Ñwaè' Maêk 14
14
1Mnòŋ vi m bɛti bbaa tɛ a ka' ye Ŋkǎ' càasi mndap, ba ŋkà' ce a ke ye brɛ̌d ce a lɛ̀ yis njo ka'. Běe bgòrgòr efa ŋgǎa taŋshi taŋshì ba ŋgǎa ryɛ'ni mncir a ce ròo njì tɛ a bo koo Jisòs à bfee, yʉ. 2Wowèe a laa enɛ̂, “Sèe fa koo ye à mʉ̀ ŋkà' ka' njobè' sèe ka' koo ye à mʉ̀ ŋkà', bèe a lo kɛ' ŋgɛ'.”
3Jisòs à m ba à rla' Bɛtanì mbe ndàp mbe Saimʉ̀n ŋwɛ̀ msàasì. A ka' ce ye byee, njeŋwɛ̀ mò' à niŋ nè mʉ njɛ̀ɛ ntʉŋ blùr mò'. Njɛ̀ɛ mgʉr mo' ce mi m ce rʉ̀ʉ bòŋboŋ, a luu ntaa sê, mi ba njo jiŋ. E bʉ' ndoo mʉ ntʉŋ anà a cu'ni mgʉr enjo mbe tu Jisòs. 4Ntee yi yaŋ bèe mo' ce a m ba mbo, wowèe a kɛ' a ce làa a wǎp mʉ enɛ̂, “A jarsi mgʉr ca à cicì njokɛ? 5A ba fyèni mgʉr ca tɛ yi caa btosìn mjèe mtaar tɛ a lor mbàa anà fa nè ŋgǎa fùp.” Wowèe a ka' làa wa'a, a lapni njeŋwɛ̀ ca sê.
6Awɛ Jisòs à laa nè wowèe enɛ̂ “Lɛ̀ nè ye nyaŋ. Wèe ce fa ye ŋgɛ' njokɛ? E gèe ba yuu bòŋboŋ nè mɛ̀. 7Ŋgǎa fùp a be kù ba wèe wowèe à nfè' sìp. Àde' wèe ja' wowèe à nfè' wèe à gwɛɛ. Geewa'a, sèe be ba à nfè' sìp ka'. 8Njeŋwɛ̀ ca à gèe yuu ce yi ghɛɛte à ndèe yi ŋger. E cù'ni mgʉr ca fa mɛ̌ nyòr à rkupshi yà nyor tɛ a ka' tuŋ. 9M ce suŋ wèe nè mini-ŋwɛ̀ enɛ fàdì' wɛɛwɛ ce a ka' ce fè'shi Nsuŋ Mbòŋmboŋ njep ŋgòŋ na, a be suŋ yuu ce njeŋwɛ̀ ca à m gèe nà, kèr ce kuushi ye.”
10Judas Ìskarìyòt ce à m ba mò' efa bèe ncòp-baa-à rrʉ̀ʉ à m dù a yɛ běe bgòrgòr efa ŋgǎa taŋshi taŋshì tɛ e bo fyèni Jisòs nè wowèe. 11Wowèe a yu' rbòŋ nè yuu ce e suŋ wowèe, a ka'ni enɛ a be fa ye mbàa. Judàs à kɛ' a ce ròo nduunjì à rfyèni Jisòs.
12Nòŋ entombì efa Ŋkǎ' ye brɛ̌d ce a lɛ̀ yis njo ka' yi m ghɛɛ. À m ba nòŋ ce a m ce shɛshi bya' ce a be ye ŋkà' àgho. Ŋgǎa yɛ'ni yì buu a bipshi nè ye enɛ̂, “À ce kòŋ enɛ wèr fɛr byee ba fɛ, tɛ à bo ye?” 13E tuu bèe a mmbaa efa wǎp mʉ a laa nè wowèe enɛ̂, “Dù nè à mʉ̀ rla', wèe be bà' tɛ wèe tarte wèe mbaŋrùŋwɛ̀ mò' ce e byɛ̀' ntʉŋ mdip. Dù nè fa yě mbùu, 14e niŋ mbe ndàp, wèe niŋ mbo foŋ, laa nè ŋwɛ̀ ndap enɛ ŋwɛ̀ ryɛ'nì à làa enɛ̂, ‘Dì' ce m be ye Ŋkǎ' càasi mndap wèr ŋgǎa yɛ'ni yà buu wèe yi yû?’ 15Wèe be làa wa'a, tɛ e duŋshi wèe rum ndap mò' ŋgòr mbendù ndap anà, ce a kupshi, a fa buu mbo wɛɛwɛ. Wèe fɛr byee ŋkà' ca mbo.” 16Wowèe a ka' dù, a yɛ buu wɛɛwɛ à ku ba àmbò Jisòs à m suŋ wowèe nà. Wowèe a fɛr byee ŋkà' anà mbo.
