Yh 9
9
Yesu opozya mphofu
1Penzoyenda Yesu, ewona mphofu yovyalika tetyo. 2Asambili ŵake emukonsha kuti, “Asambizyi, munthu uyu evyalika mphofu cikomo ca macimo ŵa ŵani? Macimo ŵake, keno ŵa avyazi ŵake?”
3Yesu elaŵila kuti, “Uyu munthu ni mphofulini cikomo ca macimo ŵake, keno ŵa avyazi ŵake yayi. Koma, cikomo ca umphofu wake, Mulungu awoneshe nchito zake mwa yeve. 4Kukali mzuŵa, tikokata nchito za Atata enituma. Usiku ukaza, munthu angatweshelini kuseŵenza. 5Panikali pano pansi, nine kuŵala kosanikila ŵanthu wonse.”
6Pecilaŵila ivi, Yesu ethunyila mata pansi, nokanda lito na mata ŵala. Nipo ezoleka matika ŵala mu menso mwa wala munthu, 7nomuwuzya kuti, “Nkhoya, ukasambe mu tenga ya Siloamu.” (Tanthauzo ya Siloamu niye kuti, Nthumi.) Munthu wala eluta cendi, nakuyosamba, nakuya kwawo ololesha.
8Pamene apo ayake na ŵanthu ŵamene kale enzomuwona osenga–senga elaŵila kuti, “Kansi uyu ni walalini enzonkhala pansi apa noyingosenga?”
9Ayakine elaŵila kuti, “Ni wamene.”
Ayakine enze kuti, “Yayi, akungopalana naye.”
Koma mwine wake wala elaŵila kuti, “Yayi cendi, ni newo.”
10Ŵanthu ŵala emukonsha kuti, “Nga menso ŵako ololesha tyani?”
11Yeve elaŵila kuti, “Munthu ŵala wakuti Yesu ekanda matika nozoleka mu menso mwangu umu. Noniwuzya kuti, ‘Nkhoya, ukasambe mu Siloamu.’ Niluta cendi, nipo penisamba, nitatika kulolesha.”
12Ŵanthu ŵala emukonsha kuti, “Nga yeve ali kuni?”
Munthu wala elaŵila kuti, “Kaya, nuziŵalini.”
Afalisi okonsheshesha munthu wopozyewa wala
13Ŵanthu ayakine enzopangwa kuti munthu wala enze mphofu alute naye kuyowona Afalisi. 14Nsiku yecikanda matika nomupozya nawo yenze ya Sabata. 15Tetyo, Afalisi nawo soti emukonsha munthu wala kuti, “Nga wewo, walolesha tyani?”
Yeve eŵawuzya kuti, “Enizoleka matika mu menso mwangu, newo nakuyosamba nipo lomba nulolesha.”
16Afalisi ayakine elaŵila kuti, “Munthu wamene wala ofumilalini kwa Mulungu, cikomo okonkhalini tetulo yokumya nsiku ya Sabata.”
Koma ayakine elaŵila kuti, “Munthu wocimwa angocita viziŵikilo vokanganisha voteti?” Tetyo, kwenze kusushana.
17Lomba Afalisi emukonsha soti munthu wala enzololalini, elaŵila kuti, “Kansi wewo ukuti vinji va uyu munthu, mwawakucilishila?”
Yeve elaŵila kuti, “Ni mneneli mphela.”
18Ayuda aliyocetekele kuti uyu munthu ololesha lomba enze mphofu kale, mpaka peciyita avyazi ŵake. 19Lomba eŵakonsha kuti, “Kansi mwewo, uyu ni mwana wanu? Niye kuti evyalika cendi mphofu? Nga lomba caŵatyani kuti ololesha?”
