Yohanes 12
12
Maria monuyung minya' harupm ko kaki Yesus pakai' mohormati Sio
(12:1-8)
(Mat. 26:6-13; Mrk. 14:3-9)
1Onam ari sobolupm poraya'an Paskah mula'i, Yesus datakng agi' ko laman Betania, ia'an laman Lazarus inyo udah dipulah Yesus bobali' hidup doi' komatian. 2Di santai ado acara makatn bosamo pakai' mohormati Yesus. Marta pan jumpat molayati boko urakng di santai. Lazarus ado di antaro boko urakng inyo dudu' makatn bosamo agatn Yesus. 3Lalu Maria mombaba' sotongah liter minya' harupm inyo murni. Minya' nantai kotakng mahal apo io monuyungnyo ko kaki Yesus lalu momalit'i inyo agatn rambutnyo. Soluruh rumah nantai monjadi harupm obai minya' harupm nantai.
4Apo Yudas Iskariot, salah siku' murid Yesus, (ia'an io inyo co manah agi' monyorahan Yesus ko boko musuh-Nyo), Yudas bopandir, 5“Mapo minya' harupm nantai kinyo dijual sorogo tigo ratus dinar? Ongko duitnyo ulih dionju' ko boko urakng jaro!” 6(Sobondarnyo, io bopandir ubo nantai bilonyo obai io honda' monulukng urakng jaro, apo obai io pongolit. Io inyo monjujut kantong pakai' duit inyo urakng bukai onju' pakai' polayatan Yesus. Huatan io hala mongolit doi' nantai.)
7Ongko, Yesus bopandir, “Jangan monogur botina' nantai! Io molabuhan nantai pakai' monyiap'an bukakng-Ku pakai' dipasar. 8Urakng jaro hala ado bosamo kaitn, apo Aku kinyo paca'an hala bosamo kaitn.”
Boko imam kopala' ado hajat pakai' mombunuh Lazarus
(12:9-11)
9Banya' urakng Yahudi mondinga' obai Yesus ado di Betania. Ongko, sia' botula' ko su'utn. Sia' co haja' honda' moniant Yesus, apo sia' honda' moniant Lazarus inyo Yesus pulah bobali' hidup doi' komatian. 10-11Obai la'apo inyo tojadi ko Lazarus nantai, banya' urakng Yahudi moninggalan boko imam kopala' ongko pocayo ko Yesus. Obai nantaiam, boko imam kopala' bohajat pakai' mombunuh Lazarus jam.
Yesus dihimpa'i kotakng ramai di kota Yerusalem
(12:12-19)
(Mat. 21:1-11; Mrk. 11:1-11; Luk. 19:28-40)
12Kohobu'annyo, urakng banya' inyo udah datakng pakai' morayaan pogai Paskah, sia' mondinga' borito obai Yesus tongahan dalapm pojalatan monuju Yerusalem. 13Jadi, sia' monguti' boko doutn palem lalu botula' mohimpa'i Sio. Sia' mondongkakng-mondorah,
“Hosana!#12:13: Dalapm Baso Ibrani inyo kuno, kato ‘Hosana’ digunoan pakai' minto tulukng (‘Tuhatn solamat'ancam koi!’) huatan pakai' momuji (‘Topujicam Tuhatn!’) Timpu joman Yesus, kato ni'in monjadi pujian tohadap rajo. Kato ni'in mirip agatn kato ‘dirgahayu’ dalapm Baso Indonesia.
Diborokati Sio inyo datakng dalapm damo Tuhatn Allah!#12:13: Doi' buku Mazmur 118:26
Diborokaticam Rajo urakng Israel!”
14Timpu nantai Yesus mondapat'an siku' koledai muda', lalu noi' ko pucu'nyo. Hal nantai tojadi sosuai agatn lapo inyo udah totulis di dalapm Buku Suci joman komai:
15“Boko urakng Yerusalem.#12:15: Teks sobondarnyo, baso Yunani, momakai kiasan ‘putri Sion.’ (Kota Yerusalem didirian di Bukit Sion.) Jangan gola'!
Porotian! Rajo kaitn datakng dudu' di pucu' siku' koledai muda'!”#12:15: Doi' buku Zakharia 9.9
16(Timpu nantai, boko murid Yesus co mongoroti boko hal nantai. Apo, lopas Yesus dimuliaan molalu'i komatian huatan konoi'an-Nyo ko sorugo, hoyu' sia' mongoroti obai boko hal nian totulis mongona'i Yesus. Sia' mongoroti obai boko hal ni'in inyo sia' pulah ko Yesus, udah sosuai agatn pomandiran nabi nantai.)
