Ñwaè' Maêk 12
12
1Jisòs à kɛ' a ce suŋ buu nè bèe ca à mŋgàa enɛ̂, “Ŋwɛ̀ mò' à m fà' yi nsuu, a bye njɛ̀ɛ msini ce a ke gèe mrù' àgho, a bee ŋka' a sir nsuu anà àgho, a tuŋ dì' ce a be gèe mrù' mbo, a boo tà'tà' mbo foŋ. A ka' gèe wa'a wɛɛ, a lɛ nsuu anà nè bèe mo', a du à mbè. 2Nfè' ntee msini anà à ka' ghɛɛ, ŋwɛ̀ ca à tuu yì ŋwɛ̀ rfà' mò' enɛ e du yɛ bèe ce e m lɛ̀ nsuu nè wowèe nà, koo msini mi. 3E dû, a ka' bà', bèe anà a koo ye a lîp, e kʉtì mbòmmbo. 4Ŋwɛ̀ nsuu à ker tuu ŋwɛ̀ rfà' mò', wowèe a ker koo a lîp, a to' tu, a koosi ye rìtu. 5E ker tuu mò', wowèe a koo a yʉ, awɛ e ker tuu wèe mo', wowèe a lip wèe mo', a yʉshi wèe mo'. 6E m ku tʉr sè'ni ba ŋwɛ̀ mò'sir à rtuu, ce à m ba muu yì ce e m kòŋ magòr. E m lò a tuu ye àlʉ̀simbùu, a ce kwà'shi enɛ a be yu'ni nè muu yì ca. 7Bèe ce a m lɛ̀ nsuu nè wowèe na, a ka' yɛ ye, a laa fa wǎp mʉ enɛ̂, ‘A ŋwɛ̀ ce e be ye bti' na. Sèe koo yʉ, tɛ vi bti' vi bo ba visèe.’ 8A koo ye a yʉ, a fʉr embe mʉ̀ nsuu, a ma' njepmbè. 9Banɛ yuu ce àde' ŋwɛ̀ nsuu gee nè wowèe yu kɛ? E be vʉ̀ yʉshi wowèe, lɛ̀ nsuu nè běe jɛɛ. 10Wèe à m be be' nlàa Nyʉ̀ ca ka' a? Enɛ̂,
‘Lùr ce ŋgǎa boo mndap a m mà',
à m kʉtì ba lǔr rbuundap.
11Ca à m gèe Tata Nyʉ̀,
à ba yuu bɛ̀ɛ nè sèe.’
12Běe bgòrgòr anà a m ròo à rkoo Jisòs, njobè' wowèe a m yi enɛ e m mà' ŋgàa ca ba nè wowèe. Geewa'a wowèe a m wɛp bèe, a ma'shi Jisòs a duse.
13Wowèe a lo a tuu bèe Farìsi mo' ba bèe vi ŋkʉʉ Hɛròd enɛ a vʉ bipshi buu nè Jisòs tɛ a bo ròo njì ce a be gèe tɛ e ka' fàa nlàa. 14Wowèe a vʉ a laa nè ye enɛ̂, “Ŋwɛ̀ ryɛ'nì, wèr yi wernɛ a wɛ̀ ŋwɛ̀ mini ce wɛ ke lòr ŋwɛ̀ mò' jɛɛ ka'. Wɛ ke yɛ'ni nduunjǐ Nyʉ̀ nè mini-ŋwɛ̀ àmbò yi yu. Suŋ ka nè wèr lɛ̂, ncir yi byemi enɛ sèe ma' mbǎa bàrà' nè ŋkwe Rum kɛ̀ sèe ma' ka'?” 15Jisòs à yɛ taa ce wowèe a ce lè', a bipshi nè wowèe enɛ̂, “Wèe ce mòoshi mɛ̀ njokɛ? Nàa nè mbʉ̀ mbàa ce a ke mà' mbàa àgho.” 16Wowèe a vʉ nè mbʉ̀ mbàa a fa nè ye, e bipshì enɛ̂, “Tu ŋwɛ̀ embo na a yi nda, rlii ce a saŋ mbo na à ba rlii nda?” Wowèe a bèesi nè ye enɛ̂, “Tu embo a yǐ ŋkwe Rûm, rlii embo à ba li foŋ.” 17E laa nè wowèe enɛ̂, “Fa nè buu ŋkʉʉ nè ŋkʉʉ, fa vǐ Nyʉ̀ nè Nyʉ̀.” Wowèe a ba nè rgha'nì-ŋwɛ̀ à ryu' njɛ̀ɛ làa ca.
