मत्ति 26
26
येसु सेॽनेमे मोत्ता ले़ःॽपॽआ
(मरकुस १४:१-२; लुका २२:१-२; युहन्ना ११:४५-५३)
1येसुडे़ॽ इघा चोप खा इःसेॽनुङ खोमि चोङ्साजि लुसुजि, 2“हे़निङे़ॽ लेसानुमे, हागो नियाक ए़क्साङ मे़न्ठुबॽआ चरेपा चामे छुट्कारामि चाड लेङ्इये, मोबा याॽमिमि पसा काप्सिङ्बेॽ किङ्नेमामि लागि राःप्नुङ याॽमिजिमि हुकपेॽ पिन्डुजे।”
3मोडोक्पेॽ कैयाफा निङ्मा चोप्पाङ एप्पा याडाङ्बामि खिमबेॽ एप्पा याडाङ्बाजिनुङ यहुदि डायोङ्बाजि सुप्सामि। 4माहाजिडे़ॽ येसु इन्डोक्टे खुस्रिङ्मु राःप्नुङ सेॽनेमे लुनुङ मोत्ता हुबुजि। 5तर माहाजिडे़ॽ लुसुजि, “इगो चाडमि बेलाराजि कानिङे़ॽ इडोॽ ले़ःॽमा फे़न्निबा, इन्ढोङ्होङ बेॽलो याॽमिजिबेॽ हुलदुङ्गा पुॽइये।”
येसु नाम्जानुये केवा टिबेॽपॽआ
(मरकुस १४:३-९; युहन्ना १२:१-८)
6येसु बेथानियाबेॽए सिमोनमि खिमबेॽ खडा, खो याक्लो सुक्टुबाङेॽ सुक्पॽआ ले़टे़। 7मोबेॽ इक्को मेॽनामिॽ बेॽलो याङ सिॽइये बतलबेॽ नम्जानुये केवा याङ्मानुङ येसुबेॽ लेस्सा। मोबा येसु चासिॽ पेम्माबेॽ मो मेॽनामिॽडे़ॽ येसुमि निन्डवाँबेॽ माहा केवा टिबेॽटु। 8इगो खाङ्नुङ चोङ्साजि सुरके़ॽमानुङ कासामि, “इमाङ्मि लागि इढे़ॽलो केवा के़न्डिखडा, इन्ढोङ खेरो एङ्इन्डुहा ? 9बोरु इघा बेॽलो याङ्बेॽ इन्जानुङ माहा याङ, इमाङ मे़ॽनिङ्हा गरिब याॽमिजि पिबॽआहोङ नुडे़।”
10इगो खा येसुडे़ॽ लेडोक्नुङ माहाजि लुसुजि, “हे़निङे़ॽ इगो मेॽनामिॽ इन्ढोङ दुःख पिन्डानुमे ? खोसे़ॽको काङ्मि लागि इक्को नुबा योम्बोक ले़ए़टुए। 11इन्ढोङ्होङ इमाङ मे़ङ्काप्खुबा गरिबजिगो सानिङ्नोॽ हे़निङ्नुङ टुम्मे, तर का हे़निङ्नुङ सानिङ पेन्डोक्ङानि। 12खोसे़ॽ इगो नाम्जानुये केवा काङ्मि हिङाबेॽ सिटिनुङ येःॽमाबेॽ युङ्मामि पोरोइटिङे। 13चइबानोॽ, के़ॽ हे़निङ लुनिम्ने़, मक्खाम्डेममि हाम्बे हाम्बे ठाउँबेॽ इगो सुसमाचार परचार लिहा, मोबेॽ मोबेॽ इगो मेॽनामिॽडे़ॽ ले़ःॽपॽआ योम्बोकसो इःन्डुजे।”
येसु राःप्मेॽमामि यहुदा राजि लिबॽआ
(मरकुस १४:१०-११; लुका २२:३-६)
