Yh 7

Enekwawo ŵa Yesu aliyomucetekele

1Pa vuli pake, Yesu eyenda–yenda mu calo ca Galileya, kuŵa kutali na ku Yudeya cikomo Ayuda kwala enzolindila kumupaya. 2Nsita yamene iyo Cisangalalo ca Misasa cenze pafupi, 3enekwawo ŵa Yesu elaŵila kuti kwa yeve, “Muwamila kufumako kuno mwakuya ku Yudeya, kuti ŵala omukonkhani akawone vokanganisha vamucita. 4Munthu opangwa kuziŵika ngako na ŵanthu ocitalini vinthu mofisika. Pakuti mucita ivi vinthu, ziwonesheni ku ŵanthu wonse.” 5(Niye kuti cukanga enekwawo enzeve cicetekelo mwa yeve.)

6Tetyo, Yesu eŵawuzya kuti, “Nsita yangu ikaliyokumana, koma kwa mwewo ni nsita iliyonse. 7Ŵanthu ŵa pa calo angamutinkhenilini, koma otinkha newo cikomo nuŵasimikizyila kuti vakucita ni viyipa. 8Mwewo nkhoyani ku cisangalalo lomba. Newo nikuyalini lomba ku cisangalalo ici, cikomo nsita yangu iweme ikaliyokumana.” 9Yesu pecilaŵila ivi esalila mu Galileya.

Yesu akuya ku Cisangalalo ca Misasa

10Koma peciluta enekwawo ku Cisangalalo ca Misasa, Yesu naye soti elutako. Aliyolute mowonekela, koma mofisika. 11Akulu ŵa Ayuda enzomusakila kuti, “Kansi wamene wala ali kuni?”

12Nipo penze vongʼungʼunzila vinyinji va yeve pakati pa winji wa ŵanthu. Ayakine enzolaŵila kuti, “Ni munthu muweme.” Koma ayakine enze kuti, “Yayi, oyingotalizya ŵanthu wenye uyu.” 13Koma penzeve munthu olaŵila patuŵa va yeve, cikomo coyopa Akulu ŵa Ayuda.

14Cisangalalo cala pecenze pakati, Yesu eloŵa mu Ngʼanda ya Mulungu notatika kusambizya. 15Akulu ŵa Ayuda ekanganishiwa elaŵila kuti, “Ni tyani munthu uyu ali na nzelu zoteti, koma aliye nosambile kumo?”

16Yesu elaŵila kuti, “Vanusambizya ni vangulini yayi, ni va wala enituma.” 17Aliyense opangwa kucita kupangwa kwa Mulungu, azeaziŵe keno vanulaŵila vufumila kwa Mulungu, keno kwa newo neka. 18Wala oyingolaŵila va yeka olipangwila yeka mcinzi. Koma wala opangwila mcinzi wala emutuma, uyo niye wa vyendi, nipo mu mtima mwake muliye wenye. 19Kansi ni walalini Mose ekupani Matetulo? Koma paliye na yumo kumo mwa mwewo oŵakonkha. Nga mupangwilanji kunipaya?

20Koma winji wa ŵanthu wimuyasuka kuti, “Wakatiwa na ciŵanda wewo. Opangwa kukupaya ni ŵani?”

21Yesu elaŵila kuti, “Niyingocita ciziŵikilo cimo tyala monse mwikanganishiwa. 22Koma mwewo musilimula ŵana ŵanu analume pa Sabata, ngani Mose mwecikulamulilani kucita (cukanga uyu mwambo uliyofume kwa Mose koma ku makolo ŵasu). 23Mwana uyo mumusilimula pa Sabata, kuyopa kuti Tetulo ya Mose ingafwayiwe. Ni cikomo canji muyipilwa na newo cikomo nipozya munthu wamsuma pa nsiku ya Sabata? 24Osapingula powona mawonekelo tyala, koma muwopingula molungama.”

Yesu niye cendi Mpulumushi Wolayizyiwa wala

25Pamene apo ŵanthu ayakine ŵa ku Yelusalemu elaŵila kuti, “Kansi munthu wakupangwa kupaya wala ni uyulini? 26Uyu olaŵila patuŵa paliye na yumo olaŵilapo kanthu kalikonse! Kansi niye kuti akulu–akulu oziŵa kuti uyu niye Mpulumushi wala ŵati? 27Koma Mpulumushi Wolayizyiwa wala akayowela, paliye ŵatiazeaziŵe kwawafumila. Koma uyu tonse tuziŵa kwecifumila.”

28Yesu penzosambizya mu Ngʼanda ya Mulungu enzolaŵila moŵilikizya malizu kuti, “Mulingilila kuti muniziŵa newo, na kwenifuma muziŵako soti. Koma niliyowele pa newo neka yayi. Atata ali wocetekeleka niye enituma, koma mwewo muŵaziŵalini. 29Koma newo nuŵaziŵa, cikomo nine ofumila kwa ŵeve, nipo ni ŵeve enituma.”

