Juan 19
19
1Ta it atkayti, binwat ni Pilato, piyaripdasan ya na si Jesus.#19:1 Riripdas it mga Romano, may pirang naay i kulit it bakaꞌ nga ipiyagbaya-bayaꞌen. Kada sang naay, may magtatakin nga mga matarem. Maski magburus nay duguꞌ baw paglulbawan nay isi, basta ega paꞌ naꞌayaw i pagꞌayawun, sigi pang ripdas nira. Sumang kaꞌanu mabulugan nay pagpasakitan ngayti. 2Bawnga buwat it mga sundaluꞌ, naglikaw sirat dudugiyen, ka binwat nga kuruna. Bawnga ipiyakuruna it ki Jesus. Piyapakayan kanya it madarag nga gulamen nga subuk pakayan it adiꞌ. 3Bawnga magsubli-subliyen i mga sundaluꞌ ngaytit melep duꞌun it ki Jesus. Yanay pamagꞌampa-ampangen, magꞌaat, “Magayeng kadedelman it Adiꞌ it mga Judio!” Bawnga pagsariyen na nirat tampaling.
4Nanliꞌwan siꞌ si Pilato it sumaꞌup baw maat ya siꞌ it mga Judio ngayti, “Kayti, ipaꞌadap ku kanya it imyu isaꞌun maꞌrutan mi nga ega talagay magkaparagan ku nga kasalaꞌan ya.” 5Nanliꞌwan na si Jesus ngayti nga magkukuruna pat may dugi ngayting binwat baw magpapakay pat madarag ngayting gulamen. Bawnga maat ni Pilato it kanira, “Waytu na i taw ngaytu!”
6Pagkalteg it kanya it mga pagbayaꞌen ngaytit mga sasirduti baw mga guwardiya ngayti, igiyaꞌuy nira na nga magꞌaat, “Iransang kanya duꞌun it krus! Iransang kanya duꞌun it krus!”
Tubagen sira ni Pilato, “Tabanen mi na kanya! Baalaꞌ kamu paransang! Ka talagang egay magkaparagan ku nga kasalaꞌan ya.”
7Katubag i mga Judio ngayti, maat nira, “May mga kaꞌurdinan namen, baw uyun duꞌut kaꞌurdinan ngaytu, talagang bagay kanyang imatayen, ka magpangambuꞌ kanya nga Anak it Ampuꞌang Diyus.”
8Miyereꞌeret i iꞌlam ni Pilato, pagkagneg yat inampang ngayting itiꞌen it mga Judio. 9Piyabayaꞌ ya si Jesus it siminled siꞌ kanyat sumaꞌup baw iningkut ya siꞌ si Jesus ngayti. Maat ya, “Taga ari ka baytu?” Temed ega tiyubag kanya ni Jesus. 10Maat siꞌ ni Pilato, “Unuka daꞌku pagtubagen mu? Unu, ega magkaꞌrutan mu nga may pudir ku, mabwat ku ikaw nga iribri u iparansang duꞌun it krus?”
11Katubag si Jesus, maat ya, “Mabwat mu lamang bayan i atkayan sabap ibinggay it Ampuꞌang Diyus it imu i iyan nga pudir. Aypaꞌ subrang mabeꞌgat it kasalaꞌan mu i kasalaꞌan it iyan nagpaꞌalima ngaytut aken situt imu.”
12Pagkagneg ni Pilato kayti, subraꞌ yang pagpikiren nga in magꞌuꞌunu maparibri ya si Jesus. Temed nagsiggaꞌuy siꞌ i mga Judio ngayti nga magꞌaat, “In iparibri muy itung taw, siguradu nga daꞌka kampiꞌ it Impiradur. Simpri in siyung taw nga magpaꞌadiꞌ-adiꞌ, magpakikuntraꞌ kanya it Impiradur.”
13Pagkagneg ni Pilato kayti it inaat it mga Judio ngayti, ipiyataban ya na si Jesus duꞌun sit liꞌwan. Bawnga miyadung kanya duꞌun it araꞌdungan it gubirnadur in magpangukuman, duꞌut rugar nga pagpangaranat Batu nga Kadaꞌtagan, nga kat Hinebreong ampang, Gabata. 14Aldaw na nga pagpangaranat Pagsimpan, nga yay uꞌnang aldaw it Pistaꞌ ngaytit Tiyaꞌliban. Magꞌalas sais nay uras it kadedelman.#19:14 Magꞌaat i kat Ginirego, “kat ikaꞌnem nga uras”. In beteꞌ kat Romano nga takes-takesan it uras, paꞌaaten ngaytu, alas 6 it kadedelman. In kat Judio nga takes-takesan, kaꞌugtu na. Temed subuk ega mapakay i duꞌun paꞌ sirat ki Pilato it kaꞌugtu na sabap, maat ni Marcos (kapitulu 15:25), alas 9 it kadedelman i ipiyagransang it ki Jesus duꞌun it krus.
