Soma Biblia Kila Siku Novemba/2022Mfano

Raheli alikuwa amefariki mapema, kwa hiyo Yakobo alipata wana wawili tu kwake, Yusufu na Benyamini (m.7). Ila sasa wakawa wanne, maana Yakobo aliwafanya wana wa Yusufu kuwa wana wake yeye mwenyewe. Ndivyo anavyomwambia Yusufu katika m.5, Sasa wanao wawili uliozaliwa katika nchi ya Misri kabla sijaja kwako Misri ni watoto wangu, yaani, Efraimu na Manase watakuwa wangu, kama Reubeni na Simeoni. Hivyo taifa la Israeli likawa na makabila 13, Yusufu akigawanyika katika makabila mawili, yaani, Efraimu na Manase. Baraka ya Mungu kwao ilikuwa hasa kwamba wataongezeka kuwa wengi sana (m.16, Wawe wingi wa watu kati ya nchi). Na kweli, kwa pamoja wao wakawa wengi kuliko kabila lingine. Hizi ndizo jamaa za Manase; na waliohesabiwa kwao walikuwa ni hamsini na mbili elfu na mia saba; … hizi ndizo jamaa za wana wa Efraimu kama waliohesabiwa kwao, thelathini na mbili elfu na mia tano. Hao ndio wana wa Yusufu kwa jamaa zao (Hes 26:34 na 37)!