17Ado banya' urakng inyo bosamo Yesus timpu Sio mombulah Lazarus bobali' hidup doi' komatian huatan moningkau io koluar doi' dalapm pasaran. Boko urakng inyo moniant nantai torus momboritoan hal nantai ko boko urakng bukai. 18Hal nantaiam mombulah boko urakng datakng mohimpa'i Yesus, obai sia' mondinga' Sio nantaiam mombulah mujisat nantai. 19Ongko boko pomimpitn agama Yahudi doi' kolompok Farisi, sia' bopandir siku'-monyiku', “Kito samo sokali kinyo ulih morarakng sia'. Porotianbo! Somuo urakng botula' tuyut Sio!”#12:19: Boko pomimpitn agama Yahudi udah molawatn Yesus agatn banya' caro (9:22). Apo, sia' kinyo bohasil mohalaki urakng tuyut Yesus.
Yesus mombuka' jalatn kosolamant'an pakai' somuo urakng
(12:20-36)
20Timpu poraya'an Paskah, boko urakng datakng ko Yerusalem honda' monyombah Allah. Di antaro sia' ado boboropo urakng Yunani. 21Boko urakng nantai datakng ko Filipus, murid Yesus inyo boasal doi' kota Betsaida di doerah Galilea. Sia' minto ko io, “Bopai, koi honda' botomu agatn Yesus.”
22Ongko Filipus botula' mongabaran hal nantai ko Andreas. Lopas nantai sia' duo monyampaiannyo ko Yesus. 23Kato Yesus ko sia', “Udah datakam watunyo Ana' Monsio dimuliaan. 24Porotiancam contoh ni'in: aman sobigi' gandupm jatu' ko dalapm tanah, bigi' nantai gola' mati holu sobolupm lantakng monjadi tontanaman.#12:24: Doi' ilmu portanian, watu urakng monugal bonih, ado proses bonih monjadi ‘mati’ di dalapm tanah sobolupmnyo tumbuh monjadi tontanaman. Bonih nantai pocah, kulitnyo lopas, kulitnyo momburu' monjadi sama'an sumber pomakatn pakai' tontanaman inyo paca'an tumbuh nantai. Aman bigi' nantai co mati, io totap sobigi' mo. Apo, aman inyo mati huatan lantakng, inyo paca'an mohasilan banya' buah.#12:24: Ado duo roti di si'itn. 1) Yesus mongatoan Sio gola' mati oca' mombuka' jalatn pakai' banya' urakng disolamant'an, huatan 2) Kito gola' moanggap kohidupan di dunia ni'in mati (kinyo moncintai kohidupan ni'in), oca' kito mondapat'an kohidupan somanah-manahnyo di sorugo (ayat 25). 25Urakng inyo moutamoan kohidupannyo siku', sobondarnyo io co paca'an mondapat'annyo. Apo urakng inyo kinyo moutamoan kohidupannyo siku' di dunia ni'in, io paca'an mongombolonyo pakai' hidup inyo kokal. 26Aman ado urakng inyo honda' molayati-Ku, io gola' tuyut-Ku. Io paca'an ado di tompat inyo samo agatn Aku. Allah Bopai paca'an mohormati sotiap urakng inyo molayati-Ku.
27Watu ni'in, hati-Ku kotakng salu'. Lapo inyo gola' Aku pandiran? ‘Bopai, solamat'an Aku doi' pondorita'an inyo paca'an Kualapi ni'in’? Apo Aku co paca'an momadahan nantai. Obai, ninam ponyobabnyo Aku datakng ko dunia. 28Bopai, muliaancam damo Duatn!”
Ongko ado saro Allah doi' sorugo inyo mongatoan, “Aku udah momuliaan-Nyo. Aku paca'an momuliaan-Nyo agi'!”
29Urakng banya' inyo ado di santai mondinga' saro nantai. Ado inyo bopandir, “Nantai bunyi guntur!” Apo ado jam inyo bopandir, “Nantai saro molekat inyo bopandir agatn Sio.”
30Ongko Yesus bopandir, “Saro nantai kodinga'an bukainyo obai Aku, apo pakai' kaitn oca' ado buti.#12:30: Sama'annyo, doi' ayat 29, boko urakng di santai kinyo mongoroti saro nantai. Apo, nantai monjadi buti ko sia' obai Yesus bondar-bondar diutus Allah. 31Watu ni'in udah gonapam watunyo dunia ni'in dihakipi. Watu ni'in jam, io inyo monguaso'i dunia ni'in, ia'an Rajo Sitatn, paca'an dikalahan. 32Pas Aku diangkat doi' bumi, Aku paca'an mombaba' somuo urakng oca' datakng ko aku.” 33(Yesus momakai kato ‘diangkat doi' bumi’ pakai' momadahan caronyo Sio paca'an mati.)