18Bèe Sadùsi ce a kani enɛ àde' ŋwɛ̀ kwe ker fʉʉ efa rkwe ka' a vʉ a bipshi nè Jisòs enɛ̂, 19“Ŋwɛ̀ ryɛ'nì, Musìs à m saŋ ncir nè sèe enɛ ŋwɛ̀ à ka' lor ŋgwa, a ye a bi boo ka', ŋgàŋ kwe, banɛ nfʉr yì be laasi ye tɛ a ye a bi boo nè nfʉr yì ce e kwe nà. 20Bfʉr mo' a m ba bèe nsàambâ, ŋwɛ̌ nlee à lor ŋgwa, a bi boo a ye ka', a kwe. 21Ŋwɛ̀ embe yě njì à laasì ye, a ke' bi muu a ye ka', a kwe. Ŋwɛ̀ embe njì ŋwɛ̀ embe yě njì à ku gee wa'a foŋ. 22Wowèe bèe nsàamba anà wɛɛwɛ a m bi muu a njeŋwɛ̀ ca ka'. À ka' ba àlʉ̀simbùu njeŋwɛ̀ ca à kwe foŋ. 23Banɛ be kè ba à nfè' ce bèe a fʉʉ efa rkwe, tɛ njeŋwɛ̀ ca ba ŋgwa nda, àmbò yi yu enɛ bfʉr bèe nsàamba ca wɛɛwɛ à m ba bduu vi nà?” 24Jisòs à beesì nè wowèe enɛ̂, “Wèe ce làa wa'a, a ce fàa fàa njobè' wèe yi yuu Ŋwǎ' Nyʉ̀ yi làa ka', a riŋ ŋger Nyʉ̀ foŋ ka'. 25Be kè ba à nfè' ce bèe a fʉʉ efa rkwe tɛ bèe a ker lòr bbyèŋge kɛ̀ gùusi boo ka'; bèe a be kè ba àmbò bcìndap Nyʉ̀ embe bùu. 26À ka' ba yi àmbò bèe ce a kweŋger a be kè fʉʉ efa rkwe, wèe à m be be' embe ŋwà' Musìs embe dì' ce yi ce suŋ àmbò ce ce mor yi m ce kɛti mbo nà ka' a? Nyʉ̀ à m làa mbo nè Musìs enɛ̂, ‘A mɛ̀ Nyʉ̀ Abràhâm, a ba Nyʉ̀ Aisìk, a ker ba Nyʉ̀ Jakòp’ a? 27E yu Nyʉ̀ bgʉ̌ʉ bèe ka', e yu ba Nyʉ̀ bèe ce a cu btèe. Wèe ce fàa sê.”