Maat ni Pilato it mga Judio ngayti, “Waytu nay Adiꞌ mi!”
15Gimnaꞌuy siꞌ i mga Judio ngayti, nga magꞌaat, “Ega nayan egnen! Imatayen nayan! Iransang yan duꞌun it krus!”
“Unu,” maat ni Pilato, “iparansang ku duꞌun it krus i Adiꞌ mi ngaytu?”
“Egay adiꞌ namen nga beken, in daꞌga Impiradur lamang,” maat siꞌ it mga pagbayaꞌen ngaytit sasirduti.
16Aypaꞌ piyaꞌuyunan na ni Pilato i kaꞌirgan it mga Judio ngayti, nga ipiyagꞌintergaꞌ ya na si Jesus duꞌun it mga rumansang nat kanya duꞌut krus.
Iriyansang na si Jesus duꞌun it krus
[Mateo 27:32-44; Marcos 15:21-32; Lucas 23:26-43]
Kiyarguꞌ nat mga sundaluꞌ si Jesus ngayti. 17Manliꞌwan si Jesus duꞌut siyudad ngayti, pagpapasaꞌnen ya nay krus ya. Tabanen na kanya duꞌun it rugar nga pagpangaranat Rugar it Barungutan. (Golgota in kat Hinebreo.) 18Pagꞌabut duꞌun, iriyansang na kanya duꞌun it krus. May duwang kataawan nga kadengan yat iriyansang. Piyatindegan, esay ayun duꞌut iwanan ya, esa ayun kat gibang ya. Ki Jesus ngayti i duꞌut tengaꞌ.
19Simnurat si Pilato it pirang tagaꞌ nga sugi-sugid. Ipiyapakeꞌpel ya duꞌun it krus. Maat i isiyurat ya ngayti, “Si Jesus nga taga Nazaret, nga Adiꞌ it mga Judio.” 20Giyamit nga ampang duꞌut surat ngayti, Hinebreo, Liyatin baw Ginirego. Dakel i mga Judio nga magkabasa kayti, sabap adeꞌdeng duꞌun it siyudad i riyansangan it ki Jesus ngayti. 21Aypaꞌ inaat it mga pagbayaꞌen ngaytit mga sasirduti si Pilato, “Ega atkayay isurat mu nga ‘Adiꞌ it mga Judio,’ in daꞌga isurat mu nga, ‘Inaat ya nga Adiꞌ kanya it mga Judio.’”
22Tumubag si Pilato, maat ya, “Ega nayan maꞌugad-ugad i isiyurat ku ngayan. Basta nakasurat, nakasurat na.”
23Iyan nakaransang nat mga sundaluꞌ si Jesus ngayti, inanu na niray mga pakayan ya, ka biyagiꞌ-bagiꞌ nat epat nga kasundaluꞌan. Pinsiꞌ nira na gasiꞌ i gulamen ni Jesus. Egay piyagtangkiran it itiꞌen. 24Namagrunding i mga sundaluꞌ ngayti, maat nira, “Ega rasiken tami i ituꞌun. Magpintuꞌan tami isaꞌun maꞌrutan ta in siyuy makasadili kaytu.” Nagꞌabut i atkayti ngayti isaꞌun matuman i magbebtang duꞌun it kasuratang ampang it Ampuꞌang Diyus, nga magꞌaat,
“Biyagiꞌ-bagiꞌ nira i pakayan ku, baw sangbat gasing pakayan ku, piyagpintuꞌanan nira.”#19:24 Awit 22:18.
Atkayti nga matuud i binwat it mga sundaluꞌ ngayti.
25Magtitindeg duꞌun it adeꞌdeng it krus i inaꞌ ni Jesus baw minan#19:25 Siguru minan ni Jesus si Salome ngayti nga asawa ni Zebedeo baw inaꞌ ni Juan nga tagsurat kaytu. Basaen i duꞌut Mateo 27:56 baw Marcos 15:40. ya nga sulsug nga babay it inaꞌ ya ngayti. Duꞌun gasiꞌ si Maria nga asawa ni Cleopas baw si Maria Magdalena. 26Pagkalteg ni Jesus it inaꞌ ya ngayti, baw pagmaꞌalen ya ngayting alagad ya nga magtitindeg duꞌun it umi-umid it inaꞌ ya, maat ya, “Iyan nay ipabetang mu nga anak mu.” 27Baw maat ya sit alagad ya ngayti, “Pakuꞌinaꞌen mu na kanya.” Aypaꞌ gimnaring duꞌun kayti, piyataꞌid nat alagad ngayti duꞌun it sadili yang balay.
