HLIMI 34
34
Simenyo nì Lefi nì pé ma pe cɛpii wi fwɔʔɔ ton ŋa pe dá faʔara ge
1Leya wi dá picɛpii ŋa he Jakɔbe ma, á pe noo yeri Dina ge. Wi dá nyini mà kɛri bì yà ki klo li picɛɛ wele be. 2Klo fɔlɔ Amori ŋa Ɛfi kluʔu woo wi pyɔ Sisyɛmu wɔ̀ɔ wí nya mòo co fanŋa na mà syɛn wí ni mòo faʔara. 3Wi dihon wi dá bwɔ Dina na ceŋge ŋa Jakɔbe wi picɛ we. Picɛpii wi dɔɔ glán ceŋge. Wɔ̀ɔ gban mà yo wí ni wa wi dihon na we. 4Sisyɛmu wɔ̀ɔ kí yo wi to Amori ma mà yo: «Ma ki picɛpii ŋa kan na ma na cɔ.»
5Jakɔbe wi daʔa loʔó mâ yo wi dá wi picɛ Dina faʔara we, Ki ní wi najɛɛ pe kɛrí kere ni wi ajobo nì be. Jakɔbe wɔ̀ɔ pyeri fɔ à pe gâ jɛ wa kere ni mà pan.
6Sisyɛmu wi to Amori wɔ̀ɔ kɛri Jakɔbe krugu bì yà yo wí ni. 7Jakɔbe wi najɛɛ pe gâ jɛ wa kere ni mâ pan, à pe bâ ki kayoʔo loʔo ge. Ki da pe yá. Pe lama à mi gban pe na ceŋge, mɛjɛn Sisyɛmu wi dá kapekpɔʔɔ hanri wa Israyɛli woo ni be mâ Jakɔbe wi picɛ ta cɛlɛ, ga ki ìn dà yala kí hanri ge. 8Amori wɔ̀ɔ kí yo pé kan mà yo: «Na pyɔ Sisyɛmu wi dihon wí ma pwɔ yè picɛ na we. Mí na ye fɛn, yeʔe yaʔa, yoo kan wí ma wi po wi cɔ. 9Ye kpoʔolo wo nì teme na, yee yè picɛɛ kanʔa wo ma, yee wo woo kpin be kpo. 10Ye klɛn naʔa wo ni, wò klo li po yè wolo. Ye klɛn ye da yà wa, ye tra tà ta kpo ti krɛ̀ʔɛ̀ yè woro.»
11Sisyɛmu wɔ̀ɔ kí yo Dina wi to nì, ní wi lɛɛ ma be mà yo: «Yeʔe yaʔa, ye no ná na. Yraʔa o yraʔa ga yé bi nyɛli ná kan, pa miʔi kân ye ma. 12Ye cɛprɔʔɔ kpɔʔɔ na kân. Ye yrɛbɛ fafaʔa nyɛli ná kan kpo. Ga yé bi nyɛli ná kan, pa mi kì bɛfu hanri. Di yeʔe yaʔa, ye ki picɛpii ŋa kan na má na cɔ.»
13Jakɔbe wi najɛɛ à pe yo Sisyɛmu nì ticlimi na ní wi to Amori nì we, mɛjɛn Sisyɛmu wi dá pe cɛpii Dina faʔara we. 14À pe pé po: «Yraʔa kà gi wòo gban bìʔi hanri bì wò cɛpii kan naŋa wà ma ŋa wi ìn lege ge, mɛjɛn paʔa bo wo ma fɛrɛ ceŋge. 15Wó bi yere yè woʔo na, di fɔ kí ma yala ki po yè nabii pè bɛfu pe krɛʔɛ̀ pe lege. 16Ki nyiŋi na pa wo da wò picɛɛ kanʔa be ye ma, wòó bi da yè woo kpin be kpo. Nàʔa hanri ban, pa wo blɛn bì bo klotele woo. 17Di nà ye ìn ki ta bì loʔo wo ma bì ye kan pe ye lege, pa wo wò cɛpii kpe bì gɛri.»
18Amori nì, ní wi pyɔ Sisyɛmu nì à pe yere pe kayoro na de. 19Najɛpii wi ìn dà mo bìʔi hanri, mɛjɛn Jakɔbe wi picɛ wi dáa wi glanʔa. Wi dá bo kpangbanŋa mà toro wi to go woo pè bɛfu na. 20Amori nì, ní wi najɛ Sisyɛmu nì à pe kɛri pe kàʔà goyɛʔɛ na mà yáa ki nyu pe kàʔa hɛɛn ma be mà yo: 21«Ki hɛɛn bee be pé nyɛ nyimi na wo nì. Kí ma yala pe kò naʔa wò klo ni le. Pee pe ya wa we. Klo lí nyɛ kpangbanla pé kan. Wó bi da pe picɛɛ kpin be wò cɛɛ pee pé bi da wò woo kpin be kpo pe cɛɛ. 22Di ki hɛɛn pòo ki ta bì go naʔa wo nì wo krɛʔɛ klotele woo fɔ nà ki ìn bo wò nabii pé ma lege mà po nɛ pa pee pé ma lege pomo ma na ge. 23Pe ajobo nì, pe masaʔa nì, ní pe yrɛbɛ pì bɛfu puu bo wò wobo yo? Ga pé yo ye pan wo yèréʔé na jango pe kò naʔa wo nì.»
24Pè bɛfu bee pe dá ban be kàʔà goyɛʔɛ na, à pe na nuru Amori ma ní wi pyɔ Sisyɛmu nì. Nabii pè bɛfu à pe pè kân à pe pe lege, pè bɛfu bee pe dá ban be kàʔà goyɛʔɛ na. 25Ki wlɛʔɛ tanriwoʔo na, nyiŋi ga na pe da gâ bo pé na cɔlɔ ge, Jakɔbe wi najɛɛ syɛn, Simenyo nì, Lefi nì, bee Dina wi lɛɛ be, pè syɛnmu à pe mlaʔa kpegee kpe mà to kàʔa na nyiŋi ga na pe dáa ki honri mâ yo pe syɔ ge. À pe nabii pè bɛfu kpo pé ni. 26À pe Amori nì, wi pyɔ Sisyɛmuyee kpo be kpo mà Dina co wa Sisyɛmu wi go nî mà nyini mà kɛri.
27Jakɔbe wi najɛɛ pe dá do pe na mà pe kpó mà pe kàʔà foʔolo, mɛjɛn pe dá pe cɛpii faʔara we. 28Pe dá pe ajobo kpe be, pe niri nì, pe sofɛnŋɛɛ ní, kàʔà yrɛbɛ pì bɛfu ní, ní kere wobo ní be. 29À pe pe masaʔa kì bɛfu koli, pe pii ní, ní pe cɛɛ ní, ní yrɛbɛ pì bɛfu ní ba pi dá bo wa pe goro ni de.
30Jakɔbe wɔ̀ɔ kí yo Simenyo ma ní Lefi nì mà yo: «Yé ma lama wleleme na na mà na tonmo pɛn me ki klo la li hɛɛn ma be. Kana wòó ní Fɛrɛsi woo ní. Nabii cɛnri nyɛ ná ma kpo. Pee pé bi pè kpoʔolo ná na bì na kmo bì na cɔʔɔ mì nì na go ní ge.»
31À poo po: «Ki dá yala wi da wò cɛpii cun kyɛnrɛ hanrifɔlɔ yo?»
Trenutno izabrano:
HLIMI 34: NLK10
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible Society of Côte d'Ivoire