मत्ति 28
28
येसु हिङ्बोक्पॽआ
(मरकुस १६:१-११; लुका २४:१-१२; युहन्ना २०:१-१८)
1नाजामे याक ए़क्साङ, सातामि याक्लोमा याकमि माक्मिसेल्लाम मरियम मग्दलिनिनुङ हाइको मरियम येसुमि येःॽमा खाङ्सिॽ खडाजि। 2मोडोक्पेॽनोॽ बेॽएम्मा रुॽमि लेस्सा, इन्ढोङ्होङ निवाहाङ्मि इक्को थाङ्सिरिदुत थाङ्सिरिबाङ मिॽमु उक्सा, मोबा खोसे़ॽ येःॽमा टे़क्पॽआ रुङ्गोॽवा सेन्नुङ मोसोक्पेॽ पेना। 3खोमि नरिङ नम सेल्ले़क्डोॽनुङ चेॽ चाहिँ नाङ्डोॽ उथ्रिॽमा ले़टा। 4खो खाङ्नुङ येःॽमा हुङ्घुबा तिरिङ्गाजि किस्सिमे़ॽ थुरुरु योङ्मानुङ भुइबेॽ काङ्घे़ॽनुङ सिडिडोक्नोॽ लिसामि।
5तर थाङ्सिरिदुतडे़ॽ माहा मेॽनामिॽचि लुसुजि, “ए़क्सिडानिङे, के़ॽ लेनुङे़ हे़निङ काप्सिङ्बेॽ सेॽनेबॽआ येसु योक्सिॽ लेङ्इटानिङे। 6खोगो इगोबेॽ माॽआये, खोसे़ॽ लुडिडोॽ हिङ्बोॽइटे़। आप्नुङ खोमि सिगुयाक युङ्बॽआ ठाउँ खाक्सानुमे! 7हागो चान्डो खे़ॽनुङ खोमि चोङ्साजि लुबेॽटाजे ‘परभुगो हिङ्बोइटे़, खो हे़निङ्बाङ पोम्बेॽ पोम्बेॽ गालिल खे़ॽमे़ॽनिङ्सिये। मोबेॽ हे़निङे़ॽ खो चुप्मिन्डानुमे’ लो के़ॽ हे़न्जिङ इगो खा लुबेॽनिम, हागो खडाजे।”
8माहा मेॽनामिॽचि किस्सिमानुङ मोबा साप्थाङ्मानुङ मो येःॽमाबाङ येसुमि चोङ्साजि टुढामबेॽ मो लम्बवाँ लुसिॽ पिङ्खडाजि।
9हाजोक्टोॽ येसुडे़ॽ माहा मेॽनामिॽचि चुप्नुङ लुसुजि, “सान्ति!” मोजि खोमि सराङ्बेॽमु ओप्युनुङ सेवा मुसाजु। 10मोबा येसुडे़ॽ माहाजि लुसुजि, “ए़क्किसिसानिङे, खे़ॽनुङ काङ्मि निसाजि गालिलबेॽ खे़ॽमेल्लो लुबेॽटाजे, मोबेॽ खोजिडे़ॽ का चुप्इम्मे।”
येःॽमा हुङ्घुबाजिडे़ॽ लाजे़ॽपॽआ लम्बवाँ
11माहा मेॽनामिॽचि मोबाङ खे़ॽनुङ ए़क्साङ येःॽमा हुङ्घुबा आढा तिरिङ्गाजि सहरबेॽ खे़ॽनुङ एप्पा याडाङ्बाजि मोबेॽ लिबॽआ खा इःबेॽटुजि। 12मोबा एप्पा याडाङ्बाजिनुङ यहुदि धारमिक नियम इःॽखुबाजि सुम्नुङ हागो इमाङ ले़ःॽमे लुनुङ खोजि मोत्ता इःसामि। मोबा येःॽमा हुङ्घुबा तिरिङ्गाजि बेॽलो याङ पिनुङ इडोॽ लुसुजि, 13“कानिङ इम्घे़ॽपॽआ बेलाबेॽ येसुमि चोङ्साजि लेन्नुङ खोमि सिगुयाक खुघे़टुजि लुमे यो। 14इगो खा एप्पा मायोङ्बाडे़ॽ खेम्डोक्टुहोङ्सो कानिङे़ॽ खो लुनुङ हे़निङ जोगा ले़निम्ने़ सुरता ए़ले़टानुमे।” 15मोबा तिरिङ्गाजिडे़ॽ याङ लानुङ माहा एप्पा याडाङ्बाजिडे़ॽ इःॽपॽआडोक्नोॽ लुसुजि। मोडोगे़ॽ इगो खानोॽ यहुदिजिमि रुम्बेॽ रुक्टु मोबा आयुरोसो खोजिडे़ॽ मोडोक्नोॽ लुन्डुजे।
येसु खोमि चोङ्साजिबेॽ खाङ्मुबॽआ
(मरकुस १६:१४-१८; लुका २४:३६-४९; युहन्ना २०:१९-२३; एप्पा चोङ्सा १:६-८)
16मोबा इक्पोङ इक जना चोङ्साजि येसुडे़ॽ खे़ॽमा लुबॽआ ठाउँ गालिलमि टोक्टोक्माबेॽ खडामि। 17मोबेॽ माहा चोङ्साजिडे़ॽ येसु चुप्मासोरोॽ पोॽयुनुङ सेवा मुसुजि, तर माहाजिबेॽ इन्डोगे़ॽ चाहिँ सङ्क ले़टुजि। 18मोबा येसु खोजिमि के़क्पेॽ खे़ॽनुङ लुसुजि, “खेप्सानुमे, निवाहाङ्डे़ॽ का थाङ्सिरिनुङ मक्खाम्डेमसोक्पेॽ चोप अधिकार पिटे़। 19मोडोगे़ॽ खडानिङे चोप जातिहा याॽमिजि चोङ्सा टोक्सानुमे। माहाजि पाबा निवाहाङ, पसा येसुनुङ पबित्रा होङ्निवामि निङ्बेॽ बप्तिस्मा पिसानुमे। 20के़ॽ हे़निङ पिबॽआ चोप आग्या पालना ले़टानुमे लुनुङ माहाजि इःडानुमे। खेप्सानुमे, का मक्खाम्डेममि चोप्पाङ ए़क्साङ्ए याकठोक सानिङ हे़निङ्नुङ सोरि टुङे।”
Kasalukuyang Napili:
मत्ति 28: YAMP
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023, Wycliffe Bible Translators, Inc. and Nepal Bible Society