14मोबा येसुमि बारो जना चोङ्साजिबेॽ यहुदा इस्करियोत चाहिँ एप्पा याडाङ्बाजिबेॽ खे़ॽनुङ लुसुजि, 15“के़ॽ येसु हे़निङ्मि हुकपेॽ राःप्मेॽनिम्ने़, मोमि साटो का इमाङ पिन्डानिङे ?” मोबा माहाजिडे़ॽ खो सिसे़ङ्मि याङ सुम्बोङ मुन्डा पिसुजि। 16मो याकबाङ्नोॽ यहुदाडे़ॽ येसु राःप्मेॽमामि दाउ खाङ्बोगु।
छुट्कारा चाडमि भत्तेर
(मरकुस १४:१२-२६; लुका २२:७-२३; युहन्ना १३:२१-३०; १ कोरिन्थि ११:२३-२५)
17हागो खमिर मे़एम्बॽआ चरेपा चामे चाडमि#२६:१७ खमिर मे़एम्बॽआ चरेपा चामे चाडमि यहुदिजिडे़ॽ चाहिँ इगो चाड साता इक्को ले़टुजे। इगो चाडमि याक्लोए याक हाइको इक्को चाडसो सिॽटे़। मो चाड चाहिँ “छुट्कारामि चाड” लुसुजे, मो चाड चामाबेॽ याक्लोए याकमि युडाए चामाबेॽ चासामे याक्लोए याक चोङ्साजि येसुबेॽ लेन्नुङ सिप्सुजि, “छुट्कारा चाडमि भत्तेर हे़ने़ए़ लागि कानिङे़ॽ हाम्बेॽ पोरोक्मे ?” 18येसुडे़ॽ माहाजि लुसुजि, “सहरबेॽए इक्को एप्पा याॽमिमि खिमबेॽ खे़ॽनुङ लुसानुमे, ‘कानिङ्मि गुरुडे़ॽ लुटे़, काङ्मि बेला के़क्पेॽ लेम्बेटे़। का टाङ्बामि चोङ्साजिनुङ हे़ने़ए़ खिमबेॽ छुट्कारामि चाड चामा मिङ्इङे’।” 19मोबा येसुडे़ॽ लुबॽआडोक्नोॽ चोङ्साजि खे़ॽनुङ चाडमि लागि भत्तेर खोजिडे़ॽ पोरोगुजि।
20युडा येसु खोमि बारो जना चोङ्साजिनुङ चासिॽ पेना। 21खोजि चामे़ॽनिङ्सिमाबेॽ येसुडे़ॽ लुसुजि, “चइबानोॽ, हे़निङ लुनिम्ने़ हे़निङ्मि रुम्बाङ इक्कोसे़ॽ का धोका पिये।” 22मो खा खेम्नुङ चोङ्साजिमि बेॽलो निवा टुक्नुङ इक्को इक्को ले़ःॽसाङ चोबे़ॽ येसु सिप्सुजि, “परभु, इमा मो धोका पिघुबा काडे ?” 23मोबा येसुडे़ॽ लुसु, “असे़ॽ कानुङ सोरि थालाबेॽ चरेपा सोक्मे़ॽनिङ्सिन्डुए मोसे़ॽनोॽ का धोका पिये। 24याॽमिमि पसागो खोमि टुम्बेॽ साप्पॽआडोक्नोॽ लिनुङ खे़ॽमानोॽ खे़ये। तर इनामा, याॽमिमि पसा धोका पिघुबा याॽमि, मो याॽमिगो बोरु मे़न्टोक्पॽआहोङ्नोॽ नुडे़।” 25मोबा यहुदाडे़ॽसो सिप्सु, “गुरु, इमा हे़न धोका पिघुबा याॽमि का नोॽटे ?” येसुडे़ॽ खो लुसु, “मोगो आम्टाङ्बे़ॽ लुमे़ॽनिङ्सिन्डुए।”
26खोजि चामे़ॽनिङ्सिमाबेॽ, येसुडे़ॽ चरेपा याङ्मानुङ निवाहाङ ओहाक पिनुङ एडु, मोबा चोङ्साजि पिसाङ लुसुजि, “इगो टाप्नुङ चासानुमे, इगो काङ्मि हिङा ले़ये।”
