Ñwaè' Maêk 13
13
1Jisòs à ka' ce fʉʉ embe Ndàp Nyʉ̀, mò' efa ŋgǎa yɛ'ni yì buu à laa nè ye enɛ̂, “Ŋwɛ̀ Ryɛ'nì, yɛ àmbò blùr ca ba mndàp ca vi kù'ŋger nà.” 2Awɛ Jisòs à beesì nè ye enɛ̂, “Wɛ̀ yɛ ku' mndap bgòrgòr ca a? Lùr mò' be cu nje ndap ka'. A be kɛ̀ɛshi vi wɛɛwɛ.” 3E du a cu mbe rtùu Olèf, a ce kè' Ndap Nyʉ̀. Awɛ Pità ba Jɛ̂ms, ker ba Jǒn ba Andrù a ku ba a wowèe mbo cà'cà', a bipshi yuu mo' nè ye. 4A m bipshi enɛ̂, “Ŋwɛ̀ Ryɛ'nì, suŋ wèr nfè' ce buu ca be koni. Yuu ce yi be dùŋshi enɛ nfè' ce buu ca be koni à ghɛɛ, yu kɛ?”
5Jisòs à kɛ' a ce suŋ wowèe enɛ̂, “Lor nè nfè' fà dì' ŋwɛ̀ mò' bo' wèe ka'. 6Bèe magòr a be vʉ̀ a mɛ̌ rlii ce làa enɛ̂, a mɛ̀ ye, bo' bèe magòr tɛ a da'. 7Wèe à ka' yu' enɛ a ce mà' bìr, ker yu' à mŋoo enɛ a ce mà' bìr à bdì' mò', mlù mi fa koo wèe ka'. Buu ca vi be kù koni; geewa'a nfè' ŋgòŋ yi be mì à be ghɛɛ ka'. 8To' yi be mà' bìr a to' mo', ŋkʉʉ mò' ma' bìr a mò', tɛ ŋgòŋ yi ci'ti à bdì' mo', tɛ njè koo. Buu ca vi be ba nè bèe àmbò à nfè' ce njeŋwɛ̀ e ke kɛ̀' ce luuti muu nà.
9“Wèe lor nfè', njobè' a be lòr wèe dù àgho à bkansùr, lìp wèe à mndap mloo. A be tɛr wèe njeptii bgovanò ba bkʉʉ njo' mɛ̀, tɛ wèe suŋ wowèe buu kuu mɛ̀. 10Bto' wɛɛwɛ vi tʉr à ryu' Nsuŋ Mbòŋmboŋ entombì. 11A ka' koo wèe ce dù àgho tɛ a bo dù sa' wèe, mlù mi fa koo wèe enɛ wèe be dù làa ba kɛ ka'. Nfè' e ghɛɛ, wèe ku laa yuu ce yi vʉ̀ wèe kù cùu, njobè' ce làa wèe ka', ce làa ba Yʉ' Rara nè wèe. 12Ŋwɛ̀ be lòr nfʉr yì fa tɛ a yʉ, tɛ tar muu fa muu tɛ a yʉ. Boo a be tèe btu nè wâp bta ba wâp mâ, gèe tɛ a yʉshi wowèe. 13Bèe wɛɛwɛ a be kè bàa wèe njo' mɛ̀. Geewa'a ŋwɛ̀ ce e ka' tɛɛ tatap du ba' àlʉ̀simbùu banɛ ŋgàŋ be lùŋ.”
