HLIMI 35
35
Jakɔbe wí ma jɛ wa Sisyɛmu ni mà kɛri Betɛli ni
1Nyɛʔɛlɛ à liʔi yo Jakɔbe ma we mà yo: «Ma jɛ̀ ma kɛri Betɛli ni, ma ya glɛn wa ban, ma ya sraʔá farahaʔa fan wa Nyɛʔɛlɛ kan la li dá lì tyɛʔɛ má na nyiŋi ga na ma dáa fé ma lɛ Esawu na we»
2Jakɔbe wɔ̀ɔ kí yo wi go woo pè bɛfu ma, ní bee ní pe dá bo wí ni ge mà yo: «Ye klòʔo ke tɔɔ nyɛʔɛŋɛɛ yrigi ge naʔa yè kpafoʔo ni, ye yè yɛli, ye yè drere hru de, ní yè kpasyoro ní de. 3Wó bi jɛ bì gɛri Betɛli ni, pa mi yà sraʔá farahaʔa fan wa Nyɛʔɛlɛ la kan li dá na nyɛrimi loʔo me, wlɛʔɛ ga na na yɛʔɛ̀ ki dá gban ge. Liì li la li da ní mà po ná ni nɛ na tanʔala na la mí ma hanri ge.»
4À pe nyɛʔɛŋɛɛ kè bɛfu kan Jakɔbe ma gee ke dá bo wa pe kyɛrɛ ni mà pe katonŋoo plɛn gee ke dá bo wa pe naakpoʔo na ge. Jakɔbe wɔ̀ɔ pì bɛfu tru mà pi tón be tikpɔʔɔ ga lara kí nyɛ be Sisyɛmu tanla we. 5Ki kruʔu ma à pe jɛ mà kɛri. Nyɛʔɛlɛ à li fyara le kyɛ̀rɛ̀ da ni ti da pé kɛli ge, mà kan hɛn wɛ ìn dà gban bì ba Jakɔbe nì wi pii na be.
6Jakɔbe nì wi woo pè bɛfu ní bee pe dá bo wí ni à pe yâ je wa Lusi ni ga kí nyɛ Betɛli wa Kana klo ni le. 7Wɔ̀ɔ sraʔá farahaʔa fan be ki deʔe na mà yele kanʔa na mà naʔa yeri Ɛli Betɛli, mɛjɛn be ki deʔe kiì na Nyɛʔɛlɛ li dá lì tyɛʔɛ wí na, nyiŋi ga na wi dáa fe wi lɛ Esawu na we.
8Debora ŋa wi dá Hrebɛka jo we wɔ̀ɔ ku. À poo le wa Betɛli wi noʔoma deʔe na tikpɔʔɔ kà lara pé naʔa yeri Syɛni mà yele kanʔa na naʔa yeri konŋoo syɛni.
9Nyɛʔɛlɛ à li bâ nì mà lì tyɛʔɛ Jakɔbe na, ki ní wí ma jɛ wa kɔ Pada Aramu ni mà pan. Nyɛʔɛlɛ à li frɛmɛ pa wí na. 10Nyɛʔɛlɛ à luu po: «Ma yele liì li la pé na ma yeri Jakɔbe ge. Pe ìn bi da ma yeri Jakɔbe adi, di pé bi da ma yeri Israyɛli.»
Ki pomo na Nyɛʔɛlɛ lí mà ki yele kan le wi na mà noo yeri Israyɛli. 11Nyɛʔɛlɛ à liʔi yo wí kan mà yo: «Mì wi Nyɛʔɛlɛ la Sye wì bɛfu fɔlɔ we. Ma he, ma nyɛʔɛ ceŋge, ma krɛ̀ʔɛ̀ klo. Ee klòʔo fafaʔa bi nyini wa ma nî, à masaa fafaʔabaa bí ba nyini wa ma nî kpo. 12Klo la mi dá gan Abrahamu ma ní Isake nì, mí bi li kân má ma bì nì bì li kân nɛ ma kluʔu pii ma bee pé gà bo naʔa ma kruʔu ma ni we.»
