Yh 10

Linganizyo ya ciŵaya ca mbelele

1“Munthu oloŵa mu ciŵaya ca mbelele cosaloŵela pa mulyango, koma kucitokwelela payakine, uyo ni kawalala na nyankapondo. 2Koma munthu oloŵela pa mulyango niye ciŵeta wa mbelele zala. 3Yeve wala malonda omuvulila. Mbelele zukumvwa lizu yake, nipo oziyita mazina mbelele zake zala, nozifumya. 4Akazifumya mbelele zake zonse, ozitangulila, zeve zumukonkha, cikomo zuziŵa lizu yake. 5Koma mulwendo zingamukonkhelini yayi, zimuwutuke, cikomo zuziŵalini lizu ya mulwendo.”

6Yesu eŵawuzya linganizyo ŵala, koma ŵanthu ŵala aliyomvwishe venzoŵawuzya vala.

7Lomba Yesu elaŵila soti kuti, “Ni vyendi kuti newo nine mulyango wa mbelele.” 8Ayakine wonse ewela newo nikaliyofwika, ni akawalala na anyankapondo, koma mbelele ziliyoŵamvwile. 9Mulyango ni newo. Munthu akaloŵela pa newo, azeapulumuke. Azeawoloŵa nofuma, nipo azefwane vakulya. 10Kawalala oyingowelela kuyiŵa, kupaya noceneka. Koma newo niwelela kuti mbelele zala ziŵe na moyo, moyo wake unyinji.

Yesu niye ciŵeta muweme

11“Newo nine ciŵeta muweme. Ciŵeta muweme otaya moyo wake kuti apulumushe mbelele zake. 12Koma wolembewa nchito tyala akawona mmbulu ukuza, osiya mbelele zala yeve nowutuka. Ocita tetyo pakuti ni ciŵetalini ngaye–ngaye, nipo mbelele ni zakelini yayi. Lomba mmbulu wala ukatapo ziyakine, ziyakine nomwazyikana. 13Wolembewa nchito wala outuka, cikomo oyingokonkha malipilo tyala, nipo oyikakolini nzelu ku mbelele zala. 14Ciŵeta muweme ni newo. Mbelele zangu nuziziŵa, nipo zeve newo zuniziŵa, 15ngani mwakuniziŵila Atata, nane soti niye mwanuziŵila Atata ŵala. Nutayilapo moyo wangu pa mbelele zala.

16“Nili nazo mbelele ziyakine, zililini za mu ciŵaya muno. Izi soti nuwamila kuziŵetela. Zizamvwe malizu ŵangu, nipo pazepaŵe soti mkusi umo na ciŵeta wake soti yumo. 17Atata onitemwa pakuti nutaya moyo wangu, kuti nikawutole soti. 18Paliye munthu anganipoke moyo wangu uyu, koma nuwutwala neka. Nili nazo mphamvu zoutaya moyo wangu, nili nazo soti mphamvu zoutola. Ici niye cecinilamulila kucita Atata.”

19Ŵanthu etatika soti kusushana ŵeka–ŵeka cikomo ca malizu aŵa. 20Anyinji mwa ŵeve enze kuti, “Wakatiwa na viŵanda, nipo wasiluka. Ni cikomo canji mumumvwila soti uyu?”

21Koma ayakine enze kuti, “Malizu ŵamene aŵa ni ŵa munthulini wokatiwa na viŵanda. Kansi viŵanda vingaloleshe mphofu?”

Ayuda okana Yesu

22Ku Yelusalemu kwenze cisangalalo cokumbuka kutwaliwa soti kwa Ngʼanda ya Mulungu. Yenze nsita ya mphepo. 23Yesu enzoziyendela mu Ngʼanda ya Mulungu, mu lukolo yoyitiwa Lukolo ya Solomoni. 24Ŵanthu emuzingilila nomukonsha kuti, “Kansi ukaleke lini kutinyunyumwisha? Keno niwe Mpulumushi Wolayizyiwa wala, tiwuzye momvwika.”

25Yesu elaŵila kuti, “Nikuwuzyani kale, koma mucetekelalini. Nchito zanucita mu zina ya Atata, niye zunicitila umboni. 26Koma mwewo municetekelalini, cikomo mulilini ŵa mu mkusi wa mbelele zangu. 27Mbelele zangu zikumvwa malizu ŵangu. Newo nuziziŵa, nipo zunikonkha. 28Nuzipa moyo wosasila, nipo zutayikalini, paliye munthu watiazeazitole mu manja mwangu. 29Atata enipa mbelele zala opula wonse, nipo paliye angatweshe kuzitola mu manja mwawo. 30Newo na Atata nise ŵamo.”

31Ŵanthu ŵala etola soti myala kuti amuteme nayo. 32Yesu eŵakonsha kuti, “Nakuwoneshani nchito ziweme zinyinji zecinituma Atata. Nga mwa izi nchito zamukuti munitemele myala ni zotyani?”

33Ŵanthu ŵala emuyasuka kuti, “Tupangwalini kukutema myala cikomo ca nchito ziweme yayi, koma cikomo utafulila Mulungu. Wewo, munthu tyala, uziyezya Mulungu.”

34 Yesu elaŵila kuti, “Kansi mu Matetulo mwanu ni mwalalini mwilembewa kuti, Mulungu elaŵila kuti, ‘Nimwe milungu,’ 35Pala malizu ŵa mu Malembo ni ŵa vyendi nsita zonse, nipo Mulungu eŵayita kuti milungu ŵanthu ŵala ŵenzolaŵila nawo. 36Newo Atata enisalula nonituma pano pansi. Lomba mwewo mungalaŵile tyani kuti nutafulila Mulungu, cikomo nalaŵila kuti nine Mwana wa Mulungu? 37Keno nucitalini nchito zecinipa Atata, musanicetekele. 38Koma keno nuzicita cendi, cetekelani nchito zala, cukanga municetekelalini newo. Pamene apo muzemuziŵe mosakayika kuti Atata akuŵa mwa newo, nipo newo nukuŵa mwa Atata.” 39Pamene apo ŵanthu ŵala epangwa soti kumukata, koma yeve ezyeŵa.

40Yesu ewelela soti ku silya kwa mmana wa Yolodani, kwenzobatizila ŵanthu Yohane potatika, nipo eciŵa kwamene kwala. 41Ŵanthu anyinji ewela kwa yeve, nolaŵila kuti, “Yohane aliyocite ciziŵikilo cokanganisha yayi, koma vonse venzolaŵila va munthu wala venze vyendi.” 42Motetyo, ŵanthu anyinji ecetekela mwa Yesu kwala.

ప్రస్తుతం ఎంపిక చేయబడింది:

Yh 10: GMN

హైలైట్

షేర్ చేయి

కాపీ