Soma Biblia Kila Siku Novemba/2022Mfano

Yusufu alifika mbele ya Farao pamoja na baba yake na baadhi ya ndugu zake. Alikuwa ameshawafundisha namna ya kumjibu Farao akisema, Itakuwa Farao atakapowaita, na kuwauliza, Kazi yenu ni nini? Semeni, Watumwa wako tumekuwa wachunga wanyama tangu ujana wetu, na hata leo, sisi, na baba zetu. Yusufu aliwaambia pia sababu ya kusema hivyo: Mpate kukaa katika nchi ya Gosheni (46:33-34). Yusufu alijitahidi kumpendeza Farao ili awatendee mema. Farao alimwuliza Israeli juu ya umri wake. Israeli akajibu, Siku za miaka ya kusafiri kwangu ni 130; siku za miaka ya maisha yangu zimekuwa chache, tena za taabu (m.9). Israeli alikuwa msafiri. Hakuona raha idumuyo. Alitamani nchi iliyo bora, yaani, ya mbinguni! Ni kama ilivyoandikwa katika Ebr 11:9-10: Alikaa ugenini katika ile nchi ya ahadi, kama katika nchi isiyo yake, akikaa katika hema pamoja na Isaka na Yakobo, warithi pamoja naye wa ahadi ile ile. Maana alikuwa akiutazamia mji wenye misingi, ambao mwenye kuubuni na kuujenga ni Mungu.