17À ka' ba à mbùuŋkùr, Jisòs à vʉ a yì bèe ce ncòp-baa-à-rrʉ̀ʉ. 18Wowèe a ka' cu mbe tɛbùr ce ye byee, Jisòs à laa nè wowèe enɛ̂, “M ce suŋ wèe nè mini-ŋwɛ̀ enɛ mò' efa wèe be fyèni mɛ̀, mò' ce e ce ye byee wèr ye.” 19Wowèe a kɛ' a ce koosimnse, a ce bipshi nè ye mò'sir mò'sir enɛ̂, “Wà' yu mɛ̀ a?” 20Jisòs à beesì nè wowèe enɛ̂, “Mò' efa wèe ce ncòp-baa-à-rrʉ̀ʉ ce e ce cʉ̀' brɛ̌d wèr ye njep kaŋ na, be fyèni mɛ̀. 21Muu Ŋwɛ̀ be kù kwe àmbò Ŋwǎ' Nyʉ̀ yi làa. Ka' yi yu wa'a, ndòo be co' ŋwɛ̀ ce e be fyèni ye. Yi yu àndèe enɛ a m ba bi ŋwɛ̀ anà ka'.”
22Àmbò wowèe a m ce yeŋger anà, e lor brɛ̌d a yoŋshi Nyʉ̀, a bɛ'shi, a fa nè wowèe, a laa enɛ̂, “Kò nè. Ca yu yà nyor.” 23E lor ndoŋ, a ka' yòŋshi Nyʉ̀, a fa nè wowèe, wowèe wɛɛwɛ a nô. 24E laa nè wowèe enɛ̂, “Cena yu wa blɛɛ ce vi kur lě' fi ce vi be fʉʉ, sùu àtu bèe magòr. 25M ce suŋ wèe nè mini-ŋwɛ̀ enɛ m be kèr no mrù' ce a gèe nè mbàŋ ce na ka', caar dù bà' à nfè' ce m be no mǐ mfi mbe dǐ' kʉʉ Nyʉ̀.”
26Wowèe a yop yɛɛ, a natî, a du mbe rtùu Olèf.
27A ka' bà', Jisòs à laa nè wowèe enɛ̂, “Wèe wɛɛwɛ be lò caŋse mà' mɛ̀ àmbò Ŋwǎ' Nyʉ̀ yi làa. Yi làa enɛ̂, ‘M be lìp ŋwɛ̀ ncìŋ njèe tɛ njèe yi da'se.’ 28Ka' yi yu wa'a, m be fʉʉ efa rkwe, du à ŋgǒŋ Galèlê, tɛ wèe vʉ koni mɛ̀ àfo.” 29Pità à laa nè ye enɛ̂, “Bèe ca wɛɛwɛ a ka' ma' wɛ̀, m ma' wɛ̀ ka'.” 30Jisòs à laa nè Pità enɛ̂, “M ce suŋ wɛ̀ nè mini-ŋwɛ̀ enɛ tɛ nduŋgʉp ka' toŋ nètʉ' e ntìni nfè' baa, à be kani ŋkàrà' taar enɛ à rìŋ mɛ̀ ka'.” 31Pità à ku luŋ enɛ̂, “Yi ka' ku ba ba enɛ sò kwe àbee, m kanì ka'.” Wowèe wɛɛwɛ a ku laa wa' foŋ.
32Wowèe a du mbe dì' mo' ce a m ce too enɛ Gɛ̀tsɛmanì. A ka' bà' mbo, Jisòs à laa nè ŋgǎa yɛ'ni yì buu enɛ̂, “Cu nè mbena tɛ m gee rloo.” 33A ka' làa wa'a, a lor Pità ba Jɛ̂ms, ker ba Jǒn, a wowèe a dû. E kɛ' a ce seŋ buu, mlù mi ce koo ye sê. 34E làa nè wowèe enɛ̂, “Ŋkoosimnse ce e yu njep mɛ̌ ntee yu yì ce àde' e ku yʉ mɛ̀. Cu nè mbena ce ke'nî.” 35E lo embo a du à njìsàp ka', a gwe kʉkʉ̀p, a loo nè Nyʉ̀ enɛ yi ka' ba àtɛ̀r e gee tɛ nfè' ŋgɛ' ce e ce vʉ̀ nà caa embe yě tù. 36E loo enɛ̂, “Yà tâ, àde' à gee buu wɛɛwɛ. Gèe tɛ ndoŋ ŋgɛ' ca caa embe mɛ̌ tù. Geewa'a, ke' ba enɛ à gee ba àmbò m ce kòŋ ka', gèe ba àmbò wɛ̀ kòŋ.”
