குணமாக்கும் கிறிஸ்துமாதிரி

இஸ்ரவேலின், ஜீவனுள்ள ஒன்றான மெய்த்தேவனுக்கும், எகிப்தியர் வழிபட்ட பலவிதமான பொய்யான தெய்வங்களுக்கும் இடையே நடந்த யுத்தம் தான் இந்த பத்து வாதைகளும் (யாத்திராகமம் 12:12; எண்ணாகமம் 33:4). 

“நானே உன் பரிகாரியாகிய கர்த்தர்” என்று சொல்லும்போது, எகிப்தின் வாதைகளை எதற்காக தேவன் அங்கு குறிப்பிடுகிறார் என்பதை நீங்கள் சுலபமாக புரிந்துகொள்ளும்படியாக, அந்த 10 வாதைகளையும் நான் உங்களுக்காக பின்வருமாறு எளிமையாக கொடுத்துள்ளேன். கர்த்தர் உங்களுக்கு காண்பிக்க விரும்பும் காரியங்களை நீங்கள் உங்கள் ஆவியில் வெளிப்பாடாக பெற்றுக்கொள்வீர்கள் என்றால், பிறகு எந்தவிதமான வியாதியின் அச்சுறுத்தலுக்கும் பயந்து வாழவோ அல்லது எந்தவொரு வியாதியும் உங்களுக்கு எதிராக வந்து உங்களை மேற்கொள்ளவோ கர்த்தர் விடவே மாட்டார். ஒருவேளை நீங்கள் இப்போது வியதிப்பட்டிருந்தால், இயேசுவின் நாமத்தில் சுகம் உங்கள் சரீரத்தில் வெளிப்படும் என்ற நிச்சயத்தோடு இருங்கள்.

கல்மழை, தவளைகள் போன்ற இயற்கையானவைகளை தேவன் பயன்படுத்தினாலும், இந்த வாதைகள் இயற்கைக்கு அப்பாற்பட்ட வாதைகள் என்பதை மறுக்க முடியாது. ஒவ்வொரு வாதையும் எப்போது உண்டாகும், எவ்வளவு பயங்கரமாய் இருக்கும், அவை எகிப்தியர் மீது மட்டும் தான் வரும் இஸ்ரவேலர் மீது வராது (நான்காவது வாதை முதற்கொண்டு) என்பதெல்லாம் நடப்பதற்கு முன்னரே அறிவிக்கப்படுவதின் மூலம் அந்த வாதைகள் அனைத்தும் இயற்கைக்கு அப்பாற்பட்டவை என்பது விளங்குகிறது. ஏறக்குறைய 9 மாத காலம் நடைபெற்ற இந்த 10 வாதைகள், எகிப்து தேசத்தையும் எகிப்து ஜனங்களையும் பாழ்கடித்து, உயிர்களுக்கும், இயற்கை வளங்களுக்கும் மாபெரும் சேதத்தை ஏற்படுத்தியது (சங்கீதம் 78:44-51; 105:26-38). வாதைகளின் உச்சகட்டமாக தலைச்சன் பிள்ளைகளை சங்கரித்ததின் மூலம், ஒடுக்கினவனின் பிடியை தேவன் நொறுக்கி, அடிமைத்தனத்திலிருந்த அவருடைய மக்களை, ஆச்சரியப்படத்தக்க விதத்தில் ஆஸ்தியோடும் ஆரோக்கியத்தோடும் புறப்படப் பண்ணினார்.

“அப்பொழுது அவர்களை வெள்ளியோடும் பொன்னோடும் புறப்படப்பண்ணினார்; அவர்கள் கோத்திரங்களில் பலவீனப்பட்டவன் ஒருவனும் இருந்ததில்லை” (சங்கீதம் 105:37).

இஸ்ரவேலின் உடன்படிக்கையின் தேவனை விசுவாசிக்கவும், அவருடைய வார்த்தைக்கு கீழ்ப்படியவும் மறுத்த மக்களுக்கு எதிராக இந்த வாதைகள் உண்டாயிற்று என்பதை நாம் கவனிக்க தவறக்கூடாது. தேவனை விசுவாசிக்க, அவருடைய வார்த்தைக்கு கீழ்ப்படிய மறுத்தவர்கள் தான் வாதிக்கப்பட்டார்கள். தேவ மனுஷனாகிய மோசே பேசின தேவனுடைய வார்த்தையை அவர்கள் உதாசினப்படுத்த எண்ணியவுடனே தேவகோபம் உடனடியாய் அவர்கள் மேல் இறங்கிற்று. ஆனால் தேவனை விசுவாசித்து, அவருடைய வார்த்தைக்கு கீழ்ப்படிய தெரிந்துகொண்ட ஒவ்வொருவரும் (எகிப்தியர் உட்பட) அழிவிலிருந்து காப்பாற்றப்பட்டார்கள் (யாத்திராகமம் 9:19-26).