20Avyazi ŵake elaŵila kuti, “Catuziŵa sewo ni cakuti uyu ni mwana wasu, nipo evyalika cendi wosalola. 21Koma kuti lomba olola, tuziŵalini mwavacitikila. Vakuti wamupozya ni ŵani kaya, sewo tuziŵalini soti. Mukonsheni mwine wake; uyu ni mkulu akonkholole yeka.” 22Avyazi ŵake ŵala elaŵila tetyo cikomo enzoyopa Akulu ŵa Ayuda. Pakuti Ayuda enzeepangana kale kuti, munthu akazomelezya kuti Yesu niye Mpulumushi Wolayizyiwa wala, azeamutende mu mpingo. 23Ni cikomo cake avyazi ŵake ŵala elaŵila kuti, “Ni mkulu, mukonsheni mwine wake uyu.”
24Pamene apo Ayuda ŵala emuyita ka ciŵili munthu wala enzololalini kale, nomuwuzya kuti, “Ulape pa menso pa Mulungu kuti ulaŵile vyendi. Sewo tuziŵa kuti munthu wala ekupozya ni wocimwa.”
25Yeve elaŵila kuti, “Vakuti yeve ni wocimwa, newo nuziŵalini. Cinthu cimo ceka canuziŵa ni cakuti: Kale nenze wosalola, koma lomba nulola.”
26Ŵeve emukonsha kuti, “Kansi ecita vinji kuti uloleshe?”
27Yeve elaŵila kuti, “Nakuwuzyani kale, koma musamalakolini. Ni cikomo canji mupangwa kuvimvwa soti? Keno namwe soti mupangwa kuŵa asambili wake ŵati?”
28Pamene apo etatika kumulaŵilila viyipa, elaŵila kuti, “Msambili ŵake ni wamene wewo. Sewo nise asambili ŵa Mose. 29Tuziŵa kuti Mulungu elaŵila na Mose, koma uyu tuziŵalini kwawafumila.”
30Munthu wala elaŵila kuti, “Pakukanganishani ni pamene apa; kuti mwewo muziŵalini kwakufumila, koma wanipozya. 31Tuziŵa kuti Mulungu omvwilalini ŵanthu wocimwa. Koma munthu akasamala va Mulungu nocita vakupangwa Mulungu, naye Mulungu omumvwila. 32Na kale kumo tikaliyomvwapo kuti muyakine wapozya mphofu. 33Munthu uyo kuti aliyofumile kwa Mulungu, sembe aliyotweshe kucita kanthu.”
34Ŵeve elaŵila kuti, “Wewo wivyalikila mu macimo ŵeka–ŵeka. Niye kuti wewo ungatisambizye sewo?” Pecilaŵila tetyo, emufumyila panja nomutenda mu mpingo.
Kusalolesha kwa mu mtima
35Yesu ecimvwa kuti Ayuda amufumya nomutenda mu mpingo wala munthu. Lomba pecimufwana, emukonsha kuti, “Kansi ucetekela mu Mwana wa Munthu?”
36Yeve elaŵila kuti, “Asikulu, muniwuzyeko ni ŵani wamene uyo, kuti nicetekele mwa yeve.”
37Yesu emuwuzya kuti, “Wamuwona kale, ni wamene olaŵila nawe.”
38Yeve elaŵila kuti, “Asikulu, nucetekela.” Pecicita tetyo emufukamila nomulambila.
39Lomba Yesu elaŵila kuti, “Niwela pano pansi kuzopingula, kuti wosalola alole, nipo ŵala olola aŵe mphofu.”
40Afalisi ayakine enze pafupi naye, pecimvwa ivi emukonsha kuti, “Kansi nga sewo nase nise mphofu?”
41Yesu elaŵila kuti, “Kuti mwenze mphofu, sembe muliye mlandu. Koma cikomo mukuti, ‘Tulolesha,’ niye kuti mukali mu macimo ŵanu.”
ప్రస్తుతం ఎంపిక చేయబడింది:
Yh 9: GMN
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Nsenga New Testament © The Bible Society of Zambia, 2015.