37E ka' kʉti, a yɛ àmbò ŋgǎa yɛ'nì yì buu a ce buumi. E laa nè Pità enɛ̂, “Saimʉ̀n, à ce buumi a? Àde' à ke' ke'sè mʉ tètè ka' a? 38Kè'se nè ce loo fà dì' wèe gwe rmòoshì ka'. Ntee njep rbʉ̀, bsɛ̀ nje nyòr.”
39Jisòs à ker du a ker loo àmbò e ba loo nà. 40E ka' kʉti, a ker yɛ àmbò wowèe a ce buumi, mmirlo mi ku ce dù nè wowèe dù. Wowèe a tʉr yuu ce a laa nè ye ka'. 41E ka' kèr dù kʉti, a laa nè wowèe enɛ̂, “Wèe ku bii buumi a ce lʉ̀shi a? Yi ghɛɛ sè'ni, nfè' à ghɛɛ. A be fa Muu Ŋwɛ̀ mbe mmbo ŋgǎa ŋgèe buu bbebep. 42Lò nè mbekì tɛ sèe dû. Ŋwɛ̀ ce e fyèni mɛ̀ nà yu àtʉtʉ.”
43Jisòs à ka' kù bii mìsi efa cùu, Judàs ce e m ba mò' efa yì bèe ce ncòp-baa-à-rrʉ̀ʉ nà à tosè. E m ba a ku' bèe ce a m tʉr bsà' ba mmbàŋ. Bèe ce a m tuu wowèe à m ba běe bgòrgòr efa mʉ̀ ŋgǎa taŋshi taŋshì, ba ŋgǎa ryɛ'ni mncir, ker ba bleebèe. 44Judàs ce e m fyèni ye nà à m suŋ wowèe wɛɛ enɛ̂, “Ŋwɛ̀ ce m ka' baa nje nyòr banɛ a ye. Koo nè ye du àgho, ke'ni bòŋboŋ fà dì' e caŋ ka'.” 45A ka' vʉ̀, a ko'shi àgee Jisòs, a laa enɛ̂, “Rabài”, a baa ye nje nyòr. 46Bèe anà a koo Jisòs a ba'ni. 47Ŋwɛ̀ mò' efa mʉ̀ bèe ce a m ba a Jisòs à co' sà', a tee tù' ese ŋkwàa ŋwɛ̀ ce e m ba tu nè ŋgǎa taŋshi taŋshì. 48Jisòs à laa nè wowèe enɛ̂, “Wèe à vʉ̀ à rkoo mɛ̀ a tʉr bsà' ba mmbàŋ àmbò m yu lɛ nyɛ̀ɛ wa'a njokɛ? 49To mɛ̀ m ku ce yɛ'ni wèe mbe Ndàp Nyʉ̀ à mnòŋ wɛɛwɛ. Wèe à ke' koo mɛ̀ mbo ka'. Geewa'a, tɛ yuu ce Ŋwǎ' Nyʉ̀ yi làa yi ghɛɛte njo.”
50Bèe ce ncòp-baa-à-rrʉ̀ʉ cà wɛɛwɛ a ma' ye, a caŋse.
51A ka' koo Jisòs ce dù àgho, muu nsùnsù mò' ce e m ku wap ba cɛ̀' à nyòr à ce dù a yě mbùu. Bèe ca a koo ye à cɛ̀', 52e ma'shì nè wowèe a caŋ a du mbùuriŋ.
53A m dù nè Jisòs njeptii ŋwɛ̀ ce e m ba tu nè ŋgǎa taŋshi taŋshì. Běe bgòrgòr efa mʉ̀ ŋgǎa taŋshi taŋshì, ba bleebèe, ker ba ŋgǎa ryɛ'ni mncir, a vʉ àbee. 54Pità à du a yě mbùu a ba yi encàŋ, a du a ba' mbe mambe ŋwɛ̀ ce e m ba tu nè ŋgǎa taŋshi taŋshì. E ka' bà' a cu njepmbè a ce yɛr mor a bèe ce a m ce kè'ni Ndap Nyʉ̀ wèe.