27मोबा ए़क्साङ अङ्गुरमि खे़वाँनुङ्मा खोरिया ठेॽनुङ निवाहाङ ओहाक पिसु, मोबा खोम चोङ्साजि पिसाङ लुसुजि, “इगोबाङ हे़निङ चोबे़ॽ उक्सानुमे। 28इन्ढोङ्होङ इगो चोङ करारमि के़ए़ हरि ले़ये, इगो बेॽलो याॽमिजिमि पाप वासोक्मामि लागि पिनुङे। 29तर हे़निङ लुनिम्ने़, के़ए़ निवाहाङ पाबामि राज्यबेॽ चोङ लिनुङ फेरि हे़निङ्नुङ चुप्नुङ मे़उङ्लेॽ इगो अङ्गुरमि खे़वाँ उक्सुङ्नि।”
30मोबा इक्को भजन सेम्लुनुङ ए़क्साङ येसु खोम चोङ्साजिनुङ जैतुन टोक्टोक्माराजि खडा।
पत्रुसडे़ॽ लेसुङ्नि लुमे टुम्बेॽ अगमबानि
(मरकुस १४:२७-३१; लुका २२:३१-३४; युहन्ना १३:३६-३८)
31मोबा येसुडे़ॽ चोङ्साजि लुसुजि, “आयु सेन्डा का याःॽयानुङ हे़निङ चिःॽखेन्डानिङे। इन्ढोङ्होङ इडोॽ साप्पॽआ ले़ये,
‘के़ॽ गोठ्ला सेॽएनुङे,
मोबा सामु बगालजि हाम्बेॽको हाम्बेॽ चिःॽखे़म्मे।’
32 “तर का सिबॽआबाङ हिङ्बोक्नुङ हे़निङ्बाङ याक्लो गालिलबेॽ खे़ए़ङे।” 33पत्रुसडे़ॽ मोडोक्पेॽ येसु लुसु, “हे़न राःप्माबेॽ चोप चिःॽखे़ॽमिहोङ्सो का चाहिँ चिखे़ॽङानि।” 34येसुडे़ॽ पत्रुस लुसु, “चइबानोॽ हे़न लुन्ने़, आयु सेन्डानोॽ वापा ओःक्मा याक्लो हे़ने़ॽ का सुमखेॽ लेङानि लुये।” 35पत्रुसडे़ॽ येसु लुसु, “का सिमा सिॽहोङ्सो हे़न लेङानि लुनुङ लुनानि।” हाइखा चोप चोङ्साजिडे़ॽसो मोडोक्नोॽ लुसुजि।
गेतसमनि बगैचाबेॽ येसुमि पारथना
(मरकुस १४:३२-४२; लुका २२:२९-४६)
36मोबा येसु गेतसमनि लुमे बगैचाबेॽ खोमि चोङ्साजिनुङ खडा, मोबा लुसुजि, “हे़निङ इगोबेॽनोॽ पेङ्गिगानिङे, का चाहिँ ए़डे़ॽ मेॽयोङ खे़ॽनुङ पारथना ले़ङे।” 37येसुडे़ॽ जब्दियामि निप्पाङ पसाजिनुङ पत्रुस सोरि चिॽखे़ॽटुजि मोबा येसुडे़ॽ चाहिँ बेॽलो दुःखनुङ खेः आक्सु। 38मोबा येसुडे़ॽ माहाजि लुसुजि, “काङ्मि सोःक्मा बेॽलो सोकपेॽ सिॽइटे़, हे़निङ इगोबेॽनोॽ पेनानिङे, कानुङ जागो पेनानिङे।”
39मोबा येसु चाहिँ ए़डे़ॽ मेॽयोङ खे़ॽनुङ भुइबेॽ उःक्नुङ पारथना ले़ःॽपुगा, “हे काङ्मि पाबा, नुयेहोङ, इगो खेःमि खोरिया काबाङ सेम्बेॽमा ना, तर के़ॽ मिप्पॽआडोॽ ने़ॽनि, हे़ने़ॽ मिप्पॽआ खा पुरा लिरो।”
