Soma Biblia Kila Siku Novemba/2022Mfano

Twaona jinsi Yusufu alivyoendelea kufanya kazi yake kwa ustadi na uaminifu. Nafasi nzuri aliyopewa hakuitumia vibaya. Hakujipatia mali au mamlaka isiyo halali. Katika yote alimtii Farao ambaye alizidi kupata mali tele na nguvu nyingi kutokana na Yusufu alivyofana: Akamnunulia Farao nchi yote ya Misri ... nchi ikawa mali yake Farao (m.20). Hivyo Yusufu ni mfano mzuri kwa kila mtumishi katika serikali ya Tanzania au katika mashirika. Ni mfano wa imani safi, uaminifu na wa kujitoa kazini! Ndivyo Paulo anavyotuelekeza katika Efe 6:5-9 akiandika, Enyi watumwa, watiini wao walio bwana zenu kwa jinsi ya mwili, kwa hofu na kutetemeka, kwa unyofu wa moyo, kana kwamba ni kumtii Kristo; wala si kwa utumwa wa macho tu kama wajipendekazao kwa wanadamu bali kama watumwa wa Kristo, mkitenda yampendezayo Mungu kwa moyo; kwa nia njema kama kumtumikia Bwana wala si mwanadamu; mkijua ya kuwa kila neno jema alitendalo mtu atapewa lilo hilo na Bwana kwamba ni mtumwa au kwamba ni huru. Nanyi, akina bwana, watendeeni wao yayo hayo, mkiacha kuwaogofya, huku mkijua ya kuwa yeye aliye Bwana wao na wenu yuko mbinguni, wala kwake hakuna upendeleo.