55Běe bgòrgòr efa mʉ̀ ŋgǎa taŋshi taŋshì ba bèe wɛɛwɛ embe kansùr a m ròo bèe tɛ a bo vʉ̀ tɛɛ njìnsa' tɛ a koo Jisòs, yʉ. Geewa'a, a yɛ fàa ka'. 56Ku' bèe a m tɛɛ njìnsa' mnàŋ. Nlàa ŋwɛ̀ yi tartè a yi mò' ka'. 57Bèe mo' a natì mbekì a nya' mnde' enɛ̂, 58“Wèr à m yu' àmbò e ce làa enɛ̂, ‘M be sà'si Ndap Nyʉ̀ ce bèe a bà'ri nè mmbo na, lòr mnǒŋ btaar bà'ri njɛ̀ɛ mò' ce àde' ŋwɛ̀ ba'rì ka'.” ’ 59Ka' yuu ce wowèe a m làa foŋ na yi m tarte a yi mò' ka'. 60Ŋwɛ̀ ce e m ba tu nè ŋgǎa taŋshi taŋshì à natì mbekì a bipshi nè Jisòs enɛ̂, “À tʉr yuu à rbèesi kuu yuu ce bèe ca a ce làa kuu wɛ̀ na ka' a?” 61Jisòs à ku cip, a laa yuu ka'. E ker bipshi nè ye enɛ̂, “A wɛ̀ Krâis, Muu Nyʉ̀ ce wèr ce gʉ'shi nè ye nà a?” 62Jisòs à beesì enɛ̂, “A mɛ̀ ye. Wèe be yɛ Muu Ŋwɛ̀ àmbò e cu à bo mà' Nyʉ̀ ce e tʉr ŋger wɛɛwɛ, kèr yɛ foŋ àmbò e ce sùu à mʉ̀ mmbà'.” 63Ŋwɛ̀ ce e m ba tu nè ŋgǎa taŋshi taŋshì à shashì bcɛ̀' efa nyòr, a laa enɛ̂, “Mbùu mò' ker ba nè sèe à rlàa enɛ ŋwɛ̀ mò' ker laa yuu kuu ŋwɛ̀ ca ka'. 64Wèe à yu' àmbò e bepsi rlii Nyʉ̀. Wèe à làa wee kɛ?” Bèe wɛɛwɛ a laa enɛ a yʉ ye. 65Bèe mo' a kɛ' a ce ce ye nè mce, a cete ye mmir, a tʉshi ye nè bdʉ̀' a laa nè ye enɛ̂, “To' ka' ŋwɛ̀ ce e tʉshi wɛ̀ nè bdʉ̀'.” Bèe ce a m ce kè'ni Ndap Nyʉ̀ a koo ye, a lîp.
66Pità à ku bii njep mambe anà, muunje mò' ce e m ce fà' nè ŋwɛ̀ ce e m ba tu nè ŋgǎa taŋshi taŋshì, 67à vʉ a yɛ Pità àmbò e ce yɛr mor. A fyɛ' ye enɛ ntuŋ, a laa nè ye enɛ̂, “Wɛ̀ m ba wèe Jisòs à rla' Nasarɛ̀t foŋ.” 68Pità à kanì, a laa nè ye enɛ̂, “M rìŋ ye ka'. M rìŋ yuu ce à ce làa anà ka'.” A ka' làa wa'a, a lɛ'si nyor embe mambe a tɛɛ njep mntosì. [E ka' tɛɛ njo, nduŋgʉp à tôŋ.]
69Muunje ca à ker yɛ Pità, a ker laa nè bèe ce a m ba àfo enɛ̂, “Ŋwɛ̀ ca yu mò' efa wowèe.” 70Pità à ker kani. Mʉ nfè' à ka' tuuse, bèe ce a m ba àfo nà a laa nè Pità foŋ enɛ̂, “A wɛ̀ mò' efa wowèe ghup njobè' à yu ŋwɛ̌ à ŋgǒŋ Galèlê.” 71Pità à ye lè', a laa enɛ̂, “M rìŋ ŋwɛ̀ ce wěe làa na ka'.” 72Nduŋgʉp à ker toŋ à nfè' anà. Pità à kuushì yuu ce Jisòs à m suŋ ye enɛ̂, “Tɛ nduŋgʉp ka' toŋ nfè' baa, à be kani enɛ à rìŋ mɛ̀ ka', ŋkàrà' taar nà.” E ka' kuushi wa'a, a bʉ' rwar.
Айни замон обунашуда:
Ñwaè' Maêk 14: LNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.