Yh 8

Mwanakazi wa ucende

1Koma Yesu eluta ku Lupili ya Olivi.

2Mmamawa ewela soti ku Ngʼanda ya Mulungu. Ŵanthu wonse ewela kwa yeve, yeve enkhala pansi notatika kuŵasambizya. 3Asambizyi ŵa Matetulo na Afalisi ewela na mwanakazi wecikata ucende, emunkhazika pakati pawo. 4Lomba ewuzya Yesu kuti, “Asambizyi, uyu mwanakazi wakatiwa ucende. 5Pala mu buku ya Matetulo, Mose etilamulila kuti munthu woteti tiwomupaya pa kumutema myala. Nga mwewo mukuti tyani pamene apa?” 6Emukonsha kuti atape Yesu mu kamwa. Koma Yesu eŵelama, notatika kulemba pansi na cikumo cake.

7Pakuti ŵeve epitilizya kumukonsha, Yesu eŵelamuka noŵawuzya kuti, “Pakati panu wala akaliyocimwapo, atatike ni yeve kumutema mwala mwanakazi uyu.” 8Pecicita tetyo, eŵelama soti nopitilizya kulemba pansi. 9Koma ŵeve pecimvwa ivi, etatika kufumapo yumo–yumo, kutatikila akulu–akulu. Yesu esala yeka, na mwanakazi ali peneme pala.

10Yesu eŵelamuka nomukonsha kuti, “Wewo mwanakazi, ali kuni ŵanthu ŵala? Kansi paliye cukanga yumo wakupa mlandu?”

11Mwanakazi wala elaŵila kuti, “Eee Asikulu, paliye.”

Lomba Yesu emuwuzya kuti, “Nane soti nukupalini mlandu. Nkhoya, koma kutatikila lomba kosati ukacimwe soti.”]

Yesu niye kuŵala kosanikila ŵanthu wonse

12Pa vuli pake Yesu elaŵila soti kuti, “Newo nine kuŵala kosanikila ŵanthu wonse. Munthu wokonkha newo, azeayendelini mu mfinzi, koma azeaŵe na kuŵala kotangulila ŵanthu ku moyo wa cendi.”

13Pamene apo Afalisi emuwuzya kuti, “Uzicitila weka umboni. Umboni wako uyo ni wosakwanila.”

14Yesu elaŵila kuti, “Cukanga kuti nuzicitila neka umboni, umboni wangu ni wa vyendi, pakuti nuziŵa kwenifumila, nipo soti nakwamene kwanukuya. Koma mwewo muziŵalini kwenifumila, keno soti kwanukuya. 15Mwewo mupingula pokonkha malingililo ŵa ŵanthu tyala. Newo nupingulalini munthu aliyense. 16Koma nikatinipingule, nupingula molungama, pakuti nililini neka yayi, Atata enituma ali nane pamo. 17Nipo mu Matetulo ŵanu mwilembewa kuti umboni wa ŵanthu aŵili ni wokwanila. 18Newo nuzicitila neka umboni, nawo soti Atata enituma onicitila umboni.”

19Pamene apo ŵeve emukonsha kuti, “Awusu wako ali kuni?”

Yesu elaŵila kuti, “Newo muniziŵalini, Atata soti muŵaziŵalini. Kuti mwiniziŵa, sembe mwiŵaziŵa soti Atata.”

20Yesu enzolaŵila malizu aŵa penzosambizya mu Ngʼanda ya Mulungu, mu cipinda copokelelamo nsembe za ŵanthu. Koma paliye emumanga, cikomo nsita yake yenzeikaliyokwana.

21Pa vuli pake Yesu eŵawuzya soti Akulu ŵa Ayuda kuti, “Newo nikuya. Muzemunisakile, koma muzemufwile mu macimo ŵanu. Kwanukuya newo, mwewo mungatweshelini kufwikako.”

22Pamene apo Akulu ŵa Ayuda elaŵila kuti, “Kansi opangwa kuyolipaya, pakulaŵila kuti, ‘Kwanukuya newo, mwewo mungatweshelini kufwikako?’”

23Yesu eŵawuzya kuti, “Mwewo nimwe ofumila pano pansi, newo nine ofumila Kululu. Mwewo nimwe ŵa calo cino ca pansi, ninelini wa calo cino ca pansi, yayi. 24Ni cikomo cake nakuwuzyani kuti mufwile macimo ŵanu. Pakuti keno mucetekelalini kuti ‘Newo nine Nilipo,’ mufwile cendi mu macimo ŵanu.”

25Pamene apo ŵeve emukonsha kuti, “Wewo niwe ŵani?”

Yesu elaŵila kuti, “Nine wenekuwuzyani potatika. 26Nili na vinyinji vakuti nilaŵile va mwewo, nipo soti vakuti ningampeni navo mlandu. Koma enituma ni wa vyendi, nipo nuwuzya ŵanthu ŵa pano pansi yeve veciniwuzya.” 27Ŵanthu ŵala aliyoziŵe kuti Yesu olaŵila va Awisi. 28Tetyo, Yesu eŵawuzya kuti, “Mukazopanyika Mwana wa Munthu, pamene apo muzeziŵe kuti newo nine wanulaŵila kuti ni newo. Muzeziŵe soti kuti nucitalini kanthu pa neka, nulaŵila vecinisambizya Atata. 29Nipo enituma, ali nane pamo. Yeve aliyonisiye neka, cikomo nsita zonse nucita vumutemwesha.”

30Yesu penzolaŵila ivi, ŵanthu anyinji ecetekela mwa yeve.