40मोबा येसु माहा सुम्बाङ चोङ्साजि टुढामबेॽ टेआप्माबेॽ खोजि इम्डिघे़ॽपॽआ चुप्टुजि, खोसे़ॽ पत्रुस लुसु, “इमा हे़निङ काङ्मि लागि इच्छोॽसो मे़इम्लेॽ पेङ्हेसानिङ्ने ? 41जाँचबेॽ मे़सिॽरो लुनुङ जागो पेन्नुङ पारथना ले़टानुमे। चइबानोॽ हे़निङ्मि होङ्निवागो पोरोइटे तर हिङा चाहिँ कमजोर ले़ये।”
42हाइके खेॽसो खो खे़ॽनुङ पारथना ले़टु, “के़ए़ पाबा, के़ॽ इगो दुःखमि कुक्लिक उङ्मानोॽ खे़येहोङ, हे़ने़ॽ मिप्पॽआ खानोॽ पुरा लिरो।” 43मोडोक्पेॽसो खो चोङ्साजिबेॽ टेजामाबेॽ खोजि इम्डिघे़ॽपॽआ चुप्टुजि, इन्ढोङ्होङ खोजि इम्मे़ॽ टुम्मिक टुम्मिक ले़टामि।
44मोबा येसुडे़ॽ माहाजि याःॽयानुङ, फेरि खो याक्लोडोक्नोॽ खे़ॽनुङ, मोडोक्मानोॽ पारथना ले़टु। 45मोबा फेरि येसु चोङ्साजिबेॽ टेजानुङ माहाजि लुसुजि, “हे़निङ हागोरोसो इम्नुङ नाजामे़ॽसिन्डानिङे ? खेप्सानुमे, याॽमिमि पसा पापिजिमि हुकपेॽ सिॽसिपोरोइटे़। 46पुकडानिङे, खडि! खाक्सानुमे का राःप्मे़ॽखुबा के़क्पेॽनोॽ लेम्बेटे़।”
येसु राःप्पॽआ
(मरकुस १४:४३-५०; लुका २२:४७-५३; युहन्ना १८:३-१२)
47येसु यामुमारोनोॽ, खोमि बारो जना एप्पा चोङ्साजिबेॽ यहुदा इस्करियोत लुमे चोङ्सा लेस्सा। खोनुङ एप्पा याडाङ्बाजि, यहुदि डायोङ्बाजिडे़ॽ पाङ्बॽआ याॽमिजिमि बेॽए हुल फेया, टोङ्इरा याङ्मानुङ लेस्सामि। 48येसु राःप्मेॽखुबा यहुदाडे़ॽ इडोॽ खोनुङ लेम्बॽआ याॽमिजि लुबॽआ ले़टे़, “हाम्बे याॽमि के़ॽ मोइ चानुङे, मोनोॽ येसु ले़ये, हे़निङे़ॽ खोनोॽ राःप्मे़।” 49मोबा यहुदा इस्करियोत येसुबेॽ लेन्नुङ लुसु, “हे गुरु, सेवायो!” लुनुङ मोसे़ॽ येसु मोइ चोसु। 50येसुडे़ॽ खो लुसु, “काङ्मि लङ्गाम, हे़न इमाङ ले़ःॽसिॽ लेङ्इटे़, मो ले़ःॽपेसे।” मोबा माहाजि पोम्बेॽ आप्नुङ येसु राःबुजि।
51येसुनुङ टुघुबा चोङ्साजिबेॽए इक्कोसे़ॽ फेया सिपबाङ चाङ्नुङ, चोप्पा एप्पा याडाङ्बामि सेउतेमि ने़ए़क चेम्बेबेॽटु। 52मोबा येसुडे़ॽ खो लुसु, “हे़ने़ए़ फेया सिपपेॽ एन्डे, इन्ढोङ्होङ फेया फे़ॽखुबाजि, फेयाबाङ्नोॽ नासि लिम्मे। 53हे़ने़ॽ इमाङ मिॽइन्डुए, इमा के़ॽ काङ्मि पाबा लुहेसुङ्ने, खोसे़ॽ का जोगबा ले़ःॽसिॽ हागोनोॽ इक्पोङ निच्चि पल्टनबाङ्सो बेॽलो थाङ्सिरिदुतजि पाङ्हेसुनिबा ? 54तर इडोॽ लिहोङ गो, धारमिक नेॽचिराबेॽ इगो खा लिमानोॽ खे़ये लुनुङ साप्पॽआ खा इन्डोक्टे पुरा लिये ?”
