Populära bibelverser från SAN MATEO 28

Dela

To bairi camaja nipetiri poari macanare yʉ ye quetire nare mʉja buio teñarã aágarã. Na quena yʉre ca-apiʉjarã na ãmaro ĩirã na mʉja buio teñarã aágarã. Na ca-apiʉjaro nare mʉja bautisagarã mani Pacʉ cʉ̃ ca-rotiro mena, yʉ, cʉ̃ Macʉ yʉ ca-rotiro mena, Dio Espíritu Santo cʉ̃ ca-rotiro mena. To bairo átiri nipetiro mʉjaare yʉ cá-áti rotiepere, “To bairona ája,” nare mʉja ĩi buio teñarã aágarã. To bairo mʉja cá-áto mʉja mena yʉ anicõa aninucugʉ ati ʉmʉrecóo ca-petiropʉ, jã ca-ĩiwĩ Jesú. To cõona ãa.

To bairo jã ca-ĩi tʉgooñari paʉna Jesú jã tʉacãna atí, oco bairo jã ca-ĩiwĩ: —Ati ʉmʉrecóo, ati yepa nipetiro ca-rotipaʉre yʉ cũumi Dio.

To bairi cãromia ca-tʉjʉra ejaricarãre oco bairo na ca-ĩiñupʉ ángel: —Uwiquẽja. Jesúre, na ca-papua jĩaricʉre macarã ejarã mʉja bairã, na ca-ĩiñupʉ. —Maami atore. Catí tunucoami, meere, “Yʉ catí tunugʉ,” mʉjaare cʉ̃ ca-ĩi buioricarore bairona. Adʉja. Cʉ̃re na ca-ñujo roca cũbata paʉre tʉjʉya, na ca-ĩiñupʉ.

To bairo na cá-áto oco bairo na ca-ĩiñupʉ Jesú: —Uwiquẽja. Yʉ yarãre oco bairo na ĩi buiorãja: “Galileapʉ aánaja. Topʉ Jesúre mʉja tʉjʉgarã,” na ĩi buiorãja. To bairo na cʉ̃ ca-ĩiro ca-buiora aájuparã na romiri.

To bairo na ca-ĩi buiorije apirã aperã cabʉcʉrã ca-rotirã nipetirãre na pii, na mena neñapo, jicãro mena camaja na ca-ĩi buiopere ca-wadapeniñuparã. To bairo camajare na ca-ĩi buiopere wadapeni yaparo Jesúre cʉ̃ na ca-rocabata paʉre ca-cotebatanare polisía majare oco bairo na ca-ĩiñuparã: —“Jesú ãnacʉ cʉ̃ buerã ca-ãnana ñamipʉ jã ca-canitoye atí, cʉ̃ rupaʉ ãnatore ne ruti aájupa,” na ĩi buiotoya camajare. To bairo na mʉja ca-ĩi buiorijere Ʉpaʉ Pilato cʉ̃ ca-queti apiata cʉ̃re jã wadapenigarã, mʉja ca-caniriquere queti apiri mʉjaare cʉ̃ tutiqueticõato ĩirã. To bairo na ĩi buio rotirã, niyerure na ca-wapayeyuparã, to bairo jeto camajare na ĩi buioya ĩirã, polisía majare na ca-ĩiñuparã sacerdote maja ʉparã jãa. To bairo na ca-ĩiro to bairo jeto camajare na ca-ĩi buiope wapa jee, sacerdote maja ʉparã nare na ca-ĩi rotirore bairona ca-ĩitoyuparã polisía camajare. To bairi yucʉ quenare ti wame polisía maja nare na ca-ĩitoriquere ame buionucuma judío maja yua.