30Pamene apo epangwa kumukata Yesu, koma penzeve na yumo emukumya, cikomo nsita yake yenzeyikaliyofwika. 31Koma ŵanthu anyinji ecetekela mwa yeve, nipo enze kuti, “Kansi akayowela Mpulumushi Wolayizyiwa wala, azecite viziŵikilo vokanganisha vopula vawacita uyu munthu?”

Afalisi otuma asilikali kuzokata Yesu

32Afalisi ecimvwa kuŵelekesha kwa winji wa ŵanthu olaŵila va Yesu. Lomba ŵeve pamo na Akulu ŵa Ansembe etuma asilikali ku Ngʼanda ya Mulungu kuti amukate. 33Apo Yesu elaŵila kuti, “Nikali namwe pa kansita katontho panikaliyokuya kwa Atata enituma. 34Mukanisakile–sakile, koma muzenifwanelini. Nipo kwanitinikaŵe newo, mwewo mungatweshelini kufwikako.”

35Pamene apo Akulu ŵa Ayuda ŵala etatika kukonshana kuti, “Kansi uyu opangwa kuya kuni kwatingamufwanelini sewo?” Kansi opangwa kuya kwa enekwasu emwazyikana ku ŵanthu ŵa mitundu iyakine? Keno kuti opangwa kuyosambizya ŵanthu ŵa kunja? 36Otanthauza kuti tyani polaŵila kuti, “Muzenisakile–sakile koma muzenifwanelini,” nipo soti kuti “Kwanitinikonkhala newo, mwewo mungazofwikakolini.”

Mimana ya manzi yukupa moyo

37Nsiku yosilizya ya cisangalalo cala yenze ikulu. Pa nsiku yala, Yesu epanama nolaŵila moŵilikizya kuti, “Keno pali munthu ali na njota, awele kwa newo kuti azamwe. 38Pala Malembo olaŵila kuti, munthu wocetekela mwa newo, mtima wake uzaŵe ngani mimana ya manzi yukupa moyo.” 39(Potetyo Yesu enzolaŵila va Mzimu Mtuŵa watiazepewe ku ŵanthu wocetekela mwa yeve. Koma mzimu enzeakaliyopewa, cikomo Yesu enzeakaliyopokela ulemelelo wake.)

Ŵanthu oyaŵikana

40Winji wa ŵanthu pewicimvwa malizu aŵa, ayakine mwa ŵeve enze kuti, “Ni vyendi munthu uyu niye mneneli wala.”

41Ayakine enze kuti, “Uyu niye Kristu, Mpulumushi Wolayizyiwa wala.”

Koma ayakine enze kuti, “Kansi Mpulumushi uyu angafume ku Galileya? 42Ni palalini Malembo olaŵila kuti, akafumile ku luko ya mfumu Davide, ku munzi wa Betelehemu kwenzonkhala Davide?”

43Tetyo, winji wa ŵanthu wiyaŵanikana cikomo ca yeve. 44Ayakine enzopangwa kumukata, koma penzeve emukumya.

Akulu ŵa Ayuda ocetekelalini mwa Yesu

45Asilikali ŵa ku Ngʼanda ya Mulungu ŵala ewelela kwa Akulu ŵa Ansembe na kwa Afalisi ŵala. Ŵeve ekonsha asilikali ŵala kuti, “Ni cikomo canji muliyowele naye?”

46Asilikali ŵala eyasuka kuti, “Vakulaŵila uyu munthu vikaliyolaŵilikapo kufumila kale.”

47Pamene apo Afalisi elaŵila kuti, “Niye kuti namwe soti wakutalizyani wenye? 48Kansi mwimvwako pakati pa akulu–akulu keno pakati pa Afalisi ocetekela mwa yeve? 49Koma ŵanthu wamba oziŵalini Matetulo ŵa Mose; ni woshamikiwa mphela!”

50Lomba Nikodimo, yumo wa Afalisi, yeve elutako kale kwa Yesu, ekonsha ayake ŵala kuti, 51“Kansi Matetulo ŵasu otizomezya kupingula munthu tikaliyokumvwa malizu ŵake kuti tiziŵe vawacita?”

52Ŵeve elaŵila kuti, “Kansi nawe niwe wa ku Galileya? Nkhoya ukasakile mu Malembo nipo ukawone kuti paliye mneneli ofumila ku Galileya.” 53[Apa wonse ezyokela kwawo.

ప్రస్తుతం ఎంపిక చేయబడింది:

Yh 7: GMN

హైలైట్

షేర్ చేయి

కాపీ