14“Wèe à ka' yɛ yuu bsàrbuu ce yi ce bepsi Ndap Nyʉ̀ (ŋwɛ̀ ce e ce bè' ŋwà' ca rìŋ), banɛ bèe ce a yu à ŋgǒŋ Jùdiyà a caŋ duse à mtùu. 15Ŋwɛ̀ à ka' ba mbe tu ndap, e fa sùu embo à rlòr yuu ka' caŋ ka'. 16Ŋwɛ̀ ce e yu à mŋkʉ̀, e fa kèr kʉti à rlòr yi cɛ̀' ka' caŋ ka'. 17Mlù mi be ba nè bbyèŋge ce a yu nè mmbʉ̀, ba byèŋge ce a ce nyoŋsi boo. 18Wèe loo weenɛ buu ca vi fa koni à cǔu saa ka'. 19Be ba à nfè' anà tɛ ŋgɛ' ba gòr sê, ba ba njɛ̀ɛ ŋgɛ' ce e m be ba ka', kɛ' embe nfè' ce Nyʉ̀ à m gèe ŋgòŋ, ba' sè'ni na, ŋgɛ' mò' be kèr ba wa' ka'. 20Nyʉ̀ à m gèe nfè' ŋgɛ' e ba nlʉ̀'shi. E m tɛ bà gèe wa'a ka', mbʉ̀ ŋwɛ̀ à m ba lùŋ ka'. Nyʉ̀ à m gèe nfè' anà à lʉ'shì wa'a njobè' yì bèe ce e m ce. 21Ŋwɛ̀ à ka' ke laa nè wèe à nfè' anà enɛ̂, ‘Yɛ̂, a Krǎis na’, kɛ̀ enɛ̂, ‘A ye nà’ ɛ̀, wèe fa byemi ka', 22njobè' bèe ce a be bo'shi enɛ a wowèe Krâis, kɛ̀ enɛ a wowèe ŋgǎa ncep ntuu Nyʉ̀ ɛ̀, a be kè nyɛɛ, dùŋshi mncòo kèr gèe buu bghagha' enɛ a bo bo' ka' nè bèe ce Nyʉ̀ à m ce nà-ŋwɛ̀. 23Banɛ wèe lor nfè', njobè' mɛ̀ suŋ wèe buu ca tɛ nfè' ka' ghɛɛ.
24“Be ba à mnòŋ ce ŋgɛ' ca à caa tɛ nyʉ̀ liiti, tɛ ŋwɛɛ yi ker saŋ ka'. 25Mkàŋsì mi be gwèŋger embe bùu, tɛ buu ŋger embe bùu bsìp vi ci'tî. 26Be ba à nfè' anà tɛ bèe a yɛ Muu Ŋwɛ̀ àmbò e ce vʉ̀ mbe mʉ̀ mmbà' embe bùu nè ŋger-ŋwɛ̀, ker ba nè fòo-ŋwɛ̀. 27E be tuu bcìndap à bdì' wɛɛwɛ à mmbuu ŋgòŋ kyèe tɛ a baashi yì bèe ce e m ce nà ŋgʉ̀' mò'sir.
28“Yɛ'ni nè yuu ese ce fik ca: Bfù efa gho vi ke kàrŋger, e ba à nfè' ce yi ka' karŋger, top, wèe riŋ weenɛ nfè' mbèŋ yu àtʉtʉ. 29Wèe à ka' yɛ àmbò buu ca vi ce koni, wèe yi weenɛ Muu Ŋwɛ̀ yu àtʉtʉ sê. 30M ce suŋ wèe nè mini-ŋwɛ̀ mɛnɛ ŋgʉ̀ běe sè'ni be kweŋger wɛɛ tɛ buu ca ka' ba ka'. 31Rbuu ba nshe a be kè mì, geewa'a wa blàa vi be kè mì à nfè' mò' ka'. 32Ŋwɛ̀ yi nòŋ kɛ̀ nfè' ce buu ca vi be koni ka', ka' bcìndap Nyʉ̀ embe bùu, ka' Muu, ku yi Tàr nòŋ ba nfè' anà. 33Lòr nè nfè'! Fa buumi nè ka', njobè' wèe rìŋ nfè' ce buu ca vi be koni ka'. 34Yi yu àmbò ŋwɛ̀ ce e mà'shi li rla' a du ŋkar à to' mo', a ma'shi yì ndap nè yi ŋgǎa mfà' a laa nè ŋwɛ̀ rcìŋ ndap enɛ e ce ke'nî. 35Banɛ wèe fa buumi ka' njobè' wèe rìŋ nfè' ce ŋwɛ̀ ndap be vʉ̀ ka'. Seemò' e be vʉ̀ à mbùuŋkùr, kɛ̀ nè ntee-tʉ', kɛ̀ à nfè' ntooŋgʉp yi toŋ, kɛ̀ à nfè' tʉ̀' à raa ɛ̀. 36E ka' lɛ'si vʉ̂, e fa yɛ wèe à mmirlò ka'. 37Yuu ce m ce làa nè wèe, m ce làa nè bèe wɛɛwɛ. Fa buumi nè ka'.”
Айни замон обунашуда:
Ñwaè' Maêk 13: LNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.