28Ŋwɛ̀ ryɛ'ni mncir mò' ce e m ce yu'shi àmbò Jisòs ce de' a wèe mo' ca wèe, à yɛ enɛ Jisòs à bèesi buu nè wowèe yɛɛnì sê. E bipshì nè ye enɛ̂, “Ncir ce yi yu kùntombì nè mncir wɛɛwɛ a yì efɛ?” 29Jisòs à beesì nè ye enɛ̂, “Ncir entombì yu ca: ‘Bèe Isrɛ̀l, yu' nè! Yìsèe Tata Nyʉ̀ ku ba mò'sir. 30Banɛ à koŋ Tata ce e yu yò Nyʉ̀ nè yo ntee-ŋwɛ̀, ba nè lo ryòŋ-ŋwɛ̀, ker ba nè wo bfee-ŋwɛ̀ wɛɛwɛ, ker ba nè yo ŋger wɛɛwɛ.’ 31Ncir ce embenjì yi yu enɛ̂: ‘Kòŋ nfʉrò àmbò wɛ̀ kòŋ yò nyor.’ Ncir mo' yi yu ce yi càa bca ka'.” 32Ŋwɛ̀ ryɛ'ni mncir anà à laa nè ye enɛ̂, “Wɛ̀ làa yɛɛnì sê, ŋwɛ̀ ryɛ'nì. Wɛ̀ làa mini wɛnɛ, Nyʉ̀ ku ba mò'sir, mò' ker ba ka', ku ba ye. 33Banɛ ŋwɛ̀ koŋ Nyʉ̀ nè yi ntee wɛɛwɛ, ba nè vi bfee-ŋwɛ̀, ker ba nè yi ŋger wɛɛwɛ, koŋ nfʉr yì foŋ àmbò e kòŋ yì nyor. Yi bòŋ magòr à rlɛ̀ mncir a caa à rgèe btaŋshì ce btòo, ker ba btaŋshì wɛɛwɛ.” 34Jisòs à ka' yɛ enɛ ŋwɛ̀ anà à bèesi nè bfee-ŋwɛ, a laa nè ye enɛ̂, “Wɛ̀ yu njìsàp efa kʉʉ Nyʉ̀ ka'.” Kɛ' embo nà ŋwɛ̀ à ker tʉr cùu à rbipshi yuu nè ye ka'.
35Àmbò Jisòs à m ce yɛ'ni bèe mbe Ndàp Nyʉ̀, e lo a bipshi nè wowèe enɛ̂, “Ŋgǎa ryɛ'ni mncir a làa enɛ Krǎis anà yu muu Dɛvìd à njɛ̌ɛ kɛ? 36Yʉ' Rara yi m gèe Dɛvìd à làa enɛ̂,
‘Tata Nyʉ̀ à m làa nè Tata yà enɛ̂,
“Cu à la rkoo mà' caar tɛ m gee tɛ à tɛr mo mkùu mbendù bèe ce a bàa wɛ̀.” ’
37Dɛvìd ce too ye enɛ Tatâ, banɛ àde' e ker ba muu yì à njɛ̌ɛ kɛ?” Bèe magòr a m lu'shi à ryu' cena.
38Jisòs à ka' ce yɛ'ni bèe, a laa nè wowèe enɛ̂, “Lor nè nfè' nè ŋgèe ŋgǎa ryɛ'ni mncir. Wowèe a kòŋ à ryar mŋgàbʉlà ce kar àgho, ker koŋ enɛ bèe a ce ca'ni wowèe à mntaa. 39Wowèe a niŋ à mndap mloo, koŋ à rcu à mnta' běe bgòrgòr, a bà' à mŋkà', ce ba mnta' bbòŋboŋ. 40Wowèe a ke bo' bbyepbkʉʉ, ye yàp buu wɛɛwɛ, ce gèe mloo msàsap à rdùŋshi bèe enɛ wowèe a rìŋ à rloo sê. Yap ŋgɛ' be kè ba gòr sê.”
41Jisòs à m cu à mbèp dì' ce a m ce fa mbàa mbe Ndàp Nyʉ̀, a ce fyɛ' àmbò bèe a ce lɛ̀ mbàa njep ŋkùp rfa. Ŋgǎa mbàa a m fa mbàa sê. 42Ŋgwaŋkʉŋwɛ̀ ce e m ba ŋwɛ̀ fùp à vʉ a fa mbàa njo baa. Mbàa baa ca yi yu àmbò bfrǎŋ ta wa'a. 43Awɛ Jisòs a kɛ' ŋgǎa yɛ'ni yì buu a laa nè wowèe enɛ̂, “M ce suŋ wee nè mini-ŋwɛ̀ mɛnɛ, ŋgwaŋkʉŋwɛ̀ ce yu ŋwɛ̀ fùp na à fa mbàa a caa bèe wɛɛwɛ ce a fa mbàa njo. 44Bèe ca wɛɛwɛ a gàpni buu mò' efa ku' yàp buu ce a tʉr, a fa rfa àgho, ŋgwaŋkʉŋwɛ̀ ca ce e tʉr yuu ka' à lòr mʉ yuu wɛɛwɛ ce e tʉr à ba yì ce yi ba jà' ye, a fa.”
Айни замон обунашуда:
Ñwaè' Maêk 12: LNT
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.