Yh 11

Imfwa ya Lazalo

1Penze munthu muyakine, zina yake Lazalo, uyu enzolwala. Enze wa ku munzi wa Betaniya, kwawo kwa Maliya na mkwawo Malita. (2Maliya uyu ni wala ezoza Asikulu mafuta wonunkhila, nopukuta mendo ŵawo na sisi yake.) Lazalo enzolwala enze mlongosi wake. 3Lomba azilongosi ŵake ŵala etumizya munthu kwa Yesu kuyomuwuzya kuti, “Asikulu, wala wamutemwa olwala.”

4Pamene apo Yesu pecimvwa ivi elaŵila kuti, “Kulwala uko, kukapelelelini pa imfwa yayi koma vacitika teti kuti Mulungu acinzikiwe, nipo kuti Mwana wa Mulungu acinzikiwe cikomo ca ulwele wala.”

5Niye kuti Yesu enzotemwa Malita na msaza wake Maliya na mlongosi wawo Lazalo. 6Koma pecimvwa va ulwele, Yesu ecoma masiku aŵili pa malo peenze. 7Pa vuli pake ewuzya asambili ŵake kuti, “Tiyeni tilute soti ku Yudeya.”

8Asambili ŵake ŵala elaŵila kuti, “Labi, lombapano apa Ayuda enzopangwa kukutemani myala, lomba mukuti muluteko soti?”

9Yesu elaŵila kuti, “Kansi ni mwalalini mzuŵa patuwona luweme? Munthu akayenda mzuŵa, okumbulwalini, cikomo owona kuŵala kwa calo cala. 10Koma akayenda usiku, okumbulwa, cikomo aliye kuŵala kwala.”

11Pecicita tetyo, eŵawuzya kuti, “Lazalo, watutemwa, ali mtulo, koma nikuya kuti nikamuwushe mtulo mwake.”

12Pamene apo asambili ŵake elaŵila kuti, “Asikulu, keno walala tyala tulo, apole.” 13Ŵeve enzoyesa kuti olaŵila va tulo ngato–ngato, koma Yesu enzolaŵila va imfwa ya Lazalo.

14Lomba Yesu eŵawuzya mosafisila kuti, “Lazalo emwalila, 15koma nine wotemwa pakuti nenzekolini, kuti muzecetekele cendi mwa newo. Ivi vonse vuwamila mwewo. Tiyeni tiluteko.”

16Pamene apo Thomasi, woyitiwa “Mapasa#11:16 Mapasa mu Cigiliki niye kuti Didimo,” ewuzya asambili ayake kuti, “Tiyeni nase soti tilute nawo kuti tikafwele nawo pamo.”

Yesu niye owukisha ŵanthu noŵapa moyo

17Yesu pecifwika ku Betaniya, efwana Lazalo walala mu manda masiku anayi. 18Ku Betaniya kwenze kufupi na ku Yelusalemu, msenga wokwanila pafupi makilomita atatu. 19Ŵanthu anyinji enzeewela kwa Malita na Maliya kuzokanda matepo.

20Malita pecimvwa kuti Yesu akuza, eciyomucinguzyila. Koma Maliya enkhala mu ngʼanda. 21Lomba Malita ewuzya Yesu kuti, “Asikulu, kuti mwenze kuno, sembe mlongosi wangu aliyomwalile. 22Koma cukanga lomba, nuziŵa kuti Mulungu azeacite ciliconse camungasenge.”

23Yesu emuwuzya kuti, “Mlongosi wako azeawuke.”

24Malita elaŵila kuti, “Nuziŵa kuti azeawuke pakuzowuka ŵanthu kwa akufwa pa nsiku yosilizya.”

25Yesu emuwuzya kuti, “Owukisha ŵanthu kwa akufwa nipo soti woŵapa moyo ni newo. Munthu wocetekela mwa newo, cukanga afwe, azeaŵe na moyo. 26Nipo aliyense ali na moyo nocetekela mwa newo, azeafwelini mphela. Kansi ucetekela ivi?”

27Yeve elaŵila kuti, “Eee Asikulu, nucetekela kuti mwewo nimwe Mpulumushi Wolayizyiwa wala, Mwana wa Mulungu, wowamila kuwela pano pansi.”

Yesu olila

28Malita pecilaŵila ivi, eyita Maliya msaza wake pa seli nomuwuzya kuti, “Asambizyi awela, okuyita.” 29Maliya pecimvwa ivi, eyima mmangu–mmangu, nakuza kwa Yesu. (30Pamene apo niye kuti Yesu akaliyofwika ku munzi kwala, koma enzeakali pa malo pecikumana na Malita.) 31Ŵanthu enze mu ngʼanda kukosesha Maliya wala, peciwona kuti wayima mmangu–mmangu nofuma, emukonkha. Enzolingilila kuti akuya ku manda kuyolilila kwala.