34Urakng banya' nantai bopandir, “Hukupm Torat mongatoan obai Kristus, Rajo Inyo Dijanjian Allah, paca'an totap hidup kokal. Jadi, sama'an lapo Duatn mongatoan obai Ana' Monsio paca'an diangkat doi' bumi? Sopo Ana' Monsio nantai?”
35Kato Yesus ko sia', “Torakng nantai kinyo manaham ado di antaro kaitn. Jadi, kaitn gola' bojalatn somanahan Torakng nantai totap ado, oca' potakng co monguaso'i kaitn. Urakng inyo bojalatn di dalapm potakng kinyo tohu ko mono io botula'. 36Pocayocam ko Torakng nantai somanah Torakng nantai ado bosamo kaitn. Sama'an nianam, kaitn monjadi boko urakng inyo hidup di dalapm Torakng.” Lopas Yesus bopandir ubo nantai, Sio botula' doi' santai, ongko diapm di tompat inyo kinyo dikotohu'i sia', di mono Sio bodiapm.
Boko urakng Yahudi co pocayo obai Yesus nantai Rajo Inyo Dijanjian Allah
(12:37-43)
37Boko urakng moniant Yesus mombulah banya' mujisat. Apo banya' doi' sia' totap co pocayo ko Sio. 38Nantai oca' tojadi pomandiran nabi Yesaya digonapi. Timpu joman komai io monulis pomandiran ni'inan:
“Tuhatn, sopo inyo pocayo agatn borito inyo koi sampaian?
Ko sopo Duatn monunju'an kuaso Duatn?”#12:38: Doi' buku Yesaya 53:1.
39Obai nantai, sia' co pocayo. Obai, Yesaya pan udah bopandir dinga' ni'in:
40 “Tuhatn udah mombulah mato sia' buto.
Sio udah mombulah hati sia' koras.
Oca' jangan sampai ni'in tojadi: sia' moniant agatn mato,
sia' mongoroti agatn hati,
lalu moninggalan boko dosa sia',
oca', Tuhatn moamputi sia'.”#12:40: Doi' buku Yesaya 6:10.
41Yesaya bopandir sama'an nantai obai io udah moniant komulia'an Yesus. Ongko, io monulis mongona'i Yesus.
42Biar pan ado banya' urakng inyo co pocayo ko Yesus, apo di antaro pomimpitn banso Yahudi, ado banya' jam inyo pocayo. Apo sia' co borani moaku'i nantai agatn torus torakng obai sia' gola' agatn boko urakng Farisi. Sia' co honda' dirarakng sombayakng agi' di dalapm tompat nantai. 43Sia' lobih sonang dihormati boko monsio, daripado dihormati Allah.
Yesus monyosahan boko urakng pakai' pocayo ko Sio oca' kinyo dihukupm watu ahir joman
(12:44-50)
44Lalu Yesus bopandir agatn saro borakng, “Sotiap urakng inyo pocayo ko aku kinyo haja' pocayo ko aku, apo pocayo ko Allah jam inyo udah moutus Aku. 45Sotiap urakng inyo moniant Aku, boroti urakng nantai moniant Allah jam inyo udah moutus Aku. 46Aku udah datakng ko dunia ni'in sobagai torakng oca' somuo urakng inyo pocayo ko aku jangan diapm di dalapm potakng. 47Aku datakng pakai' monyolamant'an urakng, kinyo pakai' mohukupm urakng. Obai nantaiam, aman ado urakng inyo mondinga' ajaran-Ku, apo kinyo monurutinyo, bukainyo Aku mohukupm io. 48Apo, pas ahir joman nononyo, somuo urakng inyo monula' Aku, somuo urakng inyo co mondinga' pomandiran-Ku, sia' paca'an dihukupm. Sia' paca'an dihukupm sosuai agatn ajaran inyo udah Aku sampaian. Pomandiran inyo Aku sampaian monjadi sama'an hakipm inyo mohukupm sia' 49Obai Aku kinyo monyampaian pomandiran doi' kohonda'-Ku siku', apo doi' kohonda' Allah Bopai inyo moutus Aku. Sionam inyo moonji'i porintah ko aku, pomandiran inyo gola' Ku sampaian. 50Aku tohu obai pomandiran-Nyo nantai moonji'i hidup kokal. Nantai sobabnyo Aku mongatoan sosuai agatn pomandiran inyo udah Bopai sampaian ko aku.”
Айни замон обунашуда:
Yohanes 12: TBDS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in