Vyendi ngavo–ngavo vakupa ufulu

31Yesu ewuzya ŵanthu emucetekela ŵala kuti, “Keno muteya matu ku malizu ŵangu nsita zonse, niye kuti nimwe cendi asambili ŵangu. 32Muzeziŵe vyendi ngavo–ngavo, nipo vyendi vala vizekuyalusheni ŵa ufulu.”

33Ŵeve elaŵila kuti, “Sewo nise ŵana ŵa Abulahamu, nipo cinkhalile casu tikaliyoŵapo ŵazya ŵa aliyense. Nga cikomo ni cinji ukuti, ‘Muzeyaluke ŵa ufulu?’”

34Yesu eŵayasuka kuti, “Aliyense ocita ucimo ni muzya cendi wa ucimo wala. 35Muzya akuŵalini nawo mu banja nsita zonse, koma mwana niye akuŵa nawo. 36Keno lomba Mwana wakumangululani, muŵe cendi ŵa ufulu. 37Nuziŵa kuti nimwe ŵana ŵa Abulahamu, koma mupangwa kunipaya, cikomo muzomelezyalini malizu ŵangu mu mitima mwanu. 38Newo nulaŵila vaniwona kwa Atata, koma mwewo mucita vamwicimvwa kwa awusu ŵanu.”

39Ŵeve elaŵila kuti, “Sewo awusu wasu ni Abulahamu.”

Yesu eŵawuzya kuti, “Kuti mwenze ŵana ŵa Abulahamu, sembe mucita venzocita Abulahamu wala. 40Koma lomba mupangwa kunipaya newo, nakuwuzyani vyendi venicimvwa kwa Mulungu. Abulahamu aliyocite voteti. 41Koma mwewo mucita venzocita awusu wanu.”

Ŵeve emuwuzya kuti, “Sewo nise ŵana cendi ŵa Abulahamu. Tili na Awusu wasu ŵamo ŵeka, niye Mulungu.”

42Yesu elaŵila kuti, “Kuti Mulungu ni Awusu wanu cendi, sembe mwinitemwa nane cikomo nifumila kwa Mulungu, nipo lomba nili kuno. Niliyowele na ulamulilo wangu neka yayi, koma yeve ecitonituma. 43Kansi ni cikomo canji mumvwishalini vanulaŵila? Cikomo cake ni cakuti mutemwalini kumvwa malizu ŵangu. 44Mwewo nimwe ŵana ŵa Satana. Yeve niye awusu ŵanu, nipo mupangwa kucita vakupangwa ngako awusu wanu. Yeve wala kankhalilo ni wopaya ŵanthu. Aliyonkhazikike mu vyendi, cikomo mwa yeve muliye vyendi. Kulaŵila wenye niye unkhalo wake, pakuti ni wa wenye, ni wisi wa wenye. 45Koma newo nulaŵila vyendi, ni cikomo cake municetekelalini. 46Kansi ni ŵani mwa mwewo anganicimfye kuti nine woyifya mu nkhani iyi? Keno nulaŵila vyendi, mulekela vinji kunicetekela? 47Munthu wofuma kwa Mulungu oteya kwatu ku Malizu ŵa Mulungu. Koma mwewo mufumilalini kwa Mulungu yayi, ni cikomo cake muteyalini matu.”

Yesu olilinganizya na Abulahamu

48Ayuda ŵala poyasuka Yesu, elaŵila kuti, “Kansi sewo tulaŵilalini vyendi kuti wewo niwe Msamaliya, nipo kuti niwe wokatiwa na viŵanda?”

49Yesu elaŵila kuti, “Newo niliyokatiwe na viŵanda. Nucinzika Atata, koma mwewo municinzikalini. 50Nipo newo nulisakililalini mcinzi. Alipo muyakine onisakilila mcinzi, niye opingula. 51Aliyense omvwisha malizu ŵangu azeafwelini cendi.”

52Ayuda ŵala emuwuzya kuti, “Koma lomba taziŵa kuti niwe wokatiwa na viŵanda. Abulahamu emwalila, aneneli nawo soti emwalila. Niye wewo ukuti, ‘Munthu akamvwila malizu ŵangu azeafwelini!’ 53Nga wewo ungapule awusu wasu Abulahamu emwalila? Aneneli soti emwalila. Kansi uliyesa kuti niwe ŵani?”

54Yesu elaŵila kuti, “Nikazicinzika neka, mcinzi wangu ni wa tyala–tyala. Alipo onicinzika. Ŵamene awo niye Atata, ŵamukuti ni Mulungu wanu. 55Mwewo muliyoŵaziwe, koma newo nuŵaziŵa, kuti nilaŵila kuti nuŵaziŵalini sembe nine wa wenye ngani mwewo. Koma nuŵaziŵa, nipo nuŵamvwila malizu ŵawo. 56Awusu wanu Abulahamu esekelela polindila kuti azeawone nsiku yowela kwangu. Elindila cendi notemwa.” 57Pamene apo Ayuda emukonsha kuti, “Ukaliyokumana vyaka makumi asanu kumo, niye kuti wiwona Abulahamu?”

58Yesu elaŵila kuti, “Nulaŵilisha cendi kuti Abulahamu penzeakaliyovyalika, ‘Newo nine Nilipo.’”

59Pamene apo, Ayuda ŵala etatika kutola myala kuti amuteme nayo. Koma Yesu ezyeŵa nofuma mu Ngʼanda ya Mulungu.

ప్రస్తుతం ఎంపిక చేయబడింది:

Yh 8: GMN

హైలైట్

షేర్ చేయి

కాపీ