Soma Biblia Kila Siku Mei 2021Mfano

Neno hili latujulisha Ayubu alivyopokea jibu la Mungu kwa ombi lake: Nionyeshe sababu ya wewe kushindana nami (Ayu 10:2). Tunakumbushwa maneno ya hekima katika Warumi 9:19b-21: Ni nani ashindaye na kusudi lake [Mungu]? La! Sivyo, Ee binadamu; wewe u nani umjibuye Mungu? Je! Kitu kilichoumbwa kimwambie yeye aliyekiumba, Kwani kuniumba hivi? Au mfinyanzi je! Hana amri juu ya udongo, kwa fungu moja la udongo kuumba chombo kimoja kiwe cha heshima, na kimoja kiwe hakina heshima? Mwanadamu hana uwezo wa kumhoji Mungu kuhusu maamuzi yake. Mungu ndiye ajuaye kilicho bora na sahihi kwetu. Wajibu wetu ni kupokea kutoka kwake, kwa unyenyekevu na kicho. Hii haimaanishi kuwa Mungu ni baba wa imla (dikteta), la hasha. Isipokuwa katika ukuu na utakatifu wake anajua yote, na hasa yanayomfaa kila mtu.