32Maliya pecifwika penze Yesu, nomuwona, eliponesha pa mendo pake elaŵila kuti, “Asikulu, kuti mwenze kuno, sembe mlongosi wangu aliyomwalile.”

33Yesu peciwona kuti Maliya olila, nipo soti ŵanthu ewela naye nawo soti olila, ekalipa nipo evutika ngako mu mtima.

34Lomba eŵakonsha kuti, “Mwamuyika kuni?”

Ŵeve elaŵila kuti, “Asikulu, tiyeni mukawone.” 35Yesu etatika kulila.

36Pamene apo ŵanthu ŵala elaŵila kuti, “Wonani, enzomutemwa ngako.”

37Koma ayakine mwa ŵeve elaŵila kuti, “Munthu uyu ni walalini ewonesha mphofu? Sembe aliyotweshe kucitapo kanthu kuti Lazalo asamwalile?”

Yesu owusha Lazalo

38Yesu evutika soti mu mtima, nofwika ku manda enze nkhwema. Pa mulyango pake penze cimwala. 39Lomba elaŵila kuti, “Fumyamponi cimwala ico.”

Malita, mlongosi wa womwalila wala, emuwuzya kuti, “Pepani Asikulu, citanda catatika kale kununkha, pakuti calalamo masiku anayi.”

40Yesu emukonsha kuti, “Kansi niliyokuwuzye kuti ukacetekela uwone ulemelelo wa Mulungu?” 41Lomba ŵanthu efumya cimwala cala.

Yesu elolesha Kululu elaŵila kuti, “Atata, nukutembezyani kuti mwanimvwila. 42Nuziŵa kuti munimvwila nsita zonse. Koma nalaŵila ivi cikomo ca winji wa ŵanthu ali pano, kuti acetekele kuti ni mwewo mwinituma.”

43Pecicita tetyo elaŵila moŵilikizya kuti, “Lazalo, fuma!” 44Pamene apo munthu emwalila wala efuma, mendo na manja ŵake vili vomangiwa na nyula za malilo. Cinso cake cenze covungiwa na nyula. Yesu eŵawuzya kuti, “Mumangululeni, kuti aŵekuya.”

Kaupo kopangana kupaya Yesu

(Mt 26:1-5; Mk 14:1-2; Lk 22:1-2)

45Anyinji mwa ŵanthu ewela kwa Maliya, ewona vecicita Yesu, nipo ecetekela mwa yeve. 46Koma ayakine eluta kwa Afalisi, noŵawuzya vecicita Yesu. 47Pamene apo Akulu ŵa Ansembe eyita kaupo, nokonshana kuti, “Ticite tyani pamene apa, pakuti munthu uyu ocita vokanganisha vinyinji? 48Tikamulekelela teti, ŵanthu wonse acetekele mwa yeve, nipo Aroma akawele kuzoticenekela malo ŵasu atuŵa aŵa nipo soti mtundu wasu uyu.”

49Koma yumo mwa ŵeve, zina yake Kayafa, enze Mkulu wa Ansembe caka cala, eŵawuzya kuti, “Mwewo muziŵalini kanthu yayi. 50Ni ciweme kuti munthu yumo afwele ŵanthu wonse, mu malo mwakuti mtundu wasu wonse ucenekeke.” 51(Ngako–ngako aliyolaŵile ivi na nzelu za yeve yeka yayi. Koma pakuti enze Mkulu wa Ansembe caka ico, enenela kuti Yesu azeafwele mtundu wa Ayuda – 52osati kuzofwela mtundu tyala, koma soti kusonkhanisha pamo ŵana ŵa Mulungu emwazyikana.)

53Kutatikila nsiku yala, Akulu ŵa Ayuda etatika kupangana kuti amupaye. 54Ni cikomo cake Yesu enzoyendalini patuŵa pakati pa ŵanthu. Koma efumako nakuya ku calo cenze pafupi na cipululu, ku munzi uyakine zina yake Efulemu, nipo enze kwala pamo na asambili ŵake.

55Cisangalalo ca Pasaka cala cenze pafupi. Tetyo, ŵanthu anyinji ofumila ku minzi eluta ku Yelusalemu kuyocita mwambo wolituŵisha, Pasaka ikaliyotatika. 56Enzomusakila Yesu, nipo peciwungana mu Ngʼanda ya Mulungu enzokonshana kuti, “Kansi mwewo mulingilila tyani? Kuti awelelini ku cisangalalo kuno?” 57Koma Akulu ŵa Ansembe na Afalisi enze elamula kuti aliyense ŵatiaziŵe kwenze Yesu, aŵaziŵishe kuti akamukate.

ప్రస్తుతం ఎంపిక చేయబడింది:

Yh 11: GMN

హైలైట్

షేర్ చేయి

కాపీ