13Ki kruʔu ma Nyɛʔɛlɛ à li jɛ be Jakɔbe tanla be deʔe ga na li dá yo wí ni ge. 14Jakɔbe wɔ̀ɔ ŋglɛnʔɛ kà yrìgí be ki deʔe na ga Nyɛʔɛlɛ li dá yo wí ni ge. Wi daʔa yrigí be mà sraʔá fara wa ki yugu na mà hùnmù woʔo na nɛ. 15Jakɔbe wɔ̀ɔ yele kan ki deʔe na ga Nyɛʔɛlɛ li dá yo wí ni mà naʔa yeri Betɛli.
Bɛnjamɛ wi heme kayoʔo ní, ní Hrasyɛli wi kùʔù kayoʔo ní
16À pe jɛ be Betɛli ni na sye. Pe gáa sye kloʔò ni, kpafolo à li yâ go cɛnri pé bi no wa Efrata na we. Hrasyɛli wɔ̀ɔ he. Wi heʔe àʔa po gbanʔa ceŋge. 17Lara ti gáa wi ya nyiŋi ga na mâ po wi heworo di ge, cɛlɛ ŋa wi dá bùu he wɔ̀ɔ wí po: «Mò gáa fyaʔa, mɛjɛn pyɔ ŋa má bi he wí nyɛ nabii.»
18Pɔɔ da gâ jɔlɔ mâ po nɛ wí bi gu ge, wɔ̀ɔ yele kan ki pyɔ na noo yeri Bɛni Oni.#35:18 Oni (Bɛni): Ki na po pé yo: Na cɔlɔʔɔ pyɔ. Di pyɔ wi to wɔ̀ɔ noo yeri Bɛnjamɛ.#35:18 Bɛnjamɛ: Na na loʔó Bɛnjamɛ, ki na po pé yo: pyɔ ŋa wí na klɛn kaligi na ge.
19Hrasyɛli wɔ̀ɔ ku, à poo le wa Efrata kloʔo na ŋa wí nyɛ Bɛtelɛmu we. 20Jakɔbe wɔ̀ɔ ŋglɛnʔɛ kà yrìgí be Hrasyɛli wi fanʔa na ge, ali alaʔa nî Hrasyɛli wi fanʔa ki ŋglɛnʔɛ kí nyɛ wa adi.
21Israyɛli wɔ̀ɔ kɛri mà yâ wi kpasyoro go kán wa deʔe ga na pé na yeri Migidali Edɛri ge. 22Nyiŋi ga na Israyɛli wi dá bo wa adi ki deʔe na, Hrubɛn wɔ̀ɔ Bila ta, cɛlɛ ŋa wi to wi dá gbe kpo ge. Di Israyɛli wɔ̀ɔ ki cɛn.
Jakɔbe wi pii pe dá bo kɛ̂ ma kɛ̀ syɛn. 23Leya wi pii pe yegee ké gee: Hrubɛn nì ŋa wi dá bo pikplɛɛ wà Jakɔbe wi pii ni be, Lefi nì, Juda nì, Isakari nì, Sabulon nì. 24Hrasyɛli wi pii pe yegee ké gee: Josɛfu nì, Bɛnjamɛ nì. 25Hrasyɛli wi tungɔɔ cɛlɛ Bila wi pii pe yegee ké gee: Dan nì, ní Nɛfitali nì. 26Leya wi tungɔɔ cɛlɛ Silipa wi pii pe yegee ké gee: Gade nì, ní Asɛri nì. Jakɔbe wi pii bee wi dá he wa Pada Aramu ni pee bɛ.
27Jakɔbe wɔ̀ɔ kɛri wi to Isake krugu Mamre ni ní Kirijati Ariba nì ga kí nyɛ Ebron, wa deʔe ga na Abrahamu nì Isake nì pe dá bo ge. 28Isake wi dá lɛ mà ta yɛʔɛ́ too nacɛrɛ. 29Wɔ̀ɔ ku mà kɛri wi woo krugu be. Wi dá lɛ ceŋge. Wi pii Esawu nì Jakɔbe nì à poo le.
Trenutno izabrano:
HLIMI 35: NLK10
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible Society of Côte d'Ivoire