Miyatay na si Jesus
[Mateo 27:45-56; Marcos 15:33-41; Lucas 23:44-49]
28Naꞌrutan na ni Jesus nga natuman nay muꞌsang bagay nga itiyaꞌeg it kanya. Bawnga, isaꞌun matuman i magbebtang duꞌut kasuratan, miyaat kanya, “Kuꞌinum aku.” 29May esang karung duꞌun nga betang ya maꞌagsem nga pagꞌimnun. Aypaꞌ buwat it mga sundaluꞌ, may itiyaꞌen nira nga maluꞌmit nga bagay duꞌut karung ngayti ka pasarepsepan. Bawnga tiyegbek it kayu-kayu ka idiyuꞌdul duꞌut baꞌbaꞌ ni Jesus. 30Pagkataꞌman ni Jesus it iti ngayti, miyampang kanya nga magꞌaat, “Natuman nay muꞌsa!” Pagkaꞌampang ya kayti, rimnungguk na kanya ka piyapalagsik ya nay kiyarurwa ya.
31Iting aldaw pagpangaranat Pagsimpan, ka sumunud nga aldaw, ega basta-bastang Aldaw it Kapaꞌnaan, nga yay kamataan it pistaꞌ ngayti. Ta, it ega ireg it mga Judio nga in patay nay mga iriyansang ngayti, pataꞌnan na lamang duꞌut krus in Aldaw nat Kapaꞌnaan, aypaꞌ ka inupakat nira si Pilato ngayti. Inangut nira nga pamariꞌen i mga aꞌay it mga magraransang ngayti duꞌut krus isaꞌun matay na sirat madaliꞌ baw awaꞌen na sira duꞌun. 32Ipiyalugut ni Pilato, aypaꞌ piyamariꞌ it mga sundaluꞌ i mga aꞌay it duwa ngayting kaꞌibaan ni Jesus. 33Temed pagꞌabut nira duꞌut ki Jesus, naltegan nira nga patay na, aypaꞌ ega na biyariꞌan nirat aꞌay. 34Yan nayan lamang i binwat it esang sundaluꞌ, sininduꞌrak yat besak i sang baling kilid ni Jesus. Magkagabut i besak, magburwak i duguꞌ baw danum. 35Iyan nakalteg kaytu i magpamatuud isaꞌun mamayaꞌ kamung banar. Matuud tuy ipagpamatuud ya ngaytu. Talagang magkaꞌrutan ya nga kamatuudan i ipagsugid ya ngaytu. 36Nagꞌabut tuy mga itu isaꞌun nga matuman i magbebtang duꞌun it kasuratan nga magꞌaat,
“Egay mabariꞌ nga maski sangbat nga tuꞌlang ya.”#19:36 Exodo 12:46, Awit 34:20.
37Baw magꞌaat pay duꞌut sang bagiꞌ nga kasuratan,
“Letganan nira kanya nga siyudyuk nira.”#19:37 Zacarias 12:10.
Ilimbeng si Jesus
[Mateo 27:57-61; Marcos 15:42-47; Lucas 23:50-56]
38Ega naꞌlay, may miyabut na duꞌut ki Pilato ngayti nga esang taw nga taga Arimatea, ngaran ya si Jose. Esa kanya gasiꞌ nga magpamayaꞌ it ki Jesus, temed ega magpabisik-bisik ka magꞌiꞌlam it kaꞌibaan yang mga Judio. Inangut ya nga pisiꞌen yay bilug ni Jesus ka ilbeng ya. Ipiyalugut ni Pilato ngayti it kanya, aypaꞌ inaduꞌun ya na ka pinsiꞌ. 39Inibaan kanya ni Nicodemo, nga magtataban it dakulang babangluun, subrat tulung puluꞌ nga kilu. Yanagayting taw i naꞌaduꞌut ki Jesus nga tiyaka-takaꞌ yay delemen.#19:39 Kapitulu 3:1-21. 40Pagkapisiꞌ nirat bilug ni Jesus, binwat nira, biyuꞌtungan it mga rambay nga pirmira nga abel. Magbuꞌtung magdaprus it babangluun, ka yay adat it mga Judio parabir ilbeng i miyatay. 41Duꞌut tepad it piyaransangan it ki Jesus, may kalulwakan. Duꞌun kayti may baꞌgung ipiyabwat nga lelbengan, nga piyalamunan nga batu. Areg lamang ti, ega pay nakalbeng duꞌun. 42Paribasay adeꞌdeng na talagay papuꞌun it Aldaw it Kapaꞌnaan#19:42 Kat mga Judio, pagsedep it aldaw i katupusan it aldaw. Aypaꞌ Aldaw it Kapaꞌnaan ngayti, garing it pagsedep it aldaw it Biyernes seked it pagsedep it aldaw it Sabado. Apu-apun it Biyernes ngayti i ipiyaglebeng nirat ki Jesus. baw adeꞌdeng i lelbengan ngayti, duꞌun nay limbengan nirat ki Jesus.
Zvasarudzwa nguva ino
Juan 19: TBWONT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 1992, Wycliffe Bible Translators, Inc. All rights reserved.