55मोडोक्पेॽनोॽ येसुडे़ॽ खो राःप्सिॽ लेम्बॽआ याॽमिजि लुसुजि, “इन्ढोङ हे़निङ फेयानुङ टोङ्इरा याङ्मानुङ का राःप्सिॽ लेङ्इटानिङे, इमा का डाकुडे मिॽइटानिङे ? के़ॽ सानिङ्नोॽ मन्दिरबेॽ सिक्छे इःॽमाबेॽ हे़निङे़ॽ मे़राःबानिङ। 56तर अगमबक्ताजिडे़ॽ धारमिक नेॽचिराबेॽ साप्पॽआ खा पुरा लिरो लुनुङ इघा चोप लिटहा।”
मोबा मोडोक्पेॽनोॽ खोमि चोप चोङ्साजि येसु याःॽयानुङ चिःखडामि।
यहुदिजिमि बेॽए सभामि पोम्बेॽ येसु
(मरकुस १४:५३-६५; लुका २२:५४-५५,६३-७१; युहन्ना १८:१३-१४,१९-२४)
57येसु राःप्खुबाजिडे़ॽ खो चोप्पा एप्पा याडाङ्बा कैयाफामि खिमबेॽ चिॽखे़ॽटुजि। मोबेॽ यहुदि धारमिक नियम इःॽखुबाजिनुङ यहुदि डायोङ्बाजि सुम्बॽआ ले़टामे। 58तर पत्रुस ओबाङ मो चोप्पा एप्पा याडाङ्बामि खिममि पाङ्लुमठोक येसुमि ए़ङ्गुवा ए़ङ्गुवा टिङ्साङ खडा, हागो इमाङ ले़न्डुजे मिॽनुङ खाङ्सिॽ होङ्सिॽयु खे़ॽनुङ मन्दिर हुङ्खुबाजिनुङ पेना। 59हागो एप्पा याडाङ्बाजिनुङ यहुदिजिमि बेॽए सभाबेॽहा याॽमिजिडे़ॽ येसु सेॽनेमामि खोमि बिरोधबेॽ मे़ॽनोक्हा साक्छि योक्पोगुजि। 60मे़ॽनोक्हा साक्छि पिघुबाजि बेॽलो लेस्सामि, तर माहाजिडे़ॽ इक्को परमानसो मे़न्चुप्टुजि। ए़क्साङ निप्पाङ याॽमिजि पोम्बेॽ आप्नुङ इडोॽ लुसाजु, 61“इगो याॽमिडे़ॽ इडोॽ लुटुए, ‘के़ॽ निवाहाङ्मि मन्दिर योबेनुङ सुम याकपेॽ आङ्सेनुङे’।”
62मोबा चोप्पा एप्पा याडाङ्बाडे़ॽ येःप्पोक्नुङ येसु लुसु, “हे़ने़ॽ इमासो लुसुनिहा ? इघा याॽजिडे़ॽ हे़न आप्टिक टिबॽआ खा इमा चइबानोॽटे ?” 63तर येसु योङ उगा, चोप्पा एप्पा याडाङ्बाडे़ॽ येसु लुसु, “हिङ्रिक निवाहाङ्मि निङ्बेॽ किरिया हे़क्नुङ लुसे, इमा हे़न निवाहाङ्मि पसा खिरिस्टडे ?” 64येसुडे़ॽ मो लुसु, “इँहिॽ हे़ने़ॽनोॽ लुबेसु। तरसो हे़निङ लुनिम्ने़, हागोएम्बाङ ए़क्साङ हे़निङे़ॽ याॽमिमि पसा चोप्पा एप्पा सक्तिदाङ्बा निवाहाङ्मि चुप्थिङ्लाम पेम्बॽआ, मोबा नान्द्रुङ्मामि खिम्मिॽवाबेॽ उङ्मे़ॽसिबॽआ खाङ्डोॽइन्डानुमे।”
65मोबा चोप्पा एप्पा याडाङ्बाडे़ॽ टाङ्बामि चेॽ नाःक्नुङ लुसु, “इगोसे़ॽको निवाहाङ सिःक्चोसु। हागो हाइखा बेॽलो आप्टिक टिघुबाजि कानिङ पाप्निबा। हागोनोॽ इगोसे़ॽ निवाहाङ सिःक्चाबॽआ हे़निङे़ॽ खेम्बेसानुम। 66हागो हे़निङ इमाङ कान्डानिङे ?” माहाजिडे़ॽ लुसुजि, “इगो सेॽनेमारोमा ले़ये।” 67मोबा माहाजिडे़ॽ येसुमि नजिकपेॽ चेडुजि, उबुजि, मोबा आढाजिडे़ॽ फे़ःक्साङ इडोॽ लुसुजि, 68“होउ खिरिस्ट, लो अगमबानि ले़टे, हे़न असे़ॽटे मोगे़ ?”
पत्रुसडे़ॽ येसु लेसुङ्नि लुबॽआ
(मरकुस १४:६६-७२; लुका २२:५६-६२; युहन्ना १८:१५-१८,२५-२७)
69मोडोक्पेॽ पत्रुस पाखे़ॽयु पाङ्लुमबेॽ पेम्मे़ॽसिडे़। इक्को सेउतेनि लेन्नुङ पत्रुस लुसु, “हे़नसो गालिलि येसुनुङ टुसे़।” 70तर पत्रुसडे़ॽ मोबेॽहा चोप याॽमिजिमि पोम्बेॽ ने़ॽनि कासाङ मो लुसु, “हे़ने़ॽ इमाङ इःन्डुए, के़ॽ मे़लेसुङ।” 71मोबा पत्रुस पाखे़ॽयु तागराबेॽ लेम्माबेॽ हाइको सेउतेनिडे़ॽ खो खाङ्डोक्टु, मोबा मोसे़ॽ याॽमिजि इडोॽ लुबेॽटुजि, “इगो याॽमिसो येसु नासरिनुङ सोरि टुसे़।”
72पत्रुसडे़ॽ मोबेॽसो किरिया हे़क्साङ लुसु, “के़ॽ आक्को याॽमि लेनोॽ लेसुङ्निबा।”
73ए़डे़ॽ ए़क्साङ मोबेॽ टुघुबा याॽमिडे़ॽसो पत्रुसमि के़क्पेॽ लेन्नुङ लुसुजि, “चइबानोॽ, हे़नसो येसुनुङ राम्घुबाजिबेॽ इक्को ले़ये, इन्ढोङ्होङ हे़न यामुमाबेॽनोॽ गालिलिडोॽ यामुये।” 74मोबा पत्रुसडे़ॽ मो चापहिमा कासोक्पेॽ सिॽलो लुसाङ किरिया हेक्पोगु, “के़ॽ मो याॽमि लेनोॽ लेसुङ्नि।” मोडोॽ कामासोरोक्नोॽ वापा ओगा।
75मोडोक्पेॽरेॽ याक्लो येसुडे़ॽ खो लुबॽआ इगो खा मिॽटोक्टु, “आयु माक्मि वापा ओःक्मा याक्लो हे़ने़ॽ का सुमखेॽ लेङानि लुये।” मोबा खो पाखे़ॽयु खे़ॽनुङ सारोनोॽ हे़क हे़क मिन्साङ हाबा।
Kasalukuyang Napili:
मत्ति 26: YAMP
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023, Wycliffe Bible Translators, Inc. and Nepal Bible Society
