक निफे़ङ लिनुङ चिघडा, रुॽमि खडा, ओब्रेक पोक्खडा। 52येःॽमा हेम्बोगा, बेॽलो धरमि याॽमिजि सिघे़ॽपॽआबाङ पुकडामि। 53माहाजि येःॽमाबाङ पे़ःॽआबामि, मोबा येसु सिबॽआबाङ हिङ्बोक्नुङ ए़क्साङ खोजि पबित्रा सहरबेॽ खडामि मोबेॽ बेॽलो याॽमिजिनुङ खाङ्मुसामि।
54येसु हुङ्खुबा तिरिङ्गाजिनुङ खोजिमि एप्पाडे़ॽ रुॽमि खे़ॽपॽआनुङ मोडोक्पेॽ लिमे़ॽसिबॽआ खा खाङ्नुङ माहाजि बेॽलो किस्सिमानुङ इडोॽ कासामि, “चइबानोॽ, इगोगो निवाहाङ्मि पसानोॽ ले़टे़ ले़ः।”
55मोबेॽ गालिलबाङ लेम्बॽआ बेॽलो मेॽनामिॽचिसो टुसामि, माहाजिडे़ॽ मेॽयोङ येःप्नुङ मोबेॽ लिबॽआ चोप खा खाङ्मे़ॽनिङसिडुजे। खोजि येसुमि सेवा ले़ःॽसाङ गालिलबाङ येसु टिङ्साङ लेम्बॽआ ले़टामे। 56माहाजिबेॽ मरियम मग्दलिनि, याकुबनुङ योसेफमि मामा मरियम, मोबा जब्दियामि पसाजिमि मामा टुसामे।
येसुमि सिगुयाक येःॽमाबेॽ युङ्बॽआ
(मरकुस १५:४२-४७; लुका २३:५०-५६; युहन्ना १९:३८-४२)
57युडा अरिमाथियाबेॽए योसेफ निङ ले़ःॽखुबा इक्को टाङायोङ्बा याॽमि लेस्सा, खोसो येसुमि चोङ्सानोॽ ले़टे़। 58खोसे़ॽ पिलातसबेॽ खे़ॽनुङ येसुमि सिगुयाक ङागु, मोबा पिलातसडे़ॽ खो लाघे़ॽमे हुकुम पिसु। 59योसेफडे़ॽ येसुमि सिगुयाक लाघे़ॽनुङ मलमलमि चोङ चेॽडे़ॽ यिबु, 60मोबा खोसे़ॽ भरखरि खोमटाङ्बामि लागि रुङ्गोॽवा युनुङ टोङ्युङ्बॽआ चोङ येःॽमाबेॽ येसु युक्सु, येःॽमामि याबुकपेॽ इक्को बेॽएम्मा रुङ्गोॽवाडे़ॽ टेक्आनुङ खो खडा। 61मोबेॽ येःॽमामि के़क्पेॽ मरियम मग्दलिनिनुङ हाइको मरियमसो टुसाजे।
तिरिङ्गाजिडे़ॽ येसुमि येःॽमा हुङ्बॽआ
62वागियाराम अथबा नाजामे याकपेॽ, एप्पा याडाङ्बाजिनुङ फरिसिजि पिलातसबेॽ सुम्जानुङ लुसुजि, 63“एप्पा मायोङ्बा, कानिङे़ॽ खेम्इटुङ्मे, मो रेम्सिङ्डे़ॽको हिङ्रिक टुमाबेॽ, ‘सुम याकपेॽ का फेरि हिङ्बोॽइङे’ लुबॽआ ले़टे़। 64मोडोगे़ॽ सुम याकठोक आक्कोमि येःॽमा नुरोॽ हुङ्मामि हुकुम ले़ःॽपेॽमा। आक्टोॽ ले़ःॽमाहोङ्रेॽ खोमि चोङ्साजिडे़ॽ खोमि सिगुयाक खुघे़ॽनुङ ‘खो सिबॽआबाङ हिङ्बोगा’ लुनुङ याॽमिजि रेम्डोक्टुजिनि। ने़ॽनिहोङ मो खा याक्लोए रेम्सिङ्बाङ्सो चुरोॽ मङे़ॽमा लिये।” 65पिलातसडे़ॽ माहाजि लुसुजि, “हे़निङ टाङ्बामिनोॽ तिरिङ्गाजि टुम्मे। खडानिङे, हे़निङे़ॽ हेःरो हुङ्मेॽटानुमे।” 66मोबा खोजि खे़ॽनुङ येःॽमामि याबुकपेॽ युङ्बॽआ रुङ्गोॽवाबेॽ छाप टिनुङ मो येःॽमा तिरिङ्गाजि हुङ्मेॽटुजि।
Kasalukuyang Napili:
मत्ति 27: YAMP
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023, Wycliffe Bible Translators, Inc